11 February 2009

قرار....مستقبل

.

بيبقى صعب اوى على الواحد انه ياخد قرار مهم فى حياته
والاصعب اكتر ان يكون القرار اللى هيتاخد ده سلاح ذو حدين
لو قولت اه هيبقى ليه اضراره
ولو قولت لا بردو هيبقى ليه اضراره
والمشكله ان الواحد لازم ياخد القرار ده لوحده
من غير ما يشارك اى حد فيه ولو حتى اقرب الناس ليه
يااااااه احساس وحش اوى
لما يبقى جوايا مليون صوت بيتكلم وانا تايهه فى النص
ولما يبقى جوايا مليون قرار ورأى فى دماغى وانا بردو تايهه فى النص
ومش قادره اشارك حد فى ده كله
صعب اوى ان الانسان ياخد قرار ويندم
وبيبقى اصعب لما مياخدش نفس القرار وبردو يندم
لاول مره فى حياتى
اكون بتمنى من ربنا انى اشوف بكره مخبيلى ايه
دايما مقتنعه ان بكره هيجبلى الاحسن
دايما مقتنعه ان ربنا اكيد شايلى حاجه كويسه
رغم ان الحاجه الكويسه دى اتاخرت كتير اوى عليا
ومابشفش لحد دلوقتى غير الوحش
بس انا الحمد الله راضيه
لكن مش عارفه ليه دلوقتى بقى جوايا الاحساس ده
محتاجه فعلا اعرف مستقبلى
خوف
قلق
توتر
انتظار
مش قادره افضل شايله الاحاسيس دى جوايا اكتر من كده
خوفى من بكره قاتلنى
يارب لو شايلى خير قربهولى
ولو غير كده انا راضيه بيه وهونه عليا

9 comments

meroooo said...

لالوم عليكى زى ماقوتلك
انتى دلوقتى فى مرحله انتقاليه مع نفسك يادينا تقدرى دلوقتى تشوفى الامور اوضح وتختارى وتقررى زى ماانتى عايزه وماحدش هيقدر يلومك
وربنا يوافقك ويدمها عليك الصبر

MR-BOLICA said...

اتاكدى يا دينا ان اللى انتى فيه ده
احسن ربنا اخترهالك ...عسى ان تكرهوا شيئا وهو خيرا لكم
محدش فينا عارف الدنيا مخبياله ايه بس ثقتك فى ربنا لازم تكون كبيره لابعد حد
احنا كلنا حنموت انا بقول الشهاده قبل ماا نام ..لازم تتمسكى وتكملى حياتك يا دينا الدنيا مبتقفش وياريت متحوليش تفكرى فى اى حاجه دلوقتى زى ما اميره قالت انتى فى مرحله بتتنقلى ليها فى حيااتك اعتمادك على نفسك حيبقى فيها اكبر بكتير من قبل كده...اى قرار حتخديه لازم تبقى دارساه اوى لان مفيش تصحيح فيه
بتطلى تفكرى لغايه متخرجى من المحرله دى اللى ان شاء الله حتعدى على خير انتى داخله على الترم التانى ولازم تشدى حيلك علشان تخلصى السنه دى

حياه بلا عنوان said...

فعلا المستقبل لازم يكون قرار وقرار نقد ننفذو ونقدر عليه لان العمر والمستقبل واحد ولازم نحافظ عليه والبوست جميل يارت تقبلى مرورى الاول تحياتى

DaNDoNa said...

اميره

ميرسى اوى يا اميره على كلامك وعلى الكومنت :)

DaNDoNa said...

احمد

اكيد يا احمد انا واثقه ان اللى ربنا كتبهولى فيه الخير حتى لو ماكنتش انا شايفه ده دلوقتى بس اكيد هشوف كده قدام
والحمد الله على اى حاجه
ميرسى على الكومنت يا احمد

DaNDoNa said...

حياه بلا عنوان

اولا منوره البلوج يا قمر
انا معاكى اكيد فى كلامك ان المستقبل قرار
بس مش دايما القرار ده بيبقى فى ايدينا اننا نتحكم فيه
وعشان كده مش دايما المستقبل بيجى زى ما احنا على الاقل متوقعين او مستنين
ميرسى اوى على الكومنت

Abdo said...

السلام عليكم ازيك يا دنيا بصى اسلوبك لوحده روعه بيخلى الى قاعد يقرا الكلام يتشد عشان يعرف الباقي فى موضوعك الخوف الى انتى فيه احساس طبيعي انك تحسيه بس له وقت وهيعدي بس لما تحققي رغبت ناس كانت بتتمني تشوفك احسن انسانه فى دنيا ربنا مخبى ايه لينا ؟؟ كا مسلمين ربنا مخبى لينا كل خير وبشر بده فى القراءن ومفيش شىء بيحصل لينا غلط غير ما تلاقينا بنقول كل ما يصيبنا الا ما كتب الله لنا وهو بيكون مجرد اختبار امتحان لاى بنى ادم هيعدي من كبوته ولا
لاء حق ربنا على عباده انه يختبرهم قوة صبرهم وتحملهم
وممكن تكون ضربة تبقي سبب لخير اى ان كان الخير تكفي اننا بنقرب لربنا اوي وقت ضعفنا وقت شدتنا واعرفي كويس طول مانتى حطه خير فى بالك وهدف لحياتك تقدرى تحققيه ولو انتى صح فيه هتلاقى كل الى بيحبك جنبك ويقوكي على انك تسعي لهدفك ...سجلي اعجابى بقلمك واسلوبك

NeNo said...

NO Comment
قل لا يصيبنا الا ما كتب الله لنا
الحمد لله على كل شيئ نايس يا دينا بجد ومتقلقيش من حاجه ربنا شيهالك ربنا مش مخبيلك غير كل خير ان شاء الله

DaNDoNa said...

عبدو

وعليكم السلام ورحمه الله وبركاته
ميرسى اوى ياعبدو على كلامك
واكيد انا مقتنعه ان اى حاجه بنمر بيها احنا شايفنها مش فى صفنا فيها حكمه وربنا بيختبرنا بيها
والحمد الله على اى حاجه
ميرسى اوى يا جميل

نينو

خير ان شاء الله يا نيره

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget