26 March 2009

كلام والسلام....كلاكيت تانى مره

.




اخيرااااااااااااا البوم فضل نزل
ايوه سامعه حد بيقول ايه المعلومه القديمه دى
يعنى اهو عقبال ما خدت فرصتى وانفردت بذات نفسى شويه واستوعبت الالبوم عن جداره
قولت اما انطلق بقى واقول احاسيسى ومشاعيرى .. بلاش يعنى ؟! الله !!
الراجل ده وهمى
غاب ورجع بالتقيل والله
حساه بجد بيقول حاجه من جوايا
نسيت انساك...بفكر بالساعات...افترقنا...بعدا ع البال...هاخلى بالى...جوا الروح
تؤ تؤ ماحدش يتكلم بقى مايتكررش الراجل ده حقيقى يعنى
انا مش مجنونه بيه بهبل يعنى عشان ماحدش يقول عليا تافهه
مش زى بنات اليومين دول اللى بيترموا على المطربين يعنى
اترمى ايه ده انا مليون مطرب يتمنانى اومال طبعا(وسعت دى منى صح)
انا بحب فضل عشان لما بيقول .. بيقول حاجه جوايا
ده بخلاف ان احساسه عالى وشخصيه محترمه
الواحده مننا هتحب ايه فى مطربها المفضل الا الحاجات دى يعنى
وبعدين المطرب من دول ايه غير شخصيه محترمه واحساس حلو وشويه حاجات فوق بعضها
اما حاجه غريبه والله

*****
اوقات كده ببص لنفسى فى المرايه
بحس بصراحه بأحساس غريب
(اللى بيخااااااف يروح)
بحس ان روحى طلعت بره جسمى وبتبص عليا
(قولت اللى بيخاف يروح ده كده فيلم رعب)
لا فعلا انا بحس بكده
يتقال عليا مجنونه يتقال عليا جالى استبحس فى الذاكره مش مهم
بس دى حقيقه
بحس انى حتى بشوف ملامحى مختلفه
بحس انى بشوف انسانه تانيه
وروحى بتقولى هى دى اللى انا عايشه جواها
وتسالنى انا مين
بقولها انا دينا
لا والنبى؟؟ يعنى تبقى ايه فى الدنيا دى بتهببى ايه على عينك
اسكت ومالقاش عندى رد
للدرجه دى بلاقى نفسى فاضيه اوى من جوه ومش لاقيه رد
لدرجه انى بحس فعلا ان روحى بتروح منى
وبمشى من قدام المرايه اللى انا قدامها
عشان ماحسش انى ضعيفه وتايهه اكتر من كده
انا عارفه وربنا ان اخرتى وحشه
وان الناس هتقول عليا اتجننت بس ايه الجديد ما انا عارفه انى مجنونه اصلا

*****

هو ليه مفهوم الاخلاق بقى عندنا مختلف ومقاسه واسع اوى كده
يعنى اللى اعرفه ان الاخلاق بتحدد بمدى تدين الشخص
او طريقه معاملته مع اهله ومع الناس واحترامه ليهم مثلا
انما اللى بقيت اشوفه دلوقتى ان كل واحد بيحدد الاخلاق على مزاجه وحسب ما هو شايف
انا شايفه وعارفه وواثقه ان البنت اللى بتشرب سجاير والا شيشه دى فيها حاجه غلط
ده من رأيى انااااااا تحديدا(ده مجرد مثال)
انما فى ناس شايفه ان ده شىء عادى وبييييس وقضيها
كل واحد حر فى اللى بيعمله
بس انا بتكلم عن مفهوم الاخلاق
ووارد جدا كمان ان البنت اللى بتشرب سجاير دى تكون اخلاقها كويسه
بس ليه تضيع ده بحاجه تافهه ومالهاش قيمه
فى ناس تقول عليا معقده وناس تقول عليا محبكاها
بس انا كده دماغى كده واتربيت كده

*****

سمعت ان فى يوم ممكن تحصل فيه معجزه غريبه اوى
انى اتجوز!!!!!!!!
اه ده بما انى داخله على ال 22 سنه دلوقتى بسم الله ما شاء الله يعنى
مش عارفه ليه دايما احس انى اخرى خطوبه
اه يا اختشى خطوبه ايه المشكله فى كده يعنى
اصل الصراحه فكره الجواز دى موترانى اوى
يلهوتى يعنى انا يجى عليا يوم من الايام وابقى وشى فى وش انسان طول حياتى
ايه الشلل اللى انا فيه ده
هاطيقه ازاى والاهم هو هيطقنى ازاى
اذا كنت انا نفسى مش طايقه نفسى
وعارفه ان دماغى جزمه قديمه وماحدش ينفع يعيش معايا
لا لا لا مش قادره اتخيل ولا اتصور ولا اعيش ولا اشعر ولا احس ولا انيل اى حاجه فى الفكره دى
يمكن انا بقول كده عشان مش بحب حد يعنى
ما اهو اكيد لو بحب حد هاكون قادره استحمله طول حياتى
وهيبقى المنيل على عينه اللى اسمه حب ده عاميه عن دماغى الجزمه دى
والله ممكن ليه لا
لا لا لا بس بردو مش قادره اتخيل وربنا اه وحياه خالى حسين مش قادره اتخيل
هو مين حسين ده؟

12 comments

MR-BOLICA said...

elawal ya dinaa begd ya ba5t fadl beiky wa enty asln ay 7add ytmnakay :h:

ka 7ett el maryaa ba2aa di malhash alla tefsir wa7d bass enty mosh mabsotaa mn gowaky :S

gowaa hoa el ahm baraa dah el skelly leus ela
7awely tefry mn gowaa 7ataa low mafis bettly di ba2a (:S)

الاخلاق اخلاق لا حتتجزا ولا حتتغير ولا حتختلف

bensbaa la elgowaz el7ob el 7ob lamaa 7augy 7atb2y asln 3ayzaa tetgowzy wa asln 7atboa 3ayezn tfdlo fi wosh ba3d :P

ahm 7agaa yekon mozi3 zay ma oltelk :f:


kalam wa el salam dah gammmed 5alih sabet ;)

Abdo said...

داينو دلع كلمة ديناصور مش انتي :P:P

ونبى فضل شاكر حلو يا دينا احسن من مطرب الجير شعر صدري بخير الى حواجبه جيبه رقم تمانيه ده ..

اما بقي احساسك ده والى مش عارف جالك ازاى ...بصى
اى بنى ادم منا عمكره ما بيظهر نقط ضعفه لناس بتكون بينه وبين نفسه فعلا وقت ما تبصى فى مرايا بس فين مرايتك مرايتك الخارصه ولا انهي مرايا انتى عايزه مرايا الى لو انتى مجروحه مش هتكسفي ودارى جرحك منها وقتها تلاقي مرايا دي هى بدويكي وتنقلك من ضعفك لقوتك وعنيكي الى تشوفي بيها ..انتى وحيده من
جواكي؟؟؟
يااااااااه شفت وعرفت كتير بشكل ده ديما بينزلو من نظرى .....صفاقه


موضوع الجواز ده بقي بغض نظر انك مجنونه ودماغك جزمه وكل كلام ده

اكيد انتى لما فى يكون فى حد تفكيره قريب من تفكيرك سيبك من كلمة حب على الاقل فى بينكم كيميا وتفاهم وافكاركم متقاربه هتسهل حجات كتير والشىء ده زيه زي الموت هو الى بيجرى ورانا لحد اخر يوم فى عمرنا وبيصبنا وهتلاقي نفسك بتتغيرى عشان الحد ده وربنا يرزقك بالى يصونك ويحافظ عليكي انتى بنت حلال وكويسه

Bant El7ag Dracula said...

mabrok ya 3am 3la alook al gamad da :d:

Bant El7ag Dracula said...

ahhhhhhhhhh 3la fkra aktar 7aga 3gbany al sa3a t7faaa bgad

Bant El7ag Dracula said...

wa 3la fakra ana lsa d`7la al blog ambar7 wy shoft al comment bta3k wrdat 3lh wktbt ba2y al story ok

DaNDoNa said...

بوليكا

ده انا اللى يابختى ان واحد زى فضل ده فى الدنيا :L
بس اخجلتم تواضعنا يا احمد والله
حكايه المرايه دى انا مش فكرتلها فى تفسير يا احمد بس بستغرب نفسى مش اكتر
وبعدين دى (:S)
بقت جزء من شخصيتى :D
وانا خلاااااااااص بعلن مناهضتى للزواج عن حب
بلا صالونات بلا انتريهات يا شيخ
كلام والسلام ده حاجات بتيجى فى دماغى كده بس يا احمد مالهاش علاقه ببعض فابقول انزلها ادينى بهيس مع نفسى شويه

ميرسى اوى ليك ومنورنى دايما وربنا

Gemy said...

اكيييييييييييد ان شاء الله هيجى اليوم وهتلاقى الحد اللى هتكون سعادتك معاه
ويارب يكون قريب
واتمنالك السعاده بجد
بلوج جميله جدا
ومواضيع اجمل
واتمنى تقبلينى صديق ليكى
وضيف دائم ليكى ان شاء الله

DaNDoNa said...

عبدو

طب وانت جاى تدلع الديناصورات هنا ليه
على اساس اننا فى العصر الحجرى مثلا :P
وقصدك ايه بمطرب الجيل والا اندهلك نيره :P
وبعدين فضل غير اى حد
وانا مش وحيده ولا حاجه ومش شرط انى بقف قدام المرايه بفكر فى حاجه معينه بعينها ولا اقول نقط ضعفى ولا حتى اشكيلها بس ببصلها لمجرد انى اشوفنى بطريقه مختلفه من جوايا
صح انا بردو بقول كده اكيد لو فى حد دماغه هتفهم دماغى هيحس انى سبحانك يارب عاقله
والله وارد

ميرسى اوى يا عبدو على متابعتك ومنور البلوج

DaNDoNa said...

بنت الاونكل دراكولا :D

انتى لسسسسسه فاكره يا اختى
البلوج متجدد بقاله سنه
بس هاروح دلوقتى اكمل باقى القصه لما نشوف اخرتها :P

DaNDoNa said...

جيمى

ميرسى اوى يا باشا
ومنور البلوج ويشرفنى طبعا انك تكون صديق ليا

Lady E said...

دخلت مدونتك من اللينك بتاع مدونتك لما دخلتي مدونتي :) تقدري تكرري الجملة دي 10 مرات ؟!

بجد فرحت جدا انك بتتابعي مدونتي وكمان ضايفاها عندك ده ايه الهنا اللي انا فيه ده

وفرحت كمان لما لاقيت في حاجات كتير في افكارك هي نفس ذات افكاري زي فكرة الخطوبة اللي صعب تقلب بجواز وزي الاغاني الجميييييييلة بتاعت فضل شاكر

DaNDoNa said...

طب لو قولت الجمله دى 10 مرات هتدينى كام؟؟

مبسوطه اوى والله انك زورتى مدونتى وانك كمان ضفتينى عندك
وانا اللى بتأسفلك انى متابعه مدونتك بس مش عملت كومنت قبل كده :$
الحمدالله انى اخيرا لاقيت حد متفق معايا فى نفس الفكره لحسن حسيت انى مجنونه والا حاجه :D
منورانى يا قمر والله

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget