13 June 2011

13/6... كلام والسلام ..كلاكيت سادس مره

.




اكتشفت من قريب اوى
انى كل ما انزل اشترى لبس جديد
ده بيغير مزاجى تماما
انا ماكنتش كده
اه كنت ببقى مبسوطه باللى بشتريه
بس حاليا حاسه ان احساسى نفسه مختلف
عايزه اشترى دايما لبس جديد
عشان اوصل للمود اللى بوصله لما احس بوجود الحاجه الجديده دى معايا
عارفه ان دى حاله نفسيه عند ناس كتير
لو حد زهقان او مضايق ينزل يشترى اى حاجه جديده ده بيغير مزاجه
بس انا اصلا ماكنتش كده
والموضوع ده جديد معايا
مش فاهمه ايه اللى جد يعنى؟!

*************

عمرى فى حياتى ماكنت بدخل فى خصوصيات حد
ولا بحب اعرف حاجه عن حد هو مش عايزنى اعرفها
وعشان كده ماكنتش بسمح لحد انه يدخل فى حياتى
مش معنى انى بهزر مع حد والا حتى بسمعله لما يحب يحكيلى
يبقى احنا اصحاب
كويس انى مستمعه جيده
بس مش شرط ده يخلينى صديقه لكل اللى بسمعلهم
حتى لو هما شايفنى كده

*************

عمرى ابدا
ما كان سكوتى معناه ضعفى 
بس كتير سكوتى بيبقى مراعاه لمشاعر اللى قدامى
او نوع من انواع تكبير الدماغ
حتى لو كنت هاجى على نفسى مره واتنين
بس اكيد فى وقت هاقول استوب

*************

عادى
اللى اخترع الكلمه دى انسان هايل بجد
بقيت استخدمها كتير اوى
بحس انها بتجيب من الاخر
وتقصر فى الكلام
كلمه عادى بالنسبالى
(احيانا) بيبقى وراها كلام كتير اوووى

*************

طول عمرى
مش بتمنى اى حاجه
غير ان اى حد يعرفنى يحبنى او يقول عليا انسانه كويسه
بيتهيألى مفيش حاجه احلى من كده
بس الاهم
هو انا فعلا قادره اوصل لده ؟!!؟

*************

دايما لما بفكر فى حاجه
ربنا بيدينى اشارات
اختار ايه وايه الاحسن ليا
وقتها بتأكد ان ربنا بيحبنى مهما كنت مقصره

*************

نفسى اسافر لبنان والبحرين ودبى
نفسى اقعد قدام البحر فى اسكندريه الساعه 3 بليل ولحد الشروق
نفسى ادخل سينما من 12 ل 3
نفسى امشى فى شارع فااااضى الفجر

*************

عندى فوبيا من البحر
معظم اللى حواليا شايفين انها حاجه عبيطه
و بيحاولوا يساعدونى اتغلب عليها
مش قادرين يفهموا انى مش حابه اصلا اتغلب عليها
لان غير انى بخاف
فا اصلا مابحبش انزل البحر

*************

انا تعبت من كرهى ليكى
بس انا اصلا مش بكرهك !!!
بالعكس
(اوقات) بيوحشنى كلامك معايا
وسهرنا طول الليل نرغى
وضحكنا وهزارنا حتى تهيسنا
هو انا لو قولت انك بتوحشينى
ابقى هبله؟؟؟؟

*************

شهر رمضان واحشنى جدااا
السنادى من اكتر السنين اللى احس انى مستعجله عليه اوى كده
يمكن لان ذكرياته السنه اللى فاتت كانت حلوه معايا
يمكن لانى مستنيه فيه اكون احسن
مش عارفه
بس الاكيد انى مستنياه وعايزاه اوى

14 comments

reemaas said...

بقيت انا اول من بيعلقلك كتير يابنوته يارب مش تزهقى منى

البوست عجبنى اوى حساكى شبهى كده فى حاجات كتير حتى فوبيا البحر بس هى مش واصله معايا لفوبيا انا بس بخاف ابقى فى وسط الميه وبحس ان اصعب موته هى الغرق ربنا يكفينا الشر


شرا الهدوم الجديد متعه مابعدها متعه وبيحسن المود جدااااااااااااااااا اهلا بيكى فى عالم الشوبينج

كريمة سندي said...

فضفضة حلوة بس بس البحر جميل وخطير في نفس الوقت

كل عام وأنت بخير

شمس النهار said...

بوست جميل جدا بس عايز بوست علشان اعلق عليه

بس انتي فضفضتي فيه كتير واكيد ارتحتي بعدها

استسلمي للمشاعر الصادقة اللي مش ضد دين ولا عرف ولا اخلاق وقاومي ماعكس ذلك نصيحة علي الماشي من ام
وعلي فكرة انا كمان بحب كلمة عادي والحدق اللي قصادي يفهم
:))
اللاب توب اتصلح والحمد لله

Anonymous said...

أنا كمان عايزه رمضان يجيي بسرعه السنه دي :)
لو قلتي انه بيوحشك مش هتبقي هبله هتبقي...بنت بتحب:)
الحاجات اللي نفسك تعمليها ممكن تعمليها لما تتجوزي ده الحل الوحيد :)
أنا كمان عايزه أجيب لبس جديد و مش فاضيه :(
بوست جميل و يدل على إنسانه صافيه أوي
تحياتي ليكي

شيرين سامي

NaiRa said...

كلام والسلام بردو
بحب اوى الكلام اللى يطلع من القلب لانو بيوصل القلب فعلا

فتــافيت (رحاب الخضري) said...

انا كمان زمان.. كنت ببقى مبسوطة لما انزل اجيب لبس جديد لكن دلوقتي لا :(... كبرنا ممكن

كمان وحشني رمضان جدا
بس بخاف منه.. دايما بيكون فيه مشاكل عندي

مش هبلة لو قولتي.... انها بتوحشك
بس هبلة لو رحت قولتي لها كده :)

تعرفي اني بخاف من الكهربا جدا
زي خوفك من البحر :)

Bent Men ElZman Da !! said...

reemaas

بالعكـــس
انا مبسوطه بوجودك جدا يا ريماس وانك متابعانى
دى حاجه تشرفنى والله

انتى قولتى حاجه هى دى اللى بحسها بالظبط
انك تبقى فى وسط البحر لوحدك
مفيش اى حاجه بتحميكى
يمكن ده من الاحاسيس اللى بحسها ناحيه البحر
عشان كده مش بنحبه

هو انا كنت بستغرب جو الشوبنج ده...طلعت منهم :D

منورانى يا قمر :))

Bent Men ElZman Da !! said...

كريمة سندي

مااحنا بنحبه عشان جميل
وبنخاف منه لانه خطير وغدار
ميرسى اوى يا كريمه منورانى دايما :))

Bent Men ElZman Da !! said...

شمس النهار

بالظبط
اهى كلمه عادى دى محتاجه الحدق ده عشان يعرف وراها ايه
ميرسى اوى على نصيحتك اللى اكيد تهمنى
مبسوطه بتعليقك جدا نورتينى :))

Bent Men ElZman Da !! said...

شيرين سامي

رمضان ده تحسى انه اكتر وقت الواحد بيكون صافى اوى من جواه
ماهو اكيد مفيش حل انى اعمل الحاجات دى الا لما الاقى حد يطاوعنى وينزلنى فى الاوقات الغريبه دى :))

ميرسى اوى على تعليقك يا شيرين
ومنورانى دايما :))

Bent Men ElZman Da !! said...

NaiRa

ياسلام عليك يا بتاع كلام القلوب انت :))
ميرسى اوى يا نيره

Bent Men ElZman Da !! said...

فتافيت

ممكن عشان اللى بقى يشغل تفكيرك اكبر من انه يروح بانك تشترى حاجه جديده
ان شاء الله السنادى رمضان عندك يكون احسن من اى سنه ومن غير مشاكل :))
لا ما انا متاكده انى هابقى هبله لو قولتلها :D
كمان الكهربا دى نوع من انواع الفوبيا
طب ابقى قوليلى لو عرفتى تتغلى على خوفك يمكن تشجعينى
نورتينى يا رحاب ومبسوطه او بتعليقك :))

مصطفى سيف الدين said...

احلى حاجة الكلام اللي بيبقى طالع من القلب دون ترتيب
بتبقى نفسك تكتبي افكار كتير ورا بعض وقلمك مش ملاحق
ودي بتبقى احلى حاجة
تسلم ايدك وفكرك ويبلغك رمضان على خير

Bent Men ElZman Da !! said...

ميرسى اوى يا مصطفى
ربنا يبلغنا رمضان على خير ان شاء الله كلنا :))
نورتنى بوجودك ومتابعتك

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment