07 August 2011

(6) رمضان بين زمان ودلوقتى

.




انا بيتهيالى زمان لو سألت اى بيت مصرى
فى اول يوم فى رمضان
انتوا عاملين اكل ايه النهارده
هيردوا كلهم اجابه واحده
تحسوا ان كورس كده
حافظين مش فاهمين
احنا طلعنا لاقينا اهلنا بيعملوا الاكل ده يبقى احنا زيهم
تعود ان ده اللى المفروض يتعمل فى رمضان
ورمضان مميز باكلات فى موجوده فى اى وقت تانى
زى القطايف والكنافه 
اللى مفيش بيت مصرى مش بيعملهم اول يوم رمضان
لو مش كان النوعين يبقى على الاقل نوع واحد منهم
بالرغم من اننا اصلا مش بيكون فينا نفس ناكل اى حاجه بعد الفطار
بس اتعودنا على كده
وكمان الفول اللى شئ مقدس على السحور و مفيش غنى عنه

اما دلوقتى
الموضوع مابقاش فارق كتير
القطايف والكنافه موجودين طول شهور السنه
لو حبيت تاكلهم فى اى وقت هتجبهم وتعملهم
الموضوع مابقاش مرتبط برمضان خالص
حتى حكايه الاكل المحدد اللى كلنا اتعودنا نعمله ده
عادى بردو ممكن يتعمل او يتعمل غيره خالص
حتى السفره بكل اللى عليها بقى مختلف
اما السحور فا مابقاش شرط اساسى انه يكون فول
اصل احنا جيل معدته تعبانه اصلا
الناس مازالت متفقين فى حاجه واحده بس
انهم يشتروا كل اللى تطوله ايديهم
ولا كأننا داخلين على مجاعات
ويارتنا حتى بناكل نص الاكل ده

*********************************

دعاء النهارده

اللهم اجعل لى فيه نصيباً من رحمتك الواسعه
واهدنى فيه لتراهينك الساطعه
وخذ بناصيتى الى مرضاتك الجامعه
بمحبتك يا امل المشتاقين

*****

فيديو النهارده

فيديو النهارده هو حلقه من برنامج ثوره على النفس
البرنامج تقديم معز مسعود
بيتكلم فيه كل يوم عن صفه المفروض نتخلص منها
وزى ما كنا قادرين نعمل ثوره على احوال البلد اللى مش عاجبانا
نقدر نعمل ثوره على نفسنا ونغيرها للاحسن ان شاء الله
البرنامج رائع بجد
وفيه حوار مع ناس من الشارع وشخصيات مشهوره
وطريقه معز مسعود فيه بسيطه كعادته وتوصل للواحد بسلاسه

مواعيد عرض البرنامج
على القناه الثانيه المصريه
الساعه 6 وربع
وعلى قناه cbc
الساعه 6 وربع بردو  وبيتراجع مع ميعاد الفطار يومياَ
والاعاده فى 3 وربع الفجر

وده فيديو لأحدى حلقات البرنامج



ودى صفحه معز مسعود على الفيس بوك
بينزل عليها يومياً الحلقات لو حد يحب يتابع

Moez Masoud معز مسعود


20 comments

سواح في ملك اللــــــــــــــــــه- said...

هي طقوس ياعزيزتي اعتدنا عليها من ايام الدولة

علي مااعتقد الفاطمية

ولكن كلما ازداد الوعي الديني والحياتي

فالحكمة من الصيام ليس الامتناع عن الاكل فقط

ولكن للاحساس بالجائع وتهذيب النفس

تحيتي لكي

m.hallawa said...

السلام عليكم
رمضان في مصر له طعم تاني خالص
بوست جميل رائع تسلم الايادى
ورمضان كريم
تحياتي

Noha Saleh said...

كل سنة وانتى طيبة
مش فى موضوع الاكل بس رمضان اختلف فى كل حاجة الحاجة اللى كلنا متفقين عليها بس هى انه شهر عبادات
رمضان كريم

The illusionist said...

شكرا يا سيدتى

الف الف شكر على الفيديو وقريت الدعاء وحملت الكتاب وهنشره ربنا يجعله فى ميزان حسناتك الف شكر ليكى يا دينا بجد انتى زى الفل فى رمضان ده

Radwa Ashraf said...

موضوع الأكل ده حقيقى فعلا !!
الناس بتشترى أكل بكميات و معظمه للأسف بيترمى من ركنته
و أكلات رمضان المميزة فعلا اللى هى بالنسبالى أهم حاجة (القطايف) بقى ممكن متوافرة فى أى وقت
رغم انى محبش أكلها غير فى رمضان .. محسش بيها غير كده
أعجبنى الفيديو جدا و دعاء جميل
تسلم ايدك يا جميلة :)

Bent Men ElZman Da !! said...

سواح في ملك اللــــــــــــــــــه-

حضرتك فعلا قولت نقطه انا مش اتكلمت فيها فى البوست ده
وهى اننا المفروض نفكر فى الشهر ده كشهر عبادات
مش شهر الاكل

شكرا ليك جدا ومنورنى دايما :))

Bent Men ElZman Da !! said...

m.hallawa

شكرا لحضرتك
ورمضان كريم علينا كلنا
منورنى دايما :))

Bent Men ElZman Da !! said...

Noha Saleh

كل سنه وانتى بخير يا جميله

ما احنا لازم نبقى متفقين الى الابد انه شهر عبادات
دى الحاجه الوحيده اللى ماينفعش تتغير

ميرسى ليكى ونورتينى :))

Bent Men ElZman Da !! said...

The illusionist

شكرا ليك جدا يا محمد
وربنا يجعله فى ميزان حسناتنا كلنا ويتقبل مننا يارب

نورتنى بوجودك :))

Bent Men ElZman Da !! said...

Radwa Ashraf

يعنى بنشترى الاكل وبنرميه بالرغم من ان فى ناس كتير محتاجه ولو رغيف عيش حاف بس

شكرا ليكى يا رضوى
ومنورانى دايما يا قمر :))

ابراهيم رزق said...

متفق معكى تماما الافى نقطتين

1 اعترض على انك بتقولى القطايف موجودة طول السنة هذا خطأ القطايف فى رمضان فقط لانى حاولت اشتريها فى غير رمضان كانت غير موجودة
2 اعترض جدا جدا جدا على الفول ده الفول صديقى يكفى وجوده حتى لو لم اتناوله هو انيس و صديقى و السحور لا يصبح سحورا فى عدم وجوده
تحياتى

reemaas said...

الفول والفتة حاجات مقدسة عندنا لسه
لازم فول على السحور ولازم اول يوم فطار تبقى فتة هههه

ربنا ما يقطعها عادة لانها فعلا بتحسسنا بدخله رمضان

شمس النهار said...

الاكل الفوووورمة ده كان ايام البيت الكبير دلوقتي خلاص مابقاش في لمة اوي زي زمان
ولما تحصل اللمة تلاقي كل واحد يعتذر ويقولك اصل مش عارف انا بفطر اتبنج فاخلاص سيبوكوا من رمضان قال يعني بيتلموا في غير رمضان

البرنامج لطيف وعجبني اكتشفته لما كنت عازمة ناس يوم الجمعة وطلبوا يتفرجوا عليه قبل الفطار بس انا معترضة علي طريقة التصوير
ضلمة حبتين

blue-wave said...

ولكن يظل لتلك الاشياء سحرها الرائع فى رمضان
تحياتى

كريمة سندي said...

بوست جميل جدا .. وصحيح إن الأكلات الرمضانية لها طعم ونكهة تانية حتى لو كانت موجودة طوال السنة

Bent Men ElZman Da !! said...

ابراهيم رزق

انا مع حضرتك فى نقطه الفول انه شئ طبيعى على السحور
بس لاننا بقينا جيل بيزهق بسرعه اصلا فا مش متعودين ناكل نفس الاكله كل يوم

القطايف بقول كده من واقع اللى حواليا
ان القطايف موجوده طول السنه
بس الواحد مش بيحاول يجبها عشان تفضل فى عينه دى فى رمضان وبس بنحافظ على اخر حاجه فاضله من الطقوس الرمضانيه

شكرا ليك جد ودايما منورنى :))

Bent Men ElZman Da !! said...

reemaas

انتوا استثنائات يا نور صراحه ههههههههه
ربنا ما يقطعلكم عادى يا قمر

ميرسى ليكى ونورتينى :))

Bent Men ElZman Da !! said...

شمس النهار

فعلا رمضان بيكون مناسبه لتجمع العيله كلها
بضايق جدا من الناس اللى تعتزر فى رمضان بالذات

يمكن البرنامج تصويره طبيعى ومش مستخدمين اضاءه عشان كده ضلمه شويه
بس مضمونه بجد حلو اوى

شكرا لحضرتك جدا ونورتينى :)

Bent Men ElZman Da !! said...

blue-wave

رمضان مهما اختلفت تفاصيله لكن يبقى رمضان بردو

شكرا ليك ونورتنى :)

Bent Men ElZman Da !! said...

كريمة سندي

فعلا حتى لو موجوده طول السنه
احنا بنحاول نخليها فى رمضان بس
عشان نحس بطعم رمضان فيها

شكرا لحضرتك ومنورانى دايما :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment