08 July 2011

صندوق الذكريات

.




ده واجب تدوينى
(حكايه الواجب دى مش عارفه ليه فكرتنى بالمدرسه)
اتبعتلى
من نور صاحبه مدونه بنوته مصريه
ومن كريمه سندى صاحبه مدونه اقصوقصه
ميرسى ليكم انكم افتكرتونى :))

الواحد لما بيفكر يقعد مع نفسه كده ويفتكر ذكرياته
بيحس انه بيفتح باب وراه عالم كبييييير اوى
مش بيتخيل انه عدى عليه كل ده
ولما بيعيش مع ذكرياته
بيحس انها بتتكون تانى حواليه وكأنه بيعيش الموقف نفسه
بيختلف حاجه واحده
تأثير المواقف نفسها
لو كنت مبسوط مش هتبقى مبسوط بنفس القوه
ولو كنت حزين مش هتبقى حزين بنفس الدرجه
بس هيفضل جواك حاجه واحد
الحنين لكل حاجه فاتت كانت حلوه او حتى وحشه

افضل ذكرى

مش عارفه ليه كل ما احاول افتكر ذكرياتى اللى انا مخبياها دى
مش بيجى فى بالى غير الوحش منها
يمكن انا اللى كئيبه ومش واخده بالى
والا متشائمه لا قدر الله
الواحد اصلا مش عايز اكتئاب
خلينى كاتمه فى قلبى وساكته كده
فا مش ناويه اكتب اى ذكرى وحشه
كفايه الحلو دلوقتى

طفولتى

بحب اوووى ايام زمان وانا صغيره
كل حاجه فيها كانت جميله وهاديه
انا كنت رايقه ومفيش فى دماغى حاجه
اخرى اوى افكر هو توم وجيرى هيشتغل الساعه كام
بابا كان مدلعنى جدا
اى حاجه بطلبها انا او اختى بيعملهالى
هى اه اختى الصغيره بس مفتريه عليا حبتين
ماما كانت شديده علينا شويه
بس يمكن لانها كانت المسئول الاول عن تربيتنا
بحكم ان بابا فى شغله يعنى يعنى
بس وقت ما بابا بيكون موجود
ده كان بيبقى حاجه مختلفه تماما
بنقضيها لعب وهزار
وكان بيعرف كويس اوى ازاى يخترعلنا لعب احنا اصلنا مش عارفنها
ولحد دلوقتى بنفتكرها
و فى اغنيه للاطفال كان بيغنيها لينا واحنا صغيرين
مش احنا بس
ده كل اطفال العيله طالعين حافظنها بسببه
لانه كان بيغنيها ليهم كلهم وكان حنين عليهم اوى
وتقريبا مفيش حد يعرف الاغنيه دى الا هو
لان كل ما أقول لحد عليها مش يعرفها اصلا
وانا ان شاء الله ناويه لما اجيب بيبى
هاقعد بردو اغنيله الاغنيه دى
واقوله لو جدو كان موجود كان هيقعد يغنيهالك كتير اوى

يوم خطوبتى
اليوم ده بجد كان فارق معايا اووووى
كنت حاسه ان انا مش انا
واى حد يشوف صوره ليا والا الفيديو بيقولى انتى ازاى عملتى كده
انا بطبعى خجوله جداا وسط الناس 
ومش بحب التركيز والنظر يبقى عليا بالمنظر ده
لكن حاسه ان من سعادتى كنت مختلفه حتى فى اسلوبى
كنت مبسوطه ان ربنا رزقنى بأنسان بيحبنى وبيحافظ عليا
وكنت مبسوطه ومستغربه انى بتخطب للانسان ده تحديدا 
لانه كان ابعد انسان عن تفكيرى
ولحد فتره قريبه ماكنتش مستوعبه اصلا
الحمدالله انى بدأت استوعب والا كان هيتجنن منى ياعينى :D

يوم نتيجه الثانويه العامه 
كان يوم مهم اوى عندى كمان
رغم انه ماكنش مجموعى كبير للدرجه
بس كنت مبسوطه بيه ومبسوطه اكتر ان اهلى مبسوطين بيه
والحمدالله مش ضايقتهم فى حاجه
هو اه مادخلنيش الكليه اللى كنت عايزاها
بس كنت مبسوطه بردو ان هما عاجباهم الكليه دى 
حتى لو مش عاجبانى انا

سلام

لـ بابا
عشان ربتنى كويس
وعشان لو فيا حاجه كويسه اكيد منك
وكمان عشان انت واحشنى اوى
الله يرحمك

اهداء

لكل اصحابى اللى دخلوا حياتى
سواء كانوا لسه موجودين او مش موجودين
علمتونى حاجه
وساعدتونى اعدى حاجات كتير اوى فى حياتى
ماعتقدش انى لو كنت من غيركم
كنت هاعرف اعديها


عتاب

لنفسى
عشان بحس اوقات كتير انى وحشه
وبقصر فى حق ناس كتير حتى نفسى
وللأسف مش بعرف اسامح حد

شكر

لـ أمى
لانها كانت سبب فى تكوين جزء كبير من شخصيتى
لانها كانت جنبى فى كل موقف فى حياتى
لانها ساعدتنى دايماً
ولانى من غيرها ولا حاجه ابداً

كلمه

 لأى حد زعلته او ضايقته
لأى حد قصرت فى حقه بقصد ومن غير قصد
بعتزر وبقول انا أسفه

امرر الواجب لــ

ساره

مها

رحاب

شيرين سامى

والجميله


42 comments

Anonymous said...

صباحك غاردينيا
بجد جميلة جداً ولزيزة وطعمة اوي والف الف مبرووك الخطوبة وعقبال الفرحة الكبيرة بس طبعاً تعزميني >>> بتحلم تيجي مصر :)
وربنا يرحم والدك ووالدي ويخليلكم اطيب ام في الدنيا حبيت اوي كلمتك وحسيتها من قلبك وفعلا دا اجمل إحساس اننا نطلب السماح من اي حد نزعله لان الدنيا مش مستاهله الزعل "
؛؛
؛
لروحك عبق الغاردينيا
كانت هنا
reemaas

Bent Men ElZman Da !! said...

ريــــمــــاس

الله يبارك فيكى يا قمر
اكيد معزومه وياريت تيجى ده انتى تنورى مصر والله :)
اكيد بنزعل ناس كده فى حياتنا يمكن من غير ما نقصد
وبجد الموضوع ده بيضايق اوووى
ربنا يرحم امواتنا واموت المسلمين جميعاً اللهم آمين

ميرسى ليكى يا قمر على كلامك الجميل ده
ومنورانى دايما :))

~ISLAM~ said...

الله يرحمه والدك ويرحم كل امواتنا

الف مليون مبروك الخطوبه ربنا يكملك الفرحه بخير وسعاده

متفتكريش اى ذكريات وحشه
كل الذكريات والحاجات الوحشه خليها دوافع
حياتك اكيد هتبقى احلى
والاهم من كل ده علاقتك بربنا

جميل الواجب التدوينى
رجعنى لحاجات كتيره جميله

تحياتى

آرثـر رامبـو said...

صباح الخير أختـي

عندي فضول أعرف الأغنية بتقول أيـه ؟

ذكريات جميلة وهادئـة

وفقك الله في حياتكـ

كريمة سندي said...

صباح الهنا والسعادة ..

مبارك الخطوبة وعقبال الفرح بإذن الله

ذكريات جميلة في حياتك مرت ربنا يسعدك أكتر وأكتر

وميرسي لتقبل الدعوة

والله يرحم الوالد ويسكنه فسيح جناته اللهم آمين

Bent Men ElZman Da !! said...

iــــــsـــــــlـــــــaـــــm

ربنا يرحمنا جميعا
والله يبارك فيك وميرسى على زوقك
دايما الذكريات بترجعنا لحاجات كتير حلوه فى حياتنا
حاول بقى تعمل الواجب ده انت كمان بقى
عشان بجد بيفكر الواحد بحاجات حلوه اوى

منورنى يا اسلام :))

Bent Men ElZman Da !! said...

آرثـر رامبـو

صباح النور :)
الاغنيه كانت اسمها صندوق اللعب
بيقول ان فيها كذا لعبه وكل لعبه بقى بتعمل ايه
تعرفها؟؟

نورتنى وميرسى ليك على زوقك :))

Bent Men ElZman Da !! said...

كريمة سندي

صباح الجمال :))
الله يبارك فيكى
انا ماقدرش اتاخر عن دعوتك اكيد :)

ميرسى ليكى جدا على زوقك ومنورانى دايما

شهرزاد المصرية said...

ألله يرحم والدك و يخللى لك
والدتك و ألف مبروك على الخطوبة
عقبال الجواز إن شاء ألله

Anonymous said...

جميلة

Anonymous said...

انت مش كئيبه و لا حاجه لو كنت متشاءمه كان زمان البوست طلع شكله مختلف لكن كلنا بنمر بذكريات و أوقات سيئه بس مش لازم نقف عندها كتير, ربنا يخليلك مامتك و يسعدها بيكي و يسعدك بيها.
أنا بشكرك أويييي انك مررتيلي الواجب و ان شاء الله جداً
شيرين امي

الاحلام said...

ادام الله عليكى النعم وحفظكى من كل سوء
ذكريات جميله لا تنسى حتى وان كان فيها جروح فهى دائما تكون ذكريات جميله
دمتى بخير تقبلى تحياتى الاحـــلام

مصطفى سيف الدين said...

ربنا يهنيكي ويسعدك دايما ويباركلك في الخطوبة ويتمم بخير ان شاء الله
جميل صندوقك علشان جواه قلب طيب
ربنا يهنيكي دايما
تحياتي

Bent Men ElZman Da !! said...

شهرزاد المصرية

ربنا يرحمنا جميعاً
ميرسى ليكى اوووى على زوقك يا جميله
ونورتينى :))

Bent Men ElZman Da !! said...

Anonymous

ميرسى ليك :)

Bent Men ElZman Da !! said...

Anonymous

هو الطبيعى يا شيرين ان الواحد بتمر عليه ذكريات وحشه كتير الحياه كده
بس المفروض اننا نعديها ومش نقف عندها عشان مش يحصلنا اكتئاب فعلا
ميرسى ليكى يا قمر على زوقك ربنا يخليكى
ومستنيه اشوف ذكرياتك قريب بقى
نورتينى يا شيرين :))

Bent Men ElZman Da !! said...

الاحلام

ميرسى ليك جداا على زوقك
وربنا يوفقك انت كمان ان شاء الله
نورتينى بزيارتك :))

Bent Men ElZman Da !! said...

مصطفى سيف

ربنا يبارك فيك يا مصطفى
ميرسى ليك جدا على زوقك
منورنى دايما بوجودك :))

ابراهيم رزق said...

رحم الله والدك و ادخله فسيح جناته
ربنا يخلى ليكى والدتك و تفرح بيكى

جميلة ذكرياتك و بسيطة و هادئة

مبروك على الخطوبة و ربنا يتمم بخير بس ابقى اعزمينا

تحياتى

Anonymous said...

دندوووووووووون
كلامك سكر زيادة.. اسمحيلي أشكرك عشان مررتيهولي
وما تزعليش مني لو ما قدرتش اعمل الواجب اللي عليا

واجبات التدوين دي او زي ما كنا بنسميها زمان: التاج :) مرحلة عدت عليا وماحبتش أكمل فيها
لذا بكون في قمة الخجل لما بعتذر عنها

معلش يا دودو.. ما تزعليش مني :(

*******************

مها ميهوووو

reemaas said...

نفس اللى حصلى برده افتكرت الذكريات الوحشة مش عارفه اى ده يا بنتى


ذكرياتك حلوة كتييييييييير

Bent Men ElZman Da !! said...

ابراهيم رزق

ربنا يخليك
والله يبارك فيك عقبال ما تشوف ساليناز عروسه ان شاء الله :))
اكيد معزومين طبعا ودى محتاجه كلام

ميرسى ليك جدااا على زوقك
ونورتنى :))

Bent Men ElZman Da !! said...

أحسن تـستاهـل

ميهوووووووو
والله انتى اللى دمك زى العسل
انا بس مررتلك الواجب ده
عشان بحب طريقه كلامك وهزارك
بس ولا يهمك يا حبيبتى من غير كسوف ولا حاجه :))
ومش زعلانه منك طبعا ده انتى عسل والله

ميرسى ليكى يا مها

Bent Men ElZman Da !! said...

reemaas

الحمدالله دى مش كئابه منى عشان بدأت اخاف على نفسك
هو تقريبا يا نور عشان الحاجات الوحشه اللى بتعلم فينا اكتر
انتى احلى يا قمر
ميرسى ليكى انك مررتيلى الواجب ده
ومنورانى دايما :))

آخر العنقــــــود said...

الله يرحم والدك وان شاء الله يكون من اهل الجنة وكل من تحبين

والف مبروك الخطوبة.. ربنا يتمم لك على خير ان شاء الله ويسعدك دنيا واخرة

دمتِ بسعادة

سواح في ملك اللــــــــــــــــــه- said...

ندعوا اله لكي ان يكون القادم افضل

مدونتك جميلة

تحيتي

Bent Men ElZman Da !! said...

آخر العنقــــــود

ربنا يخليكى يا قمر
وميرسى ليكى جدا على زوقك
نورتينى :))

Bent Men ElZman Da !! said...

سواح في ملك اللـــــه

ميرسى ليك جداا
وشرفتنى بزيارتك :))

NaiRa said...

اكتر حاجه عجبتنى كلامك عن بابا نايس يا دوده

زهرة الضحا said...

ربنا يرحم والدك و يرزقه احنا و اياه الفردوس الاعلي بإذن الله

و مبروك يا قمر علي خطوبتك و ربنا يتمملك علي خير

Bent Men ElZman Da !! said...

NaiRa

هو كان احلى حاجه فى كل حاجه يا نيره

Bent Men ElZman Da !! said...

زهرة الضحا

ميرسى ليكى يا قمر على زوقك
ربنا يخليكى
منورانى دايما :))

سَارةٌ said...

عاااااا .. بِتدَّبسيني ليه يا دُونَّه؟
ده انا كُنت فَكراكي طيِّبه :DD
..
هَحاول بِجد أرد عالتَّاج مع اني حاولتْ
ومعرفتشْ أكتب فِيه حاجه :P
..
أنا عَجبني البوست ده ورغيك وكله على فكره
والسُّونج كمان مَكنتش سِمعتها قبل كده ..:):)
..
شُكراً خالصْ عالتَّاج بقى ..:):)

aendbad said...

واجب جميل واجابات اجمل
تقبلي مروري الاول وليس الاخير باذن الله
تقديري وتحياتي

Bent Men ElZman Da !! said...

حَـبآيـۃْ.بـטּـدۉڷ

هههههههههه
شوفتى طلعت شريره ازاى :D
اكتبى اى حاجه انا راضيه :P
ميرسى ليكى انتى يا قمر
منورانى يا ساره دايما والله :))

Bent Men ElZman Da !! said...

aendbad

ميرسى ليك جداا
ونورتنى بزيارتك واتمنى تتكرر تانى :))

Emtiaz Zourob said...

صندوق ذكرياتك عامر دايما ,, والحلو انك ذكرتي الذكريات الحلوة .. انا كمان طفولتي كانت سعيدة زيك وخطبتي لزوجي الحالي كان خبر الموسم في منطقتنا لكل معارفنا بسبب الاختلاف الكلي بيني وبين زوجي من ناحية الأراء والفكر .. لكن ربنا ستر واستمرت الخطوبة والزواج حتى الآن رغم الاختلاف الكبير بيننا ..

عموما مبارك الخطوبة وربنا يتمم لك على خير
ويرحم الوالد ويجعل مثواه الفردوس الاعلى من الجنة ..

Bent Men ElZman Da !! said...

وجع البنفسج

بحس والله انا الاختلاف ده بيولد نقط نقاش كتير
اصل لو كل حاجه متشابهين فيها حاسه ان هيحصل ملل مع الوقت مش هينفع اكون متجوزه خيالى اللى شبهى فى كل حاجه مثلا
ربنا يوفقك فى حياتك الزوجيه دايما يااارب
وميرسى ليكى جدا على زوقك
نورتينى :))

نيللي علي said...

حلوه اوى صندوق ذكرياتك ..احسسنى با بالدفى والامان...ربنا يسعد ايامك كلها يارب امين

Bent Men ElZman Da !! said...

نيللى

ميرسى ليكى يا قمر على زوقك
وربنا يسعدك يارب انتى كمان دايما
شرفتينى بزيارتك :))

Sara said...

انتي بجد انسانة جميلة أوي يا بنوتة =)

عجبني جدًا كلامك

و ربنا يديم عليكي السعادة دايمًا

Bent Men ElZman Da !! said...

Sara

انتى الاجمل يا قمر
ميرسى بجد اووى على زوقك
نورتينى وسعيده بتعليقك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment