09 June 2011

9/6....احنا اتخمينا يا رجاله :D

.


احنا اتخمينا يا رجاله
ايوه يا جدعان احنا اتكروتنا
ازاى الناس دى تستهبلنا
اهو عشان كده كانوا بيقولوا علينا هفأ وعيال سيس

لما يقولولنا ان الارض كرويه وفى الاخر تطلع لا كرويه ولا ينسون
ونكتشف بعد
عناء ان الارض بيضاويه
يبقى احنا اتخمينا

لما يقولولنا ان جو مصر دافئ ممطر شتاءا وحار جاف صيفا
ونكتشف بعد كده
ان الشتا برد بس بيستهبل حبتين
والصيف بيبقى حار جدا يكاد ان الناس قربت تمشى بدوش فوق راسها
وقريبا اوى فصول السنه هتبقى
صيف على استحياء.. صيف جدا .. صيف اوى .. صيف اخر حاجه
لان باقى الفصول غير معلومه الهويه
يبقى احنا اتخمينا

لما بردو يقولولنا ان الكواكب عددها 9
ويكتشفوا بقدره قادر بعد كده ان الكواكب بقوا 11
يبقى احنا اتخمينا

يبقى بزمتكم احنا اتكروتنا فى المدارس والا لا
بيقولولنا معلومات غلط
ومطلوب مننا اننا نعرفها ونحفظها ونمتحنها ونجاوبها عشان ننجح
ولما
نكبر ونبقى اد الحيطه كده
يجوا يقولولنا لا معلش دى المعلومات طلعت غلط
العلم بيتطور بقى
طب واحنا ذنبنا ايه اننا نعرف معلومات غلط

يبقى هما كده كانوا بيستهيفونا
وانا من موقعى هذا بطلب حاجه من اتنين
ده بما انهم يعنى كانوا بيعاملونا على اننا عيال هبله
ياما يدونى فرق الدرجات بتاعه زمان دلوقتى زياده على تقدير الكليه
(حفظا لماء الوجه بس بدل مقبول اللى منوره الشهاده بتاعتى دى)
ياما تدونى حقى ناشف وتسفرونى اقضى اجازتى فى جزر القمر
ايوه ما انا م
ش هتنازل عن حقى يعنى
اما عجايب



كل واحد فينا لما بيخلص تعليم بيبقى عايزله تعليم تانى
لان للاسف شهادته مهما كانت مستواها مش بتكفى
وبتفتقر لحاجات كتير اوى بتكون مهمه فى مجال الشغل فيما بعد
ايا كان نوع الشغل ده ايه
بس الاهل لما بيعلموا اولادهم عشان يكبروا وياخدوا شهاده ويشتغلوا ويريحوهم شويه
بيتفاجوا انهم محتاجين يصرفوا عليهم تانى كورسات وحاجات كتير
عشان يقدروا يوصلوا لمستوى كويس فى شغل لمستقبلهم

بيتهيألى ان التعليم من اهم واكبر المشاكل فى بلدنا من زمان
ومن الحاجات اللى قدامنا سنين طويله اوى عقبال ما نقدر نصلح فيها
واللى خلانا بالرجعيه دى هو التعليم
نفسى فى اللى جاى التعليم يكون احسن
عشان خاطر العيال الغلابه اللى لسه بيدرسوا دول
يمكن يكون فى امل منهم

8 comments

Anonymous said...

ادامنا سنين على ما نعدل التعليم؟ هو انا ليه حساكي يائسة وانتي بتقوليها؟؟
لا لا لا .. تخيلي كده لو مسكنا الملف ده لزويل مثلا الحال هيبقى ايه؟
ومصر هتبقى ايه؟
أملك كبير في ربنا يا بنوتة الدنيا تبقى احلى ولونها بمبي بلون مدونتك :)

مها ميهوووو

Bent Men ElZman Da !! said...

بالعكس انا مش يائسه
بس اصلا كل الطلبه اتعودوا على نظام التعليم الغريب اللى كانوا بيمروا بيه طول سنين دراستهم
هيبقى صعب ان دماغهم تتغير ويتعودوا على اسلوب جديد كمان
ماينفعناش زويل فى القصه دى والنبى بقى؟ :D
ان شاء الله كله هيبقى بمبى احلى من المدونه دى كمان :))
ميرسى ليكى يا مها ومبسوطه بتعليقك اوى
منورانى يا قمر

كريمة سندي said...

بس كانت أحلى خمة تحياتي

Bent Men ElZman Da !! said...

هههههههه
انتى اول حد اشوفه يقول كده
منورانى يا قمر

فتــافيت (رحاب الخضري) said...

هههههههههههه صح والله
ايه ده... كل دي معلومات غلط؟؟
لا انا فاكرة لما كنت في ابتدائي كان فيه درس اسمه عام 2000... وايه بقى يحسسك اننا هانطلع نعيش في المريخ في السنة دي.. وجت الفين ولا حصل حاجة ولا يحزنون... مع ان وانا بقرا الدرس ده.. ماكنتش متخيلة اني هاعيش في كل الهنا ده... وقد كان ماعشتش :))

منظومة التعليم محتاجة تتفور
ونجيب منظومة جديدة... عشان نقدر نظبط البلد

Bent Men ElZman Da !! said...

اهو انا اول مره افتكر منك حكايه درس سنه 2000 ده
بس هما عمتا كانوا متخيلين ان فى الالفيه الجديده الدنيا هتبقى حاجه تانيه خالص
وبعدين خدوا على قفاهم واحنا خدنا معاهم :D

فعلا لازم تتفور
لان مفيش حاجه فيها كويسه اصلا
ميرسى اوى يا رحاب على تعليقك
نورتى المدونه :))

reemaas said...

خدتيها من على طرف لسانى يابنوتة

والله كنت هكتب عن البرنامج ده لانه مستفذنى جداااااااا ومحسسنى انهم بينجزوا
لما نقلوا امريكان جوت تالينت كانت كويسه بس مش كل حاجة كوبى كده ماينفعش

Bent Men ElZman Da !! said...

انتى بتتكلمى عن البوست اللى بعد كده :))
هو برنامج مستفز فعلا
الواحد ممكن يستوعبه فى النسخه الاجنبى منه لانهم غيرنا
بس انه يطبق عندنا
دى اللى مستفزه اوى
ميرسى ليكى يا قمر

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment