16 August 2011

(2) احلى ما فى رمضان

.




يمكن رمضان بيبقى سبب كبير اوى
فى ان الناس تبدأ تسأل على بعدها
ولان كل واحد فينا بيبقى داخل على رمضان بنيه صافيه
وامنيه جواه انه يخرج من الشهر ده واخد ثواب كبير
وشايل كل حاجه وحشه من جواه
وربنا يتقبل توبته عن اى حاجه عملها تغضبه سبحانه وتعالى

زى ما بنبدأ بدايه جديده من جوانا
بنحاول نبدأ بدايه جديده مع كل اللى حوالينا
سواء اصحاب او قرايب او زمايل او جيران
او حتى ناس لسه معرفتنا بيهم جديده وسطحيه
بناخد دايما رمضان والتهنئه بيه وسيله عشان نكلم بعض

قبل رمضان بكام يوم
بتبدا اتصالاتنا بكل الناس اللى نعرفهم عشان نقولهم كل سنه وهما طيبين
ولو مفيش مكالمات بيبقى فى رسايل
بجد بتبقى حاجه كويسه عشان بتخلينا نقرب من بعض
ولو حد شايل جواه حاجه من ناحيه اى شخص تانى
هيقدر يمسحها نهائى من جواه
لو زعلان من حد وانت بدأت تكلمه هتلاقى انه نسى الزعل ده اول ما قولتله كل سنه وانت طيب
كل واحد فينا بتبقى نفسيته مستعده انه يسامح التانى

الحاجه التانيه كمان
ان فى رمضان بتكتر الزيارات العائليه
ويمكن دى من اهم واحلى النقط اللى فى رمضان
صله الرحم مذكوره فى القرآن ومن تعاليم ديَنا الاساسيه
وبما ان احنا بقينا فى وقت كل حاجه فيه سريعه
وماحدش عنده وقت للزيارات واشغالنا واخدانا من كل اللى حوالينا
رمضان بيكون فرصه للزيارات دى
بيقرب الاهالى من بعضهم وبيعمل بينهم اُلفه جميله اوى
الواحد فى وسط لمه العيله دى
بيحس انه مبسوط من جواه وبيضحك من غير اى حاجه
دايما بنتمنى ان كل الايام تبقى رمضان عشان كده
عشان رمضان دايما بيجمع كل الناس
ياريت نفضل كده فى رمضان وفى غير رمضان

*************************************

دعاء النهارده

اللهم لا تؤاخذنى فيه بالثغرات
واقلنى فيه من الخطايا والهفوات
ولا تجعلنى فيه عرضا للبلايا والافات
بعزتك يا عز المسلمين

*****

تفسير النهارده

قال تعالى :
 (( وَاعْبُدُوا اللَّهَ وَلا تُشْرِكُوا بِهِ شَيْئاً وَبِالْوَالِدَيْنِ إِحْسَاناً 

وَبِذِي الْقُرْبَى وَالْيَتَامَى وَالْمَسَاكِينِ وَالْجَارِ ذِي الْقُرْبَى وَالْجَارِ الْجُنُبِ 

وَالصَّاحِبِ بِالْجَنْبِ وَابْنِ السَّبِيلِ وَمَا  مَلَكَتْ أَيْمَانُكُمْ

 إِنَّ اللَّهَ لا يُحِبُّ مَنْ كَانَ مُخْتَالاً فَخُوراً))  
(النساء:36) 


   بعد أن قام الله عز وجل بتنظيم العلاقات الأسرية ، وأرسى نظامها، 
بدأ بتنظيم العلاقات الإنسانية العامة بما فيها الأقربون وغيرهم، 
وذلك بعد أن بين ما يجب على الإنسان تجاه الخالق، حيث أمر الله العباد بأن يعبدوه حق العبادة ، 
ولا يجعلوا له ندا أو شريكا من حجر أو جماد أو نبات أو ملائكة أو بشر ،
فإنه هو الإله الواحد الذي شريك له
قال النبى صلى الله عليه وسلم لمعاذ ابن جبل :
" أتدري ما حق الله على العباد؟" 
قال: الله ورسوله أعلم ، قال : "أن يعبدوه ولا يشركوا به شيئا " 
ثم قال: أتدري ما حق العباد على الله إذا فعلوا ذلك ؟ أن لا يعذبهم ".
ثم أوصى بالإحسان إلى الوالدين،
فإن الله سبحانه جعلهما سببا لخروجك من العدم إلى الوجود، 

ثم ابن السبيل وهو المسافر المنقطع عن بلده سواء كان ثريا أم لا .
ثم أوصى بملك الأيمان من العبيد والإماء ، 
وقد أطلق سبحانه الإحسان الى هؤلاء ليشمل صنوف الحفاوة والإكرام، و
قد كان تأكيد الإسلام بالإحسان الى هؤلاء تمشياً مع روحه العام في توثيق صلة البشر بعضهم مع بعض، 
وجمعهم في رباط الود والحب والوئام. 
ثم أخذ سبحانه ببيان الصفات التي تفسد هذا الود والحب والوئام وأنه مبغض لها،

ألا وهي كل مختال متبختر متكبر، 
والفخور الذي يفخر بمناقبه كبراً واعتزازاً وتطاولاً،
وكثيراً ما يتطاول ويتكبر فلا يحسن إلى الأصناف المذكورة في الآية الكريمة،
ألا فأنعم به من شرع حكيم
.

26 comments

ابراهيم رزق said...

بخلاف العزومات العائلية

شهر رمضان هو الشهر الوحيد الذى تتجمع فيه الاسرة على مائدة واحدة

تحياتى و تقديرى

سواح في ملك اللــــــــــــــــــه- said...

كلامك جميل جدا

بس برضه العلاقات الاسرية مبقتش زي الاول

جزاكي الله خيرا علي الايات الجميلة وشرحها

Bent Men ElZman Da !! said...

ابراهيم رزق

معاك حق يا استاذ ابراهيم فعلا

شكرا لحضرتك ومنورنى:)

Bent Men ElZman Da !! said...

سواح في ملك اللـــــــــــــــه-

ده للاسف لاننا فى زمن مش بقينا نهتم بالعلاقات الاسريه او الانسانيه كتير
بس رمضان بيكون فرصه عشان نحاول نعمل حاله من التواصلى الى حد ما

شكرا لحضرتك
منورنى :))

Casper said...

بلا أدنى شك هو شهر مبارك
يكثر فيه الخير وتظل أيامه هي أفضل أيام العام

=======

خالص تقديري لفكرك وقلمك

شمس النهار said...

لارمضان بقا زي الاول ولا العائلات بقت تتجمع زي الاول مابقاش موضوع يوم عندي ويوم عندكم
كله عايز يفطر في بيته ويصلي التراويح وينام
الدنيا مابقاش لها طعم زي الاول

Bent Men ElZman Da !! said...

Casper

ايامه اصلا بالسنه كلها

شكرا ليك جدا :))

Bent Men ElZman Da !! said...

شمس النهار

ده الطبيعى دلوقتى
بس يمكن فى رمضالن الحكايه تكون اهون شويه
الى حد ما ناس قرايبنا بنروحلهم
هما بيجوا عندنا
ده مش بيحصل فى الايام العاديه خالص

ميرسى لحضرتك
منورانى دايما :))

Anonymous said...

صباحك غاردينيا
ليتنا نبقى بعد رمضان بنفس الروح والخلق التي أعتدنا عليها في شهر الخير حيث التواصل والسؤال عن بعضنا وتجمعنا على سفرة رمضانية تجمعنا "
؛؛
؛
لروحك عبق الغاردينيا
كانت هنا
reemaas

sabry abo-omar said...

جميل فعلا انك تتكلمى عن العلاقات الاجتماعية فى رمضان ،لانها فعلا من اهم مايميز هذا الشهر الكريم . ولكن العادات الجميلةوالعزومات المتبادلة بدات تختفى واحدة واحدة وزى ماقال احد المعلقين عندك انه بقى مجرد تجمع افراد الاسرة الواحدة فى وقت واحد هدف مش بيحصل فى غير رمضان..ربنا يكرمك على كلامك والاحاديث والادعية..ليكى انشاء الله عظيم الثواب

heba atteya youssef said...

الواحد فى وسط لمه العيله دى
بيحس انه مبسوط من جواه وبيضحك من غير اى حاجه
دايما بنتمنى ان كل الايام تبقى رمضان عشان كده
عشان رمضان دايما بيجمع كل الناس
ياريت نفضل كده فى رمضان وفى غير رمضان

جميله هي كلماتك .. كما احساسك
تحياتي

Unknown said...

اللهم لا تؤاخذنى فيه بالثغرات
واقلنى فيه من الخطايا والهفوات
ولا تجعلنى فيه عرضا للبلايا والافات
بعزتك يا عز المسلمين

امين يارب

موفقه ان شاء الله

reemaas said...

ديما بيقولوها كلمة

رمضان بيحب اللمة

حطى بقى تحت كلمة اللمة دى كل اللى تحبيه من اصحاب لقرايب لناس ماتعرفش بعض اصلا

εïз زهرة εïз said...

معاكي حق
بالذات ان انا مكنتش عايشة في مصر
لما جيت هنا
عجبني جدا جو اللمة مع الأهل والعزومات والذي منه ^_^

ربنا يتقبل :)

آرثـر رامبـو said...

جزاك الله خير

تاكاشى said...

رمضان يحب اللمه
يحب النفوس الصافيه

واحنا زى مانكون مبرمجين
بنبقى مستنيين من رمضان لرمضان عشان نصفى نفسنا ونهوى عن السواد اللى جوانا

يارب يجعل ايامنا كلها رمضان

سَارةٌ said...

الله يا دِينـآ .
بِرغم اني مش بعمل نص الحاجات اللي فـ البوست دي
بَس حسييت بالإنبساط كِدَهو ..
والدُّعاء حلوو جداً بجد
ربنا يبارك فيكي :)

Bent Men ElZman Da !! said...

ريــــمــــاس

ياريت والله
وتبقى الحكايه دى فى رمضان وغير رمضان

ميرسى ليكى يا ريماس
منورانى يا جميله :))

Bent Men ElZman Da !! said...

sabry abo-omar

انا مش معترضه على رأى حضرتك
لان زى ما عادات كتير فى حياتنا بتتغير
كمان جو اللمه ده بيتغير
بس رمضان بيكون فرصه اننا نرجع كل حاجه بنسيبها تعدى من ايدينا وتروح

شكرا اوى لحضرتك
شرفتنى بوجودك :))

Bent Men ElZman Da !! said...

heba atteya youssef

انتى الاجمل يا هبه
ميرسى يا جميله على تعليقك :))

Bent Men ElZman Da !! said...

خالد ناجى

اللهم آمين
شكرا لحضرتك
وسعيده بزيارتك جدا :))

Bent Men ElZman Da !! said...

reemaas

معاكى حق يا نور فعلا
كفايه تهانينا لبعض دى لوحدها لمه

ميرسى اوى يا قمر :))

Bent Men ElZman Da !! said...

εïз Semsema εïз

اه مصر الجو فيها بيبقى مختلف خالص

ربنا يتقبل مننا جميعاً

ميرسى ليكى يا جميله :))

Bent Men ElZman Da !! said...

آرثـر رامبـو

شكرا لحضرتك جدا :)

Bent Men ElZman Da !! said...

تاكاشى

ده بجد
بنستناه من السنه للسنه عشان بنحس انه فرصه نبقى احسن من جوانا

ميرسى ليكى ومنورنى :)

Bent Men ElZman Da !! said...

حَـبآيـۃْ.بـטּـدۉڷ

واحشنى وجودك اووووى هنا يا ساره
مش اكيد الواحد يعمل كل الحاجات دى
بس ادينا بنعمل مره حاجه والمره الجايه حاجتين

ميرسى يا ساره ونورتينى والله :*

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment