21 June 2011

21/6... العشق المخلوع :D

.




المسلسلات التركيه دى بقت وباء
حقيقى بقى موضوع لا يطاق
انا نفسى افهم
ايه اللى يجبر حد يقعد يتفرج على مسلسل 150 حلقه
ده لو تكرموا وكروتوا فى الاحداث
انما لو كانت ايديهم سخيه كده وشطحوا بخيالهم
ممكن يعملوا للمسلسل 3 اجزاء مثلا
وكل جزء 180 حلقه مثلا
يعنى ممكن تقعد عمرك كله تتفرج على مسلسلين تلاته والا حاجه

الغريبه ان الناس متبعاهم اوى
مش بيزهقوا؟؟
بس على فكره بقى 
الشعب المصرى كان عنده من زمان 
مؤشرات الاستعداد لمتابعه مسلسل مدته 5 سنين مثلا
من ايام مسلسل اوشين
و the bold and the beautiful
كانوا الممثلين فيه بيكبروا ويعجزا واحنا معاهم وحافظين كل تفاصيلهم
لما خلص الناس زعلت اوى
تقريبا المسلسلات التركيه جت عشان تعوض الفراغ اللى المسلسين دول عملوه

تأثير المسلسلات دى بقت خطر
كل واحده عايزه جوزها يبقى زى مهند
وكل واحد عايز مراته تبقى زى نور والا سمر
يعنى المسلسلات بتعمل مشاكل عائليه
اكتر منها وسيله استمتاع
طب ما بلاش منها احسن
وبعدين انا نفسى افهم اصلا ايه الحلو فى واحد زى مهند ده
(غير الشعر الاصفر والعين الزرقا)

تاثيرها كمان بقى على الاسعار
اللى اكتشفته من فتره قريبه
ان ملابس البنات زادت اسعارها جدا
بسبب المسلسلات التركيه
لان معظمها دلوقتى بقى مستورد من تركيا
والبنات عايزه تلبس زى سمر
 (عشان تعجب واحد زى مهند اكيد)

بيتهيالى احنا المفروض نطالب بخلع المسلسلات التركيه من التلفزيون المصرى
وجميع الفضائيات المجاوره

لسه شايفه الفيديو ده النهارده
مسخرررره بجد



طب بجد لو اتعملهم دبلجه زى اللى فى الفيديو ده
هينفعوا معانا اوى
على الاقل هيبقوا زينا كده وشبهنا
مش نشوفهم عشان نتحسر

16 comments

FAW said...

أنا بجد مش عارف إزاي حد ممكن يتفرج علي المسلسل المستفز ده , لأ وكمان مدبلج , حاجة رهيبة والله

بس لو فعلا فيه بنات أو ولاد بيتأثروا بالكلام الفاضي ده يبقوا قمة في التفاهة بصراحة

شمس النهار said...

ضحكتيني عارفة ان من اوائل تدويناتي كان عن مهند يخربيته قلب الناس علي بعض
:))))))))))

Bent Men ElZman Da !! said...

FAW

لا فى ناس كده بجد
تخيل انا شوفت حوار بين اتنين متجوزين
هو يقولها انتى ماينفعش تبقى زى نور دى كده
وهى تقوله ليه هو انت فاكر نفسك مهند :D :D

ميرسى ليك نورتنى :))

Bent Men ElZman Da !! said...

شمس النهار

ده جه عمل فتنه بين الناس :D

ميرسى ليكى اوى ونورتينى :))

كريمة سندي said...

والله المكيسيكية لما كانت تطور تطلع تقريبا زي التركية بس ماكنش الهوس دا موجود على أيامنا زي بالوقت تحياتي

Bent Men ElZman Da !! said...

كريمة سندي

ايوه انا تابعت فتره المكسيكى واستحملته اكتر من التركى
والا يمكن انا اللى مابقاش عندى خلق :D

ميرسى ليكى كتير ومنورانى دايما :))

Unknown said...

احم احم
سلامو عليكو

بكرههم بكرههم
بكره المسلسلات عامة وخصوصا التركية وخصوصا الواد مهند ده
مش لسبب والله انا قبل ما ادخل الجيش كان عندي شعر وعندي واحد قريبي عينه خضرا
مش نقص يعني ولا حاجة
بس مستتقل دمه قوي
وكنت مستغرب من كم الناس اللي كانت بتابعه
وزي ما انتي بتقولي المسلسل طويل جدا ومستحيل حلقة تفوتهم يعني

يلا هنقول ايه بقي
ارزاق


سلامو عليكو

reemaas said...

ههههههههههههههههههه
طبعا انا هنضرب لو قلت ان المسلسلات عجبتنى ههههههههههه

بس والله ماعجبنى حلاوة مهند ولا نور ولا سمر
انا بس عجبنى طريقه التمثيل والصرف الواضح والانتاج يعنى كعمل فنى والله مش اكتر بقيت نادر لما بشوف تمثيل يقنعنى

سَارةٌ said...

الفيديوو فظييع جدا :DD

ساعات كنت بلقط حاجات من المسلسل ده
بس اكتشفت ان قصته فاكسه أصلاً :DD
يِخربيت مُهند بَقى ..
أنا شُوفت ناس متجننه بالفعل
مِنُّه ! :DD

مصطفى سيف الدين said...

بالنسبة ليا فانا شخص ملول جدا ومش باستحمل اتفرج على مسلسل حتى لو كان مصري وحتى لو كان خمستاشر حلقة
الا اذا كانت حلقاته منفصلة زي راجل وست ستات مثلا انما اقعد كل يوم استنى الحلقة
لا مقدرش
ومش عارف ازاي الناس بتستحمل كده
تحياتي

Bent Men ElZman Da !! said...

حضرة الظابط

ماهما الحلوين كده بيبقوا تنحين :D :D
اهى المسلسلات التركيه دى فعلا ارزاق
فجأه كده اكتسحت جميع المسلسلات

ميرسى ليكى اوى على تعليقك :))

Bent Men ElZman Da !! said...

reemaas

لالالا خالص ولا هتنضربى ولا حاجه
انا براعى الموضوع ده لانى عايشه فى بيت كل اللى فيه مدمنين مسلسلات تركى :D :D

هو صراحه من ناحيه الصرف فا هما بيصرفوا جامد اوى لدرجه انهم بيحبطونا :D

ميرسى ليكى ياقمر على ردك نورتينى :))

Bent Men ElZman Da !! said...

حَـبآيـۃْ.بـטּـدۉڷ

قصته فاكسه اوووووى
معظم المسلسلات التركيه اصلا بيطولوا فيها رغم ان نهايتها بتبقى معروفه

ميرسى ليكى يا ساره منورانى يا قمر :))

Bent Men ElZman Da !! said...

مصطفى سيف

لا ده انت على كده عدو المسلسلات التركيه الاول
اصلها بترفع شعار هتمل يعنى هتمل لا مفر منها

ميرسى ليك ونورتنى :))

Unknown said...

قوليلهم والنبي ههههههههههه
يما بنقول الكلام ده
بس بيني وبينك الموضوع مع انه مش جديد ولا فيه حاجه جديده
بس حلاوته انه جاي من بنت هههههههههه
لان الموضوع ده الكل كان بيوجهه للبنات
لكن اما اشوف بنت تكتب في كده فشابو طبعا ليها
وتسلم الايادي

Bent Men ElZman Da !! said...

AbDeLrHmAn SaMi

ما انا بقول اهو
بس اكيد لا حياه لمن تنادى
اصل التركى ده ادمان
مهما حاولت تقنع الناس بالعكس مش هتلاقى :D :D

ميرسى ليك جدا ونورتنى :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment