02 February 2010

كلام والسلام ... كلاكيت تالت مره

.



مش عارفه ليه حسانى متفائله من بدايه السنادى
رغم انها ماجتش بحاجه حلوه لحد دلوقتى
ورغم انها جابت حاجات كتير ملغبطه فى بعضها
ورغم انها خلتنى اشيل من حساباتى ناس مهمه جدااااا بالنسبالى
ورغم انها المفروض تكون سنه محوريه فى حياتى
ورغم انى بكيت فى اول ايامها كما لم ابكى منذ فتره طويله (حلوه حته الفصحى دى)
ورغم كل الهبل ده
الا انى متفائله
وخايفه اصحى من التفائل ده على طريقاً مسدودا مسدودا يا ولدى

***********

بقيت حاسه انى قادره اسعد نفسى بنفسى
كلمه كنت نفسى اقولها من زمان بجد
لو حسيت فى لحظه انى هاتجنن واكتئب
بحاول اشغل نفسى ومافكرش
بقول لدماغى هششششش ماتفكريش
وهى مؤدبه وبتسمع الكلام ومابتفكرش
بقيت بتمنى اخرج حتى لو لوحدى
لان مجرد مشى فى الشارع لوحدى
بيحسسنى انى مبسوطه

************

الشتاء على غير عادته
عاملى حاله من التصالح غير عاديه
اتمنى انها تدوم

************

باختصار شديد جدا
v
v
كان لازم افهم م الاول
ان الفيلم ده مش هيطول

باختصار اشد جدا جدا بقى
v
v
بقيت بتوحشنى ويوحشنى كلامى معاك

************

بالرغم من الكلمه الهايله اللى قولتها فى الجمله الهايله اللى فاتت
الا انى خدت قرار هام جدا جدا
انى مش هاعتمد على حد عشان يبسطنى
مش هستنى حد عشان يطمنى
حاسه انى مبسوطه بنفسى بالرغم من ان مفيش حاجه فى حياتى ابقى فخوره بيها
بس يكفينى فخر اى حد من اهلى بيا وهو بيتكلم عليا
حتى بردو لو ماكنتش عملالهم حاجه مهمه

************
من كام يوم وانا راكبه الاتوبيس مع ماما الصبح
وبعد محاولات اتصالى باصحابى عشان يخرجوا معايا
وبعد فشلى فى كل المحاولات دى
فجأه لاقتنى بقولها
ماما انا هانزل من الاتوبيس هاروح معرض الكتاب
ماما : لوحدك؟
انا : اه لوحدى
ماما : بطلى جنان يا حبيبتى وتعالى روحى معايا
انا : ابدااااا انا خدت قرار خلاص .. اشوفك بعدين يا قطه
بعتها طبعا عند اول محطه
ونزلت روحت لوحدى فى اول محاولاتى للخروج منفرده بذات نفسى
واللى تخيلت انها هتبقى كئيبه ورخمه
الا انى كنت مبسوطه جدااااااا
وبتمشى بمزاجى وبدخل كل دار براحتى
ماحدش ورايا بيقولى يلا وانا زهقت او تعبت
كانت مسيطره عليا الراويات وخصوصا اجاثا كريستى مش عارفه ليه
وكمان المسرحيات وخصوصا من الادب العالمى بردو مش عارفه ليه
ولفت نظرى كتب كتير
بلد متعلم عليها
ووظيفه ما تمت
و الضرب فى الميت
انا عموما بحب الادب الساخر جداااااااااااااا
واضايقت عشان كان فى حفلات توقيع عايزه احضرها ومش لحقتها
طلعت من اليوم ده بأيه بقى
انى اتبسطت وانا لوحدى
اتبسطت بالكتب اللى جبتها
الا ان المشكله الوحيده
انى لما ببقى لوحدى
ببقى عايزه حاجه تسلينى
مش بلاقى قدامى غير انى امشى اكل اى حاجه
وده مؤشر خطير جدا جدا
وهيخلينى البس فى الحيط ان شاء الله

************

الفتره اللى فاتت كنت باخد كورس ICDL
كنت مش حابه اروحه لكن كان شئ لازم
مش بتأقلم مع اى ناس غريبه عنى بسرعه
مش باخد على اى جو جديد عليا بسرعه
ولذلك كنت منطويه كعادتى
الا انى فى يوم بدأت اخد على الناس اللى معايا
وعلى الباشمهندس
اللى كان بيدينا
واخر يوم كنت مضايقه جداااااا انى مش هاشوفهم تانى
حتى لو كنا هنوعد بعض اننا نتقابل
بس عارفه ان مشاغلنا الجايه هتاخدنا
اول مره فى حياتى
اخد على ناس غريبه عنى بالطريقه دى وبالسرعه دى

************

ساره:انا بقيت مضايقه اوى يا دينا مفيش حاجه كويسه بقى هتحصل
انا:ليه يعنى يا ساره ما الحياه ايزى اهى
انا بردو:صراحه انا بقيت متفائله جدا السنادى او بمعنى اصح مابقاش فى حاجه تضايقنى
ساره:انا خايفه يكون احساسك ده لانك مابقاش عندك القدره تزعلى تانى اولان دموعك خلاص خلصت
انا(فى حاله تتنيح وتفكير):تفتكرى ده السبب؟!!

*************

فى انتظار على احر من الجمر
للشغل
عايزه اشتغل
ونفسى اشتغل
وهاموت واشتغل

11 comments

حـــــروف متــبعترة " عــمرو الشــايب said...

حلو بجد الكلام و القراراات الى انتي اختيها بجد دى حالة كويسة الي انتي فيها و دقيني التفائل حلو
وجمللك مش هبل زي ما قولتي

prince of silence said...

lol 7ases eny a3rafek abl kda
bs sortek msh kda at all ... asly a3raf bent magnoona kda .. tmam zyk belzabt .. nice write :)

Bent Men ElZman Da !! said...

3mr wa2el

اخيرا حد بيقولى ان قراراتى كويسه
احمدك يارب
ادعيلى والنبى حاله التفائل دى تستمر
اصلها ساعه تروح وساعه تيجى
نورت يا جميل

Bent Men ElZman Da !! said...

prince of silence

شكلك سمعت الكلام ده من حد قبل كده هههههههههههه
بس صوره ايه اللى مش على طول مش فاهماك
ميرسى ليك
ونورت المدونه :)

psycho said...

مساء الخير
تفائلى بس وربنا هيكرمك
ومتخرجيش من التفاؤل
الخروج منه صدمه مش حلوه

Bent Men ElZman Da !! said...

لا ان شاء الله مش اخرج منه
اصل الخروج من التفائل دخول على مرحله اكتئاب عدلللللل
ميرسى ليك كتير

The illusionist said...

بيب بيب بيب انا جيت

The illusionist said...

لا مولا يهمنى موافقه مالك المدونه انا
انا جيت غصب عن مالك المدونه
اوعى يا مالك المدونه انت
وسعلى كده
هعلق

The illusionist said...

اييييييييييييييه
دونيا
حسنه قليله تمنع بلاوى كتيره
ومن قدم شئ بيداه التقاه
واللى خدته القرعه تاخده ام الخلول
والسح الدح امبو

The illusionist said...

نعلق بقى زى الشطورين الحلوين
اولا روحتى المعرض لوحدك
كنا عاوزين نشوفك
يلا معلش
ثانيا
شوووووووووووووووووووووووفتى
الواحد وهو لوحده بيبقى قمه الاستمتاع
فعلا
حاجه تحفه
وربنا كل سنه اروح وارجع لوحدى
كده فل بجد
واقابل حد شططور امور لاول مره
ولمده ساعتين كده
وفل عليا
متعه بجد
وبالنسبه لدموعك
اكيد مخلصتش
ايه
انتى لسه شباب
والشباب عيوطين يعنى
والشغل
ههههههههههههههه
هتشتغلى
غصب عنهم هتشتغلى
انتى محاميه ووكيله نيابه قاااااااااااااااااد
كدهون
وواحد فاتح صوابعينه
حجم صغنون لسه يعنى

حته يا بته جرجير شطه
وبس كده
انا منور طبعا كعادتى
بيسو

Bent Men ElZman Da !! said...

هههههههههههههههههههههههههههههههههههه
والله انت مشكله بجد
عامل حس للمدونه يا راجل وربنا ههههههههههههههه
انا كنت شوفت البوست اللى كتبته بتاع يوم المعرض
بس كنت وقتها روحت
وكنت مقرره اروح تانى بس الظروف مش سمحت للاسف
ان شاء الله لينا لقاء المعرض الجاى وعليك خير
بس فعلا الواحد وهو لوحده بيستمتع جدا بردو
هاشتغل اه ان شاء الله
بس وحياتك يا شيخ تبعدنى عن المحاماه والنيابه
ده انا قربت اتبرى من شيهادتى عشان الناس تقتنع انى مش هابقى محاميه ولا بحبها :(
واكييييييييد منور يا بيسو

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment