24 April 2011

♥...♥

.
4 التعليقات



حبك بيلون ايامى

readmore »»

20 April 2011

كلام والسلام ... كلاكيت خامس مره

.
12 التعليقات



 

بقيت احس بحاجات كتير
بس مش باكتب عنها هنا
مش عارفه ليه
بس بطلت اقدر اطلع كل حاجه فى الكتابه
بقيت حاسه ان اللى جوايا ده هيفضل يلف ويدور جوايا
ومش عارفه ارتبه عشان اكتبه او حتى عشان اقوله بينى وبين نفسى
مش لانى تايهه
والا لان اللى جوايا وحش او واجعنى فا مش عايزه اكتبه
بس يمكن لانى حاسه انه كتير ومتلغبط
فا بسيب اللى جوايا يعيش جوايا زى ما هو من غير ترتيب

***********

بقى بيجيلى حساسيه من موضوع السياسه ده خلاص
:D

***********

انتى بالذات
ماكنتش متخيله ان وقت حاجه مهمه زى دى فى حياتى
هتبقى اكتر حد بعيد عنى
او زيك زى اى حد
مش ناسيالك اى حاجه حلوه عملتيها معايا ولا كل موقف وقفتى جنبى فيه
بس دلوقتى بالذات مش شايفه منك كل ده
مش عارفه يمكن لانك زى ما قولتى بطلنا نلاقى اعذار لبعض
والا لان احساسى اللى انا حساه من ناحيتك حقيقه
باختلاف الاسباب
مش ده اللى كنت مستنياه منك !!!

***********

اكتشفت وانا قاعده مع نفسى كده
انى بطلت اعمل كذا حاجه
بطلت اخرج كتير زى ما كنت بخرج
بطلت اتصور مع العيال المتشردين اصحابى كتير
بطلت اروح الاماكن اللى بحبها وكنت بحب اقعد فيها
بطلت ادخل سينما كتير واشوف كل الافلام اللى نازله جديد
بطلت ابقى ماشيه بنظام على الدايت
بطلت اغير نغمه الموبيل كتير
بطلت اشوف افلام اجنبى كتير
بطلت أقرا كتب كتير زى الاول
يمكن لان دول كانوا بيشغلوا فراغ مش موجود دلوقتى
يمكن !!

***********

ناس كتير اووووى من اصحابى وحشونى
نفسى اشوفهم واتكلم معاهم
ومع ذلك
مش بسأل على حد بردو
مش فاهمه دى نداله
والا توهان

***********

مفتقده حاجه
بس مش عارفه ايه هى !!!!!!

***********

انا مابحبش اتكلم فى التليفون كتير
ايه المشكله فى كده !!
حاسه انى عندى فوبيا من اى جرس :D
ليه الناس كلها مستغربه من كده يعنى؟
ليه الاقى دايما حد يطلعلى من تحت الارض يحب يقعد يرغى
ومايعرفش ان ربنا وقعه فى واحده اصلا مش بطيق التليفونات ولا الرغى
انا وللأسف مش اجتماعيه
هو ده حاجه عيب والا وباء ؟؟
:D :D

***********

بقالى كتير بتمنى احلم بأشخاص معينه
ومش بحلم بيهم
وده ماكنش بيحصل !!

***********

انا مش حاسه الاحساس اللى المفروض احسه !!!

***********

بترعبنى فكره المسئوليه بشكل عام
انى ابقى مسئوله عن حاجه بكل تفاصيلها
حساها شئ مش سهل

***********

مش بستريح لو قعدت مع ناس غريبه عنى
او مش متعوده عليهم
نفسى اغير الموضوع ده بس مش عارفه


readmore »»

01 April 2011

نبأ عاجل :D !!!!

.
10 التعليقات

مستغربه ومش مستوعبه ومزبهله...!!!
خطوه كانت من كام شهر بعيده تماما عن تفكيرى
قرار كنت مش شايفه انى عندى استعداد اخده خالص الفتره دى
بس حصل ..!!!
باختصار
.
.

انا
اتخطبت



اينعم تلك حقيقه واقعه لا مجال للشك فيها
مش كذبه ابريل حاكم انا عارفه الافكار السوداء دى
ايوه .. انا اخيرا اقتنعت واتغيرت ووافقت

مش متخيله انى بقيت خطيبتك انت
وانت تحديدا
لانك كنت ابعد شخص عن خيالى
بس دلوقتى بقيت اجمل انسان فى عمرى

ايدى اليمين ذادت حته
كل ما ابصلها استغرب اوى ان الحته دى منك انت
عقبال ما انقلها فى ايدى الشمال ويارب اكون وقتها استوعبت
والا الموضوع هيبقى خطر ساعتها

ربنا يقدرنى واكون اد مسئوليه دبلتك اللى بقت فى ايدى
وربنا يقدرنى واقدر اسعدك
ويارب يكملنا على خير ويجعل لينا خير فى بعض ان شاء الله

مبسوطه بيك اوووى
مبسوطه بوجودك فى حياتى
مبسوطه بحياتى معاك
مبسوطه بحنيتك
مبسوطه بطيبه قلبك
مبسوطه بكل لحظه بنعيشها مع بعض
مبسوطه بحُبك
مبسوطه انك خطيبى :$


readmore »»