17 June 2011

17/6..... مرحله اللانهايه !!!

.



بقالى فتره واحشنى اووووى جو المذاكره
والسهر والامتحانات والدروس
مع انى ماكنتش بحب الكليه ولا بحب دراستها
رغم ان الكليه الحمدالله طيرت الربع اللى كان فاضل فى دماغى
لدرجه انى فى لحظه من اللحظات فكرت اكمل دراسه

بس ارجع وافكر
لو رجعت اعمل دبلومه اصلا ماحدش بينجح فيها من اللى بيجيبوا تقديرات
يبقى انا هانجح
ولو فكرت ادخل كليه تانيه خالص
هيبقى لسه قدامى 4 سنين بحالهم على الاقل وده اكيد صعب
وبعدين انا اصلا بتخنق من الدراسه والمذاكره
بس بردو فى حاجه وحشانى فى ده كله

من قبل ما اخلص دراسه
وانا بحلم بموضوع الشغل ده
مش عارفه ليه بس كنت حاسه انى نفسى اشتغل
واوصل فى الشغل ده لحاجه كمان
ويكون حاجه بحبها مش مجرد شغل وخلاص
لحد من فتره قريبه وكان موضوع الشغل ده واخد حيز كبير من تفكيرى
انما دلوقتى
مابقاش الموضوع شاغل تفكيرى نهائى
سبحان الله كأنه اتمسح من بالى اصلا
 
كنت دايما بقول انى عايزه اخلص مرحله الدراسه
لمجرد انى مش احس ان انا واقفه عند مرحله معينه خنقانى
بس ماكنتش اعرف ان المرحله دى
هتبقى من مراحل حياتى اللى اتمنى ارجعلها

كلنا فى اوقات دراستنا وخصوصا فى الكليه
بنستنى وقت التخرج ده بفارغ الصبر
عشان عايزين نعدى المرحله دى
بس مابنفكرش بعد كده ان الموضوع هيبقى مش سهل
مابنفكرش اننا هنخرج من مرحله معينه
عشان نوصل لمرحله بلا نهايه
ماهو ياما هتشتغل ياما هتفضل عاطل
(الحكايه دى للشباب يمكن اكتر من البنات)
هتشتغل يبقى لازم تجتهد فى شغلك وتحاول توصل فيه لمكانه كويسه
هتبقى عاطل يعنى هتقضيها فى مرحله البحث عن وظيفه لحد ما تلاقى وساعتها هتوصل لمرحله الوظيفه
واللى هى  بردو لازم تجتهد فى شغلك وتوصل فيه لمكانه كويسه
يعنى هتخلص مراحل كتير فى حياتك ليها نهايه
عشان توصل لمرحله اللانهايه
بس فى الاخر دى سنه الحياه
لازم الواحد يتعب ويشتغل عشان يقدر يعيش

11 comments

reemaas said...

صباحك سكر يا بنوتة

طبيعى طالما فيه هدف معين اكبر من مرحلة معينه اننا عينا تبقى عليه بمعنى اننا فى الدراسة حلمنا التخرج والشغل

لما نتخرج ومانوصلش للحلم او نحس اننا حققناه بس مش مبسوطين بنحن للحاله اللى كنا مبسوطين فيها حتى لو مذاكرة

تحليل نفسى اهو اى اخدمة

Bent Men ElZman Da !! said...

صباحك زى الفل يا قمر

بحب انا التحليلات النفسيه دى
هى فى الاخر مراحل الواحد لازم يعيشها
ميرسى ليكى يا قمر
ومنورانى كتير :))

Mahmoud Ahmed said...

مرحله المذاكره مرحله راحه
انما مرحله الشغل مرحله التعب كله
^_^
ربنا يوفقك في حياتك ان شاء الله

Mahmoud Ahmed said...

على فكره
صندوق التعليقات بتاع الفيس بوك ظاهر عندك في المدونه

Bent Men ElZman Da !! said...

ما هى عشان كده انا حسيتها مرحله اللانهايه

اومال انا مش شايفاه ليه :|

ميرسى ليك يا سبايدر
نورتنى :))

مصطفى سيف الدين said...

كلنا بنحن لفترة الجامعة والكلية وحياة الطلبة عموما بالرغم اننا كنا مضغوطين فيها
بس ذكرياتها دايما حلوة
تحياتي

Bent Men ElZman Da !! said...

مصطفى سيف

فعلا يا مصطفى
احنا تقريبا بنحن لكل حاجه بتفكرنا اننا كنا اصغر من دلوقتى
ميرسى ليك اوى :))

ابراهيم رزق said...

لا نشعر بجمال المرحلة الا بعد ان نتركها

من المهم ان نعمل و هذا سهل لكن من الافضل ان نعمل ما نحب و تلك هى الصعوبة

تحياتى

Bent Men ElZman Da !! said...

ابراهيم رزق

احنا مش بنحس بحلاوه اى الحاجه الا لما تعدى
و مش سهل ان الواحد يلاقى حاجه بيحبها
شكرا ليك جدا على تعليقك
وشرفتنى بزيارتك :))

Unknown said...

احم احم
سلامو عليكو

فيه قصيدة لهشام الجخ بعنوان
اديني نجحت
هشام كان من الناس المعمرة في الكلية
زي حالاتي كده يعني
وانا في الكلية في اخر ايام يعني كنت خلاص حاسس اني تعبت من الدراسة
زهقت من كوني طالب
عايز الحالة دي تتغير بقي
بس كنت مستمتع جدا بحياتي برضو
وكانت من احلي فترات حياتي

بس كنت محتاج اعدي المرحلة دي عشان اشوف نفسي بقي
اشتغل واتجوز


هشام الجخ قال في اخر قصيدته
كل حاجة يا جامعة فرحت لما قالو اني نجحت
انا الوحيد اللي ادبحت

وهو ده اللي انا حسيت بيه بس يعد التخرج بشويه كده

سلامو عليكو

Bent Men ElZman Da !! said...

وعليكم السلام

هى الكليه من امتع الفترات اللى صراحه الواحد مش بيحس بيها اوى الا لما تخلص
وزى ما قولت خصوصا الشباب هما اللى بيحسوا ان الموضوع بقى اصعب بعد ما يخلصوا دراسه
عشان مجال الشغل بيبقى اساسى عندهم غير البنات
اول مره اعرف قصيده هشام الجخ دى
بس صعبه اوى اخر جمله منها

ميرسى ليك اووى منورنى بعد طول غياب :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment