18 June 2011

18/6.... الزواج على يد مأذونه

.




مأذون شرم
الشاب الروش ابو جينز وتى شيرت 
اللى ظهر فى فيلم شورت وفانله وكاب
بعد الفيلم بقى الماذون ده افيه جامد اوى
الجديد بقى هى مأذونه بنت
الموضوع ده اول ما ظهر كان من فتره طويله فى البيت بيتك
كمجرد فكره بيطالب بيها ومش دخلت فى مرحله التنفيذ
ان بنت عايزه تبقى مأذونه 
ومفتى الجمهوريه اجاز انها تشتغل فى المجال ده
بس من قريب جت بنت فى ال90 دقيقه وكانت فعلا اول مأذونه فى الفيوم
الموضوع جديد علينا تماما
بعيدا عن حكايه المساواه وان الست دلوقتى تقدر تشتغل فى اى حاجه 
بس فكره ان شغل معين الراجل بس اللى بيعمله
دى اللى احنا متعودين عليها
يعنى هناخد وقت عقبال ما نتأقلم 
ان فى ست بتقوم بنفس المهمه

طب ماهو ممكن الراجل مش يرضى يجيب مأذونه بنت فى فرحه
عشان هيحسها غريبه عن الطبيعى
 واصلا فى رجاله منفسنين صراحه فى حكايه البنت تشتغل كل حاجه زيهم

طيب بخلاف الموضوع ده تحديدا
هو موضوع المساواه ده بجد؟
يعنى هو ينفع البنت تبقى زى الولد فى فى كل حاجه
والا فى رجاله هيفضلوا منفسنين كده 
لحد ما يضيعوا اى فرصه قدام الست انها توصل لمكانه معينه
يعنى دى مجرد شعارات
و المساواه دى صعب تحصل فى مجتمعتنا اصلا
والا مع الوقت والمحاولات بيبقى فى أمل؟؟

14 comments

مصطفى سيف said...

بصراحة معرفش مدى شرعية ان البنت ماذونة بس في رايي مادام البنت متنفعش تبقى امام وتصلي بالناس يبقى متنفعش تبقى مأذونة والله اعلم
ده رايي
مش فتوى طبعا المفتي اعلم مني بس انا لو جيت اتجوز مش هروح لماذونة علشان مش عارف مدى شرعيتها
بالنسبة للمساواة مفيش حاجة اسمها مساواة كل فرد في المجتمع له حقوق وواجبات بتختلف الحقوق والواجبات من شخص لشخص علشان كده مفيش مساواة بين الراجل والراجل او الست والست او الست والراجل كل واحد له ظروف معينة ده بالنسبة لكلمة مساواة لغويا
لكن لو تقصدي عمل المرأة طبعا كلنا مع عمل المرأة بس اللي ينسابها يناسب انوثتها ويساهم في الرقي بالمجتمع
ارجو اكون وضحت رايي
تحياتي

Bent Men ElZaman Da !! said...

فى حالات البنت ماينفعش تعملها من ناحيه الشرعيه
زى انها ماتقدرش تدخل الجامع فى اوقات معينه يبقى ازاى هتقدر تكتب كتاب هناك مثلا
المساواه لغويا صعبه زى ما شرحت
بس انا كنت بتكلم من ناحيه العمل فعلا
زى ما قولت اللى يناسبها ويناسب انوثتها
يعنى فى اشكال كتيره من العمل هى ماتقدرش تقوم بيها
وبالتالى هيظهر هنا الاختلاف فى دورها عن دور الرجل
وكده تبقى المساواه مش موجوده

مبسوطه برأيك اوى وشرفتنى بوجودك :))

reemaas said...

الشرعيه وعدم الشرعيه هيفتى فيها اهلها
لكن انا مع المسواه اكيد مع الاحتفاظ بمكانة كل واحد وهيبته

Bent Men ElZaman Da !! said...

شكرا ليكى ياريماس على رأيك نورتينى :))

حَـبآيـۃْ.بـטּـدۉڷ said...

:DDD مِش قادره اتخيل المنظر ..
تقريباً البوست كله وانا فطسانه على نفسي م الضحك
:DD
..
طبعاً أنا مِش مَع المُساواه اللي بِالمنظر ده !
فِيه حاجات ميجوزش فيها المُساواه ..
أنا عن نفسي كبنت !
يعني ايه اتجوز على ايدْ مـأذونه ؟
من قِلة المَأذونين مثلاً !
..
حاجَه عجب بجد ..
:DD

Noha Saleh said...

حلوة مدونتك
بصى موضوع المساواة ده حقيقى جدا دلوقتى
بس هى النفسنة زى ما انتى بتقولى من بعض الرجال
طالما اهل العلم قالوا مش حرام يبقى خلاص
من حقها تشتغل
مدونتك عجبانى جدا

Bent Men ElZaman Da !! said...

حَـبآيـۃْ.بـטּـدۉڷ

شوفتى بقى اهو انتى بنت ومش متخيله الموضوع تخيلى لو ولد هيعمل ايه :D :D

ميرسى ليكى يا ساره منورانى يا قمر :))

Bent Men ElZaman Da !! said...

Noha Saleh

اهل العلم اكيد ادرى من حيث الشرعيه
بس العادات هى اللى هتقف قدام اى بنت فى موقف زى ده

مبسوطه اووى ان المدونه عجبتك
ومبسوطه اكتر بزيارتك
شرفتينى يا نهى :))

اسكندرانيه said...

اعتقد مينفعش فى كل حاجه
ورأيى الشخصى المتواضع انى مش حابه ان البنت تبقى مأذونه
مع انى مع المساواه جدا
بس فى اللى ينفع البنت تشتغله مش كل حاجه تنفع
الله ينور يا بنوته

Bent Men ElZaman Da !! said...

اسكندرانيه

صح يا ساره
فى حاجات تنفع للبت وفى ماينفعش
ميرسى على رأيك ونورتينى :))

أحسن تـستاهـل said...

طب انتي ترضيها دي؟ مأذونة ست ف فرحك؟؟
طب ما نجرب ونجيب محصلين الكهربا والغاز والمية ستات بأه
ما هي مساواه

انا بتجنن من حوارات المساواة دي بشكلللللللللل

***************************

مها ميهوووو

Bent Men ElZaman Da !! said...

فى حاجات معينه كده احنا مش قادرين نتخيل والا نتصور ست بتعملها
دى منهم
بس بما ان فى بنت فعلا مأذونه
هى هتعمل ايه فى شغلها بقى

ميرسى ليكى يا مها منورانى :))

المتمردة هبة said...

لا هو حتى لو المجتمع وصل للمساواة المادية .. ان يبقى للبنت نفس مناصب الولد .. فبرده هيفضل من جواه فى تفرقة بين الولد و البنت عمره ما هيقدر يستغنى عنها مهما عمل ..

:((

Bent Men ElZaman Da !! said...

المتمردة هبة

ايوه يا هبه
ماهى الحكايه فى التفرقه اللى من جواه دى
فى ولاد كتير مش بيبقوا متقابلنها
ميرسى ليكى على تعليقك ونورتينى بزيارتك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget