31 May 2009

ودى كانت نهايه طالبه فى حقوق

.



لما ابقى نايمه واشوف قدامى ورق الشريعه
يبقى انا بقيت محتاجه اغير النظاره

لما ابقى داخله اذاكر وواخده معايا عوامتى وبراشوتى وحد يسألنى بأستغراب:انت هتعملى ايه يا دينا؟؟
واقول اصلى داخله اذاكر قانون بحرى وجوى يبقى انا وصلت لمرحله وحشه اوى

لما حد يجى يتفق معايا على حاجه واقوله لو حصل غير كده هتدفع تعويضات وهصادر التامين النهائى بتاعك
يبقى انا كده اتجننت

لما الدكتور بتاع الكورس يقولنا ان قاعده التطهير بالتظهير فى الكمبياله لو شرحهلنا 97 مره بردو مش هنفهمها
ولما أسال اصحابى اللى خدوها قبل كده عشان يشرحوهالى ويقلولى احنا ماكناش فاهمنها اصلا
ولما انا احاول اعتمد على نفسى واذاكرها لوحدى واقعد فى وسط اوضتى وحواليا كل الورق
واشد فى شعرى واقول عااااااااااااا لانى بردو مش فاهمهاها
يبقى انا كده فعلا محتاجه دكتور نفسانى ان ماكنتش مستشفى المجانين بحالها

ولما بعد كلللل ده ادخل الامتحان واول ما امسك الورق مافهمش اى حاجه
يبقى انا اكيد كنت بذاكر ماده تانيه !!!

ولما احاول احل الاسئله والاقى صوت جوايا بيقولى لقد حان الان موعد برنامج العك المباشر
يبقى انا اكيد اكيد دور اكتوبر بينادينى وانا هحاول اعمل مش واخده بالى

لما حد يقعد يذاكر ليل نهار ويحل بمجهوده ومع ذلك يشيل مواد
وحد تانى بيصيع ومابيذاكرش وكمان بيغش وينجح بتقدير
يبقى ستوب هنا بقى كده فى حاجه غلط

لما الدكتور يلغى جزء من الكتاب ومع ذلك يجيب فيه سؤال مهم وبدرجه كبيره
يبقى ده اسمه استعباط

لما الدكتور يدينا اسئله مهمه ويأكد انها جايه فى الامتحان ومع ذلك بردو مايجبش منها
يبقى ده اسمه استهبال

لما تكون نسبه النجاح صافى ماتتعداش 35% وبردو الدكاتره مايردوش يرفعوها
يبقى دى اسمها قله ادب

لما دكتور محترم جدا يتصل فى برنامج مهم جدا كان بيناقش حكايه نسب النجاح دى
ويقول فيما معناه ياريت الطلبه يريحوا نفسهم ماحدش هينجح السنه دى
يبقى الراجل ده لازم يتعدم رميا بالقباقيب قدام النافوره اللى فى وسط الجامعه عشان يبقى عبره لمن يعتبر



اما بالنسبه لينا
فا احنا لـــنـــا الله
وانت شايف يارب اهو
انت شااااااااااايف

23 comments

ســـهــــر said...

دة بقا العادى يا بنتى الدكاترة دلوقتى بيعقدوا
تعرفى كان فى عندى دكتورة كانت بتقول والله يا دفعه (وكلمة وحشة كده )لو نجحتوا السنة دى يبقا ليكو حق

اصل فين الرقابة اللى عليهم ؟
ضميرهم ؟ مثلا مثلا ؟
معتقدش لانهم اوقات كتير جدا بينجحو الطالب لمجرد انة اشترا الكتاب وقدم الشيت كدة ضمن مقبول

مع ان فى ناس كتير مش لاقية حق مواصلاتها للجامعه

اييييييييه دونيا والله

عجبانى انا الاعدام بالقباقيب دى
بس يكون نعلة حديد
هههههههههههه

ربنا ينجحك انتى وكل اللى زيك يارب
طولت عليكى ورغاية موت انا معلش بقا استحملينى

يوميات شاب منوفى said...

هههههههههههههههة عثل عثل يعنى فكرتنى بايام الكلية والله ايام جميلة بس اكتر حاجة تحنق هلا الامتحنات ربنا معاكى وتنجحى بس الدكاترةدول عندهم مرض نفسى

NaiRa said...

:f: هههههههههههههههههههههه

لا يا دينا ده كده يبقى انتى اكيد فى مصر

هههههههههههههههههههههههه لول

Lady E said...

ايه ده برنامج العك المباشر جه عندكو كمان عااااااااا

يا عيني عليكي يا دودو هي كلية الحموم دي صعبة اساسا بس ان شاء الله خير ومفيش دور اكتوبر ولا حاجه

وربنا ع الضكاترة الظالمين والمفتريين في كليتكو وكليتنا وكل الجامعات عااااااااا

لنا الله
منه له
منه لـــــــــــه

Bent Men ElZman Da !! said...

ســـهــــر

هما الدكاتره دول لو يعرفوا يعنى ايه ضمير كانوا عملوا فينا اللى بيعملوه ده
جاتهم داهيه قولى امين :(
طب احنا ماعندناش شيت نقدمه
تفتكرى ايه اللى هينجحنا بقى :D
بيتهيالى بركه دعاء الوالدين :D
ووعد منى يا ساسو اول ما نيجى نعدم الدكتور رميا بالقباقيب هاجيبك ترميلك كام قبقاب معانا :D
وبعدين انتى ترغى براحتك يا قمر

ميرسى ليكى يا جميله

Bent Men ElZman Da !! said...

يوميات شاب منوفى

اسوء حاجه فى الكليه هى الامتحانات بجد
ياسلام لو يعملوا كليه بدون امتحانات
وكمان بدون دكاتره
من الاخر تبقى ملاهى يعنى :D

ميرسى ليك يا باشا :)

Bent Men ElZman Da !! said...

7BiBeT ABDO

اضحكى اضحكى
الهى يارب ربنا يرزقك بدكاتره زى اللى عندنا دول عشان يخلوكى تضحكى بجد :@

Bent Men ElZman Da !! said...

Lady E

برنامج العك ده بقى فى جميع الكليات تقريبا :(
بس هو فعلا انا متوقعه ان مفيش دور اكتوبر
انا متوقعه اكبر من كده انى هاعيد السنه هههههههههههه
الضحكه دى تعبيرا عن انى بحاول اخفى حاله الاكتئاب مش اكتر :i:
والهى يارب كل اللى الدكاتره بيعملوه فينا يتردلهم فى عيالهم عشان كده ظلم بجد بقى :@
ربنا معاكى يا ليدى فى امتحاناتك وتخلصى على خير

Zika said...

ده حال كل طلاب مصر
انا طالب تجاره ولسه مخلص امبارح
وتعاطفك لوحده مش كفايه :D:D

Lady E said...

امين يارب

يتردلهم في صحتهم قادر يا كريم

يارب تكوني بخير يا بنوتة

وحشتيني

Lady E said...

انتي فين يا قمرايا وحشتيييييييييييني جدا وقلقاااااانه عليكي جدا ياااااارب يكون خير

بنجاواتى said...

لا حول ولا قوة الا بالله

ربنا معاكى ومعانا ومع كل اللى زينا

بس فى حاجة وحيدة انتى مالكيش حق فيها:
لما الدكتور بتاع الكورس يقولنا ان قاعده التطهير بالتظهير فى الكمبياله لو شرحهلنا 97 مره بردو مش هنفهمها

مالكيش حق خااااااالص بصراحة يعنى

ربنا معاكى
تحياتى من فوق الكومبيالة

MǿиY El-Shreef said...

انتي فين وحشاني :(

Zika said...

انا كنت معلق هنا
تعليقي راح فين
اطلعوا بتعليقي بدل ما ابلغ عنكوا :P:D

aya mohamed said...

انا بجد مش مصدقه عنيا ده بلوج دينا مستحيل طبعا بقى انتى بتدخلى وتكتبى واحنا نقول البت دى اختفت فين ماشى يا دودو هلم العيال عليكى :P

بالنسبه لموضوع الكلية فبجد اتصدمت اوى من الراجل اللى طلع فى البرنامج ده ده بيقول عادى كده بس ان شاء الله خير دى اخر سنه هتاخدوها هتاخدوها متقلقيش
ووحشتينى جدا بجد ابقى اسالى ولا اعملى اى منظر

The illusionist said...

ههههههههههههههههههههههههههههههههههه
يا خبر اسود
الله يخرب بيت اللى بتعمله حقوق
ربنا ياخدها
انا عارف قصدك
لانى بذاكر حقوق مع ابن عمى
والورق بعدد شعر راسنا احنا الاتنين
ربنا معاكى

Lady E said...

وحشتيني جدا وقلقانه عليكي جدا جدا ومفتقداكي جدا جدا جدا
يارب تكوني بخير

Bent Men ElZman Da !! said...

Zika

تعاطفك لوحده مش كفايه اتبرع ولو بدرجتين
او اجابه سؤال الواحد يمشى بيها نفسه :D
معلش يا زيكا كلنا لها
ومش تقلق الرد بتاعك كان هربان بس جبتهولك من قفاه اهو :D
منور يا باشا

Bent Men ElZman Da !! said...

Lady E

وحشتييييييييييييينى كتييييييير
بجد وحشانى جدا
وسورى انى ماكنتش بدخل الفتره دى ومقصره اوى فى متابعتك
ميرسى ليكى يا حبيبتى على سؤالك

Bent Men ElZman Da !! said...

بنجاواتى

مش عارفه انا ازاى مانفهمش قاعده التطهير بالتظهير
دى حته سهله خالص :D
اكيد اكيد احنا اللى دفعه غبيه :D
وانا ببعتلك سلامى وتحياتى من فوق الكمبياله :D
ربنا يوفقك ياباشا ومنور

Bent Men ElZman Da !! said...

MǿиY El-Shreef

انتى كمان وحشانى اوى يا مونى
معلش كان فى فتره كبوه كده بس عدت على خير :D

Bent Men ElZman Da !! said...

YoYo

انا قولت انتى وباقى العيال اعلنتوا الهجره من البلوج
قولت لا بقى لازم اعمل واقفه من اللى هى دى واخدلنا حقنا وسط البلوجرز
يقولوا علينا ايه يعنى ماقدرناش نتعامل مع التكنولوبيا قصدى التكنولوجيا

وحياتك يا يويو انا بقيت مستغربه من كل حاجه مش الدكاتره وبس
من الامتحانات ومن اداره الكليه ومن التصحيح ومن نفسى تقريبا :D
وحكايه اخر سنه دى بصراحه مش واثقه فيها ابدااااااااااا
لو ربنا كرمنى هيبقى دور اكتوبر :D
وانتى كمان كنتى وحشانى بجد يا يويو
نورتينى يا حبيبه قلبى يارب مش تكون اخر مره وترجعوا تانى بقىىىىىى هنا

Bent Men ElZman Da !! said...

THE illusionist

حقوق دى هتخلينا فى التراوه والله :D
وغير ان الورق بعدد شعر راسكوا انتوا الاتنين
ده كمان لازم نحفظه كله :D
اليك ان تتخيل بقى :D
ميرسى ليك ياباشا نورت

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment