31 December 2009

فى ستيييين .... سلامه

.
5 التعليقات



مستريحه جداااااا ان السنادى خلصت
لانى شايفاها سنه كئيبه اوى من اولها لاخرها
مافيهاش حاجه كويسه الا تخرجى اليتيم اللى مافرحتش بيه
بس الحمد الله انى خلصت الكليه الهباب دى وانا بكامل قوايا العقليه
(ولو انى بقيت اشك فى الحكايه دى)
لكن مضايقه انى مكتوب فى شهاتى دفعه 2009
لانى شايفاها سنه مش حسباها فى عمرى
شايفه انها مش عدت عليا اصلا غير بمشاكلها بس

وحاسه انى لسه عندى 21 سنه
السنه الزياده دى هتبرع بيها لاى جمعيه خيريه
او اللى عايزها هافتحله باب تقديم الطلب ويتفضلها والله ما تغلى على حد

المهم انها خلصت وخدت الشر وراحت
وفى ستييييين ... يلا هاجى على نفسى واقول سلامه


اهلى
انتوا وبس محور حياتى
حياتى من غيركم فاضيه اوى ولوحدى اوى
انا من غيركم ولا حاجه

لكل اللى الناس اللى خرجت من حياتى ومن تفكيرى السنادى
حياتى احسن من غيركم
وعلمتونى كتير اوووى

لكل الناس اللى دخلت حياتى
....
ولا حاجه لان مفيش حد جديد دخل فى حياتى

لكل الناس اللى كانت ومازالت ويارب تفضل موجوده فى حياتى
وكل اصحابى اللى كانوا فعلا اصحابى بجد
حياتى احسن بيكم
وساعدتونى اعدى حاجات كتير من غير ما تحسوا ولا تقصدوا
وخليتوا ايام فى حياتى احلى بكتير
ربنا يخليكم ليا

اما انت
you are special one for me
خليك عارف الجمله دى كويس اووى
اه اوقات بتضايقنى واوقات بترخم عليا
وانا اوقات بضايقك واوقات برخم عليك
بس ده مايمنعش انى كنت ومازلت وهافضل
شايفاك اهم واجمل شخص عدى عليا فى حياتى
من فتره طويله اوى ماقابلتش حد بيفهمنى زيك
وقت حزنى كنت اول حد جنبى
وقت فرحى بتكون اول حد معايا لانك فى الغالب بتبقى سبب الفرحه دى
لو فى ضحكه اترسمت على وشى فا انت اكيد سبب فيها
ولو يوم نمت وانا مرتاحه نفسياً فا انت اكيد سبب فى ده
مش شايفه انى معاك بضيع اى يوم ومش طالبه ابدا منك اكتر من كده
ليه بقى بقولك كل ده؟!
يمكن لانى مش عارفه اقولهولك قدامك
ويمكن لانى مش عايزه اوصل معنى اكتر من اللى بقوله ده
ويمكن لانى مش عايزه احس ان فى قلق ممكن يحصل لو اتكلمت
ويمكن لانى عارفه انك الوحيد اللى هتفهم انا قصدى ايه
اسفه لو كنت ضايقتك فى يوم بقصد او من غير قصد
اسفه لو كنت ضايقت اى حد بقصد او من غير قصد
عايزه أبدا سنه جديده مع كل الاشخاص اللى فى حياتى
اسفه انى فى يوم كنت ضعيفه او ماكنتش أد اى حاجه بتمر عليا
اسفه انى فى يوم حسيت بأحباط
واسفه انى مش متابعه المدونه زى الاول
ولا حتى بشوف باقى المدونات

مش بتمنى اى حاجه
غير ان الايام الجايه تبقى احسن من اى ايام فاتت
&
Happy New Year 2 all

readmore »»

11 December 2009

ياااارب

.
6 التعليقات



تعبت
تعبت اوى
مش مصدقه
معقول؟!!
سنه بحالها مفيهاش يوم حلو
مفيهاش خبر واحد كويس
مفيهاش يوم ضحكت فيه من قلبى
مفيهاش يوم قولت بصوت عالى انا مبسوطه
مفيهاش يوم حسيت انى عشته بجد
واللى انا فيه ده مش عدم رضا
بالعكس
ده اقصى مراحل الرضا
لانى لو ماكنتش راضيه كنت اتجننت
اه فى ناس كتير حالهم اسوء منى
بس يمكن انا بقيت ضعيفه؟
اه ضعيفه
او بنكسر بسرعه؟
اه بنكسر بسرعه
ومابقتش قادره اكون اقوى من كده
وماعنديش حاجه غير انى اقول
ياااارب
فرجك قريب

readmore »»

20 November 2009

ليه بيحصل كده؟!!!!؟

.
2 التعليقات



الموضوع بقى اكبر بكتير من انه يكون كوره وناس بتشجع بلادها
الموضوع فى حاجات تانيه مش قادره افهمها
شايفه قدامى كره وحقد فظيع لينا
وايه سببه ؟ ده اللى مش قادره افهمه
هو مش المفروض بردو اننا بلاد عربيه زى بعض
اومال ايه اللى بيحصل ده
صراحه اول ما خسرنا
كنت مضايقه وده اللى استغربتله لانى اصلا مابحبش الكوره
بس الفكره ماكنتش فى دماغى كوره
الفكره ان هما كده هيبقوا شايفين انهم انتصروا علينا
لانهم واخدين الموضوع حرب
وخسارتنا دى هتخلى كلامهم يكتر
لانهم من غير خساره كانوا بيقولوا كسوبنا اتنين صفر فى اول ماتش
ده على اساس انهم جايين ومتوقعين ياخدوا 6 صفر تقريبا
ده غير قله الادب اللى كانت بتنزل فى جرايدهم
بس اللى حصل فى السودان ده بعيداُ تماما عن اى خساره ومكسب واى كوره وتشجيع
شايفه حاجات كتير بتحصل مش قادره اصدقها
يمكن لو بينا وبين اى دوله اجنبيه كنت هاصدقها
لكن بلد زينا زيهم
المفروض ان احنا فى جانب واحد مع بعض!
طب ازاى ؟!!!؟

حاسه ان الماتش ده كان القشه اللى كسرت ظهر البعير زى ما بيقولوا
حاسه ان الحقد اللى جواهم ده من زمان
رغم ان بيتهيالى مفيش اى ازمات تذكر حصلت بين مصر والجزائر قبل كده
معقول يعنى يكون كل ده من سنين جواهم وظهر دلوقتى بالذات
مش قادره انسا ماتش الامم الافريقيه اللى فات لما كسبنا
وبنت جزائريه اعرفها باركتلى وكانت مبسوطه وبتقول انا حاسه كأننا احنا اللى فزنا
ودلوقتى عماله تتريق وتهزق فى المصريين
طب منين كنتى مبسوطه بينا ومنين دلوقتى بتهزقى فينا!!

اللى حصل فى السودان ده وضرب المصريين و ناس معروفه فى الفن والرياضه
ماينفعش يتعدى بالساهل
عشان ده قبل ما يكون بيكسر كرامه الناس دى
فا هو بيكسر كرامتنا احنا كمصريين
لان ببساطه كده بلادنا مش قادره تحمينا من ناس همجيه زى دى
كلام كتير اووووووى جوايا يمكن مافكرتش اقوله من اول ما كل ده حصل
بس كل واحد سواء كان فى الماتش او كان قاعد فى بيته بيتفرج وعرف اللى حصل
شاف انه اتهان واتضرب زى الناس اللى اضربت بالظبط
بيتهيالى الناس المصريين اللى راحت السودان دى لا اذنبت ولا كفرت لما قالت تشجع بلادها

اللى مضايقنى بجد
لما تشوفنا بلد زى اسرائيل هيقولوا علينا ايه
ده يا فرحتهم فينا وبصراحه حقهم واحنا بنديلهم مشاكلنا وضعفنا وهزيمتنا على طبق من فضه
انا مش من انصار نظريه المؤامره فى حالات كتير
بس اللى بيحصل ده شئ غير طبيعى
شئ بيخلى فى دماغ كل واحد فينا علامه استفهام كبيره اوى
لما احنا بنعمل فى بعض كده غيرنا هيعمل فينا ايه!!

بضايق اوى لما اشوف صور لعلم الجزائرى ومرسوم عليها جزمه او علامه غلط
بقينا نعامل علامهم على انه علم اسرائيل
دى حاجه تحزن بجد لما الامور توصل بين دولتين عربيتين لكده
الغريبه ان فى ناس بتقول مش شعب الجزائر كله كده
هتقول ربعه كويس؟ نفسى اشوف واحد يوحد ربه من الربع ده ويطلع يقول انا مش مع اللى عملوه
ده حتى الجاليات العربيه اللى فيهم جزائريين فى دول تانيه بردوا بيضربوا المصريين اللى موجودين معاهم
والاغرب ان بالرغم من كل اللى حصل مفيش مسئول واحد من الجزائر يفكر يقدم اعتزار رسمى لمصر على اللى حصل

مش عارفه اتكلم عن اللى عبد الناصر عمله مع الثوره الجزائريه و العدوان الثلاثى اللى كان جزء منه بسببهم
والا اتكلم عن شركات وفلوس مصريين كتير اللى مشغله نسبه كبيره من اقتصاد الجزائر
والا اتكلم عن افتراء منتخب الجزائر على المصريين لما قالوا انهم كسرولهم الاتوبيس فى مصر وطلع ان هما اللى عاملين كده
والا اتكلم عن افتراء جرايدهم وقله ادبها
والا اتكلم عن علم مصر الى حطوا فيه نجمه دواود وحرقوه ولا كأنه علم اسرائيل
والا اتكلم عن الناس اللى اضربت فى السودان والخطط والمؤمرات اللى الجزائريين كانوا عاملينها
وبيستنوا المصريين عشان يضربوهم
دى مش ناس رايحه تشجع دى ناس رايحه تضرب
بلاش كل ده
طب الناس الغلبانه اللى عايشه فى حالها فى الجزائر ورايحين عشان يشتغلوا ايه ذنبهم يضربوا ويتحبسوا
ويسيبوا اشغالهم وينزلوا مصر هربانين من اللى بيحصلهم
حرب سياسيه واقتصاديه ونفسيه منهم ضدنا

اللى مفرحنى فى ده كله حاجه واحده
اننا شعب مهما كان عندنا حاجات جوه بلادنا مضايقانا
بس عند اقل وابسط مشكله بتواجهنا
بنكون كلنا جنب بعض وبندافع عن بعض
احنا زى ما احنا بنحب بعض وبنخاف على بعض
وقبل ده كله بنخاف على مصر وفخوريين بيها وسط كل بلاد الدنيا
وده كفايه اوى عندنا

readmore »»

20 October 2009

صعبه الحياه

.
10 التعليقات






صعبه الحياه فى بعادك حبيبى
حلمت معاك فى لحظه لوقاك وبعدين معاك ما ترجع حبيبى

ليه سبتنى ما انت كنت زمان بتقول بتحبنى
انا عايزاك
عايزه افضل معاك
بس فين القاك

لسه بحبك رغم البعد لسه فاكراك
لسه بحس بيك رغم البعد لسه عايزاك

readmore »»

04 October 2009

التعليم فى زمن انفلونزا الخنازير

.
14 التعليقات



النهارده كان يوم فحلقى
ماعرفش ايه الفحلقى ده
بس هو كان يوم مالوش الوان فعلا
ال ايه انفلونزا الخنازير
شوف ازاااااااااى
ازاى يا جدع
قالوا نقلل التواجد فى الاماكن المزدحمه
وقالوا المناديل والكمامات والمعقمات حاجات اساسيه
قالوا بلاش التواجد فى الاماكن المقفوله
بس على مييييييين
احنا شعب خلقنا لنعترض
انا مستغربه بجد
ده لو الناس قاصدين يتعدوا مش هينزلوا بالكميه دى
المدارس وقالوا عليها رقابه
ومع ذلك فى عيال عندهم انفلونزا عاديه واهلهم سايبينهم ينزلوا
وده لوحده مبرر انه يعمل توتر للاطفال المتشردين دول واهاليهم
والا الكليات بقى
ماشاء الله مش فى دماغهم نهائى
حفله الترحيب بالطلبه الجداد شغاله عادى
والزحمه شئ لا يصدقه عقل
مقسمين كل دفعه على 3 اقسام
طب باقى الدفعات جايين ليييييييييييه
فى ناس خلصت بقالها 5 سنين مثلا
طب بردو جايين لييييييييييييييه
فى ناس ماعندهاش دراسه اصلا فى اليوم ده
طب بيخنقونا وجايين لييييييييييه بردو
اموت وافهم
بس اللى هيشلنى
انى اصلا طول سنينى فى الكليه ماروحتش اول يوم
السنه المنحوسه اللى المفروض خلصت فيها
انزل اول يوم
ياخراشى على هبلى
مين العبيط اللى طاوعنى فى الموقف ده
وازاى عقلى اللى عنده هسهس يطاوعنى فى لحظه زى دى
حقا انه شئ لا يصدقه عقل

readmore »»

21 August 2009

RaMaDaN KaReEem

.
16 التعليقات



̡ رمضان كريم وكل سنه وكلنا طيبين ويعود علينا بالخير يارب

readmore »»

18 August 2009

اما ناس سيس صحيح !!

.
8 التعليقات

ناس سيس صحيح بجد يعنى
الاول يقولوا هنحدد النت
وبعدين يلغوا تحديد النت
انا طبعا مش ضد انهم لغوا القرار
بس ضد الهبل والتخلف والاستهبال اللى هما ماشيين بيه
اول ما القرار نزل واصحابى قالولى عليه
قولتلهم وحياتكم مش هيكمل
لما يلاقوا الناس نطت فى كرش كل واحد قال القرار ده
ساعتها كل واحد هيخاف على كرشه وهيتراجعوا
ما هى حصلت قبل كده
لما قرروا فى الاول ان النت كله يبقى محدد
الناس اعترضت والفيس بوك اتملى جروبات
وناس كتير قالت هنشيل النت خالص بلا نت بلا تحديد
قالوا خلاص هيبقى فى محدد وغير محدد
ولما حبوا يستذكوا تانى وينزلوا نفس القرار بطريقه اشيك
فاكرين الناس هبله اصلها
بس الناس بردو عملت نفس القصه
و هما بردو تراجعوا !!
لازم الواحد يقل ادبه ويعمل مظاهرات واحتجاجات عشان تحترموا اخلاقكم
طب ما الواحد يعمل جروبات وانقلابات بقى عشان حاجات تانيه يمكن يتراجعوا فيها
زى الاسعار مثلا
الاسعار فى الطالع طاااااالع طااااااااااالع
وانا شاكه ان هى اللى السبب فى خرم الازون
بمناسبه خرم الازون
انا عايزه اعرف حاجه
ياترى ده ليه علاقه بأنهم قفلوا الخرم الللى فى الربع جنيه؟
يعنى افتكروا انهم لو سدوا الخرم بتاع الربع جنيه هيتقفل بتاع الازون؟
واصلا شكله بقى وحش اخر حاجه
فين الربع جنيه بتاع زمان ده اللى كان بيملى الايد اييييه دونيا
وهاموت وافهم ليه غيروا الجنيه الورق بالجنيه المعدن
عشان المعدن عمره اطول
والا مثلا يكونش ضد الميه ضد النار ضد الحشره ضد الفار
وبعدين انا اصلا العملات المعدنيه الكتيره دى بقت موترانى الصراحه
كل ما ادى فلوس لحد الاقيه جايبهالى جنيهات معدن
فى ايه يا جدعان؟!
هنمشى بسره من الدنانير بعد كده والا ايه عشان ابقى عامله حسابى يعنى ؟!!
اما انتم عالم تشل صحيح
وانا مازلت عند رأيى بردو
ناس سيسسسسسسسس فعلا

readmore »»

09 August 2009

احنا مين وفين وليه؟والنبى اللى يعرف يقولى

.
18 التعليقات

دخلت الاسبوع اللى فات او اللى قبله يعنى مش فاكره
(السن بقى معلش)
فيلم الف مبروك
بخلاف ان الفيلم مش حسيته حلو قوى بس هو فى المجمل حلو
لكن مش موضوعنا
فى جمله اتقالت فيه ولافته نظرى من وقتها
"احنا نقدر نغير الواقع لان احنا اللى بنعمله لكن مانقدرش نغير القدر"
لان مش احنا السبب فيه يعنى
السؤال اللى جه فى دماغى بقى
طب وهو ايه القدر وايه الواقع؟؟
ما الاتنين مجرد مسميات والنتيجه هى حياتنا
وبعدين احنا قدرنا مكتوبلنا فى كل حاجه بتحصلنا
يعنى ازاى نفرق بين ان ده قدر وان ده واقع
قبل ما الحاجه بتحصلك يعنى بيكون مكتوبلك فى الاوبشن بتاعها انها واقع مثلا
كل حاجه بتعدى علينا بنقول انها مكتوبالنا من قبل ما نتولد
يعنى قدر
يعنى ايا كانت الوسائل اللى بنمارس بيها حياتنا
فا هى بتوصلنا لنفس اللى هنوصله
تمشى يمين تمشى شمال ان شاء الله تمشى لفوق
هتوصل لنفس المكان اللى مكتوبلك توصله
الموضوع ده جاب فى دماغى حاجه جميله اوى
وانا فى ثانوى كنت باخد فلسفه مادتى المفضله
كان عندنا جدل فيها ان ياترى الانسان مسير والا مخير
وكان فى اراء واختلافات كتير اوى
وكل رأي انت تقتنع بيه ميه فى الميه يجى الرأى اللى بعده يخليك تغير وجهه نظرك تماما
بس ياترى احنا من جوانا حاسيين بأيه
احنا فعلا مجبرين على كل حاجه بتمر بينا فى حياتنا
والا احنا اللى بنحدد اختيارتنا
يعنى ماشيين على خط مرسوم لينا من قبل ما نيجى الدنيا
والا احنا بنحاول نرسم الخط ده
الموضوع مش تدخل فى الدين ولا القدر لان القدر ده شئ الحمدالله مؤمنين بيه
بس الفكره كلها احنا بنأثر علي حياتنا بأيه
والا هى اللى بتأثر فينا
احنا مجرد ممثلين بنأدى دور فى المسرح الكبييييييير اللى اسمه الحياه
والا احنا الجماهير اللى بنتفرج وبنحدد هنكمل فرجه على العرض ده والا لا
دور احنا حافظينه وبنأديه
والا دور احنا بنغير فيه

readmore »»

26 July 2009

اسفه اوى

.


اسفه انى كنت ضعيفه بالشكل ده
اسفه انى ماقدرتش انفذ وعدى
اسفه انى ماقدرتش احقق اللى كنت بتتمناه
اسفه اوى

readmore »»

15 July 2009

ده جنان ده والا ايه؟!!!؟

.
26 التعليقات


من ساعه الامتحانات وانا عندى احساس غريب
(ده بخلاف طبعا احساس الاكتئاب الفظيع من الامتحانات الهايله اللى مريت بيها)
حاسه انى نفسى اقف فى مكان فااااااضى واشد فى شعرى واقول عاااااااااااااااااااا
عااااااااا دى مش يعنى بعيط
لا لا
دى اعتراضا منى على كل حاجه حواليا
على الناس وتصرفاتهم وعليا وعلي تصرفاتى
ايوه واركز اوى عليا وعلى تصرفاتى دى
انا بقيت وحششششششششششششششه
فى اعتراف اكتر من كده؟؟!!؟؟
مابقتش عارفه اتعامل كويس مع الناس
مابقتش عايزه اكلم حد
مابقتش عايزه احكى حاجه عنى
مابقتش عارفه اسامح حد
مابقتش بهتم بحاجه ولا بهتم بحد ولا فاااااااااارقه معايا
عايزه اعيش فى هدوء من غير دوشه (هسسسسسسسس يعنى)
سور عااااااااالى اتبنى جوايا من ناحيه ناس كتير
من اقل موقف بزهق وبتخنق وبمل وبتعصب وبتنرفز وباكل فى هدومى وبقطع فى شعرى
تقريبا والله اعلم بتلكك !!!
لدرجه انى بقيت احس ان جالى مرض نفسى مثلا
وعارفه ان ماحدش هيستحملنى على الحال ده كتير
والمصيبه والمشكله انى مش عايزه حد يستحملنى اصلا
انا بقيت مخنوقه ومضايقه من نفسى
فما بالك الناس بقى تعمل فيا ايه؟
يولعوا فيا؟ والا يعلقونى من رجليا لمده اسبوع فى الشمس الحارقه دى
يمكن اتلم واحترم اخلاقى واتعدل
واتكلم كويس وارد كويس وابطل ازعق واترنرفز على اقل حاجه
غير بقى كل ده
انا مابقتش بشوف فيا الا الحاجات الوحشه
كل موقف كنت ساذجه فيه
كل حاجه عملتها غلط بقصد او من غير قصد
او كلمه تضايق وتخنق وتشل قولتها
كل تصرف اهبل وعبيط طلع منى
كل الحاجات دى شايفاها بتعدى قدام عينى
ياترى ده نتيجه طبيعيه لقله الزوق اللى بقيت فيها؟
والا جنان ده والا ايييييييييييه؟!!!!!!!!!؟

readmore »»

31 May 2009

ودى كانت نهايه طالبه فى حقوق

.
23 التعليقات



لما ابقى نايمه واشوف قدامى ورق الشريعه
يبقى انا بقيت محتاجه اغير النظاره

لما ابقى داخله اذاكر وواخده معايا عوامتى وبراشوتى وحد يسألنى بأستغراب:انت هتعملى ايه يا دينا؟؟
واقول اصلى داخله اذاكر قانون بحرى وجوى يبقى انا وصلت لمرحله وحشه اوى

لما حد يجى يتفق معايا على حاجه واقوله لو حصل غير كده هتدفع تعويضات وهصادر التامين النهائى بتاعك
يبقى انا كده اتجننت

لما الدكتور بتاع الكورس يقولنا ان قاعده التطهير بالتظهير فى الكمبياله لو شرحهلنا 97 مره بردو مش هنفهمها
ولما أسال اصحابى اللى خدوها قبل كده عشان يشرحوهالى ويقلولى احنا ماكناش فاهمنها اصلا
ولما انا احاول اعتمد على نفسى واذاكرها لوحدى واقعد فى وسط اوضتى وحواليا كل الورق
واشد فى شعرى واقول عااااااااااااا لانى بردو مش فاهمهاها
يبقى انا كده فعلا محتاجه دكتور نفسانى ان ماكنتش مستشفى المجانين بحالها

ولما بعد كلللل ده ادخل الامتحان واول ما امسك الورق مافهمش اى حاجه
يبقى انا اكيد كنت بذاكر ماده تانيه !!!

ولما احاول احل الاسئله والاقى صوت جوايا بيقولى لقد حان الان موعد برنامج العك المباشر
يبقى انا اكيد اكيد دور اكتوبر بينادينى وانا هحاول اعمل مش واخده بالى

لما حد يقعد يذاكر ليل نهار ويحل بمجهوده ومع ذلك يشيل مواد
وحد تانى بيصيع ومابيذاكرش وكمان بيغش وينجح بتقدير
يبقى ستوب هنا بقى كده فى حاجه غلط

لما الدكتور يلغى جزء من الكتاب ومع ذلك يجيب فيه سؤال مهم وبدرجه كبيره
يبقى ده اسمه استعباط

لما الدكتور يدينا اسئله مهمه ويأكد انها جايه فى الامتحان ومع ذلك بردو مايجبش منها
يبقى ده اسمه استهبال

لما تكون نسبه النجاح صافى ماتتعداش 35% وبردو الدكاتره مايردوش يرفعوها
يبقى دى اسمها قله ادب

لما دكتور محترم جدا يتصل فى برنامج مهم جدا كان بيناقش حكايه نسب النجاح دى
ويقول فيما معناه ياريت الطلبه يريحوا نفسهم ماحدش هينجح السنه دى
يبقى الراجل ده لازم يتعدم رميا بالقباقيب قدام النافوره اللى فى وسط الجامعه عشان يبقى عبره لمن يعتبر



اما بالنسبه لينا
فا احنا لـــنـــا الله
وانت شايف يارب اهو
انت شااااااااااايف

readmore »»

20 May 2009

واحد من الناس

.
13 التعليقات

الاسبوع اللى فات فى لحظه كان ربنا هادينى فيها وقاعده بذاكر قانون ادراى
(ماده يععععع خالص)
قولت فى وسط المذاكره لما اخد شويه راحه
(كل 10 دقايق راحه اوماال المهم نفسويتى طبعا اقطع نفسى يعنى)
فتحت التليفزيون لاقيت برنامج واحد من الناس وكنت اول مره اشوفه
و جايبين احمد السقا رغم انى مش بحبه بس الراجل كان بيقول كلام جامد
ده غير انى سواء بحبه والا مابحبوش فا هو اكيد احسن من القانون الادارى
المهم قعدت اتفرج كلام كتير قاله وعجبنى ويمكن اول مره يعجبنى لقاء ليه
من ضمن الكلام اللى قاله وعجبنى

-1-
قال ان الشعب مابقاش زى زمان يعنى مش بيحب البلد زى الاول
و مابقاش مستحمل عيوبها ومابقاش خوفنا على البلد زى قبل كده
بس فى المقابل لو حصلت لا قدر الله حرب
هتلاقى اللى منفضين ومش عاجبهم حاجه دول
هما اول حد هيدافع عن البلد
يعنى زى زمان مثلا
كانوا الشباب فافى خالص وبيسمعوا اغانى عجيبه وبيلبسوا هدوم اعجب
بس وقت ما حصلت الحرب كان كله بيدافع عن البلد
يعنى تقريبا بينطبق علينا المثل اللى بيقول"ادعى على ولدى واكره اللى يقول امين"
(مش بيقول كده المثل بردو؟)
هو قال مثل بردو بس انا مش فاكراه هو فى نفس المعنى ده عموما
واتكلم كمان عن الشباب اللى بيهاجروا ان دول مش عايزين البلد
وبالتالى البلد مش عايزاهم
انا شايفه فعلا ان الهجره دى اسوء حاجه ممكن الواحد يعملها
بحس ان ده هروب من الوقع
انا مش ضد الشاب اللى بيسافر يكون نفسه لكن انا ضد الهجره
واللى تهون عليه بلده مهما كان فيها من عيوب بيتهيالى تهون عليه اى حاجه تانى

-2-
اتكلم كمان عن الازمه الاقتصاديه اللى فى العالم كله
قال اننا من الحكمه لما امريكا مثلا تحاول تخرج من ازمتها اننا نمسك فيها ونحاول نطلع معاها
ومانفضلش محلك سر كده
بالرغم من انى واثقه ان ده مش هيحصل بس عجبتنى الفكره جدا
فكرتنى بحاجه ولاقيت صورتها قدامى
فكرتنى بالعيل الصغير لما يبقى مش عارف الطريق ويمشى ورا اللى اكبر منه
ويبقى ماسك فى طرف هدومه لحد ما يوصل
هى دى نفس الفكره تقريبا
تفتكروا مين العيل الصغير بقىىى
(مش احنا خالص طبعا)

-3-
قال انه مش بيعلم ابنه الصح من الغلط
هو بيعمل قدامه الصح عشان يتعلمه منه
وقال جمله دخلت دماغى اووووى
ان احنا بنربى نفسنا مع ولادنا لانهم عباره عن هارد فاضى واحنا اللى بنملاه
الموضوع ده دايما شاغل تفكيرى مش عارفه ليه
ان لما ربنا يرزقنى ان شاء الله مستقبلا باولاد ازاى هربيهم (ده اذا طلعوا متربين اساسا)
حساه موضوع صعب اوى انى ابقى مسئوله عن حياه وشخصيه بنى ادم
انا اللى هاكونها بعيوبه ومميزاته
يعنى كل عيب فى الشخصيه دى اكيد هاكون مسئوله عن وجوده
وكل ميزه احتمال يبقالى يد فى وجودها
صعب ان الواحد يبقى مسئول عن افكار و شخصيه انسان لسه بيتكون
كل كلمه هاقولها او كل فعل هاعمله هيلزق فى دماغه
والعيال بيبقى قلبهم اسود ومش بينسوا حاجه
وانا بسم الله ما شاء الله مليانه عيوب يعنى هما اللى هيربونى مش انا الى هربيهم
هو اكيد الموضوع ده لسه بعيد اوى عليه
بس لافت انتباهى وفكرتنى جملته بالموضوع ده

غير ده كله بقى عجبتنى جدا الرباعيات اللى بيكتبها وللاسف مالحقتش اكتب اللى قاله

وفى مقابل ده ماعجبتنيش حاجه واحده فى كلامه
لما اتكلم عن خلع مراته للحجاب
قال ان دى حريه شخصيه ليها بس
لكن انا بيتهيالى يعنى ان ربنا بيحاسب الزوج عن افعال زوجته
اللى هو المفروض مسئول عنها ادام بعلمه
زى مثلا تنبييها للصلاه والحجاب او لبسها عموما
ده حسب معلوماتى يعنى

كان عاجبنى كلامه لدرجه انى شوفت الحلقه كلها
مش عارفه ده لان أرائه كانت عجبانى فعلا
والا كنت بحاول اهرب من المذاكره مثلا ؟!!!!!؟

readmore »»

13 May 2009

انا زعلاااااااااانه

.
16 التعليقات


يوم الحد وبالتحديد الساعه 9 ونص وبالمناسبه كان على قناه دبى كمان
(مش حرماكو من حاجه اهو)
فضل جه فى برنامج تراتاتا (ايه الاسم الغبى ده!) بعد غياب خمس سنين عن اى برامج ومقابلات
طبعا مش محتاجه اقول انى كنت قاعده بتنطط قدام التليفزيون ومش مصدقه نفسى
ولا مصدقه اى حاجه اصلا
حقيقى الراجل ده بشع
حد مش هيتكرر تانى من ناحيه كل حاجه اخلاق وزوق وصوت واحساس
بعد ما انشكحت طول الحلقه وكنت بضحك بسبب ومن غير سبب (هبله تقريبا!)
جه فى الاخر وصدمنى (بقى دى اخرتها يا فضل :( )
قال انه فاضله فى عقده مع روتانا 3 سنين
بما يعادل البوم واحد يعنى بخلاف البوم اغانى بليغ حمدى اللى بيفكر يعمله
وقال انه بعد ال3 سنين دول هيعمل ايييييييييه بقى ؟؟!!!؟
هــــــيــــعـــتـــــزل
انا بقيت متنحه ومزبهله ومصدومه قدام التليفزيون يا جدعان
جالى اندهاش فى الذاكره وربنا
وجالى اى حاجه ممكن اى حد يتخيلها

رزان مغربى كانت المذيعه يومها اتصدمت بردو
وسالته ده بجد يعنى والا بيهزر
قالها : "لا بجد"
سألته تانى طب مش هانقول عشان الناس اللى مش موافقه على اعتزالك
انت نفسك مش هيوحشك الميكروفون والغناء
قالها : "لا" (ياخراشى عليك يا فضل ده انت عايز تشلنى بقى)
وربنا انا كنت قربت اعيط ان ماكنتش عيطت فعلا وعملت مش واخده بالى

لما انت تعتزل اومال مين اللى يغنى؟؟!!!!؟؟
هتسيب الساحه للعيال السيكى ميكى اللى بيطلعوا كل يوم دول ازاى ؟؟!!!!؟؟

مفيش حد يملى مكانك اصلا
ماينفعش حد يبقى ملك الرومانسيه غيرك يا فضل
المملكه اللى انت عملتها هتفضل لوحدك فيها
اغانيك وصوتك بقوا بيوجوعنى كل ما احس انك مش هتغنى تانى
مين هاحس انه بيتكلم عنى بعد كده غيرك يا فضل
هاسمع مين بعدك يا فضل
ماينفعش بجد ابدااااااااااا ان ده يحصل

انا بعترض
انا بحتج
انا مضايقه
انا زعلانه
انا بقطع فى شعرى خلاص

readmore »»

09 May 2009

هو اتوبيس كام بيروح فين ؟!!!!؟

.
18 التعليقات

الاسبوع اللى فات بعد الانتخه والنوم على طول الخط
قررت اخيرا انى ابدأ اذاكر واروح الكورس
قولت يابت تعالى على نفسك وفكك من ميه البطيخ اللى انتى عايشه فيها دى
وابدأى ذاكرى بقى والا هتاخدى صابونه فى اخر السنه ودى السنه الاخيره
والصابونه فيها بتبقى وصمه عار فى شهاده الليسانس مدى الحياه
(مش عيب لما يتكتبلى دور اكتوبر بردو .. وبعدين لست انا اللى يتكتبلى كده ابدا)

المهم من اول يوم انا قولت الكورس ده مالوش الوان اصلا
بالذمه حد يتوه فى العباسيه موطن جامعتى حبيبتى (سامحنى يارب على الكذبه دى - ال حبيبتى ال )
هو انا مش توهت بالظبط بس كنت هاعيط خلاص لما لاقيت الاتوبيس طلع على كوبرى اول مره اشوفه
بس لما نزل من على الكوبرى انشكحت اوى (مرادف فرحت اخر حاجه يعنى) اصلى طلعت عارفه المكان
ده اول يوم


تانى يوم بقى كان فى مكان تانى خااااااالص واول مره اروحه
(احنا كل ترم فى مكان شكل -اصل الدكتور بيحب يورينا معالم مصر المختلفه من خلال الكورس)
روحت علشان اشوف هاركب ايه وهانيل ايه وانا بتوه فى شارعنا اصلا
المهم لاقيت المواصله الوحيده اللى اعرفها قولت يا ما انت كريم يارب
واروح أسال السواق يقولى الاتوبيس بايظ وبنصلحه(يوم فحلقى من اوله )
قولت اقف يمكن الاقى حاجه تانيه واستنيت استنييييييت
وفى الاخر لاقيت اتوبيس جاى مكتوب عليه المكان اللى عايزه اروحه
من المفاجأه ماصدقتش وكنت خلاص هارمى نفسى قدامه عشان يقف
ركبت واول كرسى ولازقت فيه وانا هبله كده مش عارفه انا ركبت رقم كام
قولت لما أسال البنت اللى جنبى (وانا اصلا مابحبش اقعد جنب حد حتى لو بنت ادام الاتوبيس فاضى)
انا: لوسمحتى هو ده الاتوبيس ده رقم كام؟
البنت: ده رقم 131
انا: ايه ده .. مش ممكن .. منار !!!!!!
البنت: ديناااااا !!!!!
واكتشفت ان البنت دى كانت صاحبتى فى ثانوى (يا محاااسن الصدف - محاسن مين؟!!؟)
وانا ماكنتش شوفتها بقالى اكتر من سنتين
بجد دى كانت احلى حاجه حصلتلى فى اليوم ده
قعدت بقى تحكيلى عنها وعن اصحابنا و شغلها وانا كمان قعدت احكيلها بردو
كنت مبسوطه اوى انى شوفتها كل ما ابصلها اشوف فيها ايام وذكريات عمرها ما هتتكرر
كل ما بشوفها بفتكر ان فعلا كانت فى ايام حلوه فى حياتى وكنت مبسوطه فيها بجد
اتكلمنا كتير اوى لانها كانت نازله فى مكان قريب من المكان اللى انا نازله فيه
المهم افترقنا على وعد بلقاء اخر (حلوه حته الافلام العربى دى)
لما وصلت قعدت ادور على مكان الكورس
المشكله انى كنت جنبه وقعدت الف والف والف فى الاخر روحتله عن طريق كوالالمبور تقريبا
بس تعمل ايه فى الشعب المصرى بقى يحب يوريك معالم الجمهوريه بالوصف الجامد بتاعهم
العيال بتوع الكورس دول وربنا حبه تحف
رغم انى ماليش علاقه بأى حد فيهم بس لما بشوفهم بيضحكونى بحس انهم عيال منفضه كده
مهما كانت عندهم مشاكل بس بيضحكوا وبيهزروا وبيضحكونى معاهم
عدى الموضوع على خير بخلاف وانا راجعه وقفت نص ساعه عشان الاقى حاجه اركبها
وبخلاف انها كانت ماتوصلش للبيت على طول كمان

ولما وصلت وجيت اركب حاجه تانيه ببص جنبى لاقيت ميييييييين
لاقيت خالى (اليوم ده كان يوم الصدف العالمى)
قولت يلا اهو الاقى حد يونسنى وانا مروحه
وادى تانى يوم


تالت يوم بقى
روحت عادى جدا مع معاناه مع المواصلات كالعاده
ولما روحت توهت بردوووو فى نفس المكان وخدت نفس اللفه (انا مابسترش فى حته ابدا انا عارفه)
وانا راجعه بقى ركبت حته اتوبيس مسخره ويارتنى ماركبته بس مالقتش غيره
وانا قاعده بعد ما شاب محترم قام وقعدنى (لسه فى شباب زوق والله)
لاقيت بنت وقفت جنبى والبت ضاربه على وشها عشرتاشر بوز وفكرتنى بحمبوزو لاوى بوزو بتاع اونكل كرومبو
بس اكتشفت بقى الجريمه لما لاقيت موبيلها بيرن وهى بترد
البنت : لا مفيش حاجه كنت مصدعه فا قولت امشى
البنت تانى : لا يا تامر ماهو مش معقول كده انا قولتلك 100 مره مش بحب تعاكس بنات قدامى
البنت بردو(يعنى انا كنت هاسمع كلام تامر منين مثلا):وانا قاعده دورى ايه بقى طرطور والا ايه

ماكنتش بتصنت والله يا جدعان
هى اللى كانت مسمعه الاتوبيس كله ولا كأنها بتغظينا عشان عندها تامر واحنا لا
المهم ان فى النهايه البت رجعت لورا وخلاص ياحبيبى ماتزعلش ولما اروح هاكلمك
(يابنتى ماينفعش كده اثبتى على موقفك بنات اخر زمن صحيح)
وانا قاعده حطه ايدى على خدى
(ياعينى عليكى يا دودو وانتى مش لاقيه لا تامر ولا وائل ولا حتى توتو تقوليله الكلام ده)

اييييييييه دونييييييييا
بعد كده بقى
الاقيلك واحد مجنووووون ياما عامل مستهبل واقف جنبى
وكان بيغنى هندى او صينى حاجه من الاتنين يعنى
بس اللحن كان عاجبنى جدا والله
بيقول ربنا بيدى قوه للكافر فى الدنيا عشان يحاسبه كويس فى الاخره (والله معاك حق)
و رجع يقول الاغنيه الهندى تانى (ما كنا ماشيين كويس يا حج حصلك ايه بس )
وبعدين رجع قال اصل لما القصير يقع المفروض الطويل يمسكه
كان نفسى افهم يقع فين وايه اللى هيوقعه وهو مين القصير والطويل دول اصلا

فى حاجه مستغرباها فى ده كله بقى
انا ماكنتش بحب الاتوبيسات وكنت بحب المترو
و بالرغم من اللى بشوفه فى المواصلات ده بس بقيت احبها وبقيت اكره المترو !!
المواصلات دى والله بتحصل فيها مواقف عجيبه
بشوف حكايات ومواقف وحاجات كتير بتضحكنى وبتخلينى اقعد أتامل فى الناس

فى النهايه بقى
ياريت اللى يعرف اى مواصله بتروح فى اى حته يقولى
اصلى ناويه اعمل بيان بارقام الاتوبيسات للعلم بالشئ
واحتمال اعمل دراسات فى كيفيه البحث عن مواصله فى زمن استهبلت فيه المواصلات

readmore »»

05 May 2009

تخااااااريف

.
21 التعليقات

مبسوطه بقالى يومين عشان حصلت حاجه تبسط
(ايه الهبل ده ما اكيد مبسوطه عشان حاجه تبسط يعنى)
بس حسيت انى مفيده
عملت حاجه لبابا هيفتكرنى بيها لما نتقابل فى الاخره ان شاء الله
يمكن كنت سبب فيها مش اكتر
بس عشان ابقى الولد الصالح اللى بيدعو له زى ما المفروض اكون
مبسوطه اوى بده
ويارب تكون وصلتله

بس فى المقابل
انا حاسه ان فى حاجه واقعه من جوايا
يعنى اه الموضوع يبسط وانا مبسوطه فعلا
بس زعلانه بردو
لا لا انا مش زعلانه بس انا تايهه
من الاخر انا
مــــتــنـــــحـــــه

بيبقى احساس تنح اوى
لما تحس انك فااااااااااااااااااضى
متنح وبتفكر ... بس بتفكر فى ايه ماتعرفش !!!
وتحس انك عايش حياتك طيشه كده
نفسك تعمل حاجه مهمه ومش عارف
نفسك تبقى حاجه مهمه وبردو مش عارف
بقالى فتره
كل ما اروح اترزع فى حته
يكون جنبى شويه شباب وبنات بيتكلموا على مشروع بيعملوه
سواء بقى كان مشروع تخرج او مشروع بيزنس
بقول لنفسى ياربى ليه مابقاش كده
انا عايزه اروح واجى واشتغل واتعب واعمل حاجه ابقى فخوره بيها
انا هافضل قاعده فى بيتنا زى خبيتها كده لحد امتا
ايوه انا عايزه اتمرمممممط
نفسى اتمرمط
ايه المشكله فى كده يعنى
زهقت بقى مش من حقى ازهق كمان والا ايه

طب بلاش دى
انا حاسه ان طول حياتى هافضل اجرى ورا حاجه
فى حاجه بدور عليها ومش عارفه الاقيها
(والنبى اللى ايده فاضيه يجى يدور معايا)
رغم ان مفيش حاجه ضايعه منى
بس حاسه ان انا نفسى اللى ضايعه
وماشيه ماشيه ماشيه ولا بيدى
يوووووه قصدى انى ماشيه ومش عارفه رايحه على فين يعنى

طب بلاش دى كماااااااان
انا مابقتش عارفه افرح
اه وربنا مابقتش عارفه افرح
بقيت بخاف اضحك
يا اما بحس ان الضحك ده مش من حقى ياما بحس ان فى مصيبه جايه
واعيش بقى لحظه >>> حاسس بمصيبه جيالى يا لطيف يالطيف
انا مابقتش مكتئبه وده شىء كويس فى حد ذاته
بس بقيت بهزئ فى اللامبالاه
بفكر فى >>>>> "ولا حـــاجـــه"
من الاخر انا دماغى بقت فى التوهااااااااان


وشكرا

readmore »»

21 April 2009

انا مش بتاعه الكلام ده

.
34 التعليقات

بعد تفكير عميييييييييق
لحد ما غرقت
فكرت ان ... لا بقى كفايه كده
انا لازم اعبر عن رأيى .. الله !!
واقول ان ماينفعش الواحد يتنازل عن افكاره وأرائه ابدا ابدا
كنت قبل كده مقتنعه اقتناع تاااااااام انى مش بتاعه جواز صالونات وكلام فارغ من ده
لكن الاقيلك الناس كلها وكأنها اتفقت عليا وتقولى ان مابيكملش الا جواز الصالونات بلا حب بلا بتنجان
طب ماشى انا متفقه معاكوا فى الجزء الاخير من الجمله بلا حب بلا بتنجان
بس انا ايييييه ضمنى ان البنى ادم اللى هيجى يقعد فى صالون بتنا ده مايكنش ابن ستين فى سبعين
"مع الوقت هتعرفى"
والنبى؟؟؟ طب وانا ليه اضيع وقت من اصله مع واحد لسه هاكتشفه ومش انا اصلا اللى مختاراه
والاقى بقى طلعلى من تحت الارض قصص وروايات عن اتنين قعدوا يحبوا بعض عشرتاشر سنه مثلا
ولما اتجوزو اطلقوا بعد سنه

وان اللى اتجوزو جواز هباب قصدى صالونات عاشوا فى تبات ونبات وخلفوا صبيان وبنات
وفجاء سؤال تصحبه الخباثه والسهتنه والسوسه مجتمعين معا
"طب لو بتحبى حد قولى عشان مانفكرلكيش فى حد من بره"
وكالعاده انا واقفه زى البطيخه وعلى وشى وفى عيونى نظرات انكسار
وحياتكم يا جدعان ماعنديش بوى فريند للاسف...اجيبه منين طيب؟؟؟!!!
(اصل هاقول ايه بلا نيله خلينى كاتمه فى قلبى وساكته)

وفى النهايه جاءت الجمله القاتله
"طب ادام انتى مش بتحبى ولا ناويه تحبى ولا عايزه جواز صالونات اومال هتتنيلى تتجوزى ازاى"
وساد الصمت الرهيب (اتخرست طبعا + وش متنح)
واخيرا طلعت منى جمله جامده جدا >> "ان شاء الله ما عنى اتجوزت"

"ولحد امتا؟؟ هتفضلى ماشيه بدماغك لحد امتا؟؟"
الله ... يعنى عايزنى امشى من غير دماغى يعنى!!! اومال امشى بكوز دره مكانها مثلا؟؟!!
(شكلى هيبقى مسخره ساعتها اكيد)

نهايته
قولت يابت تعالى على نفسك عشان تسكتيهم وتعرفيهم ان اخرتهم سودا معاكى فى الحوار ده
وقررت اتنازل شويه صغنتتين واشوف اخرتها
(المشكله ان بدايه التنازل مش هيقف عند الشويه الصغنتتين دول)

طلع جواز الصالونات ده حواااااااار وربنا
ال ايه امه تيجى تشوفك .. لا وهو كمان يجى يشوفك
وحياه طنط؟؟؟؟ لييييييييييه فرجه انا والا اييييييييييه
ما تحطونى فى مزاد احسسسسسسن (وش هينفجر من الغيظ وقرب يعيط)
وجاءت محاولات الاقناع يابنتى ما انتى كمان هتشوفى وهتقولى رأيك هو مش اجبار
ابداااااااا بردو ... انا اشوف اه اتشاف لالالالالا
المهم اتنازلت شويه صغنتتين كمان (يا مهووووووون لما نشوف اخرتها)
طب وربنا طلع حوار بردو جواز الهباب ده
يا جدعان انا تنحه ومابهزرش مع حد من اول مره وماحبش حد ياخد عليا من اول مره
(وخصوصا لما اكون انا اصلا مش طايقاه)

وماحبش حد يقعد لوك لوك لوك كده وانا مطالب منى اسايره واشتغل لوك لوك انا كمان
(وخصوصا بردو لما اكون انا اصلا مش طايقاه)

ودول ناس بدأو معايا بدايه غلط فى يوم نحس زيهم
وشويه وخلاص هاقل ادبى وهاقوم اجرى وراهم بالجزمه
ويقولو البت اتجننت

و جاءت النهايه لصالحى واعلنت انتصارى وطلعتهم لسانى
هيييييييييه انا اللى اتفرجت وانتوا لا هيييييييييييه
هييييييييييه انا اللى قولت "لا" وانتوا لا هيييييييييه(وش مطلع لسانه)

فى النهايه
طلعت بحاجه مهمه اوى من هنا بقى
انا مش هتنازل عن دماغى تانى ابدا ابدا
انا دماغى جزمه قديمه وهتفضل جزمه قديمه
وبعدين انا مش فرجه لحد وماعنديش استعداد احس انى قللت من نفسى مره تانيه

واعلنتها بكامل قواى العقليه
لسسسسسست انا اللى اتجوز بالطريقه دى
انا مش بتاعه الكلام ده
انا مش بتاعه جواز صالونات وكلام فارغ
والمشكله انى لحد دلوقتى مش بتاعه حب بردو
نفسى افهم انا بتاعه ايه بالظبط

readmore »»

12 April 2009

اما نشوف اخرتها مع البشر دول

.
4 التعليقات

تااااااااج
من الاختين الحلوين هناء وشيرين
يووووووه
قصدى من الاموره نودى بنت الحاج دراكولا
و تقريبا من الاموره التانيه نينو
عالم فاضيه صحيح :P
نهايته
لما نشوف اخرتها


انت مين؟
عفراكوش :D
انا دينا اكيد
انا بنت عادية زى اى بنت عصبية شوية مش شوية هو كتير الصراحة
واوقات بكون طيبة
ومجنونة جداااا

مين اكتر6 اشخاص بتحبهم؟
والدتى وجدتى واختى وفضل شاكر وساره انتيمتى..ومش فاكرة حد تانى بصراحة

انت سعيده؟
لو السعادة من ناحية الحياة عموما لا
بس اكيد كل واحد بيجى علية اوقات بيحس انة سعيد
بس حاليا انا مش سعيدة

لو اجتمعت انت وحسني مبارك في غرفه واحده؟
هاقولة كان يوم اسود ومالوش اى ملامح يوم ما مسكت البلد
بعت كل حاجة وخربت كل حاجة
ارحم البلد بقى والناس اللى مش عارفة تعيش عشان ربنا يرحمك

لو معاك مليون ونص جنيه تعمل بيهم ايه؟
اشمعنا النص دة ما تخليها مليون بس او اتنين
بس الصراحة مش عارفة هاعمل اية
بس والله والله انا فعلا بحلم لو يكون معايا فلوس كتير افتح دار للايتام والاطفال او لذو الاحتياجات الخاصة او للمسنين
ولو اتبقى حاجة اكيد هاعيش بيهم انا واهلى عيشة مستريحة تحسبا للمستقبل يعنى

بتحب مصر؟
بلدى اللى عايشة فيها لازم احبها

بتحب الشباب ؟
من ناحية اية بالظبط؟؟
بس لو من ناحية الصداقة انا شايفه ان مشكله صداقه الشباب انها مش بتستمر
يعنى مهما كنت زميله لحد او صديقه ليه اكيد مع الوقت الصداقه دى هتنتهى على عكس صداقه البنات
انما لو من ناحية الحب انا شايفة انة عادى يعنى
مفيش شاب شبة التانى فى الموضوع دة
وعادى بحبهم دول النص التانى فى المجتمع يعنى مجبرة احبهم

انت مسلم؟
الحمد الله

ليه؟
انا اتولدت لقيت نفسى مسلمة والحمد الله دى نعمة من عند ربنا
ولو كلمة لية دى معناها انى بثبت ازاى انى مسلمة
فا انا بحاول على اد ما اقدر ارضى ربنا واكون قريبة منة وبأدى فروضى الحمد الله
مانكرش انى اوقات ببقى مقصرة بس ربنا يهدينى

مين اكتر شخصيه ماتقدرش تستغني عنها في حياتك؟وليه؟
والدتى طبعا
ماما دى اهم حاجة فى حياتى
من غيرها بحس انى تايهة
بحس انى مش عارفة اى حاجة فى الدنيا
هى اقرب حد ليا
تخيل انسان بيحبك حب مالوش حدود ومن غير مصلحة
وعايز يجبلك حتة من السما علشان تبقى احسن حد فى الدنيا
كل دة ومش احبها ؟!!!؟

ايه اكتر موقف محرج اتعرضت ليه في حياتك؟ واتصرفت ازاي؟
لا الحمد الله ماليش انا فى المواقف المحرجة دى
لان لو فى موقف محرج اكيد كنت هافتكرة وانا مش فاكرة خالص والله

ايه الامنيه اللي بتدعي ربنا دايما انه يحققها لك؟
ان ربنا يرضى عنى وانى دايما اعيش سعيدة

**************************************************

احب شخص لقلبك في الدنيا؟
ماما

انسان مستعد تضحي بحياتك,ركز في كلمه حياتك,علشانه؟
اكيد حياتى مش هتعظم على اللى خالقها
بس هاقول ماما طبعا

انسان كرهته لدرجه الجنون وتمنيت لو تمسك سكينه وتنقض عليه وتغرزها في قلبه وتقتله وتقف تبص لجثته وتشفي غليل قلبك؟
اية الشر دة كلة
لا مش للدرجة دى يعنى
بس انا بكرة اوى اوى اوى اى حد يظلمنى وبكرة الظلم عموما دى الحاجة اللى ممكن افكر اقتل عشانها حد

ماهو:اسم اجمل كتاب كتبه بشر قرأته ومحتفظ به حتي الان؟
رغم انى بحب القراءة اوى
بس للاسف مفيش كتاب اتعلقت بية اوى كدة

اهم جهاز منزلي انت متعلق بيه او بتستخدمه كتير؟
حاليا الكومبيوتر والتليفزيون

مكان تحس بالراحه عندما تدخله؟
اوضتى

شئ تحس بالراحه النفسيه عندما تنظر اليه؟
اى مكان هادى
وخصوصا لما بقعد قدام البحر
بروح فى عالم تانى

مكان تحس فيه بالحنين الي شئ لاتدري ماهو وذكريات جارفه الي لاشئ؟
مفيش مكان محدد
اماكن كتير كنت بروحها مع اصحابى زمان لما بعدى من عندها بافتكرهم وبفتكر اجمل ايام قضتها معاهم

اجمل مدينه زرتها داخل مصر؟
مرسى مطروح عاجبتنى
واسكندرية كمان

اجمل مكان طبيعي رأيته في مصر؟
اكيد البحر ومش فى مصر بس فى اى حتة

شخصيه كرتونيه بتحبها؟
بحب كتير اوى
بس اكتر شخصيتين
توم وجيرى

نوع هاتفك المحمول؟
Nokia n80

سرعه البروسيسور جهازك؟
طب ثوانى اسال حد وابقى اجى اقول :D
اية الكلام دة
ماليش انا فى الحاجات دى

حجم ذاكره,هارد,جهازك؟
مساحة الهارد يعنى
80

المساحه التي تشغلها المواد الاسلاميه علي جهازك؟
والله مش عارفة
بس انا عندى احاديث كتير والقران كامل
والقران باصوات ناس كتير

نفس المساحه السالف ذكرها في قلبك الاجابه لنفسك علشان الرياء يااخواننا؟
لا طبعا الحب اللى فى قلبى ل ربنا مش هيتقاس ابدا بمساحة المواد الاسلامية اللى انا حطاها على جهازى
الموضوع اكبر من كدة
ودى حاجة اللى يعرفها ربنا بس

اهم هدف انت واضعه لحياتك الآن؟
انى اخلص دراستى واشتغل دى اهم حاجة فى دماغى دلوقتى

مواصفات فتي الاحلام بالنسبه لك؟
يكون شخصيتة قوية وقادر يتحمل مسؤلية مستقبلى معاة لانها مش حاجة سهلة
يحسسنى بالامان ويكون حنين اوى عليا
اكيد يكون دمة خفيف ومش بخيل
ويكون انسان صادق ومخلص
و يراعى ربنا فيا
الاقى بس الحاجات دى ويحلها الف حلال بعدها بقى

*******
:صف الآتي
شعورك لما بتسمع كلمه مصر؟
مصر هى امى نيلها ابن عمى
رغم كل اللى بيحصل فيها
بس بحس انى فخوره لانى من البلد دى

شعورك لما بتسمع كلام عن اليهود؟
بحس انهم ورا كل مصيبة بتحصل

شعورك لما بتشوف ضابط شرطه؟
بحس انة فرحان بالبدلة اللى لابسها وخلاص

شعورك لما بتشوف كناس عجوز في الطريق؟
بضايق اوى
وبتخيل حد من اهلى فى الموقف دة وبحس احساسة
بجد بحس وقتها باحساس بشع

افكارك تجاه شاب ماشي في الطريق يلبس جلابيه بيضاء وقصيره وعمامه وله لحيه وبجيبه السواك وبيده المصحف ؟
عادى زية زى اى حد
انا لا معاة ولا ضدة
كل واحد لية دماغة اللى عاجباة

احساس يراودك في اشاره المرور مغلقه بسبب مسئول كبير؟
ببقى عايزة اولع فى العربية اللى هو راكبها
اصل هو مش على راس اهله ريشة يعنى عشان يوقف شوارع البلد عشان يمشى

هاتبعت التاج لمين؟؟
اى حد معدى من هنا وعاجبه التاج يتفضله
البيت بيتكم

readmore »»

05 April 2009

عايزين رجالتك تبقى سوسن يا مصر

.
19 التعليقات


تصدقوا انا ماكنتش متخيله الموضوع كده خالص
مش جهل منى لا سمح الله
بس ماكنتش عامله زى الناس اللى لو الزبال ماعداش النهارده خد الزباله
يبقى دى مؤامره صهيونيه هدفها تخريب البلد
على اساس يعنى ان
لو الزبال مجاش البلد هتبقى مزبله
مش فاهمين ان المشكله مش فى الزبال من اصله
المهم نرجع لموضوعنا
اللى هو كان ايه بقى؟؟!!؟؟
اه خلاص افتكرت
ال ايه يقولولك ايمو
ايمو مين وبلالينو مين يا جدعان
الصراحه انا كنت فاكره الموضوع موضه وتعدى
زى ال
بناطيل اللى لحد الركب جاتها نيله
(نفسى كده عيل ابن حلال يجى يشدها عشان الفضيحه تبقى بجلاجل والجرسه تبقى بحناجل)
الايمو دول اللى هما الناس اللى لابسين اسود ومسقطين البناطيل بردو
(مش عارفه
انا ايه اخره البناطيل اللى موقعنها دى)
وص
ابغين شعرهم اسووووووود
ولابسين حاجات
عجيبه تانيه كده


المهم انى بعد التفحيص والتمحيص بتاعى(ايه تمحيص دى!؟)
لاقيت ان الايمو دول مظهر بيعبر عن الحاله النفسيه لصاحبها آلا وهى الاكتئاب
لانهم من الاشخاص الحساسين جدا واقل مشكله عندهم بيكبروها وكأنها ماحصلتش ولا هتحصل
هو انا مالى بالكلام ده كله اصلا ؟!!!!!!؟
اه اه خلاص افتكرت (اصل الزهايمر شايف شغله الفتره دى)
الناس دول ماكنوش تقريبا موجودين فى مصر
بس بدأو يظهروا من فتره قريبه وكتير كمان
فى اللى قال عليهم زى عبده الشيطان بس هما مش كده لانهم ولحد دلوقتى ماظهروش بمعتقدات جديده خاصه بالديانات
المشكله فى حاجه بقى
انى عايزه اقول موقف شخصى حصل لزميل اختى وطبعا هى مش بيتبل فى بقها فوله وجت حكتهولى
وكالعاده انا بردو مش بيتبل فى بوقى فولى وجيت احكيه (احنا فضايح و دى غلطه اللى حكالها اصلا)
حصل اييييييييييه بقى
ان شخص من الايمو دول عرض عليه انه يكون زيهم يلبس اسود ويصبغ شعره اسود
او يحلق شعره خالص ويرسم عقرب على رأسه !! (ال عقرب ال جاته عقرب يأكله)
والشباب المفروض عليهم يلبسوا بنات (عايزين الرجاله يبقوا سوسن يعنى)
ويحطوا على ضوافرهم مانيكير اسووووود(مش بقول رجالتك هيبقوا سوسن يا مصر)
ويسمع نفس الموسيقى اللى بيسموعوها وفى الغالب بيسمعوا ايمنيم
وكان السؤال بيطرح نفسه بنفسه فى تلك اللحظه
اشمعنا ايمينيم يا نجم؟
اصله بيغنى وهو شارب وهو اصلا اغلب الوقت بيبقى شارب واحنا زيه (جاتك شربه خروع تقف فى زورك يا بعيد)
ولازم يثبت ولائه ليهم بأنه يجرح نفسه بأى حاجه عشان يبين اخلاصه للمجموعه يعنى
(شوف ازاى يا جدع اما عجايب ... ولاء مين وحنان مين يا بنى)
وفى نهايه ده كله الشخص اللى هينضم ليهم
هياخد على الاقل فى اليوم 70 جنيه
لحد هنااااااا وفول استوب يا معلم
وعلامه تعجب كبيييييييييره ااااااد كده
ده الموضوع ماطلعش استايل ومنظر وشويه شباب فاضيين عاملين جروب
ده الموضوع طلع من وراه مكسب كمان
واحنا اول درس بنتعلمه فى الدنيا ايه ياشطاااااار
ايوه سمعاك ياللى بتقول هناك انت ايوه ايوه شطور
ان الواحد مش هيدى حاجه ببلاش كده منه لنفسه اكيد وراها مقابل
طب ايه ياترى ورا المكسب ده؟؟
هى دى بقى علامه الاستفهام اللى وقفت عندها
وماقدرتش اكتشف هما ليه بيعملوا كده او على الاقل لحد دلوقتى ماظهرتش نواياهم المحدده واللى من وراها بيعملوا كل ده
يمكن مع الايام هيظهر هما عايزين ايه؟!!؟
عموما نحن فى انتظار كل جديد
وكل واحد يمسك عقله كويس حد يقولك تعاله اوديك للايمو هنا والا الايمو جايبلك شيكولاته هنا
اوعوا تروحوا
انا حذرتكم اهو
وقد اعزر من بعزر


readmore »»

26 March 2009

كلام والسلام....كلاكيت تانى مره

.
12 التعليقات




اخيرااااااااااااا البوم فضل نزل
ايوه سامعه حد بيقول ايه المعلومه القديمه دى
يعنى اهو عقبال ما خدت فرصتى وانفردت بذات نفسى شويه واستوعبت الالبوم عن جداره
قولت اما انطلق بقى واقول احاسيسى ومشاعيرى .. بلاش يعنى ؟! الله !!
الراجل ده وهمى
غاب ورجع بالتقيل والله
حساه بجد بيقول حاجه من جوايا
نسيت انساك...بفكر بالساعات...افترقنا...بعدا ع البال...هاخلى بالى...جوا الروح
تؤ تؤ ماحدش يتكلم بقى مايتكررش الراجل ده حقيقى يعنى
انا مش مجنونه بيه بهبل يعنى عشان ماحدش يقول عليا تافهه
مش زى بنات اليومين دول اللى بيترموا على المطربين يعنى
اترمى ايه ده انا مليون مطرب يتمنانى اومال طبعا(وسعت دى منى صح)
انا بحب فضل عشان لما بيقول .. بيقول حاجه جوايا
ده بخلاف ان احساسه عالى وشخصيه محترمه
الواحده مننا هتحب ايه فى مطربها المفضل الا الحاجات دى يعنى
وبعدين المطرب من دول ايه غير شخصيه محترمه واحساس حلو وشويه حاجات فوق بعضها
اما حاجه غريبه والله

*****
اوقات كده ببص لنفسى فى المرايه
بحس بصراحه بأحساس غريب
(اللى بيخااااااف يروح)
بحس ان روحى طلعت بره جسمى وبتبص عليا
(قولت اللى بيخاف يروح ده كده فيلم رعب)
لا فعلا انا بحس بكده
يتقال عليا مجنونه يتقال عليا جالى استبحس فى الذاكره مش مهم
بس دى حقيقه
بحس انى حتى بشوف ملامحى مختلفه
بحس انى بشوف انسانه تانيه
وروحى بتقولى هى دى اللى انا عايشه جواها
وتسالنى انا مين
بقولها انا دينا
لا والنبى؟؟ يعنى تبقى ايه فى الدنيا دى بتهببى ايه على عينك
اسكت ومالقاش عندى رد
للدرجه دى بلاقى نفسى فاضيه اوى من جوه ومش لاقيه رد
لدرجه انى بحس فعلا ان روحى بتروح منى
وبمشى من قدام المرايه اللى انا قدامها
عشان ماحسش انى ضعيفه وتايهه اكتر من كده
انا عارفه وربنا ان اخرتى وحشه
وان الناس هتقول عليا اتجننت بس ايه الجديد ما انا عارفه انى مجنونه اصلا

*****

هو ليه مفهوم الاخلاق بقى عندنا مختلف ومقاسه واسع اوى كده
يعنى اللى اعرفه ان الاخلاق بتحدد بمدى تدين الشخص
او طريقه معاملته مع اهله ومع الناس واحترامه ليهم مثلا
انما اللى بقيت اشوفه دلوقتى ان كل واحد بيحدد الاخلاق على مزاجه وحسب ما هو شايف
انا شايفه وعارفه وواثقه ان البنت اللى بتشرب سجاير والا شيشه دى فيها حاجه غلط
ده من رأيى انااااااا تحديدا(ده مجرد مثال)
انما فى ناس شايفه ان ده شىء عادى وبييييس وقضيها
كل واحد حر فى اللى بيعمله
بس انا بتكلم عن مفهوم الاخلاق
ووارد جدا كمان ان البنت اللى بتشرب سجاير دى تكون اخلاقها كويسه
بس ليه تضيع ده بحاجه تافهه ومالهاش قيمه
فى ناس تقول عليا معقده وناس تقول عليا محبكاها
بس انا كده دماغى كده واتربيت كده

*****

سمعت ان فى يوم ممكن تحصل فيه معجزه غريبه اوى
انى اتجوز!!!!!!!!
اه ده بما انى داخله على ال 22 سنه دلوقتى بسم الله ما شاء الله يعنى
مش عارفه ليه دايما احس انى اخرى خطوبه
اه يا اختشى خطوبه ايه المشكله فى كده يعنى
اصل الصراحه فكره الجواز دى موترانى اوى
يلهوتى يعنى انا يجى عليا يوم من الايام وابقى وشى فى وش انسان طول حياتى
ايه الشلل اللى انا فيه ده
هاطيقه ازاى والاهم هو هيطقنى ازاى
اذا كنت انا نفسى مش طايقه نفسى
وعارفه ان دماغى جزمه قديمه وماحدش ينفع يعيش معايا
لا لا لا مش قادره اتخيل ولا اتصور ولا اعيش ولا اشعر ولا احس ولا انيل اى حاجه فى الفكره دى
يمكن انا بقول كده عشان مش بحب حد يعنى
ما اهو اكيد لو بحب حد هاكون قادره استحمله طول حياتى
وهيبقى المنيل على عينه اللى اسمه حب ده عاميه عن دماغى الجزمه دى
والله ممكن ليه لا
لا لا لا بس بردو مش قادره اتخيل وربنا اه وحياه خالى حسين مش قادره اتخيل
هو مين حسين ده؟

readmore »»

19 March 2009

هتعيشى ملكه فى حياتى

.
7 التعليقات



مش عارفه ابدأ منين
ولا فى دماغى كلام يكفى اللى ينفع يتقالك
ولا حتى يوم فى السنه يكفى عشانك
مايكفيش حد بيعمل المستحيل عشان ابقى احسن انسانه فى الدنيا
مايكفيش حد عايز يجبلى حته من السماء عشان ابقى انسانه كويسه
لو كنت اوقات ضايقتك فا ده من غبائى
لو كنت اوقات قصرت معاكى فا ده بردو من غبائى
ومع ذلك بردو بتستحملى غبائى واستهبالى وعبطى احيانا
ان بقيت حاجه دلوقتى فا ده بسببك
ان هابقى حاجه فا ده هيكون عشانك
لانى من غيرك ولا حاجه
بحبك اوى

readmore »»

01 March 2009

زمـــن قـــاســـى

.
17 التعليقات


زمن قاسى زمن خاين زمن غدار
لا حد لاقى ولا عارف فين الدار
كل واحد عايش بحزنه
كل واحد راضى بهمه
كل واحد بيداوى جرحه بصبر اكبر من صبره
ليه الزمان مفيهوش امان
ليه الانسان سهل يتخان
زمن انانى زمن غدار
زمن رامينا وسط النار

readmore »»

11 February 2009

قرار....مستقبل

.
9 التعليقات

بيبقى صعب اوى على الواحد انه ياخد قرار مهم فى حياته
والاصعب اكتر ان يكون القرار اللى هيتاخد ده سلاح ذو حدين
لو قولت اه هيبقى ليه اضراره
ولو قولت لا بردو هيبقى ليه اضراره
والمشكله ان الواحد لازم ياخد القرار ده لوحده
من غير ما يشارك اى حد فيه ولو حتى اقرب الناس ليه
يااااااه احساس وحش اوى
لما يبقى جوايا مليون صوت بيتكلم وانا تايهه فى النص
ولما يبقى جوايا مليون قرار ورأى فى دماغى وانا بردو تايهه فى النص
ومش قادره اشارك حد فى ده كله
صعب اوى ان الانسان ياخد قرار ويندم
وبيبقى اصعب لما مياخدش نفس القرار وبردو يندم
لاول مره فى حياتى
اكون بتمنى من ربنا انى اشوف بكره مخبيلى ايه
دايما مقتنعه ان بكره هيجبلى الاحسن
دايما مقتنعه ان ربنا اكيد شايلى حاجه كويسه
رغم ان الحاجه الكويسه دى اتاخرت كتير اوى عليا
ومابشفش لحد دلوقتى غير الوحش
بس انا الحمد الله راضيه
لكن مش عارفه ليه دلوقتى بقى جوايا الاحساس ده
محتاجه فعلا اعرف مستقبلى
خوف
قلق
توتر
انتظار
مش قادره افضل شايله الاحاسيس دى جوايا اكتر من كده
خوفى من بكره قاتلنى
يارب لو شايلى خير قربهولى
ولو غير كده انا راضيه بيه وهونه عليا

readmore »»

03 February 2009

فــتـره حــداد

.
7 التعليقات

كنت بحلم ان 2009 تكون احلى من اى سنه فاتت
بس ماكنتش متخيله انها هتكون شايله اسوء حاجه ممكن تحصلى
خدت منى اهم شخص فى حياتى
خدت الانسان الوحيد اللى كان بيحمينى
خدت الانسان الوحيد اللى كنت ممكن اتسند عليه فى اى حاجه فى حياتى
خدت منى بابا
جوايا دموع كتير اوى وكلام كتير اوى
والمشكله انى مش عارفه اطلع اى حاجه من دول
اد ايه بيقتل انك مش قادر تحزن على اعز شخص عندك
مش لانك قاسى اوى كده ومش عارف حتى تحزن
بس لانك ماينفعش تبكى عشان انت بتحاول تقوى ناس تانيه
انا كده
مش قادره ابكى حتى لانى بحاول اقوى ماما واختى
وكل واحده فينا بتحاول تقوى الباقى
قلبى بيصرخ اوى من جوايا بس مش قادر ينزل حتى الدموع

ناس كتير مستغربه انى حتى مش ببكى
ناس كتير مستغربه انى كنت قادره اروح امتحاناتى ودروسى
ناس كتير مستغربه ان وقت دفنه بابا انا كنت فى امتحانى
ازاى قدرت اسيبه فى اخر لحظه
ازاى قدرت اسيبه فى اخر نظره
بس انا سألت نفسى .... اشوفه لاخر مره؟ والا اكمل مشوارى اللى هو كان بيحلم انى اخلصه؟
اتنازلت عن نظرتى الاخيره ليه عشان احققله اخر حلم كان بيحلمه
لانى مش قادره انسا كلمته "اخر سنه يا دينا واخيرا هتخلصى"
ولانه حتى مالحقش يفرح بتخرجى اللى كان بيحلم بيه
مالحقش حتى يفرح بأى حاجه منى او من اختى
لو نجحت السنه دى هيبقى عشانه
ولو سقطت السنه دى هيبقى عشان انا اضعف واقل حتى من انى احققله اللى كان بيحلم بيه

الموقف اللى مريت بيه ده
خلانى اكتشف ناس كتير اوى على حقيقتها
خلانى اعرف ان الصديق اللى بجد بيبان فى المواقف اللى زى دى
الصديق مش كلام وبس
الصديق اهم واصدق واقرب من كده بكتير اوى
زى ما يكون قلبى كان حاسس كنت بتكلم اخر مره عن ناس مش حطاهم فى حساباتى بيكونوا قريبين منى اوى
وناس فاكراهم قريبين منى اوى بيكونوا ابعد مما اتخيل
الموقف ده ظهرلى معدن شخصيات كتير
خلانى احزن من جوايا على ناس ماتدهمش حقهم كويس فى حين انهم كانوا اقربلى من ناس كتير خدوا حقهم وزياده
خلانى احزن من جوايا على ناس توقعت منهم ولو اهتمام بسيط ومالقتهوش
خلانى اشطب ناس كتير من حياتى
ماعتقدش ان فى اصعب من المواقف دى عشان اصحابى اللى بجد يكونوا معايا فيها
لان مفيش حاجه هتقوينى الا هما
بس اللى مقوينى شويه
ان فى شخصيات اللى توقعته منهم لاقيته ومهما شكرتهم ووصفتلهم اد ايه هما كانوا بيقوونى ده مش هيكفيهم
ناس كتير كانوا واقفين جنبى ومعايا فى كل لحظه
من اول الشخصيات دول ساره
لو قولتلها مليون كلمه شكر مش هتكفيها
ومهما اقول من الكلام بردو مش هيكفيها
من الناس اللى بان معدنها وحبها ليا بجد فى الفتره دى
بحبك اوى و ربنا يخليكى ليا

رغم ان عدى حوالى 3 اسابيع على موت بابا
بس انا مش متخيله ان ده حصل
انا الحمد الله مؤمنه بقضاء ربنا وعارفه ان الموت بيجى لأى حد وفى اى وقت
بس لحد دلوقتى مش قادره استوعب
حساه لسه فى كل مكان فى البيت كأنى شايفاه بيتحرك قدامى
سامعه صوته فى ودنى
كل يوم بتمنى انى بكون بحلم
بابا فعلا وحشنى
وحشنى هزاره معايا
وحشنى سؤاله عليا
وحشنى اوى بجد
ربنا يرحمه ويغفرله
ويخليلى اختى وماما عشان مابقاش ليا حد الا هما
مش بتمنى اكتر من كده

readmore »»

15 January 2009

كلام والسلام

.
4 التعليقات




كلام والسلام دى يعنى كلام فاضى
رغى وخلاص
كلام مالوش اى علاقه ببعضه
بفضفض عن نفسويتى يعنى
الله
اموت يعنى والا اموت مثلا

==================

انا بمتحن للاسف
الواحد والله هيجيله شلل من اللى بيحصل ده
ايه الدكاتره الحيوانات دول
بيكرهوا الواحد فى الكليه على اللى عايزها على التعليم من اساسه
المشكله ان الواحد بيخلص الكليه
ومابيبقاش فاكر ولا كلمه من اللى درسهم طول ال4 سنين
(ده اذا كانوا 4 سنين بس يعنى)
وحتى لما بيفكر يشتغل مش بيشتغل فى مجاله
كان يوم اسود يوم ما نادو بحريه المرأه فى التعليم
ما كنا مرزوعين فى بيتنا كافين خيرنا شرنا ومستنين العدل
بلا نيله

*****

كنت بتفرج على البلوج دلوقتى
وشوفت البوست بتاع اخر تاج نزلته
كنت حابه التاج ده اوى مش عارفه ليه يمكن عشان اول تاج يجيلى بتكلم فيه كتير
وكمان وصلنى بعديه تاجين بس فى فتره انا كنت منقطعه فيها عن البلوج
لو جت الفرصه ان شاء الله انزلهم
بس لاحظت ان تقريبا انا زى ما انا
(سنى طبعا اتغير)
نفس دماغى ونفس طريقتى ونفس ردودى ماعتقدش انها تختلف عن وقت التاج لدلوقتى
الا فى حاجتين
اول حاجه
وهى حاجه غريبه الحقيقه
انا بقيت احب رامى صبرى وبتوهم لو شوفتله كليب

لا الواد ده جامد يتحب من اول اغنيه الصراحه
هو بس لو تتلغى اغنيه بحبك دى من تاريخه
وانا كنت احبه من ساعه ما اتولد

وتانى حاجه بقى
هيثم مابقاش انتيمى !!!!
او ده الواضح قدامى من فتره طويله
هو الانتيم يعنى ايه؟
حد يكون اللى بينى وبينه هاى وباى وتمام وايه الاخبار وايه الجديد وبس؟
والا حد يكون جنبى وقت حزنى قبل فرحى
حد بيخاف عليا اكتر من نفسى
حد بينصحنى لما ابقى محتاجه النصيحه
حد يكون صديق ليا بجد
وانا مابقتش شايفه ولا حاسه ده منه

*****

اد ايه بيوجع ان الواحد يكون عايز يحافظ على حد فى حياته
ويلاقى الحد ده حتى مش بيتأثر بعدم وجودك فى حياته اصلا
اد بيوجع انك تدى لحد اهتمام وصداقه وتلاقى فى المقابل انه بيبعك
او على الاقل مش بيحاول يكون قريب منك زى ما انت عايز تكون
وفى النهايه
كل قلم الواحد بياخده
بيتعلم منه جامد اوى
عشان مايحسش بوجع ضربه القلم مره تانيه

وفى المقابل
اد ايه بقى بيبقى احساس جميل اوى
لما تلاقى حد خارج حساباتك او على الاقل مش متوقع منه حاجه يكون قريب منك جدا
خايف عليك اكتر من نفسك بيطمنك واقف جنبك بيساعدك بينصحك بيحبك بجد
بيستحمل منك كتير لانه عارف انك فى الاخر اطيب من اللى بتحاول تظهره عن نفسك

اد ايه بيوجع اوى لما بناخد من اللى بنحبهم اقل بكتير من توقعتنا فيهم
واد ايه بيفرح اوى لما تاخد اكتر من اللى كنت بتتوقعه من ناس بعيد عن تخيلاتك

*****

كنت مره بلف على البلوجات
شوفت بوست فى بلوج قريته وكان ليا رأى عليه
ومنعنا للاحراج واحترام الاراء انا ماجبتش لينك البوست ده
بس كان صاحب البلوج بيتكلم عن ان معظم اصحاب المدونات بيحاولو يكتبوا حاجه
بس جميع محاولاتهم على الفاضى
هو الصراحه قالها بطريقه تانيه بس مضطره اقولها بطريقتى
معنى كلامه ان اللى بيكتبوا دول بيحاولوا ال يعنى يعملولهم تفكير
وان ليهم اراء مهمه يعنى رغم ان ده مش بيحصل
بيطلع منهم كلام على الفاضى
انا مختلفه مع الرأى ده تماما
وللاسف الوقت ماكنش سامحلى انى اعمل كومنت على البوست ده
بس كلامه كان لافت نظرى
قولت اقول رأيى هنا (بفضفض يا جدعان الله)
انا اللى شايفاه ان الواحد مش بيعمل البلوج ده ولا بيكتب فيه عشان ينزل كلامه فى الجرايد
الواحد بيكتب اللى جواه بيفضفض يعنى
كلمه وقولتها اول ما بدأت اكتب هنا
"انا وصدى صوتى فى البلوج"
لا حد هيقولى انتى بتقولى كده ليه والا بتعملى كده ليه
ولا حد هيمنعنى انى اتكلم فى اللى انا عايزاه ولا هيعدل عليا
الخلاصه انى شايفه ان البلوج ده اللى عامله ليه كامل الحريه يعمل فيه اى حاجه
ان شاء الله يجيب كتاكيت ويربيهم فيه
هو حر مش منتظر مقابل للى بيقوله
ده تفكيره حتى لو كان تافه بس تفكيره
وكل رأي ليه الحق ان الواحد يحترمه
زى ما انا محترمه رأى صاحب البوست ده

readmore »»

09 January 2009

وجهات نظر....!!!

.
3 التعليقات


موقف ونقاش حصل بينى وبين ساره صاحبتى
يمكن مش كان مهم او مش طلعنا منه بحاجه
بس وصلى احساس مهم حبيت اقوله هنا
ويمكن يكون فى حد متفق او مختلف معانا فى الرأى

*****

مره انا وهى ماشيين ولفت نظرنا اتنين بيتكلموا على اللى بيحصل فى غزه

الصراحه الراجل توهنى فى اللى كان بيقوله
مابقتش فاهمه هو عايزنا نحارب والا مش عايزنا نحارب
شويه يقول عبد الناصر كان غبى لما خلانا نروح نحارب فى حاجه مش لينا فيها اصلا
وشويه يقول "واعدو لهم ما اسطتعتم من قوة و من رباط الخيل لترهبو بها عدو الله و عدوكم"
طب يا ابن الحلال ما ترسالك على بر
وفهمنا انت عايز ايه بالظبط !!!!
بس لما مشينا الحوار ده فتح بينى وبينها موضوع مهم
يمكن كنا مختلفين تماماٌ فى الرأى
بس كنت مبسوطه اننا بنتكلم فى الموضوع ده
هى شايفه ان الفلسطنين اللى وصلوا نفسهم لكده
قولتلها ازاى يعنى
قالتلى لما السادات طلب من عرفات انه يدخل معاه فى المعاهده ويرجعله جزء من فلسطين هو رفض
واضايق اوى لما السادات راح اسرائيل يعمل المعاهده
ولما جه مصر تف (بصق يعنى بلاش جهل
) على قبر السادات
انا ماكنتش اعرف المعلومه الاخيره دى
بس قولتلها ان كان ده حصل ماعتقدش اننا هناخد شعب كامل بذنب فرد واحد منه
وان كان ناس زمان غلطت ماعتقدش بردو ان الاطفال اللى بيموتوا دلوقتى ليهم ذنب
قالتلى ان اكيد مالهمش ذنب
بس سألتنى اشمعنا عايزين مصر اللى تحارب؟ عايزين يحطوها فى وش المدفع مثلا والا ايه
قولتلها ان كنا بنتكلم فا احنا ما بنتكلمش على حرب
احنا بنتكلم على الاقل على معاهده سلام على واقفه عربيه من كل الدول مش من مصر بس
قالتلى ان كلامها كله او معظمه ماكنش رأيها لوحدها
ده كان رأى ناس تانيه كانت بتتناقش معاهم فى الموضوع
لما سمعت كلامها حسيت احساس غريب بصراحه
لما احنا مجرد افراد ومش قادرين نتفق فى الرأى
ازاى رؤساء الدول بهيبتهم ومسؤوليتهم وقرارتهم هيقدرو يتفقوا فى الرأى؟؟؟
المهم انى فى النهايه وصلت لحاجه مهمه اوى
انى اتشائمت


readmore »»

05 January 2009

احنا ناس هفأ

.
4 التعليقات




طب وبعدين؟؟؟
اه فعلا وبعدين يعنى ؟؟!!!!
لا حقيقى وبعدين بردو مش فاهمه !!!!!!!!!!!!!
هو احنا هنفضل كده كل يوم يموت مننا بالالاف واحنا ساكتين
وتضيع مننا بلاد واحنا بردو ساكتين
ده الواحد لما بيبقى ملطشه للناس كده (زى ما احنا كعرب بقينا ملطشه لامريكا واسرائيل)
بيقولوا عليه هفأ واحنا الصراحه بقينا هفأ زى ما الكتاب بيقول
ومش بنفكر حتى نعمل رد فعل واحد مهم وعليه القيمه
لا الكلام بيفيد
ولا البكاء بيفيد

معقول مافضلش فى ايدينا غير الدعاء؟!!!
اكيد ربنا معاهم وينصرهم ويكون فى عونهم
بس ليه احنا مايكنش لينا رد فعل اكبر من كده
انا مش قصدى اننا نحارب عشان ما تبقاش وسعت اوى منى
لان ماتوقعش ان فى بلد عربيه عندها القدره انها تقف قدام امريكا او اسرائيل فى حرب
بس على الاقل يكون فى رد فعل...يكون فى رأى....يكون فى كلمه لينا كأمه عربيه
كل رئيس دوله بيحاجى على اللى عنده ومش بيحاول يخلى اذا كان امريكا والا اسرئيل يبصو ناحيته

خايف لحسن يتعمل فيه زى ما بيعملوا فى غيره
الواحد مابقاش مطمن اصلا ايه اللى هيحصل لبكره

احنا بقينا قاعدين ومستنين اللحظه اللى يتاخد فيها حقنا
اسفه ... هو بالفعل متاخد
انا قصدى اننا نضرب بصاروخ فوق دماغنا كده
وانا واثقه ان ساعتها بردو احنا مش هنتكلم
مش قولت احنا بقينا هفأ يا جدعان

readmore »»

01 January 2009

HappY NeW YeaR 2009

.
6 التعليقات



بحلم بسنه احسن من كل السنين اللى فاتت
ليا ولكل اللى حواليا

♥ ▀▄▀▄▀▄▀ ♥ HaPpY nEw YeAr ♥ ▀▄▀▄▀▄▀ ♥


readmore »»
 

FaceBook Comments

wibiya widget