03 July 2010

كلام والسلام ... كلاكيت رابع مره

.





 

هو احنا ليه كده بقى
ها؟
ها يعنى؟
احنا ليه دايما شخصيات متناقضه بالمنظر ده
ليه لما بنتحط فى موقف بنقول فيه رأينا اللى فى الغالب بيكون لصالحنا
وبنبقى متخيلين ان ده اصح رأي ممكن اى عبقرى يقوله فى الموضوع ده
لكن لما حد غيرنا اللى بيتحط فى نفس الموقف وبيطلب النصيحه
اوباااااا
تلاقينا بنقول مواعظ وحاجات اخر جمال كده
كلنا كده بلا استتثناء
ليه بنقول نصايح احنا مش بنمشى عليها؟
وليه بنقول حاجات صح واحنا بنعمل الغلط اللى عكسها
ليه عندنا انفصام فى الشخصيه بالمنظر ده
ليه مانحاولش نبص على كل حاجه من فوق شويه
يمكن نشوفها بطريقها مختلفه ونعرف الصح فين
ها؟
ليه ها؟

*************

من فتره كنت بتفرج على برنامج صبايا(للاسف الشديد يعنى)
وكانت بتتكلم وقتها على موضوع البنات المليانه
(لانى بكره اوى كلمه تخينه دى واللى هيقولها هاديله فى وشه انا قولتلكم اهو)
وكانت جايبه حالات بتتكلم معاهم
وهى نفسها بتتكلم انها كانت مليانه وكان وقت وحش اوى عليها
وكانت مش واثقه فى نفسها وتكاد تكون بتكرهه شكلها
رغم انها كانت بتهول اوى من الموضوع
وحسستنى ان المليانين دول كائنات خرافيه او باء مثلا
الا انى مقتنعه بجزء من كلامها
ان الاحساس وقتها بيبقى وحش ده حقيقى
والواحد بيحس انه ناقصه حاجه
والثقه بتبقى موجوده بس مش بنسبه 100% طبعا
وفى الغالب بيبقى فى احراج فى مواقف معينه
بس بعد كده الوضع بيختلف لما بتتغلب على الوضع ده
الثقه بتبقى اكتر من من قبل كده
فعلا اقل حاجه بتأثر على نفسيه اى حد فينا
حتى لو اللى حواليه مش واخدين بالهم منها
او حتى واخدين بالهم بس مستهبلين وعاملين انها حاجه عاديه
و ماحدش يستهون بحد ولا يتريق على حد
عشان اللى قدامك ممكن ياخد كلامك بهزار بس من جواه مضايق ومش عايز يزعلك
اللى عايزه اوصله من ده كله
ان اللى عنده عزيمه بجد هيغير من نفسه حتى لو فى حاجه بسيطه
والتغير ده بيفرق فى الشخصيه جامد
مش مجرد كلام فى الهوا
بقول كده لانى مريت بنفس التجربه دى تقريبا
وعارفه وحاسه بتأثير التغيير ايه
الكلمه اللى اهم من ده كله بقى
ان اللى وحش من جواه
لو عمل تغير جذرى والا حتى تربيعى
هيبقى بردو طريقك مسدودا مسدودا يا ولدى

*************

زعلنا اوى واتقهرنا وحسينا بقله قيمه
للى حصل فى كترمايا
بس لما يحصل لــ خالد سعيد اللى حصل
وماحدش ياخد جزاته
وكمان يتقال ان السبب غلط منه
يبقى احنا نستحق يحصلنا اى حاجه فى اى مكان
وحكومتنا تقولنا خدوا اكتر كمان
واحنا نقولهم ماهو اللى مش قادر يتشطر على الحمار يتشطر على اللى زينا
وابقوا خلوا كاس العالم ينفعكم

*************

كنت نفسى بعد الغياب اللى فات
ارجع المدونه وانا فى ايدى خبر حلو
ما هو كان حاجه من اتنين
ياما شغل
ياما خطوبه
والحمدالله الاولانى مافلحتش فيه
والتانى كالعاده قتلته قبل ما يكمل (قصدى قتلت الموضوع يعنى)
وقررت انه مؤجل الى أجل غير مسمى بتاتا نوهائى مطلقا
الفتره اللى فاتت دى اكتشفت اكتشافين مهمين
رغم انى هاموت بجد واشتغل فى حاجه بحبها واقدر ادى فيها اقصى ما عندى
الا انى مش اى حاجه تريحنى وتعجبنى وابقى مبسوطه بيها
وده فى مجال الشغل فى الفتره المنحوسه دى شئ لا يبشر بأى خير خالص الحقيقه
والاكتشاف التانى الاهم
انى غير قادره على تحمل مسئوليه شئ غير مقنع اسمه "الجواز"
انا لسه مابقاش عندى الاستعداد انى ابطل اخرج مع اصحابى
ولسه مش عندى استعداد وقت ما يقولولى عاملين خروجه بكره
اقولهم سورى مش فاضيه مشغوله مع المتنيل على عينه
ولا عندى استعداد ابطل ارتب رحلات زى اللى برتبها كل فتره معاهم
ولسه مش عندى استعداد لما يقولولى تعالى معانا المكان الفلانى
ابطل اقولهم بيس انا اساسى راشقه معاكوا
لسه ماعنديش استعداد لأى تغير جذرى فى حياتى
انا بحب اصحابى جداااااااا
وماعنديش استعداد ادخل حد فى حياتى دلوقتى يشاركهم فى حبى ليهم
والاهم من ده كله انى بت فافى اساسا ومش بتاعه مسئوليه وعيال وكلام من ده
(انا بس اللى اقول على نفسى اللى انا عايزاه اااااه انا حره)
لذلك هاقول فى سرى لاى واحد بيفكر يتقدملى بطريقه جواز الهباب قصدى الصالونات
نفض لنفسك ياض انت
ولأى شاب حليوه بيفكر يقولى انا معجب بيكى وعايزنا نرتبط
ياعم الامور انا لو معجبه بيك هتحس
ولو مش معجبه بيك يبقى نفض لنفسك انت كمان مع الواد اللى متنفضله قبل منك فوق ده
اما بلاوى صحيح

*************

فى نوعيه من البنات مستفزيانى اوى الفتره دى
او يمكن انا اللى الفتره دى بتلكك عشان حد يستفزنى وخلاص
انا بقيت بتخنق اوى من البنات اللى بتبقى ماشيه وحاسه بغرور فظيع دى
الغرور عمتا وحش اوى
بس بقى ظاهر فى البنات تحديدا بطريقه تفرس دلوقتى
او يمكن انا بردو اللى ربنا كرمنى بشخصيات مغروره كتير الفتره دى
بتخنق اوى من البنات اللى بتبقى ماشيه حاسه ان مفيش احسن منها على وجه الارض
واتخنق اوى من الشخصيات اللى بتعترف بده كمان
طب دارى على خيبتك مش كفايه اللى الواحد شايفه بعينه
هيبقى عينه وودانه كمان
الثقه مطلوبه
بس الغرور بيقتل النفس


*************

هو يعنى ايه بقى الراجل مابيتعيبش؟؟
والا كلمه "ده ولد مش مشكله لما يغلط"
ياخراشى على الناس اللى هتفرسنى
انا مش مع القصه الوهميه اللى اسمها مساواه الرجل بالمرأه
بس بردو انا مش مع التفرقه العنصريه دى
يعنى ايه الراجل مابيتعيبش
ومفيش راجل وحش
والراجل من حقه يغلط عادى على عكس البنت
ايه الهبل ده يا جدعان
ده اسمه استهبال والله
لا بقى
الراجل بيتعيب وفيه عيوب يراها اى كفيف
والراجل فى من صنفه كتير وحش وعايز يطخ بالنار فى عنتينه الاتنين
والراجل لما يغلط لازم يتعاقب او يتجأزى نتيجه غلطه ده زيه زى اى كائن ارضى
الا اذا كان هو كائن فضائى بقى وده اللى انا مرجحاه
ما هو مش عشان اسم النبى حارصه راجل
يبقى يمشى يشوط فى خلق الله ولا يهمه مثلا
ما هو لو كده انا هنادى ان كل البنات تقول يارتنى كنت ولد بقى
مش اسلوب ده يعنى
عصبتونى
الله
اما اروح اشرب حاجه تهدى اعصابى

19 comments

safa7_karmooz said...

بالنسبة لاول موضوع فأنا بطلت انصح نفسى حتى :D

بس اللى بيعمل كده بديله على راسه لما هوا فيه العيب وبيقولى اداريه

باقى الكلام للما اصحى من النوم ان شاء الله ^_^

ليله شتاء said...

ههههههههههههه
من العنوان كلام والسلام انا بحب البرنامج ده جدااااااااا

فعلا اللى جسمهم يمكن مليان شوية بتكون ثقتهم فى نفسهم قليلة شوية وممكن الرفعين كمان ههههههههه يعنى مش بالشكل اكيد فى كل الحالات


*********



اللى حصل فى كاترمايا حسبي الله ونعم الوكيل عنه

*****8
ربنا يرزقك بلشغل اللى بتتمنيه ولما يجيلك الحب هتنسى كل اللى قولتيه

******
من تواضع لله رفعه
ولكن الليالي تدور ..

كفاك .. غرور

********
الرجال قوامون على النساء

لكن ما حرمه الله لبنى الادمين رجل او امرأة مقالش الرجل يعمل كده والبنت لأ

********
ربنا يسعد أيامك

دمتى بخير

adel said...

1-الراجل بيغلط و مفيش حاجة اسمها كده
وربنا خلق الكل متساويين
احنا اللي بنقول اي كلام و عبط

2-مالها تخين ؟؟
عكس رفيع تخين
الكلمة مفيهاش حاجة ولا عيب ولا حرام يعني

3-اغفتكرت قتلتي العريس
LOOL

4-قتيل لبنان طلع برئ اصلا من تهم الاغتصاب دي
سمعتي الخبر ده اصلا ؟
طيب حد خد حقه ؟
طيب حتي اتنين جنية لزوم الميكروباض ؟؟

سمع هوص (Abo 3li) said...

اااااااااااااااااااااااااااه يعيني...
مش تراعي ان فيه عالم عنيها تعبانة بتدخل عندك... الخط لونه فااااااااااااااااااااااااااااااااتح اوووووووووووووووووووووووي....

ربنا يرزقك بالشغل ال نفسك فيه... ويبعتلك ابن الحلال ال مش هتقوليله نفض لنفسك ياض.. وهتقوليله بابا مستنيك ياحلاوة.... ههههههههه...

تحياتي يادينا..

Bent Men ElZaman Da !! said...

safa7_karmooz

ومش بتبقى بس على العيوب كمان
بتبقى فى مواقف محتاجه قرارات
اوقات كتير مش بنقدر نديها لنفسنا
بنقولها لغيرنا
ولما نبص على اللى قولناه
نقول طب احنا ليه مابنعملش كده
تصحى بالسلامه :D

Bent Men ElZaman Da !! said...

ليله شتاء

تصدقى انا ماعرفش ان فى برنامج اسمه كلام والسلام اصلا ههههههههه

هو اكيد مش بالشكل
بس فى حاجات بتفرق وفى ناس الشكل ده بيأثر فيها

عجبتنى الجمله اللى قولتيها على الغرور دى

اهو انا بقى بقول كده
ان اللى اتحرم اتحرم على ست وراجل
الغلط اسمه غلط بخلاف جنس الشخص اللى بيعمله

ميرسى ليكى على زوقك
وربنا يوفقك انتى كمان فى حياتك ويسعد ايامك يارب

Bent Men ElZaman Da !! said...

adel

حتى انت متفق معايا بردو
تخيل لما اللى يقولك الكلمه اللى قولتها فوق دى ست يبقى ايه الحل

الكلمه مش عيب
بس فى ناس بتتعامل معاها على انها نكته
زى رقم 5 بيضحك طب 5 :D

ههههههههههههههه
انا بردو قولت اوضح انى قتلت الموضوع لحسن حد يفتكر انى ارتكبت جريمه وانا فى عز شبابى كده
انا مأجله الجريمه لفتره مش دلوقتى يعنى

كان متوقع انه يتبرأ
عشان الاتهامات كلها كانت غير منطقيه بالمره اصلا
بس ماخدتش بالك انت بقى
ان بعد الموضوع ده
طلع 100 موضوع يخلونا ننسى او نحاول نتناسى اللى حصل
وبردو ماحدش خد ال2 جنيه بتوع الميكروباص

Bent Men ElZaman Da !! said...

سمع هوص (Abo 3li)

تصدق بردو اللون ده جايبلى حول فى عينى وانا اصلا مش ناقصه
بس برستيج المدونه مش سامحلى اغيره

لا انا لو لاقيت ابن الحلال اقوله من قفاك على التدبيسه يا امور هههههههههههه

نورتنى

MeGltNa 3mr Wa2el said...

والله انا عاوز اقولك ان الواحد فينا لما بيكون ف موضوع مش بيعرف يلملم او يعني يكون شايف الموضوع بحذافيره زي ما الكل بيقول بس لما ببتكوني برة بتقدري لان عقلك بيفكر و هو هادىء البال مش مشتت الافكار فهو بيفكر تحت ضغط انما احنا بنفكر تحت راحة فبنقول حكم و مواعظ
بس خلالالالاص

Bent Men ElZaman Da !! said...

MeGltNa 3mr Wa2el

انا معاك اكيد ان الواحد لما بيبص على الموضوع من بره وهو مش فيه بيفكر اكتر
بس ليه بنبقى متناقضين اوى بالمنظر ده
ليه بنبقى بتفكيرين بالمنظر ده
ده اللى بيفرسنى

اقصوصه said...

بالنسبه لموضوع السمنه

انا بعد عن نفسي اشوةفه كابوس

بس اكيد اغلبنا مر بمرحله بحياته

عانى فيها من هالمشكله

وفعلا مثل ما قلتي اهم شي الاراده

تقبلي مروري:)

The illusionist said...

هو انا معلقتش
طب انا جيت اهو

The illusionist said...

الكلام ده يخرب بيت كده
ده انتى شايله فى نفسك
ده لولا المدونه دى
كان زمان حد فى بيتكم راح ضحيتك
كل حرف صح
برنامج صبايا ده برنامج
...........
والبنات المغارير
دول متعه لشباب جيلنا فى التريقه
واخيرا
اه الراجل ميتعيبش
الراجل من حقه يغلط
اه بقى يعنى
هو ايه ده
لما الاقى ست شغاله بتنضف مجارى ولا بتشيل زباله
ولا طالعه على عمود نور وبتصلح سلوك وهتكهرب
ولا بتيجى تبنى مع العمال
اقولك الست متتعيبش
هههههههههههههههههههههههههه
انا راجل عنصرى
اه
لامؤاخذه يعنى
بس عندك حق
ده استهبال
بس المشكله
ان غلطه البنت
عمرها ما زى غلطه الولد
عشان كده
فى فرق

نسر الشرق said...

لو العروسة مش تخينة انا مش هوافق
مفهوم ؟؟؟
تخينة
مش مليانة
وعلى العموم اللى حصل فى كترمايا ده عكس اللى حصل فى مصر لان موضوع كترمايا هو رد فعل على الفوضى اللى صارت فى مصر
اما اللى حصل فى مصر هى الفوضى
تحياتى
http://nisr-elsharq.blogspot.com/

ســـهــــر said...

اولا كدة وحشانى اوىى ماشى يا ستى ؟
ثانيا انا مش عارفة ارد عليكى بالترتيب بس هرد كدة تلقائى وخلاث
بصى يا قمر موضوع الشغل دة بقا كارثة بكل المقاييس مهو لو مش لاقينا اللى بنحب نشتغلة هنضطر نشتغل حاجة غيرة ودى فى حد ذاتها مخنقةةةةةة اوى موضوع الخطوبة والجواز مش معنى انك بتحبى صحباتك انك مش هتقدرى تتحملى مسؤلية لا عادى جدا انا صحباتى متجوزين وبنخرج مع بعض كتير وبنتقابل والدنيا زى الفل
وموضوع البنوتات المليانة المشكلة كتير بتبقا فى اللى حواليهم بيبقو سم ولا فى دم ولا احساس

والراجل بقا بيتعيب وبيتعيب بكتير بكرة ا للى بيقول لا دة راجل ميعبوش حاجة بيبقا نفسى الوشة فى وشة :@

وبالنسبة للغرور دة مرض بكرهه اوى
قال رسول الله صلى الله عليه و سلم :"لا يدخل الجنة من كان في قلبه مثقال ذرة من كبر

وسورى بقا طولت عليكى اوى

Bent Men ElZaman Da !! said...

اقصوصه

طبيعى ان الواحد تمر فى حياته مشكله
الاسوء ان المشكله دى تفضل فتره طووووويله
ميرسى ليكى يا قمر نورتينى

Bent Men ElZaman Da !! said...

The illusionist

يا ويلكم يا ويلكم
لولا المدونه دى كان جالى هسهس وربنا
ما انا ماقولتش من الاول اصلا ان الست زى الراجل اصلا لانى من الاول قولت انى مش مقتنعه بالمسأواه لانها وهميه
بس الفكره ان الغلط ده صفه مشروعه فى لانسان بوجه عام
سواء ست والا راجل يبقى ليه التفرقه حتى فى ده بقى
مع مراعاه فرق مقدار الغلط اللى بتقول عليه

Bent Men ElZaman Da !! said...

نسر الشرق

انا هاسمحلك بس بكلمه تخينه
لانى معجبه بوجهه نظرك انك تتجوز واحده مليانه
ادوهم فرصتهم بقى ايوه كده

بيتهيالى اللى بيحصل فى مصر هو اللى بيدى مبرر ان نفسه واكتر كمان يحصل فى اى حتى
نورتنى

Bent Men ElZaman Da !! said...

ســـهــــر

اولا انتى كمان واحشانى اوى
ربنا يخليلك اصحابك
اومال انا ليه كل اصحابى البنات اللى بيتجوزوا بيختفوا من خلقتى وبيبطلوا يخرجوا
يكونش العيب فيا وانا مش حاسه ههههههههههه

فعلا فى ناس كتير مش بتراعى ان الكلمه اللى بتتقال للبنت حتى لو بسيطه او لو بهزار بتأثر فيها اوووى

اهو انا لما بشوف نفس الاشخاص اللى بتقولى عليهم ببقى نفسى الشوهم فى وشهم بردو
مش فاهمه يعنى ايه مابيتعيبش!!!!!!!!

عليه الصلاه وافضل السلام

ميرسى ليكى يا قمر
نورتينى والله

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget