05 May 2009

تخااااااريف

.

مبسوطه بقالى يومين عشان حصلت حاجه تبسط
(ايه الهبل ده ما اكيد مبسوطه عشان حاجه تبسط يعنى)
بس حسيت انى مفيده
عملت حاجه لبابا هيفتكرنى بيها لما نتقابل فى الاخره ان شاء الله
يمكن كنت سبب فيها مش اكتر
بس عشان ابقى الولد الصالح اللى بيدعو له زى ما المفروض اكون
مبسوطه اوى بده
ويارب تكون وصلتله

بس فى المقابل
انا حاسه ان فى حاجه واقعه من جوايا
يعنى اه الموضوع يبسط وانا مبسوطه فعلا
بس زعلانه بردو
لا لا انا مش زعلانه بس انا تايهه
من الاخر انا
مــــتــنـــــحـــــه

بيبقى احساس تنح اوى
لما تحس انك فااااااااااااااااااضى
متنح وبتفكر ... بس بتفكر فى ايه ماتعرفش !!!
وتحس انك عايش حياتك طيشه كده
نفسك تعمل حاجه مهمه ومش عارف
نفسك تبقى حاجه مهمه وبردو مش عارف
بقالى فتره
كل ما اروح اترزع فى حته
يكون جنبى شويه شباب وبنات بيتكلموا على مشروع بيعملوه
سواء بقى كان مشروع تخرج او مشروع بيزنس
بقول لنفسى ياربى ليه مابقاش كده
انا عايزه اروح واجى واشتغل واتعب واعمل حاجه ابقى فخوره بيها
انا هافضل قاعده فى بيتنا زى خبيتها كده لحد امتا
ايوه انا عايزه اتمرمممممط
نفسى اتمرمط
ايه المشكله فى كده يعنى
زهقت بقى مش من حقى ازهق كمان والا ايه

طب بلاش دى
انا حاسه ان طول حياتى هافضل اجرى ورا حاجه
فى حاجه بدور عليها ومش عارفه الاقيها
(والنبى اللى ايده فاضيه يجى يدور معايا)
رغم ان مفيش حاجه ضايعه منى
بس حاسه ان انا نفسى اللى ضايعه
وماشيه ماشيه ماشيه ولا بيدى
يوووووه قصدى انى ماشيه ومش عارفه رايحه على فين يعنى

طب بلاش دى كماااااااان
انا مابقتش عارفه افرح
اه وربنا مابقتش عارفه افرح
بقيت بخاف اضحك
يا اما بحس ان الضحك ده مش من حقى ياما بحس ان فى مصيبه جايه
واعيش بقى لحظه >>> حاسس بمصيبه جيالى يا لطيف يالطيف
انا مابقتش مكتئبه وده شىء كويس فى حد ذاته
بس بقيت بهزئ فى اللامبالاه
بفكر فى >>>>> "ولا حـــاجـــه"
من الاخر انا دماغى بقت فى التوهااااااااان


وشكرا

21 comments

MǿиY El-Shreef said...

ربنا يرحمه يا نينو ياااارب

وان شاء الله ربنا يحسبك ك ابن صالح يدعو له

بالنسبه للضياع

كلنا ف الباي باي ياماما

بس حاولي من اي حته تعملي حاجه

مش لازم الحاجه دي تبقى عظيمه ومش عارف ايه

حاولي توصلي رساله حتى عن طريق البلوج

اسعي ياختي وربنا معاكي

سلام ياجميله

وامانه السلام لندى مش بشوفها ليه

Bent Men ElZman Da !! said...

يا مونى ركزى انا دينا مش نينو ههههههههههههه
المشكله فعلا ان بلاقى ناس كتير فى الضياع
بس احنا ليه كده بقى نفسى افهم؟؟
وربنا معانا كلنا يارب
حاضر يا قمر هاوصل السلام لندى
هى بس هنا اليومين دول فا مش بتدخل نت
بس هاقولها اكيد انك بتسلمى عليها
ميرسى ليكى يا قمرايا

MR-BOLICA said...

:h:
انشاء الله يا دودو تبقى البنت الصالحه لابوكى
والله يرحم الجميع يارب

بالنسبه لموضوع الفراغ المساله مش بسببك على فكره
انتى الجو مش مساعدك انك تبداى بس لو لقيتى فرصه فى حاجه حتلاقى خطفتيها لانك مستنيه
وربنا يبعت الفرج من عنده
ومسيرها تروق وتحلى برده

Lady E said...

اشطه عليكي

كلنا في التوهان

عارفة الحل انك تقعدي مع نفسك وتجيبي ورقة وقلم وتشوفي انتي عايزة تعملي ايه بجد وايه الحاجات اللي ممكن تساعدك على تحقيق حلمك وهو حلم يستاهل ولا لأ

ربنا يوفقك ويوفقني ونخرج من الدوامة دي

Bent Men ElZman Da !! said...

MR-BOLICA

ميرسى ليك يا احمد
فعلا الجو العام بايخ اوى ومش يساعد على اى حاجه اصلا
وادينى مستنيه لما نشوف هتروق وتحلى امتا
منورنى دايما يا احمد

Bent Men ElZman Da !! said...

Lady E

خلاص يابنتى احنا كلنا فى الباى باى اساسا :D
حلوه الفكره اللى قولتيها
بس المشكله انى مش عارفه انا عايزه ايه اصلا يعنى :D
انا عايزه اه اعمل حاجه كويسه ومفيده وجديده بس ايه هى مش عارفه

وربنا يوفقنا جميعا يا قمر وان شاء الله الفتره دى تعدى على خير

NaiRa said...

احلى حاجه يا بت يا دينا انك تبقى فى البلووووظه

ما انا اهوه ياختشى متمرمطه فى الشغل مرمطه ما يعلم بيها الا ربنا

ربنا يكتب عليكى تتمرمطى زى ما انا متمرمطه

ربنا يرحم بابا يااااااااااااارب ويدخله فسيح جناته

Bent Men ElZman Da !! said...

العيشه فى البلوظه كتير تزهق بردو يا نيره
وبعدين انا بتمرمط بس على حبه صغيرين فى الكورس
امييييييييييين

عمك ياض said...

ماشاء الله حاجه حلوه اوي اللي حضرتك عملتيها عشان والدك دي.. ربنا يحفظك ليه ان شاء الله

بالنسبه للنقطه التانيه.. فانا عندي نظريه ان البنت لازم بتحس كده خاصة بعد الكليه بشكل اوضح..
وعمر عمر ما حتحس بكيانها وذاتها ونجاحها في اي حاجه تعملها ( مشروع - نشاط في اي حاجه ) بشكل حقيقي كامل يخليها راضيه.. غير لما تتجوز
يعني بحس ان دي الحاجه الوحيده اللي بتخلي البنت حاسه بنفسها اكتر حاجه

ممكن كمان اقترح على حضرتك النشاطات الخيريه.. بجد بتملي الوقت اوووي وكمان بتعملي حاجات رائعه بجد!! وحتحسي انك مؤثره في المجتمع وتمثلي الكتير عند ناس معينه..
ممكن الناس المعينه دي يكونو اطفال ايتام مثلا انتي حتمثلي ليهم كل اللي في الدنيا :)

بالتوفيق ان شاء الله

Bent Men ElZman Da !! said...

ربنا يخليك وميرسى على زوقك

انا لسه مش خلصت كليه
البنت فعلا موضوع الجواز ده بيفرق معاها كتير
لان وقتها بتحس انها مسئوله عن بيت ومسئوله عن اولاد فى المستقبل على اعتبار ما سيكون يعنى
ودى حاجه اكبر واهم من اى مشروع فى رأيى

اكيد حلو اوى اقتراحك
كان فى زميل عرض عليا الموضوع ده
وانا متشجعاله جدااااااااا
ونفسى بجد يتم
بس حاليا فتره امتحانات فا الجو كله واقف ومفيش اى حاجه مشجعه ولا حاجه نعملها غير المذاكره والنت من حين لاخر :D

ميرسى جدا ليك ونورتنى وبالتوفيق ليك ان شاء الله

شاب كــ طخين ـــــا said...

ربنا يجزيكى خير عن الاعملتيه لوالدك
___________
والتتنيح ده معانا كلنا
شغال اوى
انا مثلا اشتغلت من اسبوع وبردو مازلت حاله التتنيح معاى
مش عارف بردو حاسس ان فيه حاجه هربانه منى هى ايه مش لاقيها
لو وصلتى لحل عرفينا كلنا فى التتنيح اخوات :D

عبد من عباد الله said...

الاعتراف بالمشكله و تحديد المشكله ده في حد ذاته شئ رائع على فكره و مدام بتدوري و نفسك فحتلاقي على فكره بس كل اللي اقدر اقولهوك دلوقتي حاولي تشتغلي على نفسك و تنمي نفسك بحيث لما تجيلك اي حاجه من اللي نفسك فيها دي تبقي كفء و قدها ...

تحاولي تقري شويه تسمعي اي حاجات مفيده يعني بعيده شوياً عن الكليبات و الاغاني و الافلام يعني و لو يبقى فيه جزء في حياتك قرايه فرجه على علماء ( ابراهيم الفقي / خالد الجندي / مصطفى محمود / طارق سويدان / عمرو خالد / ... الخ )

و لو قدرتي انك تشتغلي في اي حاجه تشغلك و تخليكي تختلطي و تحتكي بالناس و تاخدي خبره اجتماعيه دلوقتي ممكن برده ...

و صدقيني طول ما انتي بتدوري و نفسك تكوني حاجه بإذن بعد ما تجتهدي حتبقي فعلاً حاجه و لو بتعملي حاجه انتي بتحبيها اكيد حتبقى مميزه فيها .

و في الاخر كلنا برده عايزين نبقى كده و ربنا يوفقنا و يوفقك بإذن الله .... و الله المستعان .

بنجاواتى said...

السلام عليكم

ربنا يتقبل منك العمل الصالح وينفع بيه يا رب
ويا رب ما يكونش اخر عمل من نوعه

اما حكاية الفراغ فأقول كما قال النبى صلى الله عليه وسلم:
(نعمتان مغبون فيهما كثير من الناس ,الصحة والفراغ)

فعدم الانشغال ده نعمة وزيها زى اى نعمة ممكن الواحد ينتفع بيها او يؤذى نفسه بيها

لكن دايما فى طرق كتيرة مفيدة الواحد يشغل نفسه بيها
لان الواحد مننا لو ساب نفسه كده من غير حاجة تشغلها يبقى هيموت على الحالة اللى كان عليها من سنين ويمكن اسوأ

وربنا يصلح حالك ويريح بالك ويسدد خطاكى

نومستا

Bent Men ElZman Da !! said...

امبارح كان عمرى عشرين

احمدك يارب
يعنى التتنيح والضياع ده مش فيه انا لوحدى
طب ما يمكن عشان انت جديد فى الشغل ده اللى مخليك متنح :D
وعد منى لو عرفت حل التتنيح اكييييد هاقولك واهو كلنا نفيد بعض :D
ميرسى ليك ونورتنى

Bent Men ElZman Da !! said...

عبد من عباد الله

الكل بيدور بس مش عارف يوصل
وفكره حلوه اوى اللى قولتها ان الواحد ينمى نفسه او يحاول يقرأ لناس مهمه زى اللى قولتهم
كل ده جميل
بس مقصود كلامك ان الواحد يعمل اللى عليه ويستنى بقى بعد كده ايه اللى هيجيله
لان مفيش هدف محدد ودى المشكله
شكرا اوى ليك وعلى رأيك المهم ده بجد
نورتنى

Bent Men ElZman Da !! said...

بنجاواتى

اميييين يارب
وان شاء الله مايكونش اخر حاجه اعملها
حلوه اوى المعلومه اللى قولتها
الفراغ شئ كويس فعلا
بس للى يعرف يوظفه صح
ودى الازمه ان الواحد بيبقى عنده وقت فراغ كتير بس بياخده على انه وقت ضايع وملل
وربنا يصلح لنا الحال كلنا يارب
ميرسى اوى ليك ونورتنى

Kiara said...

امممممممممممممم ربنا يسعدك وتكوني فعلا الولد الصالح

اما اللي بتدوري عليه تقريبا عارفاه

ربنا معاكي وتلاقيه

Bent Men ElZman Da !! said...

ميرسى ليكى يا قمر
ونورتينى :)

عمك ياض said...

ههههههههههههههههههههههههههههههههههههههههه
فيها حاجات تضحك اوي البوست دي :d

ودي ضحكتني اوي كمان
\\ياريت اللى يعرف اى مواصله بتروح فى اى حته يقولى\\


مش عارف ليه دايما البنت بيتوهو جامد اوي وملهموش في المواصلات ولا الكومبيوتر
مش عارف اشمعنه يعني

عمك ياض said...

:f:

Bent Men ElZman Da !! said...

شكلك قصدك على البوست اللى بعد دى
هههههههههههههههههه
يلا فى بيتها كلها مدونه واحده :D

البنات كلهم مش بيستروا فى حته اصلا
اصل احنا قلبنا ضعيف اول ما نقف فى مكان مش عارفينه بنبقى هنعييييط خلاص ههههههههههه

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment