13 May 2007

حـــاجــة نـــقـــصـــانــى

.
9 التعليقات


نقصاني

احاسيس تهز كياني

نقصاني

فكر يغير افكاري

حرماني

الدنيا من احلامي

حرماني

وللاوهام سيباني

ملكاني

افكار هتضيعني

ملكاني

ماضي ملوعني

ملزماني

حكاوي بتألمني

ملزماني

مخاوف هتظلمني

مش شيفا

غير امثال مجروحه

مش شيفا

غير قلوب مدبوحه

مش شيفا

غير دموع محبوسه

مش شيفا

غير عقول محتاره

مش شيفا

غير اهات جباره

مش سمعا

غير خوف من رنة غاره

مش سمعا

غير صرخة سمكه في صناره

احساس غريب

بالجماد و الاشياء

احساس غريب

بجمال الفراق

احساس غريب

بعذاب حتي الحيوان

احساس غريب

بأني أجن انسان

سعات بكون

مش فهما كلامي

سعات كمان

مش بحس ألامي

سعات بقول

كفايني جنون

وسعات أحس

اني مش فهماني

فجأه

اسرح في الطيور

فجأه

ادعي يا رب اغور

وفجأه

احب مرايتي واقول

الله يا بدر البدور

يا تري

مجنونه انا؟

يا تري

علي فهم الحياه اودامي كام سنه؟

ولا اكون

اعقل العاقلين

فليوسفة جيلي

وانتم مش عارفين

ولا اكون

عن الفهم ابعد ما يكون

والخيال والوهم امتلكني بجنون

وع الشكوك والظنون

انام واقوم

لحسن اكون

من العجائب البشريه

ويتعمل عليه مليون نظريه

واللي يقول دي فضائيه

واللي يقول دي مش انسيه

لأ لأ

انا مش جنية ولا فضائيه

انا روح ادبحت علي ايد البشريه

انا روح تايها ما بين السما و الارض

عايزه اجيب حقي

بس مش عارفه اظلم حد

انا روح خفيه

عيشا بين جروحكم

انا روح خفيه

بتتعلم من عذابكم

انا روح خفيه

في مراية كل بنت

انا روح خفيه

بالغباء البشري امنت

وعشان انا روح خفيه

ومعاكم عشت الفرح والقاسيه

تهت

مابقتش عرفا انا فين

في مراية انهي بنت

في قلب مين سكنت

من انهي عيون دمعت

تهت

فا خفت وبعدت

بس رجعت

ويارتني ما رجعت


.
.


(منقول لان الكلام حساه اوى وللاسف ماعرفش بتاع مين)

readmore »»

01 May 2007

تـــــاجـــــات

.
2 التعليقات

التاجات المرة دى بقى
جيالى من ميرو وهوبا وميويا
التلاتة مرة واحدة
ظبطونى تاجات بصراحة
ربنا يسامحهم بقى
اقول خمس حاجات محدش يعرفها عنى؟
1.... ناس كتير اول ما تكلمنى ممكن يقولوا عليا مغرورة او طريقة كلامى رخمة
بس انا صعب اخد على الناس بسرعة ممكن مع الوقت لكن من اول مرة بتبقى صعبة شوية
والموضوع دة بيخلينى اخسر ناس كتير من قبل ما يعرفونى كويس
2... انا عصبية جدا جدا وفى نفس الوقت باردة جدا
يعنى ممكن اعصب اللى قدامى بسهولة جدا وانا باردة اوى وماحدش يقدر يطلعنى غلطانة
وفى نفس الوقت ممكن بسهولة اوى وبكلمة واحدة اتعصب جداااااا
الموضوع بيرجع اولا واخيرا للطريقة اللى حد يعصبنى بيها
3 ... بتمر عليا اوقات صعبة اوى فى حياتى وظروف معينة وعمرى ما حد بيشوف دمعتى وناس بتفكر ان قلبى جامد اوى للدرجة دى بس بكون من جوايا بتألم اوى لان انا عمرى ما بقدر اعبر عن اللى جوايا صح ومش مشاعر الحزن بس لكن اى حاجة جوايا مش بعرف اعبر عنها صح ودة عاملى مشاكل كتير
4 .... انا صعب اوى اوى اثق فى حد بسهولة ممكن اتكلم مع اى حد ويحس انى بثق فية لكن العكس الصح
ولو وثقت فى حد وحصل موقف ولو صغير شككنى فى الثقة تلقائى الثقة دى بتتهزر من جوايا
5 ..... نظرتى الاولى فى الناس دايما بتكون صح مش عارفة لية رغم انى مش عندى خبرة كبيرة فى الحياة
بس جربتها كتير اوى الحكاية دى
(((السؤال اهو يا ميرو برائة انا كدة )))

اسم مدونتك؟
Magnonet_fadl

لماذا اخترته...وماهي نيتك من وراء اختياره؟
لانى بحب فضل شاكر بطريقة فظيعة وهو بيمثلى حاجة كبيرة اوى فى حياتى
واسمى فى اى حاجة بيكون مجنونة فضل


هل فكرت في اقفال مدونتك ... والسبب؟
بصراحة لا مش فكرت

صورتك في المدونه... رمزيتها؟
مفيش صورة

لماذا دخلت عالم التدوين من الاساس؟
انا ماكنتش اعرف الموضوع دة
بس ميرو قالتلى علية وشوفت البلوج بتاعها وبتاع ميويا
وعاجبتنى الفكرة يعنى هاقدر افضفض شوية واقول اللى جوايا

احلي جمله قيلت لك في وصف مدونتك؟
عادى اللى شافوها قالولى كويسة مش اكتر من كدة

التعليقات بالنسبه لك اهميتها؟
قبل كدة مش كنت بهتم بس مع الوقت بقيت بحب اشوف تعليقات

احلي بوست كتبته ..ضع لينك..ثم اذكر لماذا؟
مفيش بوست معين وانا مش كاتبة كتير بس كلهم حاباهم

افضل مدونه قرأتها؟
كل اللى شوفتهم لحد دلوقتى عاجبونى اوى

افضل بوست قراته؟
كان بوست بتاع ولد بيتكلم عن حبيبتة اللى ماتت والبنت كان اسمها روان
البوست دة بجد أثر فيا اوى وعاجبنى موت

حد قل ادبه قبل كده في تعليق ..ايه رد فعلك؟
لا مفيش وماعتقدش ان فى مبرر يدى الحق لحد يقل ادبة

اسوأ مدونه وبوست؟
مش شوفت بصراحة لحد دلوقتى

اسئله خاصه
هيحصل ايه لايميلك لما تموتي؟
اكيد هيموت زى ما انا هاموت

اديتي الباسورد لحد قبل كده؟
اة فعلا اديتة لحد

كانت ايه طبيبعه علاقتك بيه؟
كان الانسان المرتبطة بية
وكمان لصاحبيتى الانتيم واختى

اسمك؟
دينا

المشهور بيه وسط اصحابك؟
دودو او دندونة او دوندون

عمرك؟
عندى 19 سنة و4 شهور وكام يوم كدة

شهر برجك؟
انا 2\12
برج القوس

مجال درستي؟
بدرس فى كلية الحقوق

شخصيتك نوعها ايه؟
عصبية وعنيدة وشكاكة واوقات طيبة وكتومة جدا واوقات مجنونة

السفر بالنسبه لك؟
تجديد بحس انى بعيش حياة تانية غير حياتى اللى اتعودت عليها كل يوم

وقت فراغك بتعملي فيه ايه؟
تقريبا بقضية كلة على النت

الاكله المفضله؟
الفراخ والجمبرى واى اكل تيك اواى

الصفات اللي اخدتها من بابا؟
ولا حاجة خالص

الصفات اللي اخدتها من ماما؟
كل حاجة تقريبا ماعدا الشكل
عصبيتها وعندها وعدم ثقتها فى الناس ونظرتها الاولى فى الناس دايما صح انا زيها فى كل دة
وتقريبا زيها فى كل حاجة


اكتر ست حاجات بتكرهها؟
بكرة الظلم اوى
بكرة رامى صبرى بغباء
وبكرة شيرين عبد الوهاب بغباء اكتر واكتر
بكرة الضعف
بكرة القسوة وان حد يجرحنى
بكرة ان حد يستغل نقطة ضعفى


اكتر ست حاجات بتحبها؟
بحب ماما
بحب جدتى اوى
بعشق فضل طبعا
بحب لبنان
بحب الشيكولاتة
بحب اقعد على النت


الشغل بالنسبه لك؟
الشغل دة كيان تانى
عالم بثبت فية نفسى وياما احقق شخصيتى فية ياما مش احققها اى كان نوع الشغل المهم اثبثت وجودى فية

الانترنت بالنسبه لك؟
النت دة اقرب صديق ليا بجد دلوقتى
مش بعمل حاجة غير انى دايما على النت ايا كان اللى بعملة على النت بس المهم انة يكون موجود
اول حاجة بلجأ ليها فى اى ظرف من ظروف حياتى اللى بتحصلى
وتقريبا كل اصحابى واقرب اصحاب ليا حاليا اعرفهم من النت عشان كدة بحبة اوى


هل كنت طالب شاطر في المدرسه؟
اة الحمد الله كنت شاطرة
بس لحد ما دخلت الكلية والموضوع اتشقلب خالص والله
ولا بقيت قادرة افهم حاجة ولا بقيت قادرة اذاكر حاجة
دة انا لو بصطنع الغباء مش هبقى كدة


ايه اكتر ماده حبيتها في المدرسه والكليه؟
بموووووووووووووووت فى حاجة اسمها فلسفة
وانا فى ثانوى ماكنتش بذاكر غيرها
وكنت بتمنى اكمل دراسة فيها فى الكلية
وكمان كنت بحب العلوم اوى
وفى الكلية حبيت مادة اسمها علم الاجرام والعقاب كانت مادة لذيذة اوى


ايه اكتر ماده كرهتها في المدرسه والكليه؟
الرياضيات عمرى ما حبتها
مادة رخمة اوى ومهما حاولت افهمها مش بقدر وخصوصا الجبر ولا بفهم فية اى حاجة فى اى حاجة
انما الهندسة كنت ماشية فيها شوية يعنى


كنت عايزه تطلعي ايه وانت صغنن؟
انا بقى كان تفكيرى غريب جدااااااااا بجد
لما كنت صغيرة يعنى ابتدائى اولة اعدادى كدة كنت نفسى ادخل شرطة اشمعنا مش عارفة بس هو كدة وخلاص
لما كبرت شوية(اعدادية يعنى) كنت نفسى ادخل كلية علوم واكمل فى مجال معين فية كنت حاباة واطلع دكتورة تحاليل اشمعنا بردو مش عارف
لما كبرت شويتين بقى (ثانوي يعنى)كنت عايزة ادخل كلية اداب قسم فلسقة او علم نفس واطلع محللة نفسية
اشمعنا بردو كالعادة ولا اعرف
وفى النهاية مصيرى غير كل دول خالص


SECTION 1 - Last 1s?1. last beverage?
شاى

2.last phone call
ريهام صاحبيتى

3.last instant message?
من انتيمى هيثم

4.last cd played?
تامر حسنى .... بنت الاية

last time you cried?
النهاردة

6.last text message?
بقالى كتير مش بستقبل رسايل خالص

Section 2 - Have You Evers1. dated someone twice؟
لا

been cheated on?
لا

kissed someone & regretted it?
لا

lost someone special?
جدى الله يرحمة

5. been depressed?
اة كتير اوى

6. been drunk and threw up?
لا

Section 3 - List 3 Favorite Colors
البينك
السماوى
الاسود


Section 4 -This month have you Made a new friend?
اة

2. Fallen out of love?
اة

3. Laughed until you cried?
اوقات فعلا وخصوصا مع سارة او هيثم اصحابى

4.Met someone who changed your life?
التغير للاسواء اة قابلت انما للاحسن لسة

5. Found out who your true friends were?
يمكن الاصدقاء الحقيقين مش كتير اليومين دول
او انا مش قابلت منهم كتير
بس اكيد مع الوقت بكتشف مين الصديق اللى بجد ومين اللى مش يستحق الصداقة

6. Is there something you want to tell someone?
لا مفيش

7. Would you kiss anyone on your top friends?
اة طبعا عادى يعنى .....اشمعنا..!!؟؟


8. How many people on your top friends do you know in real life?
اتنين بس فى الحقيقة

9. How many kids do you want to have?
اتنين ان شاء الله ....الحان وايهم

10. Do you have any pets?
كان عندنا عصافير زمان بس ماتوا

11. Do you wanna change your name?
اوقات اة بحس انى عايزة اغيرة كان نفسى يبقى اسمى الحان بس بحب اسمى يعنى

12. What did you do for your last birthday?
احتفلت فى البيت مع اصحابى واهلى وبس

13. What time did you wake up today?
الساعة 1 الظهر

14.What were you doing at midnight last night?
كنت على النت بنزل حاجات

15. Name something you CANNOT wait for?
انى اخلص دراسة

16. Last time you saw your father?
من شوية

17. What is one thing you wish you could change about your life?
اهو اى حاجة تتغير فى حياتى وخلاص بس المهم تخليها للاحسن دة اللى يهمنى بس

18.What are you listening to right now?
اغنية المفروض بتاعت هانى شاكر

20. Have you ever talked about someone behind their back?
مش من وراهم بالمعنى الوحش يعنى
بس اة اكيد بجيب سيرة حد وهو مش موجود بس اكيد بطريقة كويسة


21.What’s the last piece of clothing you borrowed from anyone?
لا انا مش باخد هدوم من حد

22.Who’s getting on your nerves right now?
حد من اصحابى عمل حاجة ضايقتنى ومنرفزانى طول اليوم

Most visited webpage?
منتدى نجوم

24. Coke or Pepsi
Pepsi

25. Mac or PC?
PC

so to whom i will send the tag ??????!
انا هابعت التاج لبادو
ميرسى اوى ليكى يا ميرو انتى وهبوبا وميويا ان انتم بعتولى التاجات دى
وكل تاج وانتم طيبين

readmore »»

10 April 2007

حاجة تكسف بجد يعنى

.
4 التعليقات


خلتنى كل ما اقابل حد
افكر ازاى اوصلة
انك ما تفرقش معايا
وقلبى فاق ما اللى حصلة
بيحلفونى وبحلف
اصل الحقيقة بتجرحنى
بقى حبى ليك حاجة تكسف
بكدب وربنا يسامحنى
وانا المظلومة فى دة كلة
انا المظلومة فى دة كلة

على ناس كتير انا ياما صعب
وخلاص كفاية مفيش داعى
اشيل الناس لية همومى
ولية يحسوا باوجاعى
بقوا يسالونى اتكبر دى
حكاية خسايرها خفيفة
وعشان مفيش حد يقدر
مابقتش حابة ابقى ضعيفة
وانا المظلومة فى دة كلة
وانا المظلومة فى دة كلة

readmore »»

06 April 2007

الــــتــــــاج

.
6 التعليقات

بقالى فترة طويلة اوى مش كتبت حاجة وكويس انة جة التاج من مى عشان ارجع اكتب تانى

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها؟؟
بصراحة يمكن يكون ردى زى كتييير اوى من الناس اللى ردت على نفس السؤال
كانت هوايتى لحد السنة اللى فاتت ومن وانا صغيرة القراءة
وكنت بجد بحب اقراء بجنون واحب اقراء الحاجات الغريبة اللى تشد
ويمكن كانت دى هوايتى اللى بحبها وافضل انى مش اخرج وافضل قاعدة فى البيت اقراء
لحد بقى مادخل البتاع اللى اسمة كمبيوترومعاة النت بيتنا
وعينك ما تشوف الا النور
ولا بقوم من علية واساسى مفيش مذاكرة
ماما اتخنقت منى خلاص
وكمان اختى قربت تقتلنى عشان استوليت علية بطريقة تخنق
لدرجة ان انا اوقات بضايق من نفسى
لانى مش بحب اتعلق بحاجة بالطريقة دى
لكن ارجع واقول ان تعلقى بالكومبيوتر والنت دة عشان الفراغ الفظيع اللى انا عيشاة
اهو حاجة بتسلينى وخلاص
ميرسى يا ميويا على التاج
ومش عارفة ادية لمين

readmore »»

11 March 2007

مــش مــوجــود

.
0 التعليقات


مش موجود اللى يضيعنى
ويرمينى فى الحب
مش موجود اللى يلوعنى
وياخد منى القلب
خليك عنى بعيد
لعبك مش هيفيد
انا قلبى حديد ما يخافش من الحب
ابـــــــــدا
انا حلوة وعارفة حالى انا اقوى من الليالى
ياما قبلك ناس حبوا يجربوا
شربوا مر الكاس ولسة بيشربوا
خليك عنى بعيد
لعبك مش هيفيد
انا قلبى حديد ما يخافش من الحب
ابــــــــــــــــــــــدا

readmore »»

01 March 2007

لية فكرت اعمل البلوج؟؟

.
2 التعليقات


لية بقى فكرت اعمل البلوج؟؟

اولا فكرتة عاجبتنى اوى
وثانيا حسيت كدة انى بتكلم مع نفسى
يعنى كل اللى جوايا ممكن اطلعة هنا
من غير ما حد يعدل على كلامى والا يعترض علية
بتكلم بحريتى اوى بمعنى اصح انا وصدى صوتى فى البلوج
**
انا مش عملت البلوج دة عشان اورية لحد ويتفرج علية
عملتة عشان انا اشوفة اتكلم شوية هنا لو مالقتش حد يسمعنى
**
اللى خلانى اكتب كدة ان حد اعرفة استهتر اوى بالبلوج بتاعى لما شافة
وقتها حسيت انى اتخنقت اوى اوى
وحسيت انة بيقلل من تفكيرى جدا
لكن بردو انا مقتنعة انى مبسوطة اوى بالبلوج وفكرتة عجبانى
لانى حسيت انى هاعبر فية عن نفسى شوية
وانا فعلا محتاجة حاجة تعبر عنى

readmore »»

ياترى بكرة غير النهاردة؟؟

.
0 التعليقات

كنت مفكرة ان بكرة مخبيلى حاجة كويسة
طلع بكرة دة العن من النهاردة
بقيت بجد حاسة انى ناوية ارتكب جريمة اهو يمكن دة اللى يطلع اختلاف فى حياتى
طبعا عبيطة انا
بس حقيقى نفسى فى حاجة مختلفة
يعنى يحصل حاجة فى حياتى غير متوقعة ابدا
بس لازم تكون كويسة يعنى مش وحشة عشان انا مش ناقصة
لان فترة طويلة اوى اوى عدت فى حياتى فيها حاجات كتير تضايق
والفترة دى مستمرة
بحلم انها تنتهى
ومش هتنتهى الا لما حاجة تحصل غريبة وجديدة وقبل كل دة تكون تفرحنى
وانا منتظرة الحاجة دى

readmore »»