25 February 2011

Confused

.
3 التعليقات




حين يقترب الحلم
يساورنى الشك...!

وحين أرى الواقع
يبقى الامل بداخلى

readmore »»

13 February 2011

وماذا بعد...؟

.
2 التعليقات




الحمدالله على كل شئ
الحمدالله على اللى مصر وصلتله

شكراً
للناس اللى تعبته عشان توصلنا للتغير
شكراً لكل الشهداء اللى ضحوا بنفسهم عشان بلدهم

شكراً
شكراً ليك يا ريس
شكراً لانك اخيرا جعلت مصر اولاً فوق اى شئ
شكراُ لانك اخيرا جعلت مطالب شعبك واستقرار بلدك فوق التمسك بمنصبك
شكراً لكل "مميزات" فتره حكمك
شكراً لكل "عيوب" فتره حكمك
لان هى كانت السبب فى الانفجار اللى الشعب وصله
المشكله مش كانت فى شخصك
المشكله كانت فى نظام بأكمله
وكان لازم يتغير

اهم سؤال دلوقتى
وماذا بعد...؟
اللى جاى اقوى بكتير من اللى فات
المفروض نكون بالوعى الكافى اللى يخلينا قادرين بنفسنا نختار الخطوط العريضه فى مصيرنا اللى اتغير
وقادرين نختار كل فرد هتتكون منه مصر فى "عهدها الجديد"
عشان نقدر نحافظ على اللى مصر وصلتله دلوقتى

الامل فى بكره ... اجمل
الامل فى مصر ... اجمل


readmore »»

11 February 2011

عايزين ايه تانى؟!!؟

.
0 التعليقات



ها بقى؟
عايزين ايه تانى؟
مش كفايه كده بقى والا ايه؟
كل اللى كنتم عايزينه حصل
واللى كلنا بنحلم بيه اتحقق
مش كفايه قلق وعدم استقرار بقى؟
الناس اللى موجودين فى التحرير لحد دلوقتى عايزين ايه تانى؟
اعترضوا على الحكومه واتغيرت
طلبوا نائب واتعين
فى ناس كتير سرقوا فلوس البلد واديهم بيتحاسبوا
اعترضوا على قانون الطوارئ واديه هيتلغى
مش عايزين الريس يترشح تانى والراجل قال مش هيترشح لا هو ولا ابنه
عايزين انتخابات ديقراطيه ونزيهه واديها هتبقى برقابه قضائيه
عايزين الدستور يتغير واديه هيتغير
فى ايه تانى؟؟

ده حتى الراجل ساب كل سلطاته للنائب
اتنازل بطريقه شيك يعنى عشان امور البلد تمشى وماتولعش اكتر من كده
انتوا بقى مش عايزين تتهاونوا شويه عشان نشوف ايه اللى هيحصل بالظبط؟
ليه حاطين فى دماغكم شخص بعينه
وحاسيين ان مفيش حاجه هتمشى كويس الا لما هو يمشى
مع انى مش حاسه ان ده لو حصل بالطريقه دى دلوقتى البلد هتبقى تمام وزى الفل فجأه كده
مش لاننا لا قدر الله عاشقينه فى الضلمه
ولا لانه كان معيشنا فى هنا
وبيفطرنا ساليزون وبيعشينا كافيار
بس لان السفينه من غير قبطان بتغرق
ولان مش بسهوله يحصل انتخابات ويترشح فيها ناس اد المسئوليه
وفى فتره قصيره فى ظل الظروف اللى مصر فيها دى
والاهم لان احنا كشعب مش متفقين على شخص محدد يتحمل المسئوليه دلوقتى

ليه مش قادرين نفكر بهدوء اكتر ولسه متخيلين انه بيضحك علينا
مانكرش اننا اضحك علينا ياما قبل كده
بس ليه مش تستنوا وتشوفوا ايه اللى هيحصل بعد كده
ولو مش حصل اللى اتقال ولا اللى انتوا عايزينه
ابقوا انزلوا اتظاهروا تانى
ما التحرير موجود مش فى بلد تانيه
والا هى المظاهرات والاعتصامات مش هتمشى الا بالنوم فى التحرير؟
لان الموضوع دخل فيه ناس ليها مصالح خاصه بتدور عليها
ودخل فيه ناس مابقوش فاهمين اى حاجه واهى هيصه وخلاص

انا مش بقلل من قيمه اى حد بيعترض بأى طريقه
عشان ده اللى وصلنا لكل اللى اتحقق دلوقتى
بس لان التفكير دلوقتى فى بلدنا مش عند وتحكمات رأى وخلاص
يمشى يعنى يمشى

مرتاحه نفسياُ بالبيان الاخير
مش عشان انا هبله ومن ضمن اللى بيضحك عليهم
بس انا متفائله وبفكر فى اللى اتقال بحسن ظن
لان ربنا اكيد مش هيضيع دم الشهداء اللى ماتوا عشان يعملوا تغير لينا ولمصر ولمستقبلنا
ولان ربنا سبحانه وتعالى قال
(انا عند ظن عبدى بى أن ظن خيراً فله وان ظن شراً فله)
وانا املى فى ربنا كبير
والمفروض نكون واثقين ان ربنا مش هيسيب الظالم من غير ما ياخد جزاءه

اللهم أرنا الحق حقاً وارزقنا اتباعه
وأرنا الباطل باطلاً وارزقنا اجتنابه
ولا تجعله ملتبسا علينا فنضل
اللهم انى استودعتك بلدى رجالها و شبابها
نساءها و فتياتها اطفالها و شيوخها
اللهم انى استودعتك ممتلكاتها و مبانيها و منشآتها
اللهم انى استودعتك نيلها و اراضيها و خيراتها
اللهم انى استودعتك امنها و امانها و ارزاق اهلها
اللهم انى استودعتك حدودها و بحورها و جنودها
فاحفظهم بحفظك يا من لا تضيع عنده الودائع و أنت خير الحافظين


readmore »»

04 February 2011

يــارب...احفظ مصر

.
2 التعليقات



مش عارفه اوصف الحاله اللى انا فيها ازاى
الاول كنت مبسوطه
وبعدين بقيت قلقانه
انما دلوقتى
انا خايفه
بجد خايفه

لا انا بحب حسنى مبارك
ولا انا كمان بكرهه
بس الاكيد
انى بحب البلد دى اوووى
اول مره اقولها واكون حساها بالطريقه دى
التفكير دلوقتى مش فى الاشخاص
التفكير دلوقتى فى بلدنا
خوفى دلوقتى على البلد اللى عشت فيها طول حياتى
ماشفتش غيرها
ولا حسيت بدفئ بلد غيرها
وبرغم كل اللى بيحصلها مش عايزه اعيش ولا اموت فى اى بلد غيرها

الاول حسيت اننا فى حلم حلمناه من زمان وبيتحقق
انما دلوقتى احنا فى كابوس مش عارفه هيوصلنا لفين
حققنا حاجات كانت اكبر حتى من احلامنا
بس الانسان بطبعه طماع ومفيش حدود لاحلامه
كل ما حلم يتحقق بيبقى عايز يوصل للى بعده
خوفى ان الطمع ده يوصلنا لنهايه ماحدش فينا يتمناها

ربنا عرفوه بالعقل
وربنا بعظمته وقدرته خلق الكون بحاله فى 7 ايام
يبقى احنا اللى مجرد بشر مش هنمحى اللى بيحصل بقاله 30 سنه كأنه ماكنش له وجود
كل حاجه هتحصل بس بالصبر

مبسوطه بالتغيير اللى حصل للان
وقنوعه وصبوره
عشان كده عندى استعداد استنى واشوف التغيير ده هيوصلنا لفين
بس بالوضع الصعب اللى الشارع المصرى وصله دلوقتى
وعدم وجود امان جوه اى حد فينا
هيخلى عنينا مش قادره تشوف اى تغيير هيحصل
ولا الوضع ده هيسمح اصلا بأى تغيير يحصل
قلبى بجد واجعنى من حال بلدى
مش متحمله اشوف اللى بيحصل ده
نفسى افوق من الكابوس اللى احنا عايشين فيه
عشان اقدر استمتع بالاحلام اللى اتحققت

اى حد بيخاف على البلد دى حقيقى من جواه
يبطل يفكر انه مؤيد والا معارض
ويبطل يفكر انه عايز مين ومش عايز مين
ويبطل يفكرفى الاشخاص بحد ذاتهم
الاهم
اننا نكون اذكى من اى حد بيحاول يوقع بلدنا
اننا نحافظ على بلدنا ونحميها
ده حقها علينا

readmore »»
 

FaceBook Comments

wibiya widget