10 June 2011

10/6.... لحظه الحقيقه

.




كان بيجى برنامج اجنبى قبل كده
اللى هو اتعمل منه دلوقتى برنامج لحظه الحقيقه
كنت مستغربه الفكره اوى لما كانت فى البرنامج الاول
ازاى ناس تفضح كل اسرارهم كده على الملأ
ازاى مش خايفين من اى حاجه ممكن يخسروها
حتى لما بسبب البرنامج ده فى واحد ومراته اطلقوا
لانه عرف انها خانته من سؤال هى جاوبت عليه
بردو قولت دول اجانب
مش هيفرق معاهم اى فضيحه
ولا اى سر يتعرف عنهم
وقولت اللى يهمهم اكيد الفلوس

بس لما شوفت النسخه العربى من البرنامج
مابقتش متخيله اننا كعرب ممكن مايبقاش فارق عندنا زيهم كده
احنا بطبعنا بيبقى عندنا اسرار مش عايزين اى حد يعرفها عننا
ممكن يكون حد عمل حاجه مايحبش ان غيره يعرفها
ووارد تكون حاجه بسيطه 
ممكن تكون مجرد فكره جت فى دماغ اى حد فينا
عايز يحتفظ بيها لنفسه وماحدش يعرفها
ممكن يكون تعليق على شخصيه حد معين مش عايزينه يزعل مننا
ممكن يكون كمان شعور تجاه حد معين فى حياتنا ومش عايزين نقوله
حاجات كتير بنبقى عايزين نحتفظ بيها لنفسنا وبس
بعيدا حتى عن اقرب الناس لينا
احنا طبعنا كده 
 بس انى اشوف ناس مش خايفه من كل ده
وعندهم القدره انهم يجازفوا بكل اسرار حياتهم
وعندهم استعداد انهم يخسروا اى شخص فى حياتهم
لان اسرارهم  هتكون كتاب مفتوح للناس كلها
حساها فكره غريبه
 
مش قادره افهم
ده كله عشان الفلوس؟
والا دى جرأه؟
والا معقول يكون فى حد مش عنده اى اسرار فى حياته يخاف عليها؟

 

12 comments

Lobna Ahmed Nour said...

أنا شايفاه برنامج غير أخلاقي سواء في نسخته الأمريكية أو العربية
إيه الحكمة في اللعب بالأسرار؟ مش فاهمة
تحياتي ليكي

مصطفى سيف الدين said...

والله مادام سألتيني عن رايي اقولك
ابلغ البرامج دي متفبركة ومش بعيد اصلا ميكونوش متجوزين
او على الاقل محفظينهم اللي هيقولوه واللي هيتقال مش معبر عنه كل ده علشان فرقعة البرنامج
الفلوس تعمل اكتر من كده
بوست جميل وحلوة الاسئلة اللي بتسأليها لنفسك علشان توصلي للحظة الحقيقة بالرغم ان حقيقة البرامج دي معروفة بس بتحاولي تقنعي نفسك لو فعلا دي اراء الازواج الحقيقية وقتها هيبقى برنامج ضار جدا على العلاقات الاسرية لانه شبه نشر الغسيل اللي مش نضيف قدام كل البشر وده بيفتت الزواج
حتى لو ماتطلقوش هيدخلهم مرحلة الصمت الزوجي
تحياتي

catroz said...

ايوووووون
انا لسه شايفه حلقه منه
كنت مستغربه جدااا م اللى بيحصل
لدرجه ان الراجل وصل للحظه انوا بقى يضحك
الى هو كده كده الدنيا باظت بقى
الغلط ف حاجتين
لا تبقى عارف ان فيك بلاوى وتروحش تفضح نفسك و مراتك ع الهوا
و لما تبقى تلاقى ان الدنيا كل مدى بتزداد سوءا و عمال تكمل
بس احنا كده
بنحب نقلد
حتى لو غلط

كريمة سندي said...

والله كل البرامج الأجنبية أصبح لها حق الامتياز التجاري وكفي كل العالم أصبحت موجودة حسب لغة البلد وهذا بسبب العولمة

المهم في الأمر أننا أصبحنا نستورد فقط ولا نصدر برامج أو نبتكر برامج تنساب عاداتنا وقيمنا وتقاليدنا وهذ هو مربط الفرس تحياتي

Unknown said...

إنها الفلووووووووووووس
و الشهرة ..!!

NaiRa said...

لا بعيد عنك دى بتبقى ناس اسراها وحياتها الخاصه رخيصه عندهم لان مفيش حد معندوش اسرار ولا عندو حاجه خاصه محتفظ بيها لنفسو

Bent Men ElZman Da !! said...

لبنى أحمد نور

هى الفكره فعلا اللعب بالاسرار
يمكن عشان الفضول الانسانى بيتشجعه الاسرار
ميرسى ليكى يا لبنى نورتينى

Bent Men ElZman Da !! said...

مصطفى سيف

والله مش بعيده حكايه الفبركه دى
اتوقعها فى حاجه زى الفضايح اللى بيعملوها بالمنظر ده
اصل مش ممكن ناس تخرب على نفسها كده
شكرا ليك يا مصطفى على تعليقك

Bent Men ElZman Da !! said...

catroz

كل واحد بيدخل البرامج اللى من النوع ده
يستاهلوا اى ضرر يعود عليهم
لان هما اللى بيوصولوا نفسهم لكده
منورانى يا قمر وميرسى ليكى اووى

Bent Men ElZman Da !! said...

كريمة سندي

مش بنراعى ابدا انهم غيرنا تماما فى كل حاجه
المهم التقليد وخلاص
شكرا ليكى يا كريمه نورتى المدونه

Bent Men ElZman Da !! said...

قهوة بالفانيليا - شيماء علي

انا حاسه الفلوس اكتر
لان ماحدش بيفتكرهم اصلا بعد ما حلقتهم تخلص
ميرسى ليكى يا شيماء نورتينى

Bent Men ElZman Da !! said...

NaiRa

انا بردو مش متخيله ان مفيش حد عنده اسرار
منوره يا نيره :D

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment