15 January 2009

كلام والسلام

.




كلام والسلام دى يعنى كلام فاضى
رغى وخلاص
كلام مالوش اى علاقه ببعضه
بفضفض عن نفسويتى يعنى
الله
اموت يعنى والا اموت مثلا

==================

انا بمتحن للاسف
الواحد والله هيجيله شلل من اللى بيحصل ده
ايه الدكاتره الحيوانات دول
بيكرهوا الواحد فى الكليه على اللى عايزها على التعليم من اساسه
المشكله ان الواحد بيخلص الكليه
ومابيبقاش فاكر ولا كلمه من اللى درسهم طول ال4 سنين
(ده اذا كانوا 4 سنين بس يعنى)
وحتى لما بيفكر يشتغل مش بيشتغل فى مجاله
كان يوم اسود يوم ما نادو بحريه المرأه فى التعليم
ما كنا مرزوعين فى بيتنا كافين خيرنا شرنا ومستنين العدل
بلا نيله

*****

كنت بتفرج على البلوج دلوقتى
وشوفت البوست بتاع اخر تاج نزلته
كنت حابه التاج ده اوى مش عارفه ليه يمكن عشان اول تاج يجيلى بتكلم فيه كتير
وكمان وصلنى بعديه تاجين بس فى فتره انا كنت منقطعه فيها عن البلوج
لو جت الفرصه ان شاء الله انزلهم
بس لاحظت ان تقريبا انا زى ما انا
(سنى طبعا اتغير)
نفس دماغى ونفس طريقتى ونفس ردودى ماعتقدش انها تختلف عن وقت التاج لدلوقتى
الا فى حاجتين
اول حاجه
وهى حاجه غريبه الحقيقه
انا بقيت احب رامى صبرى وبتوهم لو شوفتله كليب

لا الواد ده جامد يتحب من اول اغنيه الصراحه
هو بس لو تتلغى اغنيه بحبك دى من تاريخه
وانا كنت احبه من ساعه ما اتولد

وتانى حاجه بقى
هيثم مابقاش انتيمى !!!!
او ده الواضح قدامى من فتره طويله
هو الانتيم يعنى ايه؟
حد يكون اللى بينى وبينه هاى وباى وتمام وايه الاخبار وايه الجديد وبس؟
والا حد يكون جنبى وقت حزنى قبل فرحى
حد بيخاف عليا اكتر من نفسى
حد بينصحنى لما ابقى محتاجه النصيحه
حد يكون صديق ليا بجد
وانا مابقتش شايفه ولا حاسه ده منه

*****

اد ايه بيوجع ان الواحد يكون عايز يحافظ على حد فى حياته
ويلاقى الحد ده حتى مش بيتأثر بعدم وجودك فى حياته اصلا
اد بيوجع انك تدى لحد اهتمام وصداقه وتلاقى فى المقابل انه بيبعك
او على الاقل مش بيحاول يكون قريب منك زى ما انت عايز تكون
وفى النهايه
كل قلم الواحد بياخده
بيتعلم منه جامد اوى
عشان مايحسش بوجع ضربه القلم مره تانيه

وفى المقابل
اد ايه بقى بيبقى احساس جميل اوى
لما تلاقى حد خارج حساباتك او على الاقل مش متوقع منه حاجه يكون قريب منك جدا
خايف عليك اكتر من نفسك بيطمنك واقف جنبك بيساعدك بينصحك بيحبك بجد
بيستحمل منك كتير لانه عارف انك فى الاخر اطيب من اللى بتحاول تظهره عن نفسك

اد ايه بيوجع اوى لما بناخد من اللى بنحبهم اقل بكتير من توقعتنا فيهم
واد ايه بيفرح اوى لما تاخد اكتر من اللى كنت بتتوقعه من ناس بعيد عن تخيلاتك

*****

كنت مره بلف على البلوجات
شوفت بوست فى بلوج قريته وكان ليا رأى عليه
ومنعنا للاحراج واحترام الاراء انا ماجبتش لينك البوست ده
بس كان صاحب البلوج بيتكلم عن ان معظم اصحاب المدونات بيحاولو يكتبوا حاجه
بس جميع محاولاتهم على الفاضى
هو الصراحه قالها بطريقه تانيه بس مضطره اقولها بطريقتى
معنى كلامه ان اللى بيكتبوا دول بيحاولوا ال يعنى يعملولهم تفكير
وان ليهم اراء مهمه يعنى رغم ان ده مش بيحصل
بيطلع منهم كلام على الفاضى
انا مختلفه مع الرأى ده تماما
وللاسف الوقت ماكنش سامحلى انى اعمل كومنت على البوست ده
بس كلامه كان لافت نظرى
قولت اقول رأيى هنا (بفضفض يا جدعان الله)
انا اللى شايفاه ان الواحد مش بيعمل البلوج ده ولا بيكتب فيه عشان ينزل كلامه فى الجرايد
الواحد بيكتب اللى جواه بيفضفض يعنى
كلمه وقولتها اول ما بدأت اكتب هنا
"انا وصدى صوتى فى البلوج"
لا حد هيقولى انتى بتقولى كده ليه والا بتعملى كده ليه
ولا حد هيمنعنى انى اتكلم فى اللى انا عايزاه ولا هيعدل عليا
الخلاصه انى شايفه ان البلوج ده اللى عامله ليه كامل الحريه يعمل فيه اى حاجه
ان شاء الله يجيب كتاكيت ويربيهم فيه
هو حر مش منتظر مقابل للى بيقوله
ده تفكيره حتى لو كان تافه بس تفكيره
وكل رأي ليه الحق ان الواحد يحترمه
زى ما انا محترمه رأى صاحب البوست ده

4 comments

MR-BOLICA said...

الاول يا دينا ربنا معاكى ومعانا كلنا فى الامتحانات يارب
ويسترها ويعديها على خير لانى بجد جيبت جاز خلاص

بالنسبه بقا لرامى صبرى .. تاكدى انوو بيحبك زى ماانتى بتحبيه كده
وبيحبك فى كل وقت مش زيك كده بتكرهيه علشان اغنيه مع انها جامده جدا والله


بالنسبه بقا للى كان مكتوب فى البلوج .. افتكر هو لو كان اصلا بيفكر مكنش شغل باله وخلاله فى بلوجه ومواضيعه انما هو اصلا مش لاقى حاجه يكتبها وبيتقض الخرين وخلاص .. ده فى حد زاته فراغ لانو مش ماسك هيئة الدفاع عند البلوجرز

نيجى بقا لاهم نقطه الا وهيا موضوع الانتيم
بصراحه انا حاسس او مش حاسس متاكد ان البوست طالع من جواكى اوى . من قلبك وحاسااه وانتى بتكتبيه كل حرف فيه
على اد ما فى احساسسين انتى حاسهم احساس بالحزن والتانى احساس انك مبسوطه اوى ومش متوقعين ان الناس دى كانت تدينا اوى كده
الاحساس الاخير ده صدقينى هو اللى حيكسب ...مهما كان مدى الوجع اللى فى الاحساس الاول..لو لحظه واحده حسيتى فيها انك مبسوطه بجد.. مع الوقت حتلاقى الاحساس الاول ده اختفى لانوو بيبعد اصلا وبيخش مكانه الجديد
وافتكر مع الوقت الخبره زادت ..وبقينا نعرف نميز

DaNDoNa said...

اولا اسفه اوى يا احمد على تاخيرى فى الرد على الكومنت ده
انا مش معترضه على صاحب البلوج فى اللى كاتبه
وهو حر ينتقد الاخرين ده شىء اكيد يرجعله
بس انا كنت بتكلم فى ان دى حريه شخصيه
البلوج ده ملك لصاحبه بس هو اللى يحدد يكتب فيه ايه ويحط فيه ايه
ممكن نعتبره مساحه حريه للشخص بيقدر يعبر فيها عن حاجات كتير جواه من الصعب انه يقولها لحد ده بالنسبه اذا كان البلوج شخصى يعنى


انا معاك ان احساسى بانى مبسوطه لان فى ناس بتدينا اكتر من اللى متوقعينه منهم ده بيفرحنى اوى وبيخلينى بجد احس ان فى ناس حواليا بيهتموا بيا حتى لو انا مش شايفاهم
بس انت بتحزن من جواك اوى على ناس فعلا ماتستحقش تكون موجوده فى حياتك ومع ذلك كنت بتعتبرهم حاجه كبيره اوى عندك

واكيد الواحد كل ما بيعدى عليه يوم وهو عايش على وش الدنيا بيزيد خبره وبيعرف يميز كويس بين الاشخاص

ميرسى اوى يا احمد على ردك ومتابعتك للبلوج :)

MR-BOLICA said...

حمد الله على سلامه الكمبيوتر
بس عارفة يا دينا.. حيجى يوم الاحساس الحلوو ده حيغطى على الاحساس الوحش ... ومع الوقت حتلاقى ناس بتتدبل وتتنحط مكان الناس التانيه
ودى على فكره سنه الحياه كده الحياه كلها تجارب

DaNDoNa said...

اكيد طبعا يا احمد
وحياتنا دى انا مراحل
كل مرحله ليها اشخاصها
ميرسى يا احمد مره تانيه

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget