25 June 2011

25/6.... فيلم رعب !!!

.



الثانويه العامه تعتبر من اهم افلام الرعب اللى بتتعرض كل سنه 
فى التوقيت ده
فعلا فيلم رعب
اى بيت فيه طالب من طلاب الثانويه العامه
بيتعمل عليه حجر صحى وعقلى
لا حد يدخل ولا يخرج
وتبدأ الواصله
الواد والا البت الغلابه بتوع الثانويه العامه
قاعد ع الكتاب مش بيقوموا
واحتمال كبير جدا انهم يعاملوه معامله المخده ويناموا عليه ساعتين تلاته
عشان لما يصحوا يكملوا مذاكره على طول ومايضيعوش وقت
ده غير موقف الاهل من الموضوع ده
لو يطولوا يلزقوا وش العيال فى الكتاب هيعملوها
طول ما هما ماشيين قدامهم
ذاكر كويس
ذاكرى يا حبيبتى
اومال احنا بنعمل ايه؟ بلعب ماتش شطرنج انا والكتاب مثلا؟؟
والا اكونش بعمل قراطيس بورق الملازم؟؟

كله كوم
والدروس فى فتره الامتحانات كوم تانى خالص
فى فتره الامتحانات الدروس بيبقى ليها ميزانيه تعادل ميزانيه الدروس كلها طول السنه
المدرسين بيستغلوا الموضوع ده بطريقه رهيبه
من دروس لملازم لمحاضرات لحاجات كتير اوى
المهم انها تزود الفلوس وخلاص



نيجى لاهم جزء فى فيلم الرعب ده
واللى هو التنسيق
التنسيق ده كارثه لوحده
بيضيع اى امل عند الطالب فى انه يكون اللى هو عايزه
ماهى يا تصيب يا تخيب
يا تدخل الكليه اللى انت عايزها
ياما هتدخل كليه بتكرهها ومش هتقدر تحقق اللى بتتمناه
وهنا هتدخل فى دوامه طب انا ممكن اعمل ايه فى حياتى 
يفيدنى بدل الكليه ادام مش بحبها

من وقت ما خلصت ثانويه عامه
وكل قرايبى واخوات اى حد اعرفه خلصها
وانا مش بتابع اصلا اى اخبار عنها
عشان بس مش يجيلى احباط من منظر العيال الغلابه 
اللى بيخرجوا يقطعوا فى شعرهم من اللجان دول

دايما أسال نفسى
ليه لما كان بيجى امتحان وحش ماكنتش بخرج اعيط؟؟
كنت ممكن اول ما اشوف الورقه والامتحان
احس انه صعب والا فى سؤال مش عارفاه
تبدأ عينى كده تستعد لاستقبال الشلالات
واتراجع عن الفكره منعا لاحداث سيول داخل اللجان
انما لما اخرج واخلص امتحانات ماكنتش بعيط ابدا
كنت بتنح بس

كل ما يجى فى دماغى موضوع الثانويه العامه ده
افتكر موقف
مره قابلتنى صاحبه اختى اول ما دخلوا ثانوى وكنت انا لسه داخله كليه
بتسألنى انتى دخلتى كليه ايه
قولتلها حقوق
بتقولى ايه ده بجد؟؟ يابختك ياريت ادخل حقوق
(الكلام ده كان من اكتر من 5 سنين .!)
انا تنحتلها
انتى بجد شايفاها حاجه كويسه؟
دى يابنتى من كليات الفاشلين اللى زيى
اللى كانوا بيموتوا نفسهم فى الثانويه العامه وبردو مش بيجيبوا مجموع وماتسالنيش ازاى
رغم ان كل مؤشرات الامتحانات التمهيديه فى الدروس كانت بتقول عكس اللى حصل
بس البنت مش حاطه امل على الثانويه العامه ومجموعها من اصله
واقصى احلامها انها تدخل حقوق
والله لو كانت تقولى نبدل كنت بدلت معاها
تاخد هى حبيتشى المبجله حقوق
وانا اخد الموقره الثانويه العامه
يمكن اجيب مجموع وادخل الكليه اللى كنت عايزاها بقى

برغم الرعب اللى كنت عايشاه فى الثانويه العامه
احترماً للشئ المسمى المجموع والتنسيق
الا انى بحبها 
ولو قدرت ارجع اذاكرها تانى هذاكرها

12 comments

شمس النهار said...

الحمد لله في الثانوية العامة ايام بناتي عمري ماعملت طوارئ خالص ولا ارهاب وكنت عادي جدا
وكانت صحتهم الجسديه والنفسية زي الفل
اللي بيعمل التوتر الاهل مش الطلبه والطالب او الطالبه من كتر مااهله بيضغطوا عليه بيحس ان الكون كله فوق دماغه وانه لو سقط البيت هينهار

مصطفى سيف said...

كل يوم بيفوت بنفتكره بابتسامة وامنية انه يرجع بالرغم لما نكون عايشينه بنقول امتى يعدي
الثانوية صحيح شدة اعصاب وقلق وتوتر بس برضه فيها احساس ان عليك مسئولية جامدة تجاه نفسك وعيلتك ولازم تثبت انك قدها في اول اختبار للمسئولية
تحياتي

Bent Men ElZaman Da !! said...

شمس النهار

معاكى حق
الاهل هما اللى بيضغطوا على اولادهم
وبيحسسوهم ان الثانويه العامه دى كائن خرافى عمرك ما هتقدر تتغلب عليه
وهى فى النهايه مرحله دراسه زى اى مرحله

ميرسى ليكى اوى :))

Bent Men ElZaman Da !! said...

مصطفى سيف

فعلا كل حاجه بتعدى علينا بتوحشنا
حتى لو فى وقتها مش كنا عايزينها

شكرا ليك جدا :))

ابراهيم رزق said...

اولا رعب الثانوية العامة ده من الاهالى
مما مش عارفين ان العملية قدرات

موضوع كلية الحقوق ده غايظنى ليه كلية الحقوق فى المراكز الاخيرة فى التنسيق لا ياتى بعدها سوى خدمة اجتماعية و زمان كان دار علوم مع ان فى الخمسينات و الاربعينات كانت من كليات القمة لانها كانت بتخرج رجال الدولة

تحياتى

Bent Men ElZaman Da !! said...

ابراهيم رزق

الاهالى بيبقوا خايفين ولادهم يدخلوا كليات مالهاش مستقبل ودى بقت كتيره اوى
بس فعلا الموضوع قدرات
كل واحد وحسب قدره استيعابه وفهمه وذكائه

كليه الحقوق وغيرها من الكليات الصعبه زى الزراعه مثلا رغم انهم بيدرسوا معظم اللى بيدرس فى كليه علوم بس بياخدوا من 60% تقريبا والمفروض انهم بيطلعوا خرجين البلد محتاجاهم اوى
بس مش واخدين حقهم

شكرا ليك على رأيك :)

كريمة سندي said...

والله أصبح مسلسل رعب وليس فيلم لأنه كل سنة بيتكرر بسخافته من الأسئلة الصعبة

Bent Men ElZaman Da !! said...

كريمة سندي

ومش بس الاسئله الصعبه
كمان الضغط النفسى

ميرسى ليكى اوى:))

Noha Saleh said...

الثانوية العامة دى قلق فى كل بيت وقلق تتوارثه الاجيال
بس اللى بيعمل القلق ده ممكن صعوبة المناهج اللى رغم صعوبتها مش بتفيد الطالب بعد كده لانه بيحفظها بس علشان يمتحنها وينساها بعد كده

reemaas said...

رغم انها كانت شدة اعصاب بس نفسى ترجع تانى على فكرة

اعتقد ان اصعب حاجة فى فيلم الرعب هو مكتب التنسيق نفسى نمشى بطريقه برا وكل كليه تحدد امتحانات معينة يخوضها الطلاب اللى عاوزين يدخلوها

Bent Men ElZaman Da !! said...

Noha Saleh

لا وكمان يا نهى اللى بيتاخد فى الثانويه العامه نادراااااً لما بيفيد فى مواد الكليه كمان
يعنى مجرد حاجات بنحفظها عشان نمتحنها وخلاص

ميرسى ليكى يا جميله على رأيك ونورتينى :))

Bent Men ElZaman Da !! said...

reemaas

اه جامده اوى فكره الكليات بره دى
ياريت يبقى عندنا كده
كانوا وفروا علينا وعلى نفسهم كتير
التنسيق ده مأساه

ميرسى يا قمر نورتينى :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget