02 June 2011

2/6

.



كنت دايما استغرب ان فى ناس يبقى فعلا معاهم كل حاجه ومضايقين
واقول انا لو مكانهم اكيد عمرى ما هابقى زعلانه
بس مع الوقت بدأت احس انى غلطانه
وبقيت احاول افهم هما ليه الناس دى كده
يعنى ايه الواحد يبقى عنده كل حاجه ممكن يكون بيبحبها
او عايزها او نفسه فيها
بس بردو فى حاجه لسه مش موجوده
فى حته لسه ناقصاه
مش شرط شئ مادى
بس ممكن اكتر يبقى شئ معنوى
هو ده طمع؟
والا ده عدم رضا؟
الواحد لسه عايز اكتر من اللى عنده
واللى عنده مش مكفيه ولا مالى عينه
هى دى طبيعه بشريه فى اى واحد فينا؟
كل ما يوصل لحاجه بيبقى عايز اللى بعدها؟
يعنى ده طمع فى الطبيعه البشريه نفسها
والا ده طمع من شخصيات معينه مش بيملى عينهم حاجه؟

احلى حاجه بجد
ان الواحد يبقى راضى بكل حاجه حواليه
راضى عن نفسه
راضى عن الشخصيات اللى بيقابلها فى حياته
راضى عن ظروف الحياه اللى بيمر بيها
وكمان يكون متصالح مع نفسه
بس ياترى هو كل واحد فينا ممكن يوصل للاحساس ده بسهوله؟؟؟

6 comments

(ست* جنى* الحسن) said...

سلامو عليكو
عندك حق فعلا فى ناس بيبقى عندها كل حاجة بس عشان اتحرمت او اتمنعت من حاجة غصب عنها دايما بتفكر فيها وبتفضل فكره انها لو كانت نالتها كان كل شىء اتغير
لكن ده اكبر غلط لان اللى يريده ربنا هو افضل شىء ممكن يحصل للانسان

انى احبك فى الله

Bent Men ElZman Da !! said...

وعليكم السلام ورحمه الله وبركاته

فعلا ممكن الحرمان يخلق جوه الواحد طمع او عدم اكتفاء باللى معاه
المشكله ان مش سهله حكايه اننا نرضى بكل حاجه بمنتهى البساطه كده
يمكن طبيعه فينا مثلا

وانا كمان بحبك فى الله اكيد :))
نورتينى بجد :))

فتــافيت (رحاب الخضري) said...

مش اي نفس ممكن تكون راضية
الرضا ده سر سعادة البشر.. ومعظم الناس مش سعيدة
بالنسبة لكام واحد سعيد؟
او كام واحد راضي؟... مش كتير خالص
لان الطمع صفة بشرية ثابتة

ربنا ينور طريقنا بالايمان
ويملى قلوبنا بالرضا والنور

Unknown said...

هي طبيعة بشرية عموما :)
يعني كل الناس بتحس بدة
الرضا بييجي من اقتناعنا من إن حياتنا اتخلقت لنا احنا بس
يعني كل واحد بصفاته و طبيعته اللي اتخلق بيها مستحيل يعرف يعيش حياة حد تاني غير نفسه :)
فاهماني ؟؟
صباحك ورد
:l:

Bent Men ElZman Da !! said...

فتافيت

عاجبتنى جمله الرضا سر سعاده البشر
فعلا لو النفس راضيه مش هتفرق اى حاجه تانيه
يااارب يملى قلوبنا بالرضا
منورانى يا رحاب بجد :))

Bent Men ElZman Da !! said...

قهوة بالفانيليا - شيماء علي

فعلا صعب حد يعيش حياه تانى
لان ربنا خلق حياه كل واحد على اد قدراته
ومع ذلك بردو بنبص على اللى مع غيرنا
نوع من انواع الطمع البشرى
صباحك فل
مبسوطه اوى يا شيماءانك شرفتينى بزيارتك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment