24 June 2011

24/6.... كائن ناقص !!

.



الحوار الاول

الام: يلا يا حبيبتى قومى البسى عشان العريس هيجي هو واهله يشفوكى كمان شويه
البنت: بس انا قولتلكم يا ماما انى مش عايزه اشوف اى عرسان دلوقتى
انا عايزه اخلص دراستى وبعدين اعمل ماجستير
الام: ماجستير؟ماجستير ايه يا ام ماجستير انتى؟
البنات مالهاش فى الكلام ده
انتى اخرك لبيتك وجوزك وولادك هتعملى ايه بالشهاده بتاعتك دى
ما احنا زمان لا اتعلمنا ولا بتاع وعرفنا نربيكم اهو
(الاب بيسمع الكلام من بعيد وبيجى على السيره)
الاب: ايه الكلام اللى انا سامعه دى
دراسه ايه اللى بتفكرى فيها
انا اتفقت مع الناس يجوا النهارده يعتى هيجوا
انتى عايزه تنزلى كلمتى الارض والا ايه؟؟
البنت: حاضر يابابا
:((

.
.
الحوار التانى

نظرات ام شارده فى وش بنتها
الام: سامعه صوت الزغاريط اللى فوقينا
البنت: اه سامعه يا ماما
الام: يعنى البت سهام تتجوز قبل منك وانتى اكبر منها ب 8 سنين
البنت: نصيب يا ماما هى لاقت انسان مناسب وانا مش لاقيت ايه المشكله
الام: ما انتى لو بتوافقى على حد من اللى بيتقدمولك 
كنتى زمانك متجوزه وعندك كام عيل كمان
البنت: بس انا ماشفتش حد مناسب لدلوقتى
الام: وكل اللى بيتقدمولك دول مفيش حد منهم مناسب
انتى بس اللى منشفه دماغك
والناس اللى عماله تتكلم وتقول انك كبرتى فى السن
وقطر الجواز فاتك وهتعنسى وتفضلى قاعده جنبى
انا نفسى افرحلك بعيل قبل ما اموت
البنت: ماتقوليش كده ياماما
الام: طيب يبقى تشوفى العريس اللى جاى بكره
والبنت عشان كلام امها قررت تتنازل عن فكره مناسب دى
لمجرد انها ترضى اهلها
وعشان تخلص من نظرات الشفقه اللى فى عيون الناس 
بما انها فى نظرهم عنست وفاتها قطر الجواز

دى نماذج بنشوفها كتير جداااا فى حياتنا
وفى مننا اللى مر بيها او يعرف حد مر بيها
تحكم الاهل فى البنت من ناحيه الجواز بالطريقه دى
بيخلى العواقب اكبر بكتير مما كانوا متخيلين
يعنى بدل ما البنت تتأخر فى الجواز شويه
تبقى اسمها طالق وفى ايديها عيلين
بدل البنت ما يبقى معاها ماجستير
تبقى من ضمن المطلقات تحت سن ال 25
الاهل بيفرحوا كده لما يلاقى بنتهم جت قعدت جنبهم؟؟
بعد ما اتجوزت جوازه فاشله لمجرد انها ترضيهم

نسبة الطلاق في مصر بتزيد يوم عن يوم
كانت 45% في سنه 2008
بمعدل وقوع 240 حالة طلاق فى اليوم الواحد
و باختلاف الاسباب
دلوقتى اكيد اكتر بكتير من كده 
والدليل منظر محاكم الاسره وعدد قضايا الخلع
الاسوء دلوقتى ظاهره الطلاق المبكر
يعنى البنت تتجوز وهى ماتزدش عن 20 سنه 

وبعدها بكام شهر والا سنه تتطلق
الفكره هنا اولا انها بقت مطلقه فى وقت المفروض لسه بتبدأ فيه حياتها
وثانيا نظره المجتمع ليها

المجتمع فى جميع مراحل حياه البنت 
بيعاملوها على انها دايما ناقصه عقل ودين
وده ان عبر فا بيعبر عن الجهل الدينى 
وعدم الاستيعاب الصح للجمله اصلا
وقبل ما البنت تتجوز بيشفوها على انها عانس واتاخرت فى الجواز
وبعد ما تتجوز جوازه مش راضيه بيها عشان تتخلص من اللقب العجيب ده
ولما تفشل جوازها بتحصل على لقب مطلقه
يعنى فى جميع الاحوال
المرأه فى نظر المجتمع
كائن غير كامل بالمره
كائن ناقص

البوست ده مشاركه منى فى حمله اتكلمى 
اللى اعلنت عنها ساره درويش على الفيس بوك



18 comments

كريمة سندي said...

والله نسبة الطلاق في العالم العربي ارتفعت بشكل مهول جدا ولأسباب تافهة

فمثلا في السعودية الطلاق عندنا زي سلام عليكم وعليكم السلام

ولا مؤخر ولا نفقه ولا عيال ولا قانون يحمي المطلقات

ابراهيم رزق said...

السلام عليكم

اشك فى نسبة الطلاق التى ذكرت لان هذه النسبة تعنى تقريبا ام كل حالتى زواج توجد حالة طلاق
اعترف انه توجد مشاكل و لكن توجد مشاكل ايضا عند الرجل يجب ان ننظر الى الصورة بشكل متكامل من اجل ايجاد الحلول
اصعب من الطلاق هى الحياة مكرهة مع من لا تحبه او تطيقه
تحياتى

دعاء مواجهات said...

ربنا يعينك بجد وتقدرى تحققى كل اهدافك

كلنا هذا الرجل

مصطفى سيف الدين said...

نسبة الطلاق بقت اوفر اوي
مش عارف هل السبب ان الاحساس بالمسئولية بقى اقل ولا ايه
حكاية الطلاق مالهاش دعوة بالحب او جواز الصالونات
حتى الجوازات اللي عن حب نسبة الطلاق زادت فيها
تحياتي واشكرك

Bent Men ElZman Da !! said...

كريمة سندي

وفى الحالات دى يا كريمه بيبقى الست هى الخاسر الاول فى الموضوع كله
عشان كل مجمتعتنا العربيه الرجل فيها فى المركز الاول وبعده اى حاجه

شكرا ليكى على رأيك :))

Bent Men ElZman Da !! said...

ابراهيم رزق

طيب يا استاذ ابراهيم حضرتك شاكك انها مش صح فى انها اكتر من كده والا اقل
اصل انا حاسه انها كتير عن كده مش عارفه ليه
بس اهم جمله قولتها ان الطلاق يهون فى سبيل ان الواحده مش تعيش حياه تكرهها ومش راضيه بيها

شكرا ليك جدا على رأيك :)

Bent Men ElZman Da !! said...

دعاء مواجهات

فى اللى احنا فيه ده ربنا يعينا كلنا :D
شكرا ليكى يا دعاء
نورتينى بزيارتك :))

Bent Men ElZman Da !! said...

مصطفى سيف

انت قولت حاجه مهمه بردو
موضوع المسئوليه
فى شباب وبنات كتير مش بيقدرو يتحملوا المسئوليه لانها حاجه مش سهله
الحكايه مش حب وبس
الحكايه بتبقى اختلافات فى حاجات كتير الطرفين مش قادرين يستحملوها
بس الموضوع فى مين بيكون الخسران فى الاخر

شكرا ليك جدا يا دكتور على رأيك :)

reemaas said...

مش عارفه ليه حاسة انى هتوجع بسبب الحمله دىى
ههههههههههههههه

انا عارفه كويس احساس الحاله التانيه على فكرة
احساس رخم

Bent Men ElZman Da !! said...

reemaas

الغصب اصلا فى الحالات دى بيبقى رخم اوووى
ميرسى ليكى يا قمر :))

Casper said...

بوست أكثر من رائع ووجهة نظر منطقية جدا

=========

رأيي الشخصي إن الانسان ميستعجلش أبدا في موضوع الزواج عشان ميرجعش يندم بعدين وكده كده النصيب هييجي في وقته

خالص تقديري لفكرك وقلمك

faroukfahmy said...

ازدادت نسبة الطلاق المبكر حتى تتماثل مع نسبة المعاش المبكر مفيش حد احسن من حد
الظاهر الشباب يتمنى ان يحمل عبارة مطلق عشان كده بيسرع بالزواج لكى يسرع بالطلاق
كان زمان كنا لا نطيق ان نسمع كلمة طلاق وكان الزوجان يتحلون بالصبر لحل مشاكلهم....موضوع حيوى يستحق الدراسة من علماء النفس والاجتماع
اعجبتنى خواطرك ومعها طلبت ان اكون من المشاركين لمتابعينك فاقبلى اشتراكى وساكون دائما فى تواصل مع ما تسطرين

د/دودى said...

لو الاب ده عنده ولد و قاله انا هدفى الماجستير كان زمانه مات من الفرحه على ابنه محب العلم انما لو بنت طلبتها تبقى قليله الادب و صغيره العقل و متعرفش مصلحتها ....

انا مثلا اهلى اترددوا فى دخولى كليه الطب عشان هضيع 7 سنين من غير جواز ده غير الماجستير اللى لابد منه فى الطب ...و انتصرت اراده العلم و حطوا صباعهم فى عين اى حد سألنى هتخطب امتى

شمس النهار said...

لهفت كل ام ان بنتها تتجوز
ونظرت المجتمع للبنت اللي مش بتتجوز
واعتقاد الامهات ان الجواز هو اول واخر المطاف
وحاجات كتير غلط في مجتمعنا
هي اللي بتتسبب في نسبة الطلاق العالية دي

Bent Men ElZman Da !! said...

Casper

معاك حق
الصح هيجى فى وقته
انما لو استعجلنا فى الغالب الاختيار بيبقى مش صح

ميرسى ليك على رأيك وزيارتك ونورتنى :))

Bent Men ElZman Da !! said...

faroukfahmy58

لا الشباب دلوقتى ماعندهمش قدره على التحمل زى الناس زمان
دلوقتى عن اول مشكله احنا هنطلق
مفيش صبر ولا تحمل ولا نظره لكل العواقب اللى هتبقى بعد الطلاق وخصوصا على الزوجه اللى بتكون اكثر حرصا فى حكايه الطلاق دى عشان هى المتضرر الاول

اكيد اقبل اشتراكك وليا الشرف اكيد
ومبسوطه اوى بزيارتك :))

Bent Men ElZman Da !! said...

د/دودى

الولد فى اى موقف هو الكسبان
لو فى الدراسه يبقى هو من حقه يدرس الوقت اللى عايزه ويسقط وينجح زى ما يحب
ولو فى وقت الجواز من حقه انه يتاخر فى السن زى ما يحب حتى لو 50 سنه هيتجوز بردو
انما البنت لا

والله اهلك بجد تفكيرهم كويس
عشان فضلوكى انتى عن نظره الناس

ميرسى ليكى اوى ونورتينى :))

Bent Men ElZman Da !! said...

شمس النهار

ماهو ماحدش بيفكر فى كل ده بقى الا لما بيحصل بالفعل
وبتبقى فى النهايه بردو النتايج بتعود على البنت
يعنى فى الاول والاخر هى الخسرانه
والاهل مش بيفكروا فى ده

ميرسى ليكى اوى نورتينى :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment