03 February 2009

فــتـره حــداد

.

كنت بحلم ان 2009 تكون احلى من اى سنه فاتت
بس ماكنتش متخيله انها هتكون شايله اسوء حاجه ممكن تحصلى
خدت منى اهم شخص فى حياتى
خدت الانسان الوحيد اللى كان بيحمينى
خدت الانسان الوحيد اللى كنت ممكن اتسند عليه فى اى حاجه فى حياتى
خدت منى بابا
جوايا دموع كتير اوى وكلام كتير اوى
والمشكله انى مش عارفه اطلع اى حاجه من دول
اد ايه بيقتل انك مش قادر تحزن على اعز شخص عندك
مش لانك قاسى اوى كده ومش عارف حتى تحزن
بس لانك ماينفعش تبكى عشان انت بتحاول تقوى ناس تانيه
انا كده
مش قادره ابكى حتى لانى بحاول اقوى ماما واختى
وكل واحده فينا بتحاول تقوى الباقى
قلبى بيصرخ اوى من جوايا بس مش قادر ينزل حتى الدموع

ناس كتير مستغربه انى حتى مش ببكى
ناس كتير مستغربه انى كنت قادره اروح امتحاناتى ودروسى
ناس كتير مستغربه ان وقت دفنه بابا انا كنت فى امتحانى
ازاى قدرت اسيبه فى اخر لحظه
ازاى قدرت اسيبه فى اخر نظره
بس انا سألت نفسى .... اشوفه لاخر مره؟ والا اكمل مشوارى اللى هو كان بيحلم انى اخلصه؟
اتنازلت عن نظرتى الاخيره ليه عشان احققله اخر حلم كان بيحلمه
لانى مش قادره انسا كلمته "اخر سنه يا دينا واخيرا هتخلصى"
ولانه حتى مالحقش يفرح بتخرجى اللى كان بيحلم بيه
مالحقش حتى يفرح بأى حاجه منى او من اختى
لو نجحت السنه دى هيبقى عشانه
ولو سقطت السنه دى هيبقى عشان انا اضعف واقل حتى من انى احققله اللى كان بيحلم بيه

الموقف اللى مريت بيه ده
خلانى اكتشف ناس كتير اوى على حقيقتها
خلانى اعرف ان الصديق اللى بجد بيبان فى المواقف اللى زى دى
الصديق مش كلام وبس
الصديق اهم واصدق واقرب من كده بكتير اوى
زى ما يكون قلبى كان حاسس كنت بتكلم اخر مره عن ناس مش حطاهم فى حساباتى بيكونوا قريبين منى اوى
وناس فاكراهم قريبين منى اوى بيكونوا ابعد مما اتخيل
الموقف ده ظهرلى معدن شخصيات كتير
خلانى احزن من جوايا على ناس ماتدهمش حقهم كويس فى حين انهم كانوا اقربلى من ناس كتير خدوا حقهم وزياده
خلانى احزن من جوايا على ناس توقعت منهم ولو اهتمام بسيط ومالقتهوش
خلانى اشطب ناس كتير من حياتى
ماعتقدش ان فى اصعب من المواقف دى عشان اصحابى اللى بجد يكونوا معايا فيها
لان مفيش حاجه هتقوينى الا هما
بس اللى مقوينى شويه
ان فى شخصيات اللى توقعته منهم لاقيته ومهما شكرتهم ووصفتلهم اد ايه هما كانوا بيقوونى ده مش هيكفيهم
ناس كتير كانوا واقفين جنبى ومعايا فى كل لحظه
من اول الشخصيات دول ساره
لو قولتلها مليون كلمه شكر مش هتكفيها
ومهما اقول من الكلام بردو مش هيكفيها
من الناس اللى بان معدنها وحبها ليا بجد فى الفتره دى
بحبك اوى و ربنا يخليكى ليا

رغم ان عدى حوالى 3 اسابيع على موت بابا
بس انا مش متخيله ان ده حصل
انا الحمد الله مؤمنه بقضاء ربنا وعارفه ان الموت بيجى لأى حد وفى اى وقت
بس لحد دلوقتى مش قادره استوعب
حساه لسه فى كل مكان فى البيت كأنى شايفاه بيتحرك قدامى
سامعه صوته فى ودنى
كل يوم بتمنى انى بكون بحلم
بابا فعلا وحشنى
وحشنى هزاره معايا
وحشنى سؤاله عليا
وحشنى اوى بجد
ربنا يرحمه ويغفرله
ويخليلى اختى وماما عشان مابقاش ليا حد الا هما
مش بتمنى اكتر من كده

7 comments

MR-BOLICA said...

البقاء لله يا دينا شدى حيلك المومن مصاب
ان شاء الله تبقى اخر الاحزان علكيم يارب .. انتى اللى عملتيه ده مس سهل انك تبقى متماسكه طول الفتره دى بس هو ده الصح لانك لازم تبقى واقفه مع مامتك لانك انتى الكبيره .. والامتحانات والمزاكره دى ان شاء الله ربنا يكتبلك النجاح وحتعرفى ادى ايه انتى مبسوطه قدام نفسك وفرحانه انك رديته وحققتيلو اللى كان عايزه منك ...الحياه حتستمر على فكره دى سنتها وربنا يارب يرحمه ويحسن اليه ويجعل مثواه الجنه
انا طبعا مجرب وافاه بس مش عاصرته زيك كتير بس عارفه انها بتوجع اوى بس الحمد لله ده قدر ربنا وكلنا حنموت انتى خليكى متامسكه وربنا حيقويكى وان شاء الله تفرحى بنتجتيك انتى واختك وتفرحى مامتك بيكم وتبقى مبسوطه انك فرحتى باباكى واللى حيفضل ليه انكم تدعيله
وربنا يخليك مامتك واختك يارب

MR-BOLICA said...

ابقى طمنينى عليكى يا دينا

maioya said...

حبيبتي معلش كلنا بنفقد
ناس في حياتنا من غيرهم بنبقي اضعف
بس بنقوي بذكراهم وتحقيق حاجه
بيحلموا بيها
مش هقولك هاتنسي لانك عمرك ماهتنسي
بس خليكي ديما فكره انه جزء منك
وجواك وطول ماهو عايش جواكي
هتفضلي ديما شايفاه وحساه حواليكي
خليكي اقوي عشان عارفين
انك اقوي
وربنا يخلي مامتك ونيره وان شاء الله
هيكونو سندك في الدنيا
وان شاءالله ربنا هايقويكي ويقويهم بيكي
سامحيني بجد كنت مقصره اوي
بس ظروفي كانت اقوي مني
ويارب يطمنا عليكي

meroooo said...

انا مش عارفه انتى بتدخلى لسه هنا ولالأ وكان نفسى اكون زى ساره وبحسدها انها قدرت تكون جنبك وانا لأ بس انتى عارفه انا فين وانتى فين بس والله كنت بحاول اكلمك وانتى مابتردش مش عارفه ليه ولعل المانع خير وانا عايزاكى تهدى شويه مع نفسك وتديها حقها فى زعلها عشان انتى تستاهلى كل خير يادينا

Bent Men ElZman Da !! said...

احمد...مى...اميره
ميرسى على اهتمامكم وردكم
والحمد الله على اى حاجه
:)

NaiRa said...

im so sad
الله يرحمك يا بابا ويجعل مسواك الجنه
بحبك وهفضل احبك لاخر يوم فى حياتى يا اغلى انسان فى حياتى
ربنا يخليكى ليا يا دينا انتى وماما

Bent Men ElZman Da !! said...

يارب
ويخليكى انتى وماما يا نيره :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment