31 December 2010

˙·٠•● HaPpY NeW YeAr ●•٠·˙

.
0 التعليقات



ياااه

الوقت بيعدى بسرعه اوووى
فاكره لحد دلوقتى البوست اللى كتبته فى اخر 2009 وكنت بقولها مع السلامه
سواء بقى كان بنيه خالصه والا مش خالصه
حاكم 2009 دى انا كنت شايله فى قلبى منها كتير وساكته
لحد ما جابتيلى عمى الوان
وبقيت اشوف الاخضر فحلقى
وهاموت واعرف ايه الفحلقى ده اصلا
نهايته
اسبنى بقى من 2009 اللى راحت وربنا ما يرجعها
وخلينى فى 2010 اللى خلصت هى كمان دى

مبسوطه اوى بالسنه دى على اد ما انا كنت خايفه منها
مبسوطه اوى بكل الناس اللى عرفتهم و قربت منهم
مبسوطه اوى بكل حاجه حصلتلى فيها
مبسوطه اوى انها مرت فى هدوء غير متوقع
مبسوطه اوى بكل تغيير حصلى فيها
مبسوطه اوى بوجود ناس كتير حواليا بحبهم ويحبونى كده

الحمدالله

بحمد ربنا انه عداها سنه خير عليا زى ما كنت بتمنى
بحمد ربنا انه ادانى حاجات كتير ماكنتش حتى احلم بيها فى السنه دى
ومش عايزه غير ان 2011 كمان تبقى سنه حلوه عليا وعلى كل الناس يارب
وربنا يحققلى اللى بتمناه فيها ان شاء الله

HaPpY NeW YeAr
(◠ ‿ ◠)

readmore »»

21 December 2010

.
8 التعليقات









لا يحمينى من برد الشتاء

سوى

.
.
.
.

دفئ حبك


readmore »»

04 December 2010

SoOo HaPpY

.
8 التعليقات




من اول ما عملت المدونه
مافكرتش ولا مره انى اعمل بوست يوم عيد ميلادى
كنت بقول يعنى ايه احتفل لنفسى بيه
او حتى ابقى مبسوطه بالدرجه اللى تخلينى اعمل بوست عشانه
انا مش من النوع اللى بيبقى مكتئب عشان سنه عدت من عمرى
بالعكس ببقى مبسوطه اوووى
مبسوطه بسنه عدت بالوحش اللى فيها اللى اتعلمت منه واكيد زاد من خبرتى وتفكيرى
ومبسوطه بالحلو اللى فيها عشان كنت سعيده بيه حتى ولو للحظه

بس السنادى تحديدا
حاسه بكل حاجه مختلفه
وعقبال ما استوعبت وفوقت قررت اعمل بوست
اصلى ايه بقى كنت عايشه حاله ازبهلال من امبارح
وتلاقينى زى العبيطه كده قاعده لوحدى بضحك
وتقريبا قالوا البت اتجننت
ان ماكنش اكيد

كل حاجه حلوه اوووى
كل حاجه مبسوطه بيها اوى
ناسيه اى حاجه وحشه عدت السنادى
لدرجه انى حاسه ان اصلا مفيش حاجه وحشه عدت

بعيدا عن احساسى انى عبيطه اخر 87 حاجه
وان كل اللى حواليا بيرتبولى عيد ميلادى وانا مش حاسه
وقدرتهم على انهم كلهم يوصلولى انهم منفضنلى بالطريقه كده
والتتنيحه الرهيبه اللى حصلتلى اول ما لاقتهم كلهم متجمعين وبيحتفلوا بعيد ميلادى
اللى انا لحد دلوقتى مش مستوعباه ومش متخيلاه
ده كله يوصلنى لنتيجه واحده
ان ده احلى عيد ميلادى عدى عليا فى حياتى كلهااااااااااااااااااا
مبسوطه اوووى ان ربنا رزقنى باصحاب تحفه زى اصحابى دول
مبسوطه اوووى انى بحبهم كتييييييييير كده
مبسوطه اوووى بوجودهم فى حياتى
ربنا يخليكم لياااااااااا

ربنا يخليكى ليا يا مامتى يا حبيبتى
يا احلى ام فى الدنيا دى كلها

اما انـت
ماعتقدش انى مهما حاولت اكتب هلاقى كلمه ممكن تكفيك
او تكفى اللى انا حساه او اللى نفسى اقولهولك
بيك ايامى احلى
بيك حياتى اجمل
كل لحظه بتعدى عليا بحمد ربنا انك معايا
وبحس ان ربنا بيحبنى اوووى
مهما حلمت واتمنيت ماكنتش لاقيت انسان زيك
لاول مره احس بوجودى اوى كده عشان انا جنبك
لاول مره احس ان مفيش اى حاجه تقدر تضايقنى او تزعلنى
عشان انت عندى بالدنيا وما فيها
انت بالنسبالى هديتى السنادى
ومش السنادى بس
انت هديه العمر كله
ربنا يخليك ليا يا احلى انسان فى الدنيا
ومش يحرمنى منك ابداااا
بـحــبــك

readmore »»

29 November 2010

♥.... ♥

.
5 التعليقات




تعلمت أشياء كثيرة السنوات الماضية .....!!

ولكنّ ......!!
منذ ان تقابلنا وتعارفنا وأحببنا بعضُنا
اصبحت الان لا اتعلم سوا شىء واحد فقط الا وهو كيف احبك فقط
فأصبحت لا اتعلم ان أنطق سوا كلمة ........!!

احبك انت


readmore »»

11 August 2010

۩˙·٠• رمضـــــان كريـــــم•٠·˙۩

.
15 التعليقات

readmore »»

03 July 2010

كلام والسلام ... كلاكيت رابع مره

.
19 التعليقات





 

هو احنا ليه كده بقى
ها؟
ها يعنى؟
احنا ليه دايما شخصيات متناقضه بالمنظر ده
ليه لما بنتحط فى موقف بنقول فيه رأينا اللى فى الغالب بيكون لصالحنا
وبنبقى متخيلين ان ده اصح رأي ممكن اى عبقرى يقوله فى الموضوع ده
لكن لما حد غيرنا اللى بيتحط فى نفس الموقف وبيطلب النصيحه
اوباااااا
تلاقينا بنقول مواعظ وحاجات اخر جمال كده
كلنا كده بلا استتثناء
ليه بنقول نصايح احنا مش بنمشى عليها؟
وليه بنقول حاجات صح واحنا بنعمل الغلط اللى عكسها
ليه عندنا انفصام فى الشخصيه بالمنظر ده
ليه مانحاولش نبص على كل حاجه من فوق شويه
يمكن نشوفها بطريقها مختلفه ونعرف الصح فين
ها؟
ليه ها؟

*************

من فتره كنت بتفرج على برنامج صبايا(للاسف الشديد يعنى)
وكانت بتتكلم وقتها على موضوع البنات المليانه
(لانى بكره اوى كلمه تخينه دى واللى هيقولها هاديله فى وشه انا قولتلكم اهو)
وكانت جايبه حالات بتتكلم معاهم
وهى نفسها بتتكلم انها كانت مليانه وكان وقت وحش اوى عليها
وكانت مش واثقه فى نفسها وتكاد تكون بتكرهه شكلها
رغم انها كانت بتهول اوى من الموضوع
وحسستنى ان المليانين دول كائنات خرافيه او باء مثلا
الا انى مقتنعه بجزء من كلامها
ان الاحساس وقتها بيبقى وحش ده حقيقى
والواحد بيحس انه ناقصه حاجه
والثقه بتبقى موجوده بس مش بنسبه 100% طبعا
وفى الغالب بيبقى فى احراج فى مواقف معينه
بس بعد كده الوضع بيختلف لما بتتغلب على الوضع ده
الثقه بتبقى اكتر من من قبل كده
فعلا اقل حاجه بتأثر على نفسيه اى حد فينا
حتى لو اللى حواليه مش واخدين بالهم منها
او حتى واخدين بالهم بس مستهبلين وعاملين انها حاجه عاديه
و ماحدش يستهون بحد ولا يتريق على حد
عشان اللى قدامك ممكن ياخد كلامك بهزار بس من جواه مضايق ومش عايز يزعلك
اللى عايزه اوصله من ده كله
ان اللى عنده عزيمه بجد هيغير من نفسه حتى لو فى حاجه بسيطه
والتغير ده بيفرق فى الشخصيه جامد
مش مجرد كلام فى الهوا
بقول كده لانى مريت بنفس التجربه دى تقريبا
وعارفه وحاسه بتأثير التغيير ايه
الكلمه اللى اهم من ده كله بقى
ان اللى وحش من جواه
لو عمل تغير جذرى والا حتى تربيعى
هيبقى بردو طريقك مسدودا مسدودا يا ولدى

*************

زعلنا اوى واتقهرنا وحسينا بقله قيمه
للى حصل فى كترمايا
بس لما يحصل لــ خالد سعيد اللى حصل
وماحدش ياخد جزاته
وكمان يتقال ان السبب غلط منه
يبقى احنا نستحق يحصلنا اى حاجه فى اى مكان
وحكومتنا تقولنا خدوا اكتر كمان
واحنا نقولهم ماهو اللى مش قادر يتشطر على الحمار يتشطر على اللى زينا
وابقوا خلوا كاس العالم ينفعكم

*************

كنت نفسى بعد الغياب اللى فات
ارجع المدونه وانا فى ايدى خبر حلو
ما هو كان حاجه من اتنين
ياما شغل
ياما خطوبه
والحمدالله الاولانى مافلحتش فيه
والتانى كالعاده قتلته قبل ما يكمل (قصدى قتلت الموضوع يعنى)
وقررت انه مؤجل الى أجل غير مسمى بتاتا نوهائى مطلقا
الفتره اللى فاتت دى اكتشفت اكتشافين مهمين
رغم انى هاموت بجد واشتغل فى حاجه بحبها واقدر ادى فيها اقصى ما عندى
الا انى مش اى حاجه تريحنى وتعجبنى وابقى مبسوطه بيها
وده فى مجال الشغل فى الفتره المنحوسه دى شئ لا يبشر بأى خير خالص الحقيقه
والاكتشاف التانى الاهم
انى غير قادره على تحمل مسئوليه شئ غير مقنع اسمه "الجواز"
انا لسه مابقاش عندى الاستعداد انى ابطل اخرج مع اصحابى
ولسه مش عندى استعداد وقت ما يقولولى عاملين خروجه بكره
اقولهم سورى مش فاضيه مشغوله مع المتنيل على عينه
ولا عندى استعداد ابطل ارتب رحلات زى اللى برتبها كل فتره معاهم
ولسه مش عندى استعداد لما يقولولى تعالى معانا المكان الفلانى
ابطل اقولهم بيس انا اساسى راشقه معاكوا
لسه ماعنديش استعداد لأى تغير جذرى فى حياتى
انا بحب اصحابى جداااااااا
وماعنديش استعداد ادخل حد فى حياتى دلوقتى يشاركهم فى حبى ليهم
والاهم من ده كله انى بت فافى اساسا ومش بتاعه مسئوليه وعيال وكلام من ده
(انا بس اللى اقول على نفسى اللى انا عايزاه اااااه انا حره)
لذلك هاقول فى سرى لاى واحد بيفكر يتقدملى بطريقه جواز الهباب قصدى الصالونات
نفض لنفسك ياض انت
ولأى شاب حليوه بيفكر يقولى انا معجب بيكى وعايزنا نرتبط
ياعم الامور انا لو معجبه بيك هتحس
ولو مش معجبه بيك يبقى نفض لنفسك انت كمان مع الواد اللى متنفضله قبل منك فوق ده
اما بلاوى صحيح

*************

فى نوعيه من البنات مستفزيانى اوى الفتره دى
او يمكن انا اللى الفتره دى بتلكك عشان حد يستفزنى وخلاص
انا بقيت بتخنق اوى من البنات اللى بتبقى ماشيه وحاسه بغرور فظيع دى
الغرور عمتا وحش اوى
بس بقى ظاهر فى البنات تحديدا بطريقه تفرس دلوقتى
او يمكن انا بردو اللى ربنا كرمنى بشخصيات مغروره كتير الفتره دى
بتخنق اوى من البنات اللى بتبقى ماشيه حاسه ان مفيش احسن منها على وجه الارض
واتخنق اوى من الشخصيات اللى بتعترف بده كمان
طب دارى على خيبتك مش كفايه اللى الواحد شايفه بعينه
هيبقى عينه وودانه كمان
الثقه مطلوبه
بس الغرور بيقتل النفس


*************

هو يعنى ايه بقى الراجل مابيتعيبش؟؟
والا كلمه "ده ولد مش مشكله لما يغلط"
ياخراشى على الناس اللى هتفرسنى
انا مش مع القصه الوهميه اللى اسمها مساواه الرجل بالمرأه
بس بردو انا مش مع التفرقه العنصريه دى
يعنى ايه الراجل مابيتعيبش
ومفيش راجل وحش
والراجل من حقه يغلط عادى على عكس البنت
ايه الهبل ده يا جدعان
ده اسمه استهبال والله
لا بقى
الراجل بيتعيب وفيه عيوب يراها اى كفيف
والراجل فى من صنفه كتير وحش وعايز يطخ بالنار فى عنتينه الاتنين
والراجل لما يغلط لازم يتعاقب او يتجأزى نتيجه غلطه ده زيه زى اى كائن ارضى
الا اذا كان هو كائن فضائى بقى وده اللى انا مرجحاه
ما هو مش عشان اسم النبى حارصه راجل
يبقى يمشى يشوط فى خلق الله ولا يهمه مثلا
ما هو لو كده انا هنادى ان كل البنات تقول يارتنى كنت ولد بقى
مش اسلوب ده يعنى
عصبتونى
الله
اما اروح اشرب حاجه تهدى اعصابى

readmore »»

29 May 2010

ناوى تبعد ؟!!!!؟

.
36 التعليقات



ناوى تبعد عنى ليه هو انا ذنبى ايه
ما انا كنت ليك وبحس بيك عملت ايه
كل ذنبى انى هويتك
كل ذنبى انى حبيتك
حبيتك وهويتك واديتك كل حياتى
حبيتك وهويتك وانت غدار وانانى
كنت حاسه معاك بالامان
كنت عايشه معاك الحنان
وماعملتش حساب للزمان
واديه خان

readmore »»

27 March 2010

حبيبى....فى ستين داهيه

.
67 التعليقات




حبيبى سابقا

وحياه البرفيوم المعفن اللى كنت بتحطه فى كل مقابله بينا
(برفيوم ايه بس!! قصدى الاسانس اللى كنت بتحطه)
وحياه كل شوز (جزمه يعنى) دابت من كتر اللف مع حضرتك
وحياه كل ورده دبلانه ومالهاش ريحه جبتهالى
(ام نص جنيه بتوع الكورنيش دول فاكرها؟)
وحياه كل كول مى بعتهالى عشان اكلمك
(يا جربان يا شحات)
وحياه كل رساله بعتهالك على الموبيل بمناسبه ومن غير مناسبه
(كنت عبيطه وهبله بقى تقول ايه !!)
وحياه كل تحويله خمسه جنيه عشان اكلمك بيها
(واحيانا كان بيبقى سلفنى شكرا)
وحياه سهر الليالى وسرحانى وتوهانى
(وقله مذاكرتى اللى خلتنى اشيل ماده الاقتصاد مرتين على التوالى)
وحياه كل محاضراتى اللى ماكنتش بحضرها عشان اشاهد فى جمال حضرتك
وحياه فلوسى ومصروفى والجمعيات اللى كنت بدخلها اللى ضاعت كلها على الهدايا
(سوف يتم طرح الهدايا فى تشريده اخرى)
وحياه كل فاتوره نت جاتلنا ايام ماكنت بدخل ديل اب عشانك
(لان الدى اس ال كان فاصل وقتها)
وحياه كل اغنيه بتفكرنى بيك
( وخصوصا اغنيتك المفضله.. الحنطور)
وحياه كل شعر واغنيه كتبتها عشانك رغم انى اساسا ماكنتش بكتب شعر
(نزلت عليا الوحل فجاءه الله يحرقك يوووووووه قصدى الوحى)
وحياه الزهايمر المبكر اللى جالى ومش لاقياله حل ده


واخيرااا
وحياه كل الايام المهببه السودا اللى شوفتها معاك ....
هنساك .... هنساك
هـــــنــســــاك ...... هـــــنــســــاك
كل غلطه غلطها قلبك يوم فى حقى كل جرح وكل دمعه بكاها قلبى
هردهااااااالك مش هنسهااااااالك
يوووووووووووه انا كده دخلت على ااغنيه محمد فؤاد
لا انا فعلا هنساك
مش كلام اغانى
واول ما اشوفك (المحك بس وانت هتشوف منى ايام سودا)
لازم اقولك
حبيبى ...... فى ستين داهيه


مع تحياتى
انا
المتنيله على عينها
حبيبتك السابقه


ملحوظه اخيره
الطاسه اللى فى الصوره دى
هتاخد بيها على دماغك لو شوفت خلقتك

ماتنساش
حبيبتك المتنيله على عينها

readmore »»

02 March 2010

خــط احـــمـــر

.
14 التعليقات



كنت ناويه اكتب بوست تانى غير ده خالص
بس يمكن لانى لاقيت حاجه شاغله تفكيرى اكتر الفتره دى
هو يعنى ايه مــثــليــين؟؟
انا مش غبيه
ولا بحاول استهبل بردو
وعارفه يعنى ايه
بس اللى نفسى اعرفه هو الناس دى بتفكر ازاى؟؟
اصل اكيد فى حاجه فى تفكيرهم غير منطقيه او انا مش قادره اوصلها

انا دايما مقتنعه ان كل واحد حر فى تصرفاته ادام مش بيضر غيره
طب اشمعنا دول بالذات اللى انا مش قادره اقتنع بمبدأ الحريه ليهم
وشايفه ان مش ده نوع الحريه اللى المفروض الواحد ياخده
والا يمكن لانه بالعقل كده ده حاجه عيب وغلط وحرام
ومفيش اى دين سماوى وغير سماوى مش قال انها حرام

لما فكرت وحاولت افهم والاقى ليهم عزر
كنت بقول ان فى جزء منهم يمكن تعرضوا لأى نوع من انواع التحرش
ايا كانت الطريقه او الشكل او الشخص اللى عمل كده
بس ده فى النهايه ممكن يوصل لعقده نفسيه تخيلهم يعملوا كده
بس بردو ماقتنعتش
لان ده مايمنعش ان الشخص يتعالج نفسياً لا هو عيب ولا حرام
ماهو مش معقول محرج او خايف من العلاج النفسى
ومش محرج ولا خايف من القرف اللى انت بتعمله ده

اما بقى بالنسبه للشخصيات اللى ماتعرضتش لاى موقف سبب فى التحول النفسى ده
فا دول ناس بقى واخده الانحراف مبدأ وقله الادب موهبه والانحلال اسلوب

من فتره قريبه كنت متاكده انى عمرى ما اقدر اتعامل مع شخصيات من النوعيه دى
واحتراماً لحرياتهم وحياتهم الا انى بردو بستحقرهم بكل صراحه
ومبدأى فى الحياه ان اى شخص من النوعيه دى ابقى بعيده عنه بعد السماء عن الارض
سواء كان بنت او ولد

اما دلوقتى
لما الظروف اجبرتنى انى اتعامل مع شخصيات من النوع ده
وتحديدا بنات
مانكرش انى اتفاجئت وازبهليت وتنحت وقرفت واتعقدت
ده اول ما عرفت
بس مع الوقت لاقتنى فجأه بعدى الموضوع
حتى لو كنت بحاسب احيانا على تصرفاتى معاهم
واحيانا اخرى ببصلهم بصات غريبه و عجيبه و مريبه
الا انى بردو بتعامل معاهم عادى جدااااااا
وبقيت انسا اوقات انهم كده
استغربت نفسى اوى
وحسيت انى متناقضه جدا
ازاى انا شايفه ان الناس دى غلط وبسكت عن الغلط !!
وشايفه ان ماينفعش اقعد او اتعامل معاهم وبتعامل معاهم !!
مهما الظروف اجبرتنى
حتى لو كان تفكيرى ده غلط بس انا مقتنعه بيه
او المفروض انى مقتنعه بيه
ايه اللى جد بقى وخلانى شايفه ان الموضوع ايزى اوى كده
ليه حسيت انى اتعديت الخط الاحمر اللى هو مبدأى وتفكيرى
المفروض ان مبدأى ده اهم حاجه عندى
وماتنازلش عنه حتى فى ابسط الامور ادام مقتنعه انى صح

كنت ومازلت وهافضل شايفه انهم غلط
وبيعملوا حاجه غلط
بس ليه انا حسانى متساهله فى تعاملاتى معاهم
وكأن الموضوع عادى
وهما عادى
مش قادره افهمنى فى الحته دى بصراحه
!!!!!!!

readmore »»

02 February 2010

كلام والسلام ... كلاكيت تالت مره

.
11 التعليقات



مش عارفه ليه حسانى متفائله من بدايه السنادى
رغم انها ماجتش بحاجه حلوه لحد دلوقتى
ورغم انها جابت حاجات كتير ملغبطه فى بعضها
ورغم انها خلتنى اشيل من حساباتى ناس مهمه جدااااا بالنسبالى
ورغم انها المفروض تكون سنه محوريه فى حياتى
ورغم انى بكيت فى اول ايامها كما لم ابكى منذ فتره طويله (حلوه حته الفصحى دى)
ورغم كل الهبل ده
الا انى متفائله
وخايفه اصحى من التفائل ده على طريقاً مسدودا مسدودا يا ولدى

***********

بقيت حاسه انى قادره اسعد نفسى بنفسى
كلمه كنت نفسى اقولها من زمان بجد
لو حسيت فى لحظه انى هاتجنن واكتئب
بحاول اشغل نفسى ومافكرش
بقول لدماغى هششششش ماتفكريش
وهى مؤدبه وبتسمع الكلام ومابتفكرش
بقيت بتمنى اخرج حتى لو لوحدى
لان مجرد مشى فى الشارع لوحدى
بيحسسنى انى مبسوطه

************

الشتاء على غير عادته
عاملى حاله من التصالح غير عاديه
اتمنى انها تدوم

************

باختصار شديد جدا
v
v
كان لازم افهم م الاول
ان الفيلم ده مش هيطول

باختصار اشد جدا جدا بقى
v
v
بقيت بتوحشنى ويوحشنى كلامى معاك

************

بالرغم من الكلمه الهايله اللى قولتها فى الجمله الهايله اللى فاتت
الا انى خدت قرار هام جدا جدا
انى مش هاعتمد على حد عشان يبسطنى
مش هستنى حد عشان يطمنى
حاسه انى مبسوطه بنفسى بالرغم من ان مفيش حاجه فى حياتى ابقى فخوره بيها
بس يكفينى فخر اى حد من اهلى بيا وهو بيتكلم عليا
حتى بردو لو ماكنتش عملالهم حاجه مهمه

************
من كام يوم وانا راكبه الاتوبيس مع ماما الصبح
وبعد محاولات اتصالى باصحابى عشان يخرجوا معايا
وبعد فشلى فى كل المحاولات دى
فجأه لاقتنى بقولها
ماما انا هانزل من الاتوبيس هاروح معرض الكتاب
ماما : لوحدك؟
انا : اه لوحدى
ماما : بطلى جنان يا حبيبتى وتعالى روحى معايا
انا : ابدااااا انا خدت قرار خلاص .. اشوفك بعدين يا قطه
بعتها طبعا عند اول محطه
ونزلت روحت لوحدى فى اول محاولاتى للخروج منفرده بذات نفسى
واللى تخيلت انها هتبقى كئيبه ورخمه
الا انى كنت مبسوطه جدااااااا
وبتمشى بمزاجى وبدخل كل دار براحتى
ماحدش ورايا بيقولى يلا وانا زهقت او تعبت
كانت مسيطره عليا الراويات وخصوصا اجاثا كريستى مش عارفه ليه
وكمان المسرحيات وخصوصا من الادب العالمى بردو مش عارفه ليه
ولفت نظرى كتب كتير
بلد متعلم عليها
ووظيفه ما تمت
و الضرب فى الميت
انا عموما بحب الادب الساخر جداااااااااااااا
واضايقت عشان كان فى حفلات توقيع عايزه احضرها ومش لحقتها
طلعت من اليوم ده بأيه بقى
انى اتبسطت وانا لوحدى
اتبسطت بالكتب اللى جبتها
الا ان المشكله الوحيده
انى لما ببقى لوحدى
ببقى عايزه حاجه تسلينى
مش بلاقى قدامى غير انى امشى اكل اى حاجه
وده مؤشر خطير جدا جدا
وهيخلينى البس فى الحيط ان شاء الله

************

الفتره اللى فاتت كنت باخد كورس ICDL
كنت مش حابه اروحه لكن كان شئ لازم
مش بتأقلم مع اى ناس غريبه عنى بسرعه
مش باخد على اى جو جديد عليا بسرعه
ولذلك كنت منطويه كعادتى
الا انى فى يوم بدأت اخد على الناس اللى معايا
وعلى الباشمهندس
اللى كان بيدينا
واخر يوم كنت مضايقه جداااااا انى مش هاشوفهم تانى
حتى لو كنا هنوعد بعض اننا نتقابل
بس عارفه ان مشاغلنا الجايه هتاخدنا
اول مره فى حياتى
اخد على ناس غريبه عنى بالطريقه دى وبالسرعه دى

************

ساره:انا بقيت مضايقه اوى يا دينا مفيش حاجه كويسه بقى هتحصل
انا:ليه يعنى يا ساره ما الحياه ايزى اهى
انا بردو:صراحه انا بقيت متفائله جدا السنادى او بمعنى اصح مابقاش فى حاجه تضايقنى
ساره:انا خايفه يكون احساسك ده لانك مابقاش عندك القدره تزعلى تانى اولان دموعك خلاص خلصت
انا(فى حاله تتنيح وتفكير):تفتكرى ده السبب؟!!

*************

فى انتظار على احر من الجمر
للشغل
عايزه اشتغل
ونفسى اشتغل
وهاموت واشتغل

readmore »»

التالته تابته

.
6 التعليقات




الف مبرووووووووووووك
الف مليون مبروك لمصر كلها
عملوها الرجاله
لتالت مره
بجد مبسوطه اوى
واقصى لحظات انبساطى كانت امبارح وانا هبله وماشيه فى الشارع وماسكه العلم وعماله اغنى او اصقف
اقصى لحظات انبساطى وانا شايفه الاجانب ماشيين جنبنا وفرحانين على فرحتنا دى
مبسوطه اوى لما بشوف فى التليفزيون دول عربيه تانيه وهى فرحانه لينا
البوست ده كان المفروض وقته امبارح
بس ماحبتش اجى من غير الصور اللى صورتها
وفرحانه بيها اوى
مش لانى اللى مصوراها (مش عايزين هبل)
بس لانى عاجبانى المناظر اللى فيها ومخليانى متفائله
ومخليانى فرحانه ببلدى
وبناسها حتى لو كانت دماغهم بتضرب فى بعد الاحيان
وفى احيان اخرى مكسلين ومتنحين وتايهين وصامتين وغامضيين



الصور دى من المترو محطه انور السادات




والصور دى من شارع طلعت حرب
اللى كان مقفووووول نهااااائى



والفيديو ده كمان


video

فى فيديوهات وصور تانيه مع ساره
ان شاء الله اعرف اقتبسهم منها فى القريب العاجل
وخصوصا صور الناس فى شارع شبرا
عشان حقيقى كان منظرهم تحفه

كلمه اخيره

الــــــــــــــف مـــــــــــــبـــــــــــــــــــرووووووووك

readmore »»
 

FaceBook Comments

wibiya widget