31 December 2011

♥{HaPPY NeW Yaer}♥

.
30 التعليقات




2011
الواحد مش قادر يصدق ان السنه دى خلصت
السنه دى اصلا ماتتصدقش
احداثها كتيره وتغيراتها كبيره
كنا قبل كده بنعيش ايام كتير شبه بعضها مفيش فيها اىجديد
انما السنادى
كان كل دقيقه خبر
وبقينا احنا اللى بنجرى وراء الاحداث والاخبار 
عشان نقدر نفهمها ونستوعبها
لان اللى حصل السنادى كان اكبر من تخيلات واستيعاب اى حد
وماكنش ابداُ حد يتصور ان كل ده يحصل فى سنه واحده
فعلا سنه صنعت تاريخ هنفضل نحكيه لولادنا طول العمر
وكأن التاريخ اختزل كل احداثه فى السنين اللى فاتت
عشان تتكتب كلها فى تاريخ 2011

فى 2011 

بلدى اتغيرت ولسه بتتغير وهاتتغير
احنا بقينا نبص لمستقبلنا بطريقه مختلفه
وبنظره فيها امل وتفاؤل اكبر من الاول
انتمائنا لبلدنا بقى شئ واضح وبيزيد يوم عن يوم

اما فى حياتى انا
فا 2011 كانت من اهم سنين حياتى اللى فرقت معايا اووى
يمكن ربنا كان بيهون عليا الاحداث اللى بتحصل فى البلد
باحداث حياتى انا نفسها
اللى اختلفت كتيييير للاحسن الحمدالله

فى 2012

نفسى بلدنا تبقى احسن بلد فى الدنيا
نفسى كل احلامنا تتحقق
نفس كل حاجه من حوالينا تبقى حلوه
نفسى من جوانا احنا نبقى احلى


كل سنه وانتم طيبين
وسنه سعيده علينا كلنا ان شاء الله

^_^


readmore »»

26 December 2011

كلام والسلام ... كلاكيت 11 مره

.
27 التعليقات




انا زهقت منى فى حكايه قله الرد على التليفونات والاتصال بحد دى
ده انا لو بتصل بنفسى ومش برد كده
هاقطع علاقتى بيا على فكره !!

********************

لما ماما من يومين بتقولى بابا كان اد ايه بيحبكم انتى واختك
ومش بيقبل اى حاجه عليكم ابداً
مش عارفه ليه افتكرت
تانى يوم بعد ما مات
لما هى اتصلت بيا من تليفونه وفجأه لاقيت اسمه
اتخضيت اوى

 دلوقتى
بتمنى ان الموقف ده يحصل تانى

********************

المذاكره وحشتنى اوى بجد
نفسى ارجع اذاكر تانى
(
:D اللى يشوف كده يقول انى كنت مقطعه المذاكره مثلا بلا نيله )

********************

هو انا ازاى بحس بيكى اوى كده
كل ما يكون فى حاجه بشوفك فى احلامى 
اللى معظمها للاسف بيتحقق

برغم اى حاجه حصلت
نفسى تكونى بخير

********************

ماما الاول كانت ضد اللى بيحصل فى التحرير
وكانت من ضمن الناس اللى شايفه ان لازم الثوار يهدوا شويه
لما وريتها الفيديوهات واللى بيعمله المجلس العسكرى فى حق الثوار
دلوقتى لما قعدت مع حد بيتكلم بطريقه وحشه عن الثوار
كان ردها 
ماسمحلكش تغلط فى الثوار اللى بيجبولنا حقنا واحنا قاعدين فى بيوتنا

مامتى
انا مبسوطه بيكى :))

********************

رضا ربنا علينا عامل زى مغناطيس للسعاده
طول ما رضاه موجود
احنا اقل حاجه بتحصلنا بتخلينا مبسوطين
لكن لو رضاه مش موجود
السعاده دى بتهرب مننا
ومهما كانت الحاجات اللى بتفرحنا موجوده
بردو مش بنحس بيها

********************

واحشنى اوى خروجى لوحدى
وحاطه سماعات الموبيل فى ودانى وابقى فى دنيا لوحدى
واتفرج على الناس والبيوت والطريق
واحشنى اوى انى اقابل ناس جديده عمرى ما عرفتهم

********************

حاسه ان ربنا بيحبنى اوى
عشان مش ادانى بس ام واحده
انما تلاته
امى وجدتى وخالتى
ربنا يخليكم ليا

readmore »»

21 December 2011

شكراً للمجلس العسكرى

.
18 التعليقات




شكراً للمجلس العسكرى
لانى ماكنتش اعرف معنى تتسحل الا من عمايلكم

شكراً للمجلس العسكرى
لانك عرفتنى اد ايه احنا دمنا رخيص اوى كده

شكراً للمجلس العسكرى
لانك خلتنى اشوف ان اللى متغطى بيك عريان

شكراً للمجلس العسكرى
لانك قطعت ايد الشعب اللى ماسكه فى الجيش
وبنيت بينهم سور عمره ابداً ما هيتكسر

شكراً للمجلس العسكرى
لان مفيش حق شهيد من الشهداء رجع لحد دلوقتى

شكراً للمجلس العسكرى
لان مفيش اى حد غلط خد جزائه لحد دلوقتى

شكراً للمجلس العسكرى
اللى فى نظره الكتب اهم من البنى ادمين

شكراً للمجلس العسكرى
لانك بتموت فى شبابنا وبتعرى فى بناتنا

شكراً للمجلس العسكرى
اللى ال أيه حمى الثوره !!
انهى ثوره اللى حمتها بالظبط حضرتك؟!!؟


readmore »»

17 December 2011

اهــديــك ♥

.
21 التعليقات




اهديك عمراً لن يكن الا معك
اهديك روحاَ لم تكتمل الا بك
اهديك قلباً لا ينبض الا لك
فلا وجود لى الا منك
♥ ♥
 

readmore »»

12 December 2011

فــيـد واسـتــفيـد

.
18 التعليقات




النهارده اخر يوم فى حمله التدوين اليومى فيد واستفيد
مش كتبت 30 تدوينه بالظبط للاسف
لان فى ظروف حصلت فى الفتره ما بين 11/11 لحد النهارده
خلت كتير مننا اصلا يتوه منه الكلام
ومايبقاش قادر يعبر عن كل اللى بيحصل بأى حاجه
لان اللى بيحصل واللى هيحصل اكبر من اى كلام يتقال
احداث محمد محمود
والانتخابات
والوزاره الجديده
صراحه كانت حمله فى وقتها المظبوط
سعيده اوى بيها
وسعيده جدا جدا بالمدونات اللى عرفتها فى الحمله دى
 كل حمله بتخلينى اعرف ناس اكتر وازور مدونات لناس كلامهم رائع بجد
شكرا لكل الناس اللى اشتركت فى الحمله دى 
لانكم خلتونى اقرالكم حاجات حلوه اوى كده
عقبال حملات تدوين تانيه ان شاء الله :)




readmore »»

11 December 2011

مقاسك ايه؟؟

.
24 التعليقات




اهو احنا كده
الدنيا دايماً مقاسها كبير علينا
واحنا بكل الكيان ده صغيرين اوى فيها
بنمشى فيها نتخبط هنا وهنا غصب عننا
قليل اوى لما نفكر او نقدر نمشى فيها على مقاسنا
وفى ناس بتعيش وتموت
وماتعرفش مقاسها فى الدنيا ايه اصلاً !!


readmore »»

10 December 2011

انا ضد البرادعى !!

.
22 التعليقات


انا ضد البرادعى من زمان من قبل الثوره 
ومش حابه ظهوره المفاجئ ده
وكأنه هو المفجر للثوره مثلاً
بس ماكنتش ضد الناس اللى بيشجعوه او عندهم استعداد يختاروه
كل واحد ليه رأيه وتفكيره وهو حر فيه

كنت من انصار عمرو موسى صراحه
بما ان هو شخصيه سياسيه وفاهم فى العلاقات الخارجيه 
 وقادر يتعامل كويس داخلياً
بدليل ان ناس كتير بتحبه من زمان
بس شيلت فى نفسيتى اوى منك ياعمرو يا موسى
ساعه احداث نوفمبر
لما طلعت فى السى بى سى
وتقول الثوار المفروض يمشوا من التحرير 
ونكون مع الجيش ايد واحده عشان نعدى الفتره دى
طب وبالنسبه للشهداء اللى ماتوا ماخدتش بالك منهم والا ايه ظروفك؟؟
فا بقى ليا تحفظ عليه 
وعندى استعداد ابقى من انصار اى حد غيره 
وادخل فى دماغ حد اقتنع بيه اكتر


لما شوفت لقاء البرادعى مع مجدى الجلاد
مش كان عندى استعداد اسمعه او اقتنع بيه
هى دماغى كده بتبقى جزمه لما بتقفل
بس بصراحه الراجل كلامه مايتعيبش
اول حاجه كلامه بسيط اوووى
يعنى الناس اللى مش متعلمه تفهم كلامه
يعنى طريقته مش متصنعه ولا متكبره 
ولا حافظله كلمتين كبار كده جاى يتمنظر علينا بيهم
لو بقى رئيس هتبقى طريقته وكلامه قريب اوى من الناس البسيطه
ثانياُ بيتكلم بزوق جدا حتى لما بيوجهله سؤال من مشاهدين مستهبلين
بيرد بزوق واحترام
وثالثاً لما اتكلم على اللى المفروض يكون من اولويات اهتماماتنا 
وطريقنا لاصلاح البلد
كان كلامه منطقى جدا وممكن يتعمل مش شئ مستحيل
فا تفائلت بيه الحقيقه
وعندى استعداد افتح دماغى اللى قفلت من ناحيته دى



حاجه على الهامش بقى
كلام البرادعى فكرنى بيها
لانه اتكلم عن مساحه الحريه المفروضه لكل واحد فينا
واللى ماينفعش حد تانى يتعداها
هو ايه اللى يدى الحق لاى انسان انه تجبر حد يعمل حاجه مش عايز يعملها
ايه بقى اللى يخلى المرشح المبجل لحزب النور
 يجبر مذيعه القناه الرابعه انها تلبس الحجاب 
عشان يتكرم ويرضى يعمل معاها حوار؟!؟
لا ويقولها البسيه دلوقتى بمزاجك 
ما انتم هتلبسوه بعد كده غصب عنكم !!!
(ده حسب كلام المذيعه نفسها)
 لما هى مش لبسته عشان ربنا يبقى هتلبسه عشانك انت ازاى !!!


readmore »»

09 December 2011

Dreams....

.
14 التعليقات



هكذا نحن
نظلل على احلامنا
لنحميها من رياح حياتنا
وتقلبات اقدارنا
.
.
لتنمو برفق

readmore »»

07 December 2011

شويه كلام

.
24 التعليقات




لما من فتره قريبه شوفت اعلانات وزاره الاسكان 
اللى بيقولوا فيها انهم هيبنوا وحدات سكنيه 
بمعدل 25000 وحده كل سنه
واللى يحب يقدم يبقى عن طريق البريد ويبعت جوابات لوزاره الاسكان
والجواب المسجل بعلم الوصول بيكون رسومه 7 جنيه
الكلام ده فكرنى بالظبط بعد الثوره لما كله قدم على طلبات شغل
عن طريق البريد بردو لوزاره الاسكان
والحمدالله ماحدش اشتغل لدلوقتى

البلد بتتغير
و الوزارات بتتغير
والسبعه جنيه زى ما هما
اكيد العيب فى السبعه جنيه على فكره !!


most shocking
ده برنامج بيجى على ام بى سى اكشن
بيجى فيه حوادث بتحصل فى امريكا من جميع الولايات
جابوا فى البرنامج ده
ان الامريكان هناك عملوا مظاهره ضد الحكومه 
عشان كانوا رافضين حاجه معينه
مش فاكره كانت ايه للاسف
بس اللى فاكراه اوى
منظر الشوارع وهى مولعه ومتكسره 
وكل المحلات فى الشارع ده والشوارع اللى جنبه متكسره
والناس متبهدله واللى واقع على الارض واللى مصاب
لما كل ده بيحصل عندهم
اومال مش بنشوفه ومش بيتكلموا عنه ليه؟؟
ولما احنا بيحصل ده عندنا فى مصر
بيبقى فضيحه وحاجه عمرها ما حصلت ليه يعنى ؟!؟


المنحوس منحوس ولوعلقوا فى انتخاباته فانوس :D
اشمعنا انتخابات الدايره بتاعتنا الوحيده من ضمن المرحله الاولى كلها
اللى تتلغى
ايه التفرقه العنصريه دى يا جدعان
هو انا اه مش محموقه عشان مرشح معين
كنت هاموت ويكسب يعنى
لانهم كلهم فى البطيخ اساسا
بس ليه الحظ المنيل ده
لا والحركه الاجمد بقى
ان فى الاعاده الناس تنزل عادى جدا 
والمدارس تبقى موت وبالطوابير وهى اصلا ملغيه
احنا نفتخر بأننا ناس ماشيين عكس التيار :D
بالعند فيكم بردو يا مرشحين دايره الساحل
انا هانزل
ومش هاختار حد فيكم وهابطل صوتى واطلعلكم لسانى


بالنسبه للوزارء الجدد
هو الموضوع ليه قلب دار مسنين كده؟؟
وبالنسبه لفايزه ابو النجا
هى عامله لكرسى الوزاره عمل؟؟
وبالنسبه لمرارتنا الغلبانه
مش ناوين تراعو ظروفها والا ايه النظام؟؟

readmore »»

05 December 2011

وطـنـي

.
32 التعليقات




يا وطن ذكره الله فى كتَابُه الكريم
فـ أحميه يارب الى يوم الدين

وطن أََبَى ان يكون تحت ايدى الطُغاه
وطن أََبَى ان يفقد اسمى معانى الحياه

وطن اكتب فيه بعض الكلام المنثور
ولكن يبقى هو اجمل وطن بين السطور

وطن رفضنا ان نعيش فيه ... كما يتمنوا
لكى يعيش فينا ... كما نحلم

وطنى
مصر





اقصوصه مشاركه فى جداريّة أدوّن وطني



readmore »»

04 December 2011

♥...♥

.
14 التعليقات





♥ وكنت انت حلمى الوحيد الذى استطعت تحقيقه ♥
 

readmore »»

03 December 2011

December Moments ♥‿♥

.
31 التعليقات


الشهر ده من كل سنه

بيبقى دايماً مميز بالنسبه ليا
بحبه عشان اخر السنه 
وبنكون داخلين على سنه جديده وامل جديد
بحبه عشان بيكون شتاء وبرد ومطر
بحبه عشان بيكون فيه
عيد ميلادك
وعيد ميلادى


كل عيد ميلاد بيعدى عليا

مش بفكر فيه ان سنه من حياتى راحت
بفكر اكتر ان سنه جديده من حياتى جايه
ببص للى جاى اكتر من اللى فات
مش بحب اكون لوحدى ابداً فى يوم زى ده
عشان الموضوع بيقلب معايا بأكتئاب

مبسوطه اوووووى اوووووى

بكل حد قالى كل سنه وانتى طيبه
مبسوطه اوى السنادى عشان فى ناس كتير عرفتهم من هنا
وكانوا من اول الناس اللى عايدتنى
مبسوطه اكتر عشان البوست اللى منه عملتهولى
وبقولها ربنا يخليكى ليا ياااااارب
♥ 
انتى مش تتخيلى انا فرحت اد ايه بالبوست ده
وعقبال يارب ما افرح بيكى واعملك احتفال كبييييير ان شاء الله
بجد مش تخيلت ان يبقى فى بينى وبين ناس عمرى ما شوفتهم ولا اتكلمت معاهم بطريقه مباشره
حب بالشكل ده
ربنا يخليكم ليا

مبسوطه انك دايماً معايا

عشان انت سبب لسعادتى
ربنا يخليك ليا ومش يحرمنى منك أبداً
عشان انا بجد بحبك

readmore »»

01 December 2011

Forgive Or ... !!

.
26 التعليقات



من تعاليم اى دين سماوى
ان احنا لازم نتسامح ونعيش فى حب دايماً
ولو حد ضايقك فى حاجه عديها
وخليك انت الاحسن وأبدأ بالسلام
وأبدأ بالنيه الصافيه بالحب
من غير ما تبص بقى
اذا كان اللى قدامك هيتقبل اللى انت بتعمله ده
بنفس التسامح والحب والنيه الصافيه والا لا
ودى حاجه كويسه ديننا بيعودنا عليها
اننا نحاول نكون نيتنا صافيه دايماً
عايشين فى راحه وامان مع بعضنا
لان لو كل واحد شايل جواه حاجه وحشه لحد
مش هنقدر نعيش فى راحه بال
ده غير انك كمان بتاخد حسنات على بدأيتك بالسلام والتسامح

طب انا عايزه اعرف حاجه
بما انى يعنى من الناس اللى مش بتعرف تسامح
هو مش كتر التسامح ده
فى الزمن الجميل اللى احنا فيه ده
ممكن يخلى اللى حواليك يفتكروا انك ضعيف وماعندكش شخصيه؟؟

طب بلاش دى
مش ممكن بردو يفتكروا انك مفيش عندك كرامه
يعنى واحد بيغلط فيك وبيسئ ليك وبيظلمك دايماً
وانت بتسامحه
مره واتنين وتلاته
فين كرامتك اللى بتدافع بيها عن نفسك؟
ما انت لو كل مره تروح تبدأ انت بالسلام
اللى قدامك ممكن يقول فى مره ماعندكش كرامه!
وبعدين المؤمن لا يلدغ من جحر مرتين

هو ايه الصح فيهم بقى ؟!!؟


readmore »»

30 November 2011

جداريّة أدوّنُ وطني

.
11 التعليقات



تحت شعار أدوّنُ وطني
دعوه عامه للمدونين وغير المدونين 
للمشاركه يوم 5 ديسمبر للتدوين عن الوطن و من اجل الوطن
شارك بنص او صوره او فيديو من تصويرك
 لمعرفه باقى التفاصيل وطريقه المشاركه 


readmore »»

28 November 2011

صوت الحريه

.
16 التعليقات




احساس الانتخابات النهارده مختلف بكتير حتى عن الاستفتاء
ان الناس كلها عايزه تنزل
واقفين فى الشارع بالساعات
مش عشان فى غرامه زى ما بيقولوا
بس عشان عايزين يعملوا ده
فى حماس كبير جوه كل الناس عشان فرحانين بالتغيير ده
ناس سنهم كبير وناس تعبانين 
واللى رجلها مكسوره واللى عامله عمليه
وكلهم عندهم نفس الروح انهم يعيشوا اللحظه دى

 اننا ننزل اصلا عشان ننتخب لاول مره فى حياتنا
من غير ما نكون مستنين بطاقه انتخابيه 
والا نكون عارفين ان صوتنا اصلاً مش هيفرق
مع ان وارد يكون فى شك جوه ناس مننا انه مش هيفرق اوى المره دى كمان
بس كخطوه اولى
تدعو للتفائل

حتى لو كنت بطلت صوتى
بس ايه اللى يجبرنى اختار ناس انا مش مقتنعه بيها
وانى ببطلان صوتى ده يبقى انا بضيع حق الشهداء او انى سلبيه
وهو انا لما انتخب حد مش يستحق مش يبقى كده بضيع حقهم بردو؟!؟؟
بس فكره انى انزل الانتخابات
وانا عمرى ما فكرت اعرف مين المرشحين فى الدايره بتاعتى اصلاً
دى لوحدها اختلاف كبير جوايا

ده مايمنعش بردو ان فى مخالفات كتير موجوده
منها الدعايه اللى ظهرت فجأه قدام اللجان
كنتوا فين قبل كده؟!؟
ده غير ان الكلام ده مخالف قانوناً اصلا
والحق يتقال
كانت الدعايه الاول للاخوان وده كان عامل تخفظ كبير عليهم
بس مع الوقت بقت للكل وكله بيوزع ورق

الحريه والعداله اللى كنت ملحظاه انهم معتمدين على الناس اللى مايعرفوش اى معلومه عن السياسه
او بمعنى اصح مش بيدورا فا بيدورلهم بنفسهم
زى ان كل واحد واخد لاب توبه وفلاشته وقاعد فى اى ركن كده
يجيب للناس ارقام اللجان ويقولهم انتخبوا الحزب بتاعنا
وفى واحد تانى مرشح فردى
اعتمد على ان الناس متقسمه كل واحد فى حته
وعامل اتوبيسات بتوصل الناس للجان بنفسهم بشرط انهم يتخبوهم
مطلع رحلات للجان يعنى وكل واحد يجى ومعاه ساندوتشاته !!

حتى مع كل التجاوزات دى
مبروك علينا خطوه جديده فى احساسنا بجد بالحريه


readmore »»

25 November 2011

انتخبوا ابن الدايره...الجزء التانى

.
18 التعليقات


البوست ده كتبته يوم 14/11/2011
وكنت أجلته شويه
و بعد الاحداث اللى حصلت قولت مش هانزله
بس قررت انزله النهارده لانى وصلت لنتيجه اخيره فيه





هو لما وزاره التربيه والتعليم 
 يعملوا الامتحانات بتاعه نص السنه فى الخباثه كده
على انها امتحانات الشهر
يبقى ده معناه ايه؟
انهم مش متفائلين خالص بالانتخابات
وده بالتبيعيه يوصلنا احساس بعدم التفائل نهائى بتاتا مطلقاً

ايييييه بقى كميه المرشحين دىىىىى !!!
عشر الاف مرشح عن 8 محافظات بس!! ليه بقى نفسى افهم؟!؟
ده الواحد مش قادر يعرف اتنين والا تلاته من المرشحين فى الدايره بتاعته
يعنى عندنا الدايره بعد ما كانت دايره المعهد الفنى بس
بقت دلوقتى بتشمل شبرا والساحل وروض الفرج والزاويه والشرابيه
فى كل منطقه من دول فى مرشحين شكل 
وبتوع المناطق التانيه مايعرفوش عنهم حاجه
كل واحد من المرشحين بيعلن فى المكان اللى يعجبه 
ومش مهم الناس بتوع باقى المناطق يعرفوه والا لا
واللى المفروض يكونوا من ضمن نفس الدايره 
ومن حقنا نكون عارفين كل المرشحين
بس عادى نتفلق وهو يعلن مكان ما يحب
وهو هيتعب نفسه مثلاً
وكل ما اروح فى مكان جديد تابع للدايره بتاعتنا
الاقى مرشحين جداد اول مره اعرف عنهم حاجه والا اشوف صورهم حتى
هو انا هامشى الف وادور وراهم بقى والا ايه

فى بقى شويه مرشحات
حاجه اخر جمال
دول داخلين المجلس يتعاكسوا مش يشتغلوا
والا اغنيه حزب الوفد بقى
حد يفهمهم يا جدعان انهم داخلين مجلس الشعب
مش مهرجان الموسيقى العربيه

بعد الجزء الاول من البوست ده
قولت لما أسال اختى هترشح مين؟
لاقتها بترد عليا بسرعه من غير تفكير
وبتقولى على اسم واحد مترشح عن الدايره بتاعتنا 
لاول مره يترشح بس كنت بسمع اسمه الى حد ما قبل كده
قولتلها اشمعنا
قالتلى اصله بيخدم الناس من قبل ما يترشح
هى اختى نزل عليها الوحى على غير العاده  كده ليه 
ووصلت للى هترشحه بكل سهوله كده
اومال انا ليه مصعبه الموضوع بالمنظر ده يعنى
بس لما فكرت
 هو انا ليه اختار بالطريقه دى اصلا
انا مش عايزه اختار مرشح خدمات
انا عايزه اختار مرشح يبقى عنينا وسط الحكومه
وقت مايعملوا حاجه يسألهم ده ليه
مش مجرد ناس بتقدملنا رشوه مستخبيه فى كلمه خدمات
ولا واحد بيدور على حصانه عشان يستخبى هو نفسه وراها

اما حزب الحريه والعداله عاملين كُتيب كده
كاتبين فيه اهداف الحزب
حسيت انه دستور مُصغر
فكرنى اوووى بمواد الدستور
كلام مثالى اوى زياده عن اللزوم
لدرجه انه مايتصدقش
او بمعنى اصح احنا اتعودنا مش نصدقه
مفيش حاجات محدد بتتقال واللى بيقولوه بيعيدو ويزيدوا فيه
مفيش حاجه محدده بعينها قالوا هيعملوها
ولما مش يعملوها يتحاسبوا على كده
عاملين ناصحين يعنى
وده اكدلى انى بردو مش هارشحهم

اما بالنسبه للرموز الانتخابيه اللى مازالت لافته نظرى اوى
رمز الكمثرى ورمز الجزر ورمز الموز
تحس انهم مرشحين من سوق العبور تقريباً
والا بتوع رمز الرسيفر والتكييف واللاب توب
حاسه انى لو دورت شويه هلاقى رمز تويتر ورمز الفيس بوك
التطور التكنولوجى يصنع المعجزات

بعد اللى حصل فى الاسبوع اللى فات ده
وعدم وجود اى موقف واضح من جميع الاحزاب والمرشحين
ولا كأنهم مرشحين فى بلد تانيه 
مش نفس البلد اللى بيحصل فيها الاحداث دى كلها
قررت انى هانزل الانتخابات
وهابطل صوتى
عشان مفيش حد يستحق انى ارشحه


readmore »»

24 November 2011

مصر تبكى أسفاً...!!

.
16 التعليقات



الواحد بجد دماغه واقفه ومش عارف يقول ايه بالظبط
المفروض كان فى يوم امتناع عن التدوين فى حمله التدوين اليومى
حداد على الشهداء وتضامناً مع الثوار فى التحرير
بس اليوم طول معانا شويه وبقوا كذا يوم


ايه القسوه دى
ايه كل اللى بيحصلنا ده
انا فعلا من الناس اللى عاشت الثوره فى الاعاده
لانى للاسف مالحقتهاش اول مره

فى العرض الاول
يوم 25 يناير
كان الوضع كله غريب ومتنحه وفى حاله اكتئاب مزمن بسبب اللى بيحصل
ولانه كان اول مره يحصل ماحدش كان فاهم مين الصح ومين الغلط
وكنت بتفرج اوقات على القناه الاولى زى ناس كتير اوى
بعد التنحى كنت حاسه بخوف من اللى جاى
وانه يمكن يكون اصعب
بس مع الايام احساسى بالخوف قل

فى الاعاده
يوم 19 نوفمبر
كان يوم مأساوى
ماينفعش نقول عليه غير كده
شايفه كل حاجه من اولها بعيداً بقى عن القناه الاولى خالص
الناس اللى بتموت عشان بس بتطلب حقها
الناس اللى عنيها بتروح عشان بيحلموا يشوفوا بلدهم احسن بلد فى الدنيا
شايفه الشباب اللى بتضرب ويترموا فى الزباله
شايفه الامن المركزى وهو قاصد انه ينشن فى عين الثوار
شايفه البنت اللى بيسحلوها من شعرها فى الشارع
انت لو اخوك او اختك بيتعمل فيهم كده هتعمل ايه

دايما بنقول على الامن المركزى اغبياء ومش بيفهموا حاجه
بس مش وصلت معاهم لعدم وجود الاحساس كمان
انهم يضربوا انسان زيه زيهم بالرصاص الحى والخراطيش
انهم يرشوهم بغاز من الاسلحه الكيميائيه
ده احنا لو فى حرب هتفكر قبل ما تستخدمه
انما شباب من بلدك وزيهم زيك تضربهم بالطريقه دى ليه

الاحداث نفسها بكل تفاصيلها بتكرر
شهداء بتموت عشان بيتظاهروا تظاهر سلمى وبيتقال عليهم بلطجيه
نفس البيانات بنفس تفاصيلها "مع اختلاف الاوضاع السياسيه "حتى بنفس بعض الكلمات فيها
يعنى مبارك قال لا انتوى الترشح
والمشير قال لم يكن يطمع فى مش عارف ايه
نفسي اشوف مين الغبى اللى بيكتبلهم الكلام الجزمه ده

مبارك قدر فى خطابه اللى قبل التنحى يكسب تعاطف الناس
والناس اختلفت جزء متعاطف معاه وبيقول نديله فرصته
وجزء بيقول لا ده بيستموت ويعيش الدور 
لحد ما يظبط فلوسه ويطفش ويسبها خربانه
انما المشير ابن الايه عمل حركه بنت لذينه صراحه وطلع انصح من مبارك
قال نعمل استفتاء
عشان بردو الشعب يختلف ما بين مؤيد ومعارض للاستفتاء ده
لو انت عارضت تبقى ضد الديمقراطيه
ولو وافقت ابقى قول للديمقراطيه خالتى بتسلم عليكى
لما انتوا مش قادرين تستحملوا ولا تسمعوا ولا تفهموا صوت الناس اللى فى التحرير
يبقى هتقدروا تسمعوا صوتنا فى الاستفتاء ازاى
وبعدين مين يثق اصلا فى استفتاء اللى هيقولوا نتيجته بيموتوا فى الشباب وبيرشوهم بغازات سامه !!

لو انا واحده من الناس اللى مش قادرين ينزلوا التحرير
يبقى كل اللى اقدر عليه واحاول اعمله
انى احاول افهم الناس اللى اعرفهم
اهلى اصحابى قرايبى جيرانى
اللى مش فاهمين الصح
ولسه مصدقين ان اللى فى التحرير دول بلطجيه وهدفهم يخربوا البلد
يشوفوا الفيديوهات والصور والناس اللى بتموت وتتسحل وتترمى فى الزباله
وبيضربوا ويشموا غاز بيدمرهم
عشان يصدقوا الحقيقه ويشوفوها بعنيهم

الناس اللى على النت قادره توصل لكل الكلام ده
بس اللى مش بيعرفوا فى النت حاجه
مش قدامهم غير التليفزيون يفهموا منه
وده مبقاش مضمون اليومين دول
فا من حقهم علينا اننا نفهمهم

readmore »»

20 November 2011

الثوره راحت فين ؟!!؟

.
34 التعليقات




هو ايه اللى بيحصل بقى
ها؟
حد فاهم كده يفهمنى؟؟

تقريبا والله اعلم ان اللى بيحصل ده الطبعه التانيه من الثوره
اصل الطبعه الاولى نفذت

حاسه ان كل حاجه بتكرر بحذافيرها
كان بيتهيألى ان حسنى مبارك هيطلع يقولنا بيان 
ويأكد ان جمال مش هيرشح نفسه ولا هو هيترشح تانى
كأن ولا 11 شهر عدوا ولا اى نيله حصلت

الثوره اتعملت ليه؟
مش عشان حسنى مبارك يمشى
بس عشان زى ما الشعب كله كان بيطالب
انه يغير النظام
شخص واحد مشى
انما جذور تفكيره واسلوبه ونظامه لسه جوه كل سُلطه فى مصر

احنا زى ما احنا
لسه كله مختلف فى رأيه عن التانى شويه ضد الاعتصام وشويه معاه
لسه ناس بتموت فى التحرير عشان بتقول رأيها
لسه بردو اللى بيحصل ده اجندات خارجيه
لسه كل اللى فى التحرير بلطجيه وعملاء ومدربين بره
لسه فى مدنين بيتحاكموا محاكمه عسكريه غصب عن عين اهلنا
لسه بنضرب بالقنابل والغاز
لسه حياتنا ولا ليها اى 30 لازمه عندهم
لسه احنا مش حاسيين بالثوره
لسه للاسف مش عارفين ناخد حقنا
الا بالمناسبه بقى
حد يقولى هى الثوره راحت فين؟
كانت جايه زياره مثلا من 25 يناير لـ 11 فبراير وبعدين سافرت؟
والا كانت ترانزيت وبعدين رجعت مكان ما جت؟

بالمناسبه كمان بقى
هو فين عصام شرف؟
هو مش ده بردو اللى كان راجل من الميدان وبتاع الثوار واحنا عايزينه
بيعمل ايه بقى ده دلوقتى؟
بيتابع الاخبار على الفيس بوك وتويتر؟
يا فرحتى بيه
ياخوفى بعد كده اللى يترشح للرياسه يصدر قرارات عبر الفيس بوك 
ويعمل للوزراء تاج ويستنى يوافقوا عبر اللايك !!!

اهم كلمه سمعتها النهارده من ماما
يافرحه مبارك فينا وفى اللى بيحصل دلوقتى !!!


readmore »»

19 November 2011

اتبرع ولو بجنيه .. !!

.
29 التعليقات



فى دول كتير اتدمرت
وقدرت ترجع تانى زى ما كانت واكبر بكتير كمان
زى اليابان والصين
اللى بقوا من اهم الدول على مستوى العالم كله وخصوصا تجارياً
دوله زى العراق مثلاً
امريكا دخلتها ودمرت كتير فيها
لما فكروا يقفوا تانى
عملوا اعلانات وحملات توعيه كتير
عشان شعب العراق يبطل كسل وكله يشتغل مع بعضه
عملوا اعلانات لـتنشيط مجالات مختلفه عندهم زى مثلاً الاتصالات
واهم مطرب عندهم اللى هو كاظم الساهر استخدموه كوجه اعلانى محبوب
ومطرب معروف جدا كدعايه للدوله اكتر من انها تكون دعايه 
لشركه الاتصالات نفسها
لمجرد انهم يوصلوا احساس للعالم كله
ان العراق لسه موجوده وهتفضل موجوده
وغيرها وغيرها من بلاد تانيه كتير


اما احنا
لما حصلت ثوره عندنا وادمرت حاجات كتير 
سواء مادياً او فكرياً او حتى معنوياً جوانا
مش فكرنا نعمل كده
مش فالحين غير فى اعلانات الشحاته وبس
معلش على اللفظ
بس لو بصينا على كل الاعلانات بعيداً طبعا عن الاعلانات التجاريه
هنلاقى اعلانات زى
اكفل طفل يتيم
اتبرع ولو بجنيه
ساهم فى اطعام مسكين
اتبرع لقريه صغيره
اتبرع .. ادفع ... ساهم
حاجات كتير اوى على نفس المنوال
انا طبعا مش بقلل ابداً من اى حمله من دول
ولا بقول انها حاجات مش مهمه
بالعكس المفروض كلنا فعلاً نكون حاسيين ان فى ناس غيرنا محتاجين
واحنا لازم نقف جنبهم
بس الفكره فى ان صعب اوووى كل الاعلانات تبقى بالمنظر ده
ليه اعلامنا يعيش دور الشحاته بالطريقه دى
ليه مفيش اعلانات وحملات توعيه كتير زى باقى الدول
اللهم الا يعنى حاجات قليله اووووى
وقليل مننا اللى شافها لانها فى جميع الاحوال مش بتبقى واخده حقها
ده غير كمان ان لما بتحصل عندنا حمله توعيه
بتبقى لغرض محدد فى فتره زمنيه معينه وبينتهى
زى مثلا الحمله اللى طلبت بـ"لا" فى الاستفتاء
واللى مش كانت حمله توعيه
دى كانت حمله اجبار على التصويت لجانب على حساب جانب اخر
لانها لو كانت حمله توعيه بجد
كانوا جابوا جزء من الفنانين والشخصيات المهمه 
يقولوا هيختاروا نعم ليه
ولا ليه
وكده يبقى عرضنا جميع الاتجاهات ونبعد عن التحيز لجهه معينه
ويسيبوا الناس تقرر وتختار براحتهم
لكن ده للاسف ماحصلش
ومش بيحصل فى اى حاجه

 ليه الاعلام عندنا او منتجين الاعلانات اللى خنقونا باعلانات تافهه
مش بيحاولوا يشجعونا ويدعمونا اننا نقف لبلدنا
ونوصل بيها لمستوى احسن
ويفتحولنا مجالات كتير نقدر نقدم فيها حاجه
ليه كل اللى بيقدروا عليه
انهم يجيبوا اتنين فى برنامج كل واحد فيهم بيتكلم فى اتجاه
واحنا اللى بنتوه معاهم فى النص
لا احنا استفادنا حاجه ولا هما استفادوا حاجه من لغبطتنا دى
زى ما بندور على ناس يتبرعوا للمحتاجين
ليه مش بندور على ناس تبنى البلد من جديد؟؟

readmore »»

17 November 2011

حــلــم ... !

.
36 التعليقات



بحلم بروح جديده
وحياه جديده
بس خايفه بردو مابقاش سعيده !!

readmore »»

16 November 2011

♥...♥

.
25 التعليقات




ها قد حل شتائى
يُصاحبه دفء قلبك وحبك
ليجعله شتاء يكسوه زهو الربيع

readmore »»

15 November 2011

ارجوك ماتستهبلنيش !!

.
36 التعليقات


فى شويه برامج فى التليفزيون
تجيب للواحد تخلف بجد
اد ايه بيستفزنى ان يبقى فى مذيعين او مذيعات عندهم استعداد يظهروا
لمجرد انهم بيستهبلوا الناس !!

فى قناه ماعرفش اسمها
بس واضح انها كانت مسابقات وبس
بعيداً عن المذيعه اللى اصلاً اتخضيت لما شوفتها
مش لانها كانت شكلها وحش ولا حاجه دى خلقه ربنا يعنى
بس لانها كانت بتتخانق اكتر من انها بتذيع
والله بقيت مزبهله من طريقتها
والاكتر لما شوفت السؤال اللى بتسأله والاجابات اللى الناس بتجاوبها
السؤال حاجه ليها رجل واحده و 3 عيون
واحنا بنشوفها فى الطريق وفيها 3 الوان وبتخافظ على سلامتنا
لا عروستى
صراحه السؤال صعب
واحد يتصل يقولها المفتاح والتانى يقولها الموبيل !!
الناس دى بتفهم منين انا عايزه اعرف؟؟؟؟
والغريبه ان صوت اللى بيتصلوا كله شبه بعضه
هى الناس دى فاكرينا مساطيل للدرجه دى والا ايه مش فاهمه !



والا يعنى ايه مثلا واحده تطلع فى برنامج  "ارجوك ماتفتيش" ده
تسأل الناس فى الشارع
ايه رأيهم فى ان خط الاستواء هيتمسح ؟؟
والا مثلا مين مخترع القطط السيامى!!
والا ان الاسدين  بتوع كوبرى قصر النيل 
 هيهربوا عن طريق النيل بسبب الحر والزهق من قعدتهم دى!!
 والسؤال الفظيع بقى
بعد وفاه عم دهب ومرض بطوط
ياترى هيقدروا سوسو ولولو وتوتو يمسكوا البلد مكانه والا لا؟!!؟
ياخراشى على الشلل
ويعنى ايه اصلا ناس ترد عليها ردود بثقه كده
وكأن السؤال عادى مثلا
مش فيه اى حاجه غلط !!

ما هو اللى انا متاكده منه
ان الناس لسه بعقلهم مش اتهطلوا للدرجه دى يعنى ولا حاجه
ازاى بقى بنى ادم طبيعى هيرد عليكى بطريقه طبيعيه فى السؤال ده؟؟؟

وتعليقها دايماً ان الناس بتفتى فى اللى تعرفه واللى ماتعرفوش
وهى كده الناس بتفتى ؟؟ ده الناس بتستغبى قصدك
لان استحاله واحد عاقل مهما كان مش عارف اجابه السؤال اللى بيتسأله
هيرد الردود اللى بالمنظر ده

لما فى اى دوله تانيه يشوفوا البرنامج ده
مش هيقدروا يربطوا ابداً ان البلد اللى بيظهر على شاشتها البرامج دى
والشعب اللى بيرد الردود دى
هو نفس الشعب اللى قدر يعمل ثوره
وقدر لاول مره فى التاريخ يخلى رئيسه السابق يتحاكم زيه زى اى حد
انا قولت مثلاً ان قبل الثوره الموضوع دى ليه علاقه بالحكومه
عشان يعرفونا احنا اد ايه هُبل
بس لما برنامج زى ده يفضل مستمر لحد دلوقتى
واتعمل جزء تانى كمان بأسم ارجوك ماتفتيش بعد الثوره
يبقى اكيد فى حاجه غلط

بطلوا تستخفوا بعقليه الناس كده
عايزين تعملوا اشتغالات
اعملوا حاجه تتصدق الى حد ما
بلاش قرف بقى


readmore »»
 

FaceBook Comments

wibiya widget