30 June 2011

30/6..... نص حاله !!

.
20 التعليقات



نص ضحكه

يعنى لما ترسم ضحكه على شفايفك
بتقول كل حاجه
بس كل حاجه عكس اللى جواك


نص فرحه

يعنى لما يبقى كل اللى حواليك فرحانين
وانت فرحان ليهم
بس نفسك تعرف المفروض تفرح انت كمان علي ايه؟!؟


نص راحه

يعنى لما تبقى راضى بأنصاف الحلول دايماً 
ترضى بيها عشان بتتمنى فى يوم من الايام تبقى كلها راحه
مش بس نص راحه

وقتها انت بتبقى نص من كل حاجه
نص ضحكه على نص فرحه
على نص راحه
وده كله بيبقى

**********

لو حد لسه يحب يرشحلى تدوينه لمشروع كتاب الـ100 تدوينه
يبقى ياااريت اووى :))


readmore »»

29 June 2011

29/6.... طياره ورق

.
19 التعليقات




نفسى أطير طياره ورق
نفسى تروح لبعيد..بعيييد
نفسى ماحدش يشوفها غيرى انا
نفسى احس انى بطير معاها
نفسى احس نفس احساسها.. بس هى اصلا الطياره الورق بتحس؟!؟
نفسى احس انى طايره زيها
وفرده دراعى زى ماهى فرده ورقها فى السما
نفسى تكون سما من غيوم
نفسى لما اطير معاها اشوف لون السما الصافيه
نفسى لون السما الصافيه يخلينى من جوايا انا كمان صافيه

من الاخر
نفسى احس انى طايره
واحس من جوايا انى صافيه
نفسى أبقى طياره ورق

*********

ياريت لو حد عاجبته اى تدوينه يرشحهالى
عشان مشروع كتاب ال 100 تدوينه
لانى مش اخترت حاجه لسه 
  وشكراً اوى :))


readmore »»

28 June 2011

28/6..... أيدك والريموت كنترول :D

.
25 التعليقات



كل حياتنا دلوقتى بقت عباره عن اعلانات
فى نوعين من الاعلانات
اعلانات احنا بنعملها
واعلانات ناس تانيه بتعملها فينا

الاعلانات اللى احنا بنعملها
اننا من اول ما بنصحى لحد ما بنام
بنعتمد على حاجات كتير بنقتبسها من الاعلانات
سواء جمل بتتقال فى اعلانات
وده لاننا بنتأثر بشكل كبير جدا بكل كلمه بتتقال فى الاعلانات تحديداً
من كتر ماهى بتتعاد قدامنا فى اليوم خمس تلاف مره
وسواء كانت الحاجات اللى احنا بنستخدمها المعلن عنها

والاعلانات اللى بتتعمل فينا دى بقى
يااااااااما بنشوف منها
جرب كده تقعد تتفرج على مسلسل على اى قناه 
من 3 العصر ومعاك لحد 11 بليل
فى الكام ساعه دول
القنوات كلها بترزع الواحد فى وشه بين كل فاصل وفاصل فى اى مسلسل
يجى نص ساعه اعلانات
تيجى بقى انت تحاول تشوف المسلسل لما الفاصل الاعلانى ينتهى
ابقى قابلنى ان افتكرت من اللى شوفته قبل الفاصل حاجه
الواحد بينسى اصلا هو كان بيتفرج عليه

الاعلانات اصلا بقت شاغله حيز كبير اوى من التليفزيون
زيها زى المسلسلات والافلام
يعنى لو حسبناها هنلاقيها واخده نفس المساحه تقريبا
وفى النهايه ده كله على حساب صاحب المحل اللى هو احنا يعنى

غير انهم بيقرفونا
الا انهم بيعملوا كمان غسيل مخ للى مش فاهم سياسيه الاعلانات
واولهم الاطفال الصغيرين
اللى متخيلين ان كل حاجه بتيجى فى التليفزيون دى صح ميه فى الميه
وخصوصا لو كانت حاجه موجهه للسن الصغير ده
بتبقى مصيبه لوحدها

بالنسبه بقى لسياسه الاعلانات
فى اعلانات لافته نظرى اليومين دول
لانها ليها علاقه باللى احنا فيه الفتره دى
فى منتجات معينه عملت اعلانات ان جزء من تمنها هيتوجه لأعمال خيريه
ده بما اننا فى فتره اصلاح بشكل عام دلوقتى
زى مثلا محو الأميه وغيرها من النشاطات اللى من النوع ده
طب فى سؤال بيطرح نفسه فى دماغى
هو احنا هنعرف منين ان فعلا تمنها بيروح فى الاتجاه اللى بيقولوا عليه؟؟
هنمشى ورا الراجل اللى بنديله حق المنتج ونشوف هيودى الفلوس فين؟
والا هما بردو هيصورلنا العمليه دى فى اعلانات؟؟
ممكن حد يقول المهم النيه 
واننا بنشترى الحاجه دى عشان نساهم فى العمل الخيرى ده
بس انا بردو هاقول ان لو احنا قولنا المهم النيه عندنا ومش مهم هما بيعملوا ايه
يبقى هما فى النهايه حققوا الغرض من سياسيتهم فى عرض الاعلان ده
الربح المضاعف على حساب الكلمه السحريه
"لصالح الأعمال الخيريه"
يعنى هما مش بس بيستهبلونا
لا دول كمان بيتأجروا بأسم الاعمال الخيريه
اللى هى أسمى بكتير من كده
هو احنا المفروض فعلا نشترى المنتج عشان نساهم فى العمل الخيرى ده وحسب نيتنا بقى؟
والا المفروض مثلا نتأكد الاول ان الشركه صاحبه المنتج ده ليها فعلا علاقه بالاعمال الخيريه اللى بتعلن عنها؟

readmore »»

27 June 2011

27/6.... ChallengE ....

.
21 التعليقات




لما واحد بيدخل منافسه
مش بيدخل منافسه عشان يثبت لنفسه انه كويس اوى وشاطر
لكن بيدخلها عشان يثبت لنفسه وللى حواليه
انه افضل من اللى بينافسهم تحديداً

التنافس بيخلق روح التحدى جوه اى حد فينا
بس بحس انه تحدى مؤقت
عشان بتتنافس فا انت هتتحدى اللى بتنافسهم دول
بس بعد ما المنافسه دى تخلص
التحدى اللى جواك هيقل
واحتمال كبير يختفى
ادام اتولد مع المنافسه دى بالذات

الكلام ده بيفكرى بايام المدرسه
لما يفضل طالب يطلع الاول دايما
ومفيش معاه اى حد بينافسه
هيجى عليه وقت ويزهق ومش هيبقى عنده روح التحدى
فا انه دايما يذاكر عشان يطلع الاول
هيقول بينه وبين نفسه
ما انا دايما الاول
هتفرق ايه بقى

بالظبط ده فى حياتنا كلنا على اختلاف المستويات
فى الدراسه وفى الشغل وفى حياتنا عموما
المشكله ان المنافسه دى ممكن تقلب بشكل تانى
وهو الغيره
الغيره من اللى حواليك لانهم مثلا بيتخطوك فى اى منافسه
فى غيره كويسه هتوصلك للاحسن
وفى غيره هتوصلك للاسوء
غيره هترجعك لورا 
وانك مش قادر تبقى فى حجم اللى بتنافسهم
وهتبقى دايما حاططهم قدام عينيك
وعايز تبقى زيهم
مش تبقى نفسك
ولما ماتعرفش تبقى زيهم
ولا تبقى نفسك
هتبقى حد ماتعرفوش اصلا
ودى اكتر حاجه بتوجع

readmore »»

26 June 2011

26/6..... يارب مايطلبوش يغيرونا احنا كمان :D

.
26 التعليقات


هو المفروض ان كل حاجه حصلت قبل الثوره تتغير؟
سواء حلوه والا وحشه؟
اصل قريت من قريب
انهم عايزين يغيروا النشيد الوطنى
اشمعنا؟؟
هو حسنى مبارك اللى مألفه؟
والا هو اللى كان بيغنهولنا؟؟
والا يكونش النشيد طلع من فلول النظام؟!؟

هو اه النشيد فيه كلمات صعبه
والعيال الصغيره اللى بيحاولوا يحافظوه فى المدرسه
بيشلفطوه خالص وبيخلوا الكلمات فيه مالهاش اى معنى
بس مش متخيله الواحد هيحس بنشيد غيره ازاى
ده احنا بنفتكر طابور المدرسه بالنشيد مش بأى حاجه تانيه

هو كل حاجه قبل كده حصلت تبقى وحشه
ومش هينفع مصر تبقى احسن الا لما نغيريها؟

بردو قريت ان الاذاعه والتليفزيون كانوا عايزين يشيلوا لقطات كتير من افلام او مؤتمرات
موجود فيها حسنى مبارك وغيره من النظام السابق واللى محبوسين دلوقتى
بيتهيالى بالطريقه دى بيمحوا جزء من التاريخ 
حتى لو كان الجزء ده مش على مزاجنا

دلوقتى بقت على كل حدث بيحصل
بيطبق عليه فيلم او حتى اغنيه
بالزمن اللى احنا فيه ده
طريقتنا لتسجيل الاحداث من حوالينا بقت فى السينما والتلفزيون والاغانى
يعنى دول كلهم فيهم جزء من تاريخنا والظروف اللى بنمر بيها

ليه نشيل جزء من التاريخ لمجرد ان االحماسه دلوقتى واخدنا
ومش شايفين غير ان الناس دى نمحيهم من اى حاجه هما فيها
طب ما مصر عدى عليها حاجات كتير اوى ظهرت فى الافلام
ليه مافكروش يشيلوا حاجه منها؟
شايفه ان ده تاريخ
سواء كنا عايزينه دلوقتى والا مش عايزينه
بس ولادنا هيجوا بعد كام سنه يسالونا عن كل تفصيله فيه
واحنا مجبرين نرد عليهم سواء بالحلو او الوحش
عشان ماينفعش يشوفوا صوره مش كامله

readmore »»

25 June 2011

25/6.... فيلم رعب !!!

.
12 التعليقات



الثانويه العامه تعتبر من اهم افلام الرعب اللى بتتعرض كل سنه 
فى التوقيت ده
فعلا فيلم رعب
اى بيت فيه طالب من طلاب الثانويه العامه
بيتعمل عليه حجر صحى وعقلى
لا حد يدخل ولا يخرج
وتبدأ الواصله
الواد والا البت الغلابه بتوع الثانويه العامه
قاعد ع الكتاب مش بيقوموا
واحتمال كبير جدا انهم يعاملوه معامله المخده ويناموا عليه ساعتين تلاته
عشان لما يصحوا يكملوا مذاكره على طول ومايضيعوش وقت
ده غير موقف الاهل من الموضوع ده
لو يطولوا يلزقوا وش العيال فى الكتاب هيعملوها
طول ما هما ماشيين قدامهم
ذاكر كويس
ذاكرى يا حبيبتى
اومال احنا بنعمل ايه؟ بلعب ماتش شطرنج انا والكتاب مثلا؟؟
والا اكونش بعمل قراطيس بورق الملازم؟؟

كله كوم
والدروس فى فتره الامتحانات كوم تانى خالص
فى فتره الامتحانات الدروس بيبقى ليها ميزانيه تعادل ميزانيه الدروس كلها طول السنه
المدرسين بيستغلوا الموضوع ده بطريقه رهيبه
من دروس لملازم لمحاضرات لحاجات كتير اوى
المهم انها تزود الفلوس وخلاص



نيجى لاهم جزء فى فيلم الرعب ده
واللى هو التنسيق
التنسيق ده كارثه لوحده
بيضيع اى امل عند الطالب فى انه يكون اللى هو عايزه
ماهى يا تصيب يا تخيب
يا تدخل الكليه اللى انت عايزها
ياما هتدخل كليه بتكرهها ومش هتقدر تحقق اللى بتتمناه
وهنا هتدخل فى دوامه طب انا ممكن اعمل ايه فى حياتى 
يفيدنى بدل الكليه ادام مش بحبها

من وقت ما خلصت ثانويه عامه
وكل قرايبى واخوات اى حد اعرفه خلصها
وانا مش بتابع اصلا اى اخبار عنها
عشان بس مش يجيلى احباط من منظر العيال الغلابه 
اللى بيخرجوا يقطعوا فى شعرهم من اللجان دول

دايما أسال نفسى
ليه لما كان بيجى امتحان وحش ماكنتش بخرج اعيط؟؟
كنت ممكن اول ما اشوف الورقه والامتحان
احس انه صعب والا فى سؤال مش عارفاه
تبدأ عينى كده تستعد لاستقبال الشلالات
واتراجع عن الفكره منعا لاحداث سيول داخل اللجان
انما لما اخرج واخلص امتحانات ماكنتش بعيط ابدا
كنت بتنح بس

كل ما يجى فى دماغى موضوع الثانويه العامه ده
افتكر موقف
مره قابلتنى صاحبه اختى اول ما دخلوا ثانوى وكنت انا لسه داخله كليه
بتسألنى انتى دخلتى كليه ايه
قولتلها حقوق
بتقولى ايه ده بجد؟؟ يابختك ياريت ادخل حقوق
(الكلام ده كان من اكتر من 5 سنين .!)
انا تنحتلها
انتى بجد شايفاها حاجه كويسه؟
دى يابنتى من كليات الفاشلين اللى زيى
اللى كانوا بيموتوا نفسهم فى الثانويه العامه وبردو مش بيجيبوا مجموع وماتسالنيش ازاى
رغم ان كل مؤشرات الامتحانات التمهيديه فى الدروس كانت بتقول عكس اللى حصل
بس البنت مش حاطه امل على الثانويه العامه ومجموعها من اصله
واقصى احلامها انها تدخل حقوق
والله لو كانت تقولى نبدل كنت بدلت معاها
تاخد هى حبيتشى المبجله حقوق
وانا اخد الموقره الثانويه العامه
يمكن اجيب مجموع وادخل الكليه اللى كنت عايزاها بقى

برغم الرعب اللى كنت عايشاه فى الثانويه العامه
احترماً للشئ المسمى المجموع والتنسيق
الا انى بحبها 
ولو قدرت ارجع اذاكرها تانى هذاكرها

readmore »»

24 June 2011

24/6.... كائن ناقص !!

.
18 التعليقات



الحوار الاول

الام: يلا يا حبيبتى قومى البسى عشان العريس هيجي هو واهله يشفوكى كمان شويه
البنت: بس انا قولتلكم يا ماما انى مش عايزه اشوف اى عرسان دلوقتى
انا عايزه اخلص دراستى وبعدين اعمل ماجستير
الام: ماجستير؟ماجستير ايه يا ام ماجستير انتى؟
البنات مالهاش فى الكلام ده
انتى اخرك لبيتك وجوزك وولادك هتعملى ايه بالشهاده بتاعتك دى
ما احنا زمان لا اتعلمنا ولا بتاع وعرفنا نربيكم اهو
(الاب بيسمع الكلام من بعيد وبيجى على السيره)
الاب: ايه الكلام اللى انا سامعه دى
دراسه ايه اللى بتفكرى فيها
انا اتفقت مع الناس يجوا النهارده يعتى هيجوا
انتى عايزه تنزلى كلمتى الارض والا ايه؟؟
البنت: حاضر يابابا
:((

.
.
الحوار التانى

نظرات ام شارده فى وش بنتها
الام: سامعه صوت الزغاريط اللى فوقينا
البنت: اه سامعه يا ماما
الام: يعنى البت سهام تتجوز قبل منك وانتى اكبر منها ب 8 سنين
البنت: نصيب يا ماما هى لاقت انسان مناسب وانا مش لاقيت ايه المشكله
الام: ما انتى لو بتوافقى على حد من اللى بيتقدمولك 
كنتى زمانك متجوزه وعندك كام عيل كمان
البنت: بس انا ماشفتش حد مناسب لدلوقتى
الام: وكل اللى بيتقدمولك دول مفيش حد منهم مناسب
انتى بس اللى منشفه دماغك
والناس اللى عماله تتكلم وتقول انك كبرتى فى السن
وقطر الجواز فاتك وهتعنسى وتفضلى قاعده جنبى
انا نفسى افرحلك بعيل قبل ما اموت
البنت: ماتقوليش كده ياماما
الام: طيب يبقى تشوفى العريس اللى جاى بكره
والبنت عشان كلام امها قررت تتنازل عن فكره مناسب دى
لمجرد انها ترضى اهلها
وعشان تخلص من نظرات الشفقه اللى فى عيون الناس 
بما انها فى نظرهم عنست وفاتها قطر الجواز

دى نماذج بنشوفها كتير جداااا فى حياتنا
وفى مننا اللى مر بيها او يعرف حد مر بيها
تحكم الاهل فى البنت من ناحيه الجواز بالطريقه دى
بيخلى العواقب اكبر بكتير مما كانوا متخيلين
يعنى بدل ما البنت تتأخر فى الجواز شويه
تبقى اسمها طالق وفى ايديها عيلين
بدل البنت ما يبقى معاها ماجستير
تبقى من ضمن المطلقات تحت سن ال 25
الاهل بيفرحوا كده لما يلاقى بنتهم جت قعدت جنبهم؟؟
بعد ما اتجوزت جوازه فاشله لمجرد انها ترضيهم

نسبة الطلاق في مصر بتزيد يوم عن يوم
كانت 45% في سنه 2008
بمعدل وقوع 240 حالة طلاق فى اليوم الواحد
و باختلاف الاسباب
دلوقتى اكيد اكتر بكتير من كده 
والدليل منظر محاكم الاسره وعدد قضايا الخلع
الاسوء دلوقتى ظاهره الطلاق المبكر
يعنى البنت تتجوز وهى ماتزدش عن 20 سنه 

وبعدها بكام شهر والا سنه تتطلق
الفكره هنا اولا انها بقت مطلقه فى وقت المفروض لسه بتبدأ فيه حياتها
وثانيا نظره المجتمع ليها

المجتمع فى جميع مراحل حياه البنت 
بيعاملوها على انها دايما ناقصه عقل ودين
وده ان عبر فا بيعبر عن الجهل الدينى 
وعدم الاستيعاب الصح للجمله اصلا
وقبل ما البنت تتجوز بيشفوها على انها عانس واتاخرت فى الجواز
وبعد ما تتجوز جوازه مش راضيه بيها عشان تتخلص من اللقب العجيب ده
ولما تفشل جوازها بتحصل على لقب مطلقه
يعنى فى جميع الاحوال
المرأه فى نظر المجتمع
كائن غير كامل بالمره
كائن ناقص

البوست ده مشاركه منى فى حمله اتكلمى 
اللى اعلنت عنها ساره درويش على الفيس بوك



readmore »»

23 June 2011

23/6..... كلام والسلام ..كلاكيت سابع مره

.
10 التعليقات



كنت قريت بوست فى مدونه من كل بستان زهره
البوست ده فكرنى بكلام واحده
قالتلى انها عشان ظروفها مش بتسمح انها تحقق كل اللى بتتمناه
بتكتب دايما امنياتها فى ورق
ومش بتحطها فى بالها
بس فعلا مع الوقت امنياتها بتتحقق
لما فكرت انا ليه مابعملش كده
ليه مش بحاول اكتب امنياتى فى ورقه يمكن مع الوقت ربنا يحققهالى
اكتشفت انى اصلا ماعنديش القدره انى اعدد امنيانى
دايما مش بتمنى من ربنا غير
ان لو اى حاجه فيها خير ليا يقربهالى
ولو فيها شر يبعدها عنى
حاسه ان ده كفايه !!

************

شكرا لانك تفعل وبكل دقه ما يقودنا نحو الفراق

"ساره درويش"

************

ليه الواحد لما بيكسب حاجه مهمه فى حياته
لازم فى نفس الوقت يخسر حاجه مهمه تانيه؟؟

************

طيب هو انا ليه بخسرك؟
وبعدين اصلا انا اللى بخسرك؟
والا انتى اللى بتخسرينى؟!؟

************

فى دايما فى حياتنا ذكريات بنتعمد ننساها
ونخبيها فى اماكن جوه عقلنا مش عايزين نوصلها
بس مع اقل موقف له علاقه بالذكريات دى
بنرجع نفتكرها كلها
كأنها شريط بيعدى قدام عينينا بالتصوير البطئ !

************

بحب الشتاء
بحب الشيكولاته
بحب النسكافيه
بحب السهر والليل عموما
بحب اغنيه 3 ستيلا ومش عارفه ليه :D
بحب صوت واغانى وشخصيه فضل شاكر
بحب الفانوس ابو شمعه :D

************

لما ببقى راكبه فى اى مواصله
بحب اوى اقعد ابص من الشباك على الناس والعربيات والطريق والبيوت
اوقات بحس انهم بيقولوا حاجات انا مش عارفه ايه هى
واوقات كمان ده بيخلى جزء من حياتى يعدى قدام عينى

************

بمناسبه الفقره اللى فوق دى على طول
هو ايه سر اللون الاخضر اللى مدهون بيه معظم العمارات اللى على الطريق الدائرى؟!؟
والا مثلا يكونوا بيوزعوه ببلاش على كل طوبه؟؟


************

امبارح بليل كنت بحضر لماما العشا 
وواقفه قدامها اشوف عايزه اعملها ايه بالظبط
(لحسن تقلب على الاكل وماترضاش تاكل خالص)
افتكرت وانا واقفه قدامها 
ان بابا كان بيقف نفس الواقفه دى وبيقولها نفس الكلام
عشان يخليها تاكل
لما افتكرته ابتسمت
حتى فى غيابك بترسم دايما ابتسامه على وشى
الله يرحمك

************

فى ناس بيحبوا اوووى تبقى حياتهم مكتوب عليها شعار سرى للغايه
بس فى المقابل بيبقى عندهم فضول قاتل 
انهم يعرفوا كل سر فى حياه اللى حواليهم
الناس دى بتستفزنى جداااااااااااااا
زى ما انت مش بتحب حد يدخل فى خصوصياتك
ماتسمحش لنفسك تدخل فى خصوصيات حد

readmore »»

22 June 2011

22/6.... اكرهها !

.
12 التعليقات




احبك
اعشقك
اهواك

اكرهها تلك الكلمات
حين ابحث عما يصوغ ما بداخلى نحوك
ولا اجد سواها

وتلك وحدها لا تكفى

readmore »»

21 June 2011

21/6... العشق المخلوع :D

.
16 التعليقات




المسلسلات التركيه دى بقت وباء
حقيقى بقى موضوع لا يطاق
انا نفسى افهم
ايه اللى يجبر حد يقعد يتفرج على مسلسل 150 حلقه
ده لو تكرموا وكروتوا فى الاحداث
انما لو كانت ايديهم سخيه كده وشطحوا بخيالهم
ممكن يعملوا للمسلسل 3 اجزاء مثلا
وكل جزء 180 حلقه مثلا
يعنى ممكن تقعد عمرك كله تتفرج على مسلسلين تلاته والا حاجه

الغريبه ان الناس متبعاهم اوى
مش بيزهقوا؟؟
بس على فكره بقى 
الشعب المصرى كان عنده من زمان 
مؤشرات الاستعداد لمتابعه مسلسل مدته 5 سنين مثلا
من ايام مسلسل اوشين
و the bold and the beautiful
كانوا الممثلين فيه بيكبروا ويعجزا واحنا معاهم وحافظين كل تفاصيلهم
لما خلص الناس زعلت اوى
تقريبا المسلسلات التركيه جت عشان تعوض الفراغ اللى المسلسين دول عملوه

تأثير المسلسلات دى بقت خطر
كل واحده عايزه جوزها يبقى زى مهند
وكل واحد عايز مراته تبقى زى نور والا سمر
يعنى المسلسلات بتعمل مشاكل عائليه
اكتر منها وسيله استمتاع
طب ما بلاش منها احسن
وبعدين انا نفسى افهم اصلا ايه الحلو فى واحد زى مهند ده
(غير الشعر الاصفر والعين الزرقا)

تاثيرها كمان بقى على الاسعار
اللى اكتشفته من فتره قريبه
ان ملابس البنات زادت اسعارها جدا
بسبب المسلسلات التركيه
لان معظمها دلوقتى بقى مستورد من تركيا
والبنات عايزه تلبس زى سمر
 (عشان تعجب واحد زى مهند اكيد)

بيتهيالى احنا المفروض نطالب بخلع المسلسلات التركيه من التلفزيون المصرى
وجميع الفضائيات المجاوره

لسه شايفه الفيديو ده النهارده
مسخرررره بجد



طب بجد لو اتعملهم دبلجه زى اللى فى الفيديو ده
هينفعوا معانا اوى
على الاقل هيبقوا زينا كده وشبهنا
مش نشوفهم عشان نتحسر

readmore »»

20 June 2011

20/6... هو احنا فعل والا رد فعل؟؟

.
16 التعليقات




هو احنا فعلا ردود افعال؟
ليه كل واحد فينا متخيل ان كل تكوين فى شخصيته هو المسئول عنه؟
وليه كل رد فعل بنعمله متخيلين انه نابع اوى من جوانا
هو احنا اصلا الفعل
والا احنا رد لكل الافعال اللى بتحصل حوالينا
طب ياهل ترى
هو احنا فعلا ردود افعالنا بتعبر عن تجاربنا
او بمعنى اصح تربيتنا
او اخلاقنا
او بيئتنا
اكيد اه
بس الاهم

" كمثال "

انت شخص محافظ على الصلاه
ياترى ده من جواك انت من غير تقويم من صغرك؟
والا لانك كبرت واتربيت لاقيت اهلك بيحافظوا على صلاتهم
فا انت بقيت زيهم

ولو انت هادى
ياترى ده هدوء من شخصيتك نفسها
والا لانك اتربيت وكبرت فى مكان هادى مع ناس محافظه على هدوئها
بقيت انت كمان محافظ اوى على هدوئك

انت لو عصبى
ياترى عصبيتك دى تكوين فى شخصيتك انت مسئول عنه؟
والا لانك اتربيت فى محيط جميع افراده عصبيين
فا تخيلت ان دى الطريقه الوحيده للتعامل او للتعبير عن الرأى

لو انت ندل
ياترى ندالتك دى مجرد دنائه منك؟
والا انت اتربيت وسط شخصيات مبدأهم النداله
فا طلعت ماشى بمبدأ عيش ندل تموت مستور؟

صراحه عاجبانى الفكره
وشايفه ان وارد يكون فيها جزء صح ووارد يكون فيها جزء غلط

بس مش معنى كده ان كل واحد فيه عيب فى شخصيته
يعلقها على شماعه اصل انا طلعت لاقيت اهلى كده
والا انا اتربيت كده
زى ما احنا جزء مننا رد فعل
اكيد فى جزء مننا فعل
والعكس صحيح
يوم عن يوم حاجات فى شخصيتنا بتطور وبتتغير
بسبب كل اللى بنمر بيه من ظروف الحياه والمشاكل اللى بتعدى علينا
او حتى الشخصيات اللى بنقابلهم

طيب هو احنا لو اتربينا فى بيئه ومحيط وطريقه تربيه واهل مختلفين
كنا هنطلع كده بردو؟؟
والا كان جزء بس اللى هيختلف من شخصيتنا؟
والا احنا ككل هنختلف؟؟

readmore »»

19 June 2011

19/6.... زحمه يا دنيا زحمه :D

.
18 التعليقات




جرب كده تروح اى حته فى اى وقت
جرب كده تدى ميعاد لاى حد
وابقى قابلنى ان روحت للمكان اللى عايزه فى ميعادك

الطبيعى ان الواحد لو عايزين يروح مشوار
بيخرج قبلها بساعه
وبمناسبه الظروف الهايله اللى المرور فيها
نقول ساعتين
انما انك تقف الساعتين دول بس فوق كوبرى 
العربيات واقفه عليه ومش راضيه تمشى
يبقى ده اللى مش طبيعى

الزحمه بقت غير طبيعيه بالمره
انك بس عشان تروح مشوار ده هياخد منك 3 ساعات
يبقى الواحد كده هيخلص عمره فى حوالى مشوارين تلاته رايح جاى

يمكن انا مابقتش اخرج كتير
بس يوم ما بخرج وبستغبى وافكر اركب مواصلات
باخد تقريبا ساعه عشان اخرج بس من النفق اللى عندنا واوصل لوسط البلد
اومال باقى المشوار هاخده فى اد ايه
فى حين ان المشوار ده نفسه لو الطريق كويس 
مش هياخد اكتر من تلت ساعه

انفاق وموجوده
كبارى ومعموله
مرور وبقى امر مفقود الامل منه خلاص
طب ايه الحل ؟؟
لا والارخم ان العرابيات بيبقوا عايزين يدخلوا على بعضهم
لولا الملامه كانوا مشيوا فوق بعض وعملوا دور تانى
فكره بردو
يعنى كل عربيه بى ام مثلا تشيل فوقها عربيه 128 مثلا
طب والله كانوا هيوفروا اوى فى المكان
ويحلوا ازمه المرور

هو العيب مثلا
ان الناس اللى معاهم عربيات بقوا عددهم كتير اوى؟
والا احنا اصلا اللى بقى عددنا كتير
والا ده اساسا بقى عيب تنظيم المرور؟؟
طيب انا عايزه افهم
هى القاهره بس اللى كده؟ والا باقى المحافظات كمان؟



readmore »»

18 June 2011

18/6.... الزواج على يد مأذونه

.
14 التعليقات




مأذون شرم
الشاب الروش ابو جينز وتى شيرت 
اللى ظهر فى فيلم شورت وفانله وكاب
بعد الفيلم بقى الماذون ده افيه جامد اوى
الجديد بقى هى مأذونه بنت
الموضوع ده اول ما ظهر كان من فتره طويله فى البيت بيتك
كمجرد فكره بيطالب بيها ومش دخلت فى مرحله التنفيذ
ان بنت عايزه تبقى مأذونه 
ومفتى الجمهوريه اجاز انها تشتغل فى المجال ده
بس من قريب جت بنت فى ال90 دقيقه وكانت فعلا اول مأذونه فى الفيوم
الموضوع جديد علينا تماما
بعيدا عن حكايه المساواه وان الست دلوقتى تقدر تشتغل فى اى حاجه 
بس فكره ان شغل معين الراجل بس اللى بيعمله
دى اللى احنا متعودين عليها
يعنى هناخد وقت عقبال ما نتأقلم 
ان فى ست بتقوم بنفس المهمه

طب ماهو ممكن الراجل مش يرضى يجيب مأذونه بنت فى فرحه
عشان هيحسها غريبه عن الطبيعى
 واصلا فى رجاله منفسنين صراحه فى حكايه البنت تشتغل كل حاجه زيهم

طيب بخلاف الموضوع ده تحديدا
هو موضوع المساواه ده بجد؟
يعنى هو ينفع البنت تبقى زى الولد فى فى كل حاجه
والا فى رجاله هيفضلوا منفسنين كده 
لحد ما يضيعوا اى فرصه قدام الست انها توصل لمكانه معينه
يعنى دى مجرد شعارات
و المساواه دى صعب تحصل فى مجتمعتنا اصلا
والا مع الوقت والمحاولات بيبقى فى أمل؟؟

readmore »»

17 June 2011

17/6..... مرحله اللانهايه !!!

.
11 التعليقات



بقالى فتره واحشنى اووووى جو المذاكره
والسهر والامتحانات والدروس
مع انى ماكنتش بحب الكليه ولا بحب دراستها
رغم ان الكليه الحمدالله طيرت الربع اللى كان فاضل فى دماغى
لدرجه انى فى لحظه من اللحظات فكرت اكمل دراسه

بس ارجع وافكر
لو رجعت اعمل دبلومه اصلا ماحدش بينجح فيها من اللى بيجيبوا تقديرات
يبقى انا هانجح
ولو فكرت ادخل كليه تانيه خالص
هيبقى لسه قدامى 4 سنين بحالهم على الاقل وده اكيد صعب
وبعدين انا اصلا بتخنق من الدراسه والمذاكره
بس بردو فى حاجه وحشانى فى ده كله

من قبل ما اخلص دراسه
وانا بحلم بموضوع الشغل ده
مش عارفه ليه بس كنت حاسه انى نفسى اشتغل
واوصل فى الشغل ده لحاجه كمان
ويكون حاجه بحبها مش مجرد شغل وخلاص
لحد من فتره قريبه وكان موضوع الشغل ده واخد حيز كبير من تفكيرى
انما دلوقتى
مابقاش الموضوع شاغل تفكيرى نهائى
سبحان الله كأنه اتمسح من بالى اصلا
 
كنت دايما بقول انى عايزه اخلص مرحله الدراسه
لمجرد انى مش احس ان انا واقفه عند مرحله معينه خنقانى
بس ماكنتش اعرف ان المرحله دى
هتبقى من مراحل حياتى اللى اتمنى ارجعلها

كلنا فى اوقات دراستنا وخصوصا فى الكليه
بنستنى وقت التخرج ده بفارغ الصبر
عشان عايزين نعدى المرحله دى
بس مابنفكرش بعد كده ان الموضوع هيبقى مش سهل
مابنفكرش اننا هنخرج من مرحله معينه
عشان نوصل لمرحله بلا نهايه
ماهو ياما هتشتغل ياما هتفضل عاطل
(الحكايه دى للشباب يمكن اكتر من البنات)
هتشتغل يبقى لازم تجتهد فى شغلك وتحاول توصل فيه لمكانه كويسه
هتبقى عاطل يعنى هتقضيها فى مرحله البحث عن وظيفه لحد ما تلاقى وساعتها هتوصل لمرحله الوظيفه
واللى هى  بردو لازم تجتهد فى شغلك وتوصل فيه لمكانه كويسه
يعنى هتخلص مراحل كتير فى حياتك ليها نهايه
عشان توصل لمرحله اللانهايه
بس فى الاخر دى سنه الحياه
لازم الواحد يتعب ويشتغل عشان يقدر يعيش

readmore »»

16 June 2011

16/6... كنت اتمنى

.
16 التعليقات


كنت اتمنى ان اكون حبك الاول
ان اكون اول نبضه بداخلك
ان اكون اول لمسه لــ يديك
ان اكون اول شوق لـ عينيك
ان اكون اول رعشه لـ حواسك
ان اكون اول اسم يسكن بذكرياتك
ان اكون اول حلم فى خيالاتك

ولكن

يكفينى فخراً
اننى حبك الاخير
وانت بالنسبه لي حبى الاول...والاخير

readmore »»

15 June 2011

15/6.... موضه الانتحار...على فين؟!؟

.
8 التعليقات


 
خوف..قلق..ارق
دى تقريبا اعراض بتصيب ناس كتير
الستات والرجاله
دى باختصار اعراض الاكتئاب
الاكتئاب ليه اسباب كتير
يمكن من اولها واهمها الوحده والملل
او ممكن ضغوط نفسيه بتتراكم على مر الوقت
ممكن مشكله شخصيه الواحد بيمر بيها
وممكن كمان مشاكل بين الاهل بتوصل الابناء للاكتئاب
فى ناس بتقدر تتغلب على الاكتئاب وتعدى منه
وفى ناس مابتقدرش

بتكلم عن الموضوع ده ليه؟
النهارده خالتى بتقولى
ان فى بنت زميله ابنها فى تدريب الكاراتيه بتاعه
(انتحرت)
انا اتصدمت صراحه من الكلمه بس
البنت دى ما تتعداش 14 او 15 سنه
ايه اللى يخلى بنت فى السن ده تفكر فى الانتحار
حاولت استفسر منها عن باقى الموضوع
بس هى قالت ان صلا اهل البنت كانوا رافضين يقولوا اى حاجه
غير انها شنقت نفسها فى اوضتها وبس!!

لما فكرت ادور على حالات مشابهه على النت
لاقيت ان فعلا فى حالات انتحار لبنات وولاد فى السن ده 
وبنسبه مش قليله
ده بخلاف ان حالات الانتحار بين الشباب بتزيد عموما يوم عن يوم
يعنى من سن 25:15 نسبه الانتحار كبيره
ده فكرنى بحالات كتير غريبه فى موضوع الانتحار ده
زى موضوع الانتحار الجماعى
لما شباب كتير اتفقوا على النت انهم ينتحروا كلهم فى وقت واحد
والبنت اللى انتحرت قدام الكاميرا على النت فى شات رووم
يعنى الموضوع فيه افكار كتير غريبه
بتبدأ من السن لحد الفكره وطريقه تنفيذها كمان
 
يمكن احنا فى البلاد العربيه الموضوع أقل شويه من البلاد الاجنبيه
بسبب وجود الوازع الدينى
بس ده مايمنعش ان النسب بردو بتتزايد
بس اللى مش قادره استوعبه
ايه اللى يخلى "طفله" زى دى تحاول تنتحر؟
وايه اللى وصلها لمرحله الجرأه دى؟
لان الانتحار محتاج جرأه لانه مش خطوه سهله
ومعنى انها انتحرت فعلا يبقى اكيد قبلها كان فى محاولات ومانجحتش 
او على الاقل افكار ماوصلتش لمرحله التنفيذ
وازاى طفله فى السن ده توصل بتفكيرها لكده اساسا
باختلاف اسباب الموضوع اللى انا مش عارفاها اصلا
بس الموضوع مش سهل

قال الله تعالى
 {ولا تقتلوا أنفسكم إنَ الله كان بكم رحيماً
صدق الله العظيم

readmore »»

14 June 2011

14/6.... ايه بقى الفرق بينهم؟؟

.
14 التعليقات



النهارده كنت فى المترو مع اختى
قابلتنا ست كبيره فى الست يمكن فى سن جدتى مثلا
سألتنا عن عنوان فى ورقه معاها
فهمت من الموقف انها مش بتعرف تقرأ اصلا
الورقه مكتوب فيها (اصل انا فضوليه ولازم اعرف)
ان ده مكان طالب ناس تشتغل زى عمال بوفيه او حاجه زى كده
والمرتب 650 جنيه تقريبا
شوفنا العنوان ووصفنالها مكانه ومشينا
لفت نظرة ان الست دى رغم سنها الكبير
وبرغم قدراتها المحدوده وفرص الشغل اللى ممكن تكون قليله قدامها
الا انها اصرت تروح اماكن ماتعرفهاش عشان تدور على شغل
زيها بالظبط زى الشباب اللى لسه متخرجين(واللى انا منهم للاسف)
اللى بيلفوا على اماكن شغل (وبردو مش بيلاقوا)
ومافكرتش انها تشحت مثلا
رغم انها فعلا تستحق المساعده

فى نفس ذات المترو واحنا راجعين
قابلنا ست تانيه سنها يمكن مايتعداش ال 35 سنه
بتوزع علينا ورقه  متصوره
مكتوب فيها القصه المعتاده
واللى تعتبر من اهم طرق الشحاته الحديثه خلال ال 7 سنين اللى فاتوا
انها بتجرى على عيالها عشان تأكلهم
وجوزها يا اما متوفى او محبوس او مريض بمرض مالوش علاج
وبتطلب نساعدها بأى حاجه كل ده فى الورقه من غير ما تقول ولا كلمه

الموقف ده خلانى اقارن بين حاله السيدتين دول
الاولى.. رغم كبر سنها وعدم قدرتها حتى على قرأه العنوان اللى هى هتروحه
الا انها بتحاول وبتدور وعايزه تشتغل
اما الثانيه.. بالرغم من ان سنها صغير ومش بيعوقها اى عاهه وقدرتها الجسديه تسمح للشغل
يعنى فرصتها فى انها تلاقى شغل اكبر من الاولى
الا انها فضلت انها تشحت او بمعنى اصح تحاول تستعطف الناس
يعنى ده مش تفرق حاجه عن دى
بس الاولى عايزه تشتغل عشان تحافظ على ماء وجهها
اما التانيه بأختصار استسهلت

ليه فى بعض الشحاتين اللى بنشوفهم بيكونوا عندهم القدره انهم يشتغلوا
وفى ناس فعلا قدرتها اقل بس بتفضل تدور على شغل حفاظا على كرامتهم
ومهما كان المقابل اللى هياخدوه حتى لو قليل

هما الناس اللى بيشحتوا بيكسبوا كتير؟ 
يعنى الفلوس الكتير دى هى اللى بتشجعهم ع الشحاته؟
والا احنا شعب بيتعاطف مع بعض بدون مبرر 
فا ده بيدى فرصه للشحاتين انهم يزيدوا؟
بس الاكيد
ان الشحاته من اهم الظواهر فى بلدنا اللى يوم عن يوم بتزيد

readmore »»

13 June 2011

13/6... كلام والسلام ..كلاكيت سادس مره

.
14 التعليقات




اكتشفت من قريب اوى
انى كل ما انزل اشترى لبس جديد
ده بيغير مزاجى تماما
انا ماكنتش كده
اه كنت ببقى مبسوطه باللى بشتريه
بس حاليا حاسه ان احساسى نفسه مختلف
عايزه اشترى دايما لبس جديد
عشان اوصل للمود اللى بوصله لما احس بوجود الحاجه الجديده دى معايا
عارفه ان دى حاله نفسيه عند ناس كتير
لو حد زهقان او مضايق ينزل يشترى اى حاجه جديده ده بيغير مزاجه
بس انا اصلا ماكنتش كده
والموضوع ده جديد معايا
مش فاهمه ايه اللى جد يعنى؟!

*************

عمرى فى حياتى ماكنت بدخل فى خصوصيات حد
ولا بحب اعرف حاجه عن حد هو مش عايزنى اعرفها
وعشان كده ماكنتش بسمح لحد انه يدخل فى حياتى
مش معنى انى بهزر مع حد والا حتى بسمعله لما يحب يحكيلى
يبقى احنا اصحاب
كويس انى مستمعه جيده
بس مش شرط ده يخلينى صديقه لكل اللى بسمعلهم
حتى لو هما شايفنى كده

*************

عمرى ابدا
ما كان سكوتى معناه ضعفى 
بس كتير سكوتى بيبقى مراعاه لمشاعر اللى قدامى
او نوع من انواع تكبير الدماغ
حتى لو كنت هاجى على نفسى مره واتنين
بس اكيد فى وقت هاقول استوب

*************

عادى
اللى اخترع الكلمه دى انسان هايل بجد
بقيت استخدمها كتير اوى
بحس انها بتجيب من الاخر
وتقصر فى الكلام
كلمه عادى بالنسبالى
(احيانا) بيبقى وراها كلام كتير اوووى

*************

طول عمرى
مش بتمنى اى حاجه
غير ان اى حد يعرفنى يحبنى او يقول عليا انسانه كويسه
بيتهيألى مفيش حاجه احلى من كده
بس الاهم
هو انا فعلا قادره اوصل لده ؟!!؟

*************

دايما لما بفكر فى حاجه
ربنا بيدينى اشارات
اختار ايه وايه الاحسن ليا
وقتها بتأكد ان ربنا بيحبنى مهما كنت مقصره

*************

نفسى اسافر لبنان والبحرين ودبى
نفسى اقعد قدام البحر فى اسكندريه الساعه 3 بليل ولحد الشروق
نفسى ادخل سينما من 12 ل 3
نفسى امشى فى شارع فااااضى الفجر

*************

عندى فوبيا من البحر
معظم اللى حواليا شايفين انها حاجه عبيطه
و بيحاولوا يساعدونى اتغلب عليها
مش قادرين يفهموا انى مش حابه اصلا اتغلب عليها
لان غير انى بخاف
فا اصلا مابحبش انزل البحر

*************

انا تعبت من كرهى ليكى
بس انا اصلا مش بكرهك !!!
بالعكس
(اوقات) بيوحشنى كلامك معايا
وسهرنا طول الليل نرغى
وضحكنا وهزارنا حتى تهيسنا
هو انا لو قولت انك بتوحشينى
ابقى هبله؟؟؟؟

*************

شهر رمضان واحشنى جدااا
السنادى من اكتر السنين اللى احس انى مستعجله عليه اوى كده
يمكن لان ذكرياته السنه اللى فاتت كانت حلوه معايا
يمكن لانى مستنيه فيه اكون احسن
مش عارفه
بس الاكيد انى مستنياه وعايزاه اوى

readmore »»

12 June 2011

12/6.... هو كيلو الكلام بكام؟!؟

.
6 التعليقات




مؤشر بيع الجرايد يوم عن يوم بيقل
بقت حاجه غريبه اوى
زمان الجرايد كانت اهم حاجه الناس عن طريقها بتعرف اخبار الدنيا كلها فى جميع المجالات
انما دلوقتى فى طرق كتير اوى تعرف عن طريقها الاخبار
يمكن النت من اكتر الحاجات اللى غطت على الجرايد دلوقتى
ولما الناس مش بتشترى الجرايد دى تفتكر بتروح فين؟؟؟؟؟
بتتباع طبعا
فى سوق الورق اللى فى الازهر

حتى الكتب
الكتب دلوقتى بقت زى الاخبار
ممكن توصلها عن طريق النت
فى ناس كتير بتفكر انها تحمل 10 كتب من النت
افضل من انهم ينزلوا يشتروا 3 كتب مثلا من اى مكان
رغم ان فى ناس لسه شايفه ان قرأه الكتب الورقيه ليها متعه خاصه
ماتعوضهاش ابدا الكتب الالكترونيه
ومع ذلك فى كتب بردو لما بتقدم وماحدش يشتريها
بتتباع عند سور الازبكيه
يعنى كل مكان وليه تخصصه فى بيع انواع الورق
سواء كان جرايد
او كتب

يعنى الكلام دلوقتى بقى بفلوس
الجرايد بتتباع بالكيلو
والكتب بتتباع بنص التمن
هو ممكن الجرايد مع الوقت تختفى؟ او تبقى على النت بس؟
بما ان النت بقى شاغل حيز كبير اوى من حياتنا
ممكن ده يخلى وسيلتنا للقرأه على النت وبس؟

readmore »»

11 June 2011

11/6... جوزونا

.
16 التعليقات



ده اسم حمله عملوها شباب
بيطالبوا فيها بتسيير نفقات الجواز
سواء كان من طلبات الاهل
او حتى بمساعده الحكومه فى موضوع الشقق مثلا
صراحه عاجبانى الفكره اووى
من قبل موضوع الحمله ده وانا دايما بفكر فى حكايه الطلبات
اللى الاهالى بيطلبوها من الشباب اللى عايزه تتجوز
فى نوعيه من الاهالى 
بيتصوروا انهم لما يطلبوا من الشاب اللى جاى يتقدم لبنتهم طلبات كتير
يبقى هما كده بيعملوا الافضل ليها وبيأمنوا مستقبلها
مش قادره افهم انهى مستقبل ده اللى بيتعاملوا معاه بطريقه ماديه وبس كده
ماحدش قال ان الاهل يتنازلوا عن اى حق من حقوق بنتهم
ولكن كأمثله

الشبكه
هو ليه مطلوب من اى عريس انه يجيب شبكه
هو ماحدش عارف سعر الدهب كام النهارده؟؟
ماهو ممكن يبقى تمن الشبكه ده مفيد فى حاجه اهم وأولى
وكفايه الدبله كأشهار للخطوبه وبس
 
الشقه
ايه المشكله لما الولد مش يكون عنده شقه
طب ما ياخد شقه ايجار
ما فى الاخر اسمها شقه بردو
او حتى الفكره اللى الشباب اقترحوها فى الحمله دى
ان الحكومه  تطبق فكره يابانيه الاصل فى بناء الشقق
بحيث ان السرير والدولايب والكراسى تبقى بالاسمنت
يعنى كأن الشقه متجهزه ويبقى فاضل حاجات بسيطه
كنوع من التوفير
صراحه الفكره جديده علينا اوى

فرش الشقه
الفرش ده بقى قصه
فى اهل بيحطوا دايما الناس اللى حواليهم مقياس لعفش بنتهم
يعنى هيجيبوا السجاده زى سجاده بنت اخت عم ابوها 
اللى جابتها ب 5000
وهيجيبوا الصالون زى صالون اخت مرات خال امها 
اللى جابته ب 10000
اصلها ماينفعش تبقى اقل من قرايبها فى حاجه
وهما مالهم بأى حد اصلا
بنتهم دى لو جاتلهم فى يوم بتعيط
ماحدش من الناس اللى بيقلدوهم دول هينفعهم
كل واحد ومستواه المادى
ايه المشكله لما تتجاب كل حاجه بس فى المعقول
ماهو كمان ممكن تتجاب الحاجات الضروريه فى البدايه وبعدين الولد والبنت يبقوا يكملوا على مهلهم
ماهو الحاجه اللى هيجيبوها دى مش بتاعه العمر مثلا
ما فى حاجات هتفضل وحاجات هتتغير
طب ليه بقى كل حاجه لازم دلوقتى

طلبات تانيه
زى مثلا المؤخر والقايمه
دول بقى فيهم قصص وروايات
منها ان الولد ممكن يكتب شيك على نفسه
انا مش متخيله انهى أهل دول ممكن يامنوا ولد على بنتهم بمقابل شيك
هو الشيك هينفعهم فى ايه؟
هو ده حق ربنا وماقولتش حاجه
بس فكره تنفيذه دى اللى غريبه


ماينفعش الاهل يفكروا فى جوازه بنتهم بطريقه ماديه بالمنظر ده
الماده مش كل شئ
ده انسان هتستأمنه على بنتك اللى هى حته منك
يعنى عمر ابدا ما الفلوس هتفرق معاك لو بنتك حصلها حاجه
او مش راعى ربنا فيها
بيتهيألى ان الفلوس مش هتنفع حد من الاهل لو ده حصل

لا وبعد ده كله
الاهالى بيسألوا هو ليه البنات بتعنس؟!!؟
عشان يا عينى الشباب جالهم عقده نفسيه خلاص
ربنا يكون فى عونهم صراحه


readmore »»