04 August 2011

(3) رمضان بين زمان ودلوقتى

.



الناس نفسهم بقوا حاجه تانيه خالص
وخصوصا فى رمضان
زمان كانوا الناس قرايبين اووى من بعضهم
والموضوع بيبقى اكتر كمان فى رمضان
يعنى مثلا لو اتنين جيران وقرايبين من بعض
تلاقى دى قبل الفطار بتبعت اكل للتانيه من اللى عملاه
والتانيه تردهالها مثلا بعد الفطار بالحلو
وهكذا
انا مثلا فاكره زمان كان جدى متعود كل سنه يعمل العرقسوس فى البيت
بكميه كبيره
ويبعتنى انا واختى نوزع على كل جيرانا اللى حوالينا
ولحد دلوقتى جيرانا لما يفتكروا جدى بيفتكروله الموضوع ده جدا
رغم انى كنت بتمرمط قبل الفطار عند كل جيرانا عشان ابعتلهم العرقسوس
الا انى بجد كنت حابه الروح دى جدااا
دلوقتى قليل لو حد عمل كده
فى ناس بتعمل وناس بتقف فى الشوارع توزع وقت الفطار
بس مش كتير زى قبل كده
حتى الناس فى الشارع وفى شغلهم كانوا بيبقوا متعاونين
فاهميين يعنى ايه عشان انت صايم 
المفروض تبقى اخلاقك احسن من اى وقت
عشان تتعود تبقى دى الاخلاق اللى تمشى عليها طول عمرك
فاهمين يعنى ايه المفروض مايتعصبوش
ولا يشتموا
ولا يتخانقوا مع بعض
ولا يجيبوا فى سيره بعض

اما دلوقتى
الناس وقت ما بتبقى صايمه بيعملوا حاجات غريبه
مبدأيا كده حكايه ان الناس تبعت لبعضها اكل دى
اه بتحصل
بس مش كل يوم
ومش فى كل الاحوال
ومش عند كل الناس
ممكن لان كل حاجه اسعارها زادت
حاجه تانيه
لو حد شاطر يجبلى يوم خرج فيه الشارع الصبح فى رمضان
ومش شاف مشكله بين اى اتنين فى الشارع
ممكن اصلا يكونوا اصحاب
والا خناقات الميكروباصات بقى
ياسلام عليهم
لو عملوا مسابقه لاحسن خناقه 
سواقين الميكروباصات هياخدوا الجايزه الاولى انا متاكده
مابيبقاش فى صبر
ولا الناس فاهمه يعنى ايه اخلاق الصيام 
وبيحاولوا يعدوا لبعض الغلطات اللى وارد تحصل فى اى موقف عادى
وبتبقى الحجه
انهم من الصيام او الحر او قله السجاير ده بيتعب اعصابهم
ردود مش منطقيه
بس ده اللى بيحصل دلوقتى فعلا

***************************************

دعاء النهارده

يارب كما شرفتنا بالايمان بك
وكرمتنا فى اركان الاسلام بالصيام لك
اعنا على طاعتك فيه
واجعل اللهم صفاء ارواحنا
فى استقباله وسيله لاجابه دعائنا

******

كتاب النهارده

كتاب رمضان يوم بيوم
 الكتاب بجد جميل اوى
فيه لكل يوم فى رمضان صفحه
متقسمه لكذا حاجه
قصه وحديث وآيه ودعاء وفكره وحكمه
حبيت اجيبه عشان اللى يحب يستفيد

حمل الكتاب من  >>>>  هنا

******

على الهامش

اللهم لا شماته

قل اللهم مالك الملك تؤتى الملك من تشاء وتنزع الملك ممن تشاء 
وتعز من تشاء وتذل من تشاء بيدك الخير انك على كل شئ قدير ﴿

26 comments

Casper said...

ده صحيح
فيه ناس فاهمة انه عشان صايم
فده معناه انه مخنوق ومش طايق نفسه ومش عاوز يفطر على حد
:d

برجح عصبية الفئة دي لادمانهم للتدخين والمنبهات
اللي ليها تأثير كبير على الحالة المزاجية

والله أعلم

سواح في ملك اللــــــــــــــــــه- said...

هي المشكلة ان احنا عايزين ثورة

تاني بس ثورة اخلاقية

عشان نرجع الاخلاق والشهامة

شكرا علي الكتاب

catroz said...

اولا كده كل سنه و انتى طيبةةةة و رمضان كرييييييم
بس عارفه انا و الله بحسها الناس مبقاش عندها وقت زى زمان .. الدنيا بقت زحمه اوى علينا و عليهم ..
روح رمضان كل سنه بتقل عن اللى قبليها

ممكن يكون احنا اللى بنكبر .. و الحاجات دى بقت تحصل بس بشكل تانى ..
يمكن احساسنا ب رمضان و العيد مميز اكتر و احنا صغار :)

ابراهيم رزق said...

تعودت ان اعود لكى كل يوم لاستعيد جزء من الذكريات

رغم انى لا احب العرقسوس الا انى افتقده بشدة و افتقد تلك الايام و افتقد جارتنا تلك رحمة الله عليها

تحياتى

Anonymous said...

مساء الورد بنت من الزمن دا

كل عام وأنت بخير وجميع العائلة الكريمة

ورمضان كريم عليكم يارب ..

رمضان أختلف كثيراً عن زمان فاختلف حتى في

التفاصيل الصغيرة والجميلة والتي نتذكرها

إلى الآن ولا أعلم سر الإختلاف ولكنني لا أعتقد

أنه مادي بقدر ما هو نفسي فكل واحد إختلى

بنفسه وعاش جو رمضان بمفرده دون أن يشاركه

أحد ..

أما قضية الأخلاق وتغيرها مع الصيام فصدقيني

هذه نقطة مؤلمة لي أنا على الأقل في هذا الوقت

فكون الشخص صائم لهو أهم حافز ليكف أذاه ولكن

هناك بشر يجرونا لبراثن الخطأ إجباراً ولكن

صبراً جميل والله المستعان على أذاهم ...

سيدتي بارك الله فيك على كل ما سطر هنا اليوم

فوالله لقد شرح نفسي ورسم بسمة على شفاهي فياليت

كل من يكتب يكتب شيء يسعدنا ...

تحياتي وإحترامي

نهر الحب said...

اولا
كل سنة وانتي طيبة
ثانيا
انا اول مرة آجي هنا

ثالثا
عندك حق جدا نا لسه كنت بفكر في كدة ازاي كل حاجة حوالينا اتغيرت حتي الاحاسيس
عارفة زمان كان قبل رمضان بيوم الناس تكلم بعض في التليفون عشان يقولوا كل سنة وانتم طيبين دلوقتي كله بيستسهل المسدجات بس انا بقي بحب اعمل زي زمان وبكلم معظم الناس عشان اسمع صوتهم واعيد عليهم بنفسي وبحس المسدج ملهاش اي طعم عشان حتي مش مكتوبة باحساسنا احنا

بحاول اعمل كدة في كل حاجة حتي لو مختلفة عن بقاي الناس ويا ريت كل واحد بيعمل كدة لكن المعظم بيعمل زي ما كل اللي حواليه بيعملوا وده غلط

رمضان كرييييم
:)

Radwa Ashraf said...

حلووووووو أوووووووووى ,, عارفة أنا كنت برضة كاتبة تدوينة النهاردة عن نفس الموضوع
اختلاف عادات الناس بين رمضان زمان و دلوقتى !!
رائعة يا جميلة

كريمة سندي said...

والله أيام زمان كانت أحلى لأن القلوب كانت صافية

تدوينة جميلة جدا ربنا يبارك فيك

شمس النهار said...

هو التعليق اتنشر ولا ايه؟؟؟

The illusionist said...

عارفه الواحد بيتناسى الكلام ده عشان ميفضلش يبكى على الروح اللى ضاعت
هنعمل ايه طيب يعنى

مبقاش فى روح اصلا

اللى متبقى من رمضان
التراويح
الفطار
الحلويات وقمر الدين
السفاله اللى بتزيد والمسلسلات والقرف
هه
هنتبطر يعنى
ده والواحد كمان يعتبر ريفى
امال لو مدنى بقى
كان حس بالفجور بقى
وان رمضان ده فى الدول العربيه شهر الفجور مش الصيام

خلاص بق4ى معلهشى
عاموما برضو لسه كل سنه وانتى طيبه

وهحمل الكتاب

واللهم لا شماته
بس انا بصراحه شمتان حته صغيره

Bent Men ElZman Da !! said...

Casper

هو ممكن فعلا تكون السجاير بتأثر على الحاله المزجيه
بس يمكن رمضان بيبقى فرصه عشان الواحد يقل منها شويه وماتبقاش الحاله المزجيه متوقفه على انه شرب سيجاره والا لا

شكرا ليك جدا على رأيك ومنورنى دايما :))

Bent Men ElZman Da !! said...

سواح في ملك اللــــــــــــــــــه-

بالظبببببط
احنا المفروض نتغير من جوانا الاول
عشان نقدر نكون احسن فى كل حاجه

ميرسى ليك اوى ومنورنى دايما :))

Bent Men ElZman Da !! said...

catroz

فعلا الزحمه ليها عامل كبير

احنا بنكبر والحاجات الحلوه بتكبر معانا بس بشكل تانى
لان الاطفال دلوقتى بيستمتعوا بحاجات
بس مش نفس الحاجات اللى كنا بنستمتع بيها واحنا صغيرين

ميرسى ليكى يا جميله
ونورتينى ويارب مش تكون اخر مره :))

Bent Men ElZman Da !! said...

ابراهيم رزق

الحاجات بتاعه زمان حتى لو مش بنحبها بس بنفتقد وجودها عشان فيها ريحه كل حاجه فاتت

مبسوطه بجد بوجودك دايما ومنورنى :))

Bent Men ElZman Da !! said...

ريبال بيهس

مساء النور
منورنى بزيارتك :)
وكل سنه وحضرتك طيب

الزمن اختلف فا كل حاجه اختلفت معاه للاسف

المفروض فعلا ان الناس تاخد رمضان حافز ليها عشان نصلح من نفسنا ونبقى احسن
للاسف فى ناس كتير مش قادره تعمل ده

شكرا ليك جداااا على رأيك اللى اسعدنى اكيد
مبسوطه بزيارتك واتمنى انها تتكرر تانى :))

Bent Men ElZman Da !! said...

نهر الحب

اهلا بيكى والمدونه منوره بوجودك :)

اهى حكايه المسدجات دى قصرت الكلام بين ناس كتير اوووى
لو مكتوبه لصحاب الرساله نفسها بتبقى افضل من الرسائل اللى بنبعتها ومفيش فيها روح
لان الموضوع بيختلف عند اللى بيستلم الرساله حتى
لو نرجع كل حاجه زى زمان هتبقى روحها احلى

ميرسى ليكى يا جميله
ونورتينى بزيارتك ويارب مش تكون الاخيره :))

Bent Men ElZman Da !! said...

Radwa Ashraf

ميرسى ليكى يا قمر
وان شاء الله اشوف التدوينه بتاعتك اكيد جميله اوى
نورتينى :))

Bent Men ElZman Da !! said...

كريمة سندي

فعلا والله

شكرا لحضرتك جدا منورانى دايما :))

Bent Men ElZman Da !! said...

شمس النهار

اه اتنشر
فى مشكله تقريبا فى التعليقات معاكى هههههه
التعليقات بس مش بتظهر الا لما اوافق عليها
اسفه بجد لو الموضوع ده عامل مشكله مع حضرتك :) بس انا والله بنشرهم اول بأول على طول :))

Bent Men ElZman Da !! said...

The illusionist

فى حاجات بسيطه باقيه من زمان
الا حكايه المسلسلات دى
هى الوحيده اللى بتزيد يوم عن يوم

منورنى يا محمد وكل سنه وانت طيب :))

Sarah .. said...

الدنيا اتغيرت من حوالينا يا دينا
بس احنا متغيرناش
يمكن عشان بنكبر ومسئولياتنا بتزيد واهتماماتنا بتختلف .. دا التغيير بس
لمة العيلة والدفا بتاع زمان بيقل أووى
والروح بتختفى
..
السواقين .. بحس ان الشهر دا بالذات بيبقى مقدس لخناقاتهم وعصبيتهم بس
لكن للمحاولة انهم يغيروا أخلاقهم للأحسن .. لأ
..
الدعاء جميل .. ربنا يتقبل
وحملت الكتاب .. فكرته جميلة جدا كمان .. شكرا يا دينا
..
عجبانى فكرة تقسيم البوست بالشكل دا :)

Sara said...

فعلاً يا دينا كله دلوقتي بيتحجج بالصيام و يقولك معلش أصلي صايم !!!
المفروض الصيام دا عشان نحترم نفسنا و نتعود على الأخلاق الحميدة
للأسف الناس بقت أغلبها فاهمة غلط =(
و لازم يرجع دور التوعية مرة تانية بأهمية الأخلاق

أشكرك يا دينا و منتظرة التدوينة الجاية بفارغ الصبر =)

reemaas said...

بينى وبينك انا نفسى بصراحة اعيش فى جو رمضان زمان بجد كان هيبقى له طعم غير

Bent Men ElZman Da !! said...

Silver Eyes

وتغير الزمن نفسه بيخلى فى حاجات فينا بتتغير
يمكن مش كلنا
بس جزء مننا كده

السواقين مأساه فى رمضان او الزحمه عموما بتخليهم مش قادرين يستوعبوا انهم المفروض يبقوا احسن للاسف

ربنا يتقبل دعانا جميعا يااارب
ميرسى ليكى يا جميله على زوقك
ويارب يكون الكتاب عجبك واستفدتى منه
نورتينى :))

Bent Men ElZman Da !! said...

Sara

دور التوعيه بأهميه الاخلاق مهم مش بس فى رمضان
لكن فى حياتنا كلها عشان نبقى احسن ونقدر نوصل بحياتنا للاحسن كمان

ميرسى ليكى يا قمر على رأيك
ومنورانى دايما :))

Bent Men ElZman Da !! said...

reemaas

كل حاجه من زمان ليها طعم وروح تانيه

ميرسى يا قمر :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment