31 July 2011

رمـــــضـــــــــان كـــــريـــــــــــــم

.
38 التعليقات



السنادى بجد مبسوطه بشهر رمضان اوى
مختلف عن اى شهر فى اى سنه قبل كده
حياتى كلها مختلفه
ويارب تبقى مختلفه للاحسن ان شاء الله
ويااارب يبقى للاحسن لينا كلنا
كل سنه وانتم طيبين
وكل سنه والامه الاسلاميه بخير يااارب
اللهم تقبل منا صالح الاعمال
اللهم اعنا على صيامه وقيامه
اللهم اعنا على ذكرك وشكرك وحسن عبادتك
اللهم اجعلنا من عتقاء شهر رمضان

رمضان كريم :)





حاجه على الهامش
 
فى حمله للتدوين اليومى فى شهر اغسطس
اقترحتها رضوى اشرف
صاحبه مدونه قصاصات
وان شاء الله هبدأ فيها من بكره
مش عارفه هادون كل يوم زى الشهر اللى فات والا لا
بس ان شاء الله هحاول على اد ما اقدر
واتمنى ان ناس كتير تشارك فيها زى الحمله اللى فاتت
وكل سنه وانتوا طيبين كمان مره :))


readmore »»

28 July 2011

غالى يا رمضان :D

.
41 التعليقات








الاول كل سنه وانتم طيبين بمناسبه قرب شهر رمضان الكريم
(بلاش المبارك عشان الكلمه دى بقت تعمل حساسيه للناس انا عارفه )

طبعا معروف فى كل بيت مصرى
ان من دلوقتى او حتى قبلها بكتير
ستات البيوت بيبدأو يجهزوا  لرمضان
وتلاقى جميع الاسواق واى سوبر ماركت تقابله فى وشك
مليان ولا كأنهم بيوزعوا الحاجه ببلاش
والواحد بيدخل جوه السوبر ماركت من دول
بيبقى هيداس فى الرجل من كتر ما الناس عماله تزق فى بعضها

انا يمكن كنت بعترض على الحكايه دى زمان
 ليه يعنى نقعد نخزن فى الحاجه
ما احنا ممكن نشترى كل حاجه فى وقتها عادى
وبكده مش هيبقى فى زحمه والاسعار مش هتزيد
بس لان رمضان السنادى فى توقيت جهنمى
واحنا بسم الله ما شاء الله 
مانتشطرش ونهتم بحكايه وقف تغير التوقيت دى
الا لما يكون رمضان هيجى فى عز الصيف
يعنى هنصوم من الساعه 3 ونص الفجر لحد 7 ونص المغرب تانى يوم
بمعدل 15 ساعه فى اليوم صيام
فا اى ست صعب انها تنزل كل يوم فى الحر الرهيب ده تجيب طلباتها
كفايه عليها شغل البيت
والناس كمان اللى بيروحوا اشغالهم
صراحه ربنا يكون فى عونهم

المهم يعنى من واقع متابعتى للموضوع ده
ولفى على كام سوبر ماركت الفتره اللى فاتت
ومن واقع بردو اللى ماما عماله تجيبه بقالها كام يوم وتخزنه ده
لاقيت ان الاسعار غليت بطريقه مش طبيعيه
هو فى الطبيعى دايما الوقت ده وقبل رمضان
الاسعار بتزيد
بس السنادى انا حاسه انها زايده جدا عن قبل كده
جميع مجالات التجاره دلوقتى تقريبا مش ماشيه
غير سوق الاغذيه بس بجميع انواعها
من لحوم بانواعها لمعلبات لاهم حاجه فى رمضان وهو الياميش
اللى كمان زايد السنادى جدااا عن كل سنه
يعنى الموظف المطحون المصرى الطبيعى اللى مرتبه على اده
يدوب يلحق يقضى بالمرتب ده فطار 6 والا 7 ايام فى رمضان
والباقى بقى يقضيها موائد رحمن
اومال الموائد دى اتعملت ليه
ماهى عشان الموظفين المطحونين الغلابه دول

ده يخلي الواحد يسأل
واحنا بلد لسه فى عنق زجاجه الثوره
هو التجار دول بيزودو الاسعار على اساس ايه؟؟
بيزودوها وهما عارفين ان الناس مجبره تشتريها عشان رمضان!!
والاهم بقى
هو الناس اصلا هتكفى الضروريات فى رمضان منين 
فى ظل الاسعار الخرافيه دى ؟!!؟

readmore »»

15 July 2011

مجرد عابره....!!

.
55 التعليقات




عندما انظر لصورنا وما سجلت من لحظات رائعه
أرى فى المقابل كم كنتى منافقه

عندما أتذكر كم كنت أبكى امامك فى اوقات ضعفى
أتذكر فى المقابل كم كنتى كاذبه

عندما أرى تضحياتك الزائفه لى
أرى فى المقابل كم كنتى حاقده

عندما أُذكر نفسى انك صديقتى العزيزه
أٌذكر نفسى فى المقابل كم انا واهمه

حينها
استطيع الفهم
انكى لم تكونى احدى محطات حياتى
بل كنتى بجوار قطار حياتى
 مجرد عابره



readmore »»

08 July 2011

صندوق الذكريات

.
42 التعليقات




ده واجب تدوينى
(حكايه الواجب دى مش عارفه ليه فكرتنى بالمدرسه)
اتبعتلى
من نور صاحبه مدونه بنوته مصريه
ومن كريمه سندى صاحبه مدونه اقصوقصه
ميرسى ليكم انكم افتكرتونى :))

الواحد لما بيفكر يقعد مع نفسه كده ويفتكر ذكرياته
بيحس انه بيفتح باب وراه عالم كبييييير اوى
مش بيتخيل انه عدى عليه كل ده
ولما بيعيش مع ذكرياته
بيحس انها بتتكون تانى حواليه وكأنه بيعيش الموقف نفسه
بيختلف حاجه واحده
تأثير المواقف نفسها
لو كنت مبسوط مش هتبقى مبسوط بنفس القوه
ولو كنت حزين مش هتبقى حزين بنفس الدرجه
بس هيفضل جواك حاجه واحد
الحنين لكل حاجه فاتت كانت حلوه او حتى وحشه

افضل ذكرى

مش عارفه ليه كل ما احاول افتكر ذكرياتى اللى انا مخبياها دى
مش بيجى فى بالى غير الوحش منها
يمكن انا اللى كئيبه ومش واخده بالى
والا متشائمه لا قدر الله
الواحد اصلا مش عايز اكتئاب
خلينى كاتمه فى قلبى وساكته كده
فا مش ناويه اكتب اى ذكرى وحشه
كفايه الحلو دلوقتى

طفولتى

بحب اوووى ايام زمان وانا صغيره
كل حاجه فيها كانت جميله وهاديه
انا كنت رايقه ومفيش فى دماغى حاجه
اخرى اوى افكر هو توم وجيرى هيشتغل الساعه كام
بابا كان مدلعنى جدا
اى حاجه بطلبها انا او اختى بيعملهالى
هى اه اختى الصغيره بس مفتريه عليا حبتين
ماما كانت شديده علينا شويه
بس يمكن لانها كانت المسئول الاول عن تربيتنا
بحكم ان بابا فى شغله يعنى يعنى
بس وقت ما بابا بيكون موجود
ده كان بيبقى حاجه مختلفه تماما
بنقضيها لعب وهزار
وكان بيعرف كويس اوى ازاى يخترعلنا لعب احنا اصلنا مش عارفنها
ولحد دلوقتى بنفتكرها
و فى اغنيه للاطفال كان بيغنيها لينا واحنا صغيرين
مش احنا بس
ده كل اطفال العيله طالعين حافظنها بسببه
لانه كان بيغنيها ليهم كلهم وكان حنين عليهم اوى
وتقريبا مفيش حد يعرف الاغنيه دى الا هو
لان كل ما أقول لحد عليها مش يعرفها اصلا
وانا ان شاء الله ناويه لما اجيب بيبى
هاقعد بردو اغنيله الاغنيه دى
واقوله لو جدو كان موجود كان هيقعد يغنيهالك كتير اوى

يوم خطوبتى
اليوم ده بجد كان فارق معايا اووووى
كنت حاسه ان انا مش انا
واى حد يشوف صوره ليا والا الفيديو بيقولى انتى ازاى عملتى كده
انا بطبعى خجوله جداا وسط الناس 
ومش بحب التركيز والنظر يبقى عليا بالمنظر ده
لكن حاسه ان من سعادتى كنت مختلفه حتى فى اسلوبى
كنت مبسوطه ان ربنا رزقنى بأنسان بيحبنى وبيحافظ عليا
وكنت مبسوطه ومستغربه انى بتخطب للانسان ده تحديدا 
لانه كان ابعد انسان عن تفكيرى
ولحد فتره قريبه ماكنتش مستوعبه اصلا
الحمدالله انى بدأت استوعب والا كان هيتجنن منى ياعينى :D

يوم نتيجه الثانويه العامه 
كان يوم مهم اوى عندى كمان
رغم انه ماكنش مجموعى كبير للدرجه
بس كنت مبسوطه بيه ومبسوطه اكتر ان اهلى مبسوطين بيه
والحمدالله مش ضايقتهم فى حاجه
هو اه مادخلنيش الكليه اللى كنت عايزاها
بس كنت مبسوطه بردو ان هما عاجباهم الكليه دى 
حتى لو مش عاجبانى انا

سلام

لـ بابا
عشان ربتنى كويس
وعشان لو فيا حاجه كويسه اكيد منك
وكمان عشان انت واحشنى اوى
الله يرحمك

اهداء

لكل اصحابى اللى دخلوا حياتى
سواء كانوا لسه موجودين او مش موجودين
علمتونى حاجه
وساعدتونى اعدى حاجات كتير اوى فى حياتى
ماعتقدش انى لو كنت من غيركم
كنت هاعرف اعديها


عتاب

لنفسى
عشان بحس اوقات كتير انى وحشه
وبقصر فى حق ناس كتير حتى نفسى
وللأسف مش بعرف اسامح حد

شكر

لـ أمى
لانها كانت سبب فى تكوين جزء كبير من شخصيتى
لانها كانت جنبى فى كل موقف فى حياتى
لانها ساعدتنى دايماً
ولانى من غيرها ولا حاجه ابداً

كلمه

 لأى حد زعلته او ضايقته
لأى حد قصرت فى حقه بقصد ومن غير قصد
بعتزر وبقول انا أسفه

امرر الواجب لــ

ساره

مها

رحاب

شيرين سامى

والجميله


readmore »»

04 July 2011

Broken !!!

.
34 التعليقات



عندما انظر لما مر من السنوات
اشعر بالاندهاش
كم كنت املك من الغباء
حيث لم أرى حقيقتك
الا الآن !!!

readmore »»

03 July 2011

♥...♥

.
26 التعليقات




 وتبقى وحدك عالمى


readmore »»

01 July 2011

كل شهر وانتوا طيبين

.
20 التعليقات




زى دلوقتى كنت بكتب البوست الجديد عشان انزله فى حمله التدوين اليومى
زعلانه ان الشهر خلص
الشهر ده كان مهم اوى بالنسبه ليا
اول مره اتكلم كتير كده
اول مره اهتم بالمدونه اوى كده
اول مره اتابع مدونات كتيره وجديده عليا كده

مش متخيله ان شهر كامل من التدوين عدى بسرعه
مش استوعبت الفكره فى الاول
انى كل يوم هاكتب بوست
وازاى هاقدر اعملها
بس قبل ما افكر ولان التفكير هيخلينى أياس واتراجع عن الفكره
قررت انى اشترك من غير تفكير

لدلوقتى مستغربه اصلا انى قدرت انزل كل يوم بوست
ومش زهقت
الشهر ده خلانى افكر فى كل تفصيله بتحصلى فى يومى
انى اقدر اتكلم عنها واعبر عنها من وجهه نظرى
وده انا ماكنتش بعمله كتير بالمنظر ده قبل كده

يمكن من كتر التدوينات اللى بتنزل يوميا 
ده ماكنش بيخلينى اشوف كل حاجه
مبسوطه اوى انى عرفت مدونات جديده
بافكار ناس مختلفه
واساليب فى الكتابه مختلفه
وبجد كتير كنت ببقى مبهوره بالتدوينات اللى بشوفها لناس كتير 
من كتر ما هى حلوه
مبسوطه اوى انى لاول مره من اول ما عملت المدونه 
اكون متابعاها اوى كده ومهتمه بيها اوى كده
مبسوطه اوى بكل المدونات اللى عرفتها وكل المدونين اللى زارونى
مبسوطه اكتر انى كنت فى حمله التدوين الشهر ده
واتمنى تحصل السنه الجايه كمان

كل شهر فى التدوين وانتوا طيبين :))

readmore »»