20 May 2009

واحد من الناس

.

الاسبوع اللى فات فى لحظه كان ربنا هادينى فيها وقاعده بذاكر قانون ادراى
(ماده يععععع خالص)
قولت فى وسط المذاكره لما اخد شويه راحه
(كل 10 دقايق راحه اوماال المهم نفسويتى طبعا اقطع نفسى يعنى)
فتحت التليفزيون لاقيت برنامج واحد من الناس وكنت اول مره اشوفه
و جايبين احمد السقا رغم انى مش بحبه بس الراجل كان بيقول كلام جامد
ده غير انى سواء بحبه والا مابحبوش فا هو اكيد احسن من القانون الادارى
المهم قعدت اتفرج كلام كتير قاله وعجبنى ويمكن اول مره يعجبنى لقاء ليه
من ضمن الكلام اللى قاله وعجبنى

-1-
قال ان الشعب مابقاش زى زمان يعنى مش بيحب البلد زى الاول
و مابقاش مستحمل عيوبها ومابقاش خوفنا على البلد زى قبل كده
بس فى المقابل لو حصلت لا قدر الله حرب
هتلاقى اللى منفضين ومش عاجبهم حاجه دول
هما اول حد هيدافع عن البلد
يعنى زى زمان مثلا
كانوا الشباب فافى خالص وبيسمعوا اغانى عجيبه وبيلبسوا هدوم اعجب
بس وقت ما حصلت الحرب كان كله بيدافع عن البلد
يعنى تقريبا بينطبق علينا المثل اللى بيقول"ادعى على ولدى واكره اللى يقول امين"
(مش بيقول كده المثل بردو؟)
هو قال مثل بردو بس انا مش فاكراه هو فى نفس المعنى ده عموما
واتكلم كمان عن الشباب اللى بيهاجروا ان دول مش عايزين البلد
وبالتالى البلد مش عايزاهم
انا شايفه فعلا ان الهجره دى اسوء حاجه ممكن الواحد يعملها
بحس ان ده هروب من الوقع
انا مش ضد الشاب اللى بيسافر يكون نفسه لكن انا ضد الهجره
واللى تهون عليه بلده مهما كان فيها من عيوب بيتهيالى تهون عليه اى حاجه تانى

-2-
اتكلم كمان عن الازمه الاقتصاديه اللى فى العالم كله
قال اننا من الحكمه لما امريكا مثلا تحاول تخرج من ازمتها اننا نمسك فيها ونحاول نطلع معاها
ومانفضلش محلك سر كده
بالرغم من انى واثقه ان ده مش هيحصل بس عجبتنى الفكره جدا
فكرتنى بحاجه ولاقيت صورتها قدامى
فكرتنى بالعيل الصغير لما يبقى مش عارف الطريق ويمشى ورا اللى اكبر منه
ويبقى ماسك فى طرف هدومه لحد ما يوصل
هى دى نفس الفكره تقريبا
تفتكروا مين العيل الصغير بقىىى
(مش احنا خالص طبعا)

-3-
قال انه مش بيعلم ابنه الصح من الغلط
هو بيعمل قدامه الصح عشان يتعلمه منه
وقال جمله دخلت دماغى اووووى
ان احنا بنربى نفسنا مع ولادنا لانهم عباره عن هارد فاضى واحنا اللى بنملاه
الموضوع ده دايما شاغل تفكيرى مش عارفه ليه
ان لما ربنا يرزقنى ان شاء الله مستقبلا باولاد ازاى هربيهم (ده اذا طلعوا متربين اساسا)
حساه موضوع صعب اوى انى ابقى مسئوله عن حياه وشخصيه بنى ادم
انا اللى هاكونها بعيوبه ومميزاته
يعنى كل عيب فى الشخصيه دى اكيد هاكون مسئوله عن وجوده
وكل ميزه احتمال يبقالى يد فى وجودها
صعب ان الواحد يبقى مسئول عن افكار و شخصيه انسان لسه بيتكون
كل كلمه هاقولها او كل فعل هاعمله هيلزق فى دماغه
والعيال بيبقى قلبهم اسود ومش بينسوا حاجه
وانا بسم الله ما شاء الله مليانه عيوب يعنى هما اللى هيربونى مش انا الى هربيهم
هو اكيد الموضوع ده لسه بعيد اوى عليه
بس لافت انتباهى وفكرتنى جملته بالموضوع ده

غير ده كله بقى عجبتنى جدا الرباعيات اللى بيكتبها وللاسف مالحقتش اكتب اللى قاله

وفى مقابل ده ماعجبتنيش حاجه واحده فى كلامه
لما اتكلم عن خلع مراته للحجاب
قال ان دى حريه شخصيه ليها بس
لكن انا بيتهيالى يعنى ان ربنا بيحاسب الزوج عن افعال زوجته
اللى هو المفروض مسئول عنها ادام بعلمه
زى مثلا تنبييها للصلاه والحجاب او لبسها عموما
ده حسب معلوماتى يعنى

كان عاجبنى كلامه لدرجه انى شوفت الحلقه كلها
مش عارفه ده لان أرائه كانت عجبانى فعلا
والا كنت بحاول اهرب من المذاكره مثلا ؟!!!!!؟

13 comments

Lady E said...

ليا عودة طبعا اكيد

ربنا يوفقك في القانون الاداري

سلام مؤقت يا قمرايا

بنجاواتى said...

السلام عليكم

طبعا بتهربى من المذاكرة :D

هو فعلا احنا فى وقت الشدة بنقف جنب بعض ومفيش مثال اقوى من الحرب اللى لو ربنا قدر وحصلت هنقف كلنا ايد واحدة ومش هنكبر ولا حاجة من دى خالص

موضوع الازمة الاقتصادية ده كلام نظرى شوية وصعب انه يحصل لكن لو حصل يبقى شئ رائع لانه مفيش مشكلة اننا نمسك فى ايد حد اكبر مننا -اقتصاديا-و

الولاد بقى دى برضه حاجة شاغلة تفكيرى انا كمان بس انا شايف ان الطفل طول ما هو طفل لازم يعمل كل حاجة هو يحبها سواء كانت صح او غلط ويبقى دور المربى فقط هو انى افهمه انه يعمل اللى هو عاوزه بس فى حاجة صح ولازم فى وقت من الاوقات لازم يعمله-انا عارف انهم هيطلعوا منحرفين هه-و

مراته ده بقى موضوع مليش تعليق عليه

نومستا

MǿиY El-Shreef said...

يارايقه بتتفرجي وانت بتذاكري

دانتي بتهربيمن المذاكره :P

انا ماشفتش البرنامج بس عجبني الكلامالي بتقوليه الي قاله احمد يعني

خصوصا ف مسأله تربيه ابنه

اما الحجاب بقى فهومسئول فعلا عن مراته قدام ربنا

ربنايهديه ويهديكي وتذاكري بقىكده

سلام ياسكر

الجواز و سنينه said...

انا زيك مش بحب احمد السقى فى اى لقاء
بس اكيد اكيد انه كان هروب من المذاكره يا قطه

الجواز و سنينه said...

انا كتبت تعليق موووش عارفه راح فين

Bent Men ElZman Da !! said...

Lady E

ميرسى ليكى يا قمر
وتنورى فى اى وقت
وربنا يوفقك انتى كمان :)

Bent Men ElZman Da !! said...

بنجاواتى

انا بردو حاسه بكده بس بستعبط ههههههه
يمكن من ناحيه الكلام اللى قاله على الازمه الاقتصاديه يعتبر نظرى اه
بس بيتهيالى احنا المفروض نعمل اى حاجه عشان نوصل شويه بدل اللى احنا فيه

ده اللى انا شايفاه
ان صعب اننا نحاول نبقى مثاليين قدام اولادنا لاننا مش ملايكه وماينفعش نفهمهم انهم عايشين وسط ملايكه

بس هو لو انا سألت يعنى ايه نومستا
ابقى جاهله؟ :D

Bent Men ElZman Da !! said...

MǿиY El-Shreef

ههههههههههههه
شوفتى بقى
مفيش حد فى روقانى :D
طب الحمد الله ان كلامى على الحجاب صح انه فعلا مسئول عن مراته
لحسن اكون بتبلى على الراجل والا حاجه
منورانى يا قمر

Bent Men ElZman Da !! said...

الجواز و سنينه

الحمد الله ان فى حد مش بيحب احمد السقا بردو اهو
لحسن افتكرت ان انا اللى مضطهداه والا حاجه
بلاش احراج بقى ههههههههه
انا عارفه انه هروب من المذاكره :(
مش تقلقى هو الكومنت كان مستخبى بس واديه ظهر :D
ميرسى ليكى اوى يا جميله

Kiara said...

كلامك عن الحلقة حلو اووووي ودخل دماغي الا نقطه قلع الحجاب

ربنا معاكي ياقمر في المذاكرة

Lady E said...

انا كمان شوفت الحلقة دي

بس اللي فهمته من كلامه ان مراته مكنتش مسلمة وبعدين اسلمت وانها بتدرس حاجات في علوم الدين تقريبا وانها تعرف حاجات كتير في الدين ممكن هو نفسه ميكونش عارفها فمحبش انه يضغط عليها بالحجاب بس

Bent Men ElZman Da !! said...

كيــــــــارا

ميرسى ليكى يا قمر على زوقك

Bent Men ElZman Da !! said...

Lady E

لا يا ليدى مراته مسلمه
هى بنت محمد الصغير الكوافير
اول ما اتجوزها ماكنتش محجبه وبعدين لبسته ودلوقتى قلعته
هو فعلا قال ان مراته بتدرس حاجات فى الدين وتعرف اكتر منه
بس اكيد من ضمن دراستها عرفت ان الحجاب واجب

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment