26 September 2011

عدت ســنــه

.
51 التعليقات




اختى : على فكره انا شاكه فيكم انتوا الاتنين كلامكم الكتير ده مش طبيعى
انا : لا يابنتى عادى احنا اصحاب بس

صاحبتى : يابنتى ما تفكرى فى الموضوع ده بقى
انا : لا طبعا  انتى عارفه انه ماينفعش ابداً

صاحبه اختى : ايه يا دينا هو فى ايه بينكم
انا : مفيش حاجه
هى بردو : طب ما يبقى في (مع ابتسامه خبيثه على وشها)


زى الايام دى دلوقتى من سنه
كنت بسمع الجمل اللى فوق دى
وبيدور نفس الحوار بينى وبين اى حد بيشوف علاقتنا ببعض 
وصداقتنا اللى زادت فجأه
ورغم ان ردودى دى كنت مقتنعه بيها اوى
ورغم انى دايماً كنت بقنع نفسى ان مفيش اى حاجه بينا
الا أنى كنت متوقعه نهايه غير اللى كنت بقولهم عليها
بس ماكنتش متخيله انها هتبقى لدرجه ان دلوقتى
انا لابسه دبلتك فى ايدى

سنه عدت من غير ما احس بيها ابداً
الحلو فيها فاكراه بكل تفاصيله
عشان بس عشته معاك

مش حسيت بالسنه دى ابدا
لان السنه جنبك بتعدى ثانيه
زى ما كل حاجه حلوه بتعدى بسرعه اووى

كل حاجه عرفت انى بحلم بيها وبتمناها
حققتهالى

صعب اوى ابقى جنبك محتاجه لحاجه
عشان اصلاً انت فى نظرى كل حاجه

و مش شايفه اى حد غيرك فى الدنيا
عشان مفيش اى حد فى الدنيا يملى عينى زيك

عقبال سنين جايه كتير نعيش فيها مع بعض
واحنا بنحب بعض كل يوم اكتر من اللى قبله

سامحنى لو عملت اى حاجه فى اى وقت زعليتك من غير ما اقصد
سامحنى لو فى يوم من الايام ماعرفتش  اخليك تحس انا اد ايه بحبك
 
 شكراً لانك دايما بتتحملنى فى جميع حالاتى
شكراً لأنك دايماً معايا
شكراً لأنك حبيبى ♥

readmore »»

21 September 2011

دنيا التكاتك !!!

.
38 التعليقات




موضوع التكاتك ده بقى ملفت للنظر جدا
وخصوصا فى الفتره اللى فاتت
لان قبل كده كان ظاهر بنسبه قليله اوى فى الارياف وبعض المحافظات
ومن فتره قريبه بدأ يظهر فى القاهره
وفى بعض المناطق اللى عملتله ترخيصات وبقى تبع مجلس المدينه كمان
زى شبرا الخيمه والوراق وامبابه
ومن فتره قريبه بدأت اشوفه عندنا
ازبهليت صراحه من سيطره التوكتوك  على الشوارع رغم صغر حجمه
يعنى تلاقى التوكتوك من دول ممكن وهو ماشى يدوس على رجل واحد
وعادى جدا يكمل طريقه ولا كأن فى حاجه
ممكن يكون هيلزق فى ميكروباص او اتوبيس 
وعادى بردو جدا يكمل ولا كأن فى حاجه حصلت
ممكن وانت راكبه كده لو الحمل زياده والا حاجه
تلاقيه راح حادف يمين
تنزل تعدله وتركب تانى ويكمل عادى بردو ولا كان فى حاجه

الغريبه فى التوكتوك  بالرغم انه صغير كده ولا يرى بالعين المجرده
الا انه بسم الله ما شاء الله
بياخدو اعداد غريبه جواه
تحس انه مفتوح والا موصل على ميكروباص من الناحيه التانيه مثلا
وهو شكله اصلا مياخدش غير فردين
بس ممكن تلاقى اسره كامله راكبه فيه ومعاهم عفش الشقه كمان لو يحبوا
تكاتك استريتش تقريبا

 
المشكله فى التكاتك دى
انهم بقوا يعملوا ازمه فى المرور غير طبيعيه
اصلا احنا عندنا ازمه فى المرور مالهاش اى حل ممكن
التكاتك  زودتها الضعف تقريبا
لانها كتير وحجمها صغير فا بتدخل فى اى حته 
ومش بتدى فرصه لاى مواصله تانيه
يعنى الازمه الاول كانت فى بتوع الميكروباصات واللى بيعملوه
دلوقتى بقت فى التكاتك وبتوع الميكروباصات بيواجهوا نفس الازمه معانا
 
محافظ القاهره اصدر قرار بمنع وجود التكاتك فى محافظه القاهره نهائياُ
واى توكتوك هيتمسك هيتصادر على طول
وبيطالبهم انهم يروحوا اى مكان فى الارياف افضل ليهم
القرار ده ليه عيوبه ومميزاته
مميزاته
انه هيساعدوا الى حد ما فى حل جزء من ازمه المرور اللى خنقتنا كلنا
عيوبه
ان الشباب اللى بيشتغلوا على التكاتك دى هيلاقوا شغل تانى فين؟؟
وخصوصا ان صعب بتوع التكاتك اللى فى الارياف 
يدخلوا عليهم اى حد غريب من محافظات تانيه
وياخدوا شغلهم
زى ما بيقولوا كل واحد بيشتغل فى منطقته ومش هيخلى حد غريب ياخد مكانه
وبعدين الاهم بقى
هو على اساس ايه كانوا بيرخصوا للتكاتك الاول وبياخدوا نمر 
وبيمشوا ولا كأنهم ملاكى
ودلوقتى فجأه مش عايزين يشوفوا ولا واحد منهم فى الشارع!!

readmore »»

16 September 2011

ياريت عندنا كده !!

.
30 التعليقات




شوفت كده بالصدفه حلقه لاوبرا ونيفرى
كانت بتقابل راجل امريكى متجوز اربعه
انا لما شوفت اعلان الحلقه وقالوا انها هتتكلم عن تعدد الزوجات
افتكرت انها هتجيب واحد عربى
بما ان القانون فى امريكا او معظم البلاد الاوروبيه بيمنع ان الشخص يتجوز اكتر من واحده
يعنى لو ثبت لشخص واحد اكثر من زواج على طول بيتحبس

انما لاقتها فى الاخر جايبه واحد امريكى ومتجوز اربعه
وقادر يظهر فى البرنامج ومش خايف من حاجه
هما كلهم مستوعبين الموقف اللى هما فيه  اذا كان هو والا زوجاته الاربعه
وعندهم استعداد يخوضوا اى حاجه 
فى سبيل ان الاسره الكبيره اوى دى تفضل مع بعض
انا صراحه استغربت جدا جدا لما شوفت الراجل ده واللى متجوزهم
 
حسيت ان الراجل ده بيطبق بالظبط اللى الدين الاسلامى قال عليه 
من ناحيه تعدد الزوجات
من حيث العدل بينهم فى المعامله ومعامله اولاده

حتى زوجاته نفسهم
بيتعاملوا مع بعض باسلوب متحضر جدا بطريقه غير معقوله
وبيحطوا حدود لنفسهم  قدام بعض عشان يرعوا مشاعر بعض كويس جدا
الله اعلم هما كانوا بيجملوا نفسهم لانهم قدام التليفزيون والا ده الطبيعى
لكن هما كمان بيظهروا فى احدى برامج الحياه الواقعيه اسمه
sister wives
بيتابعهم فى كل لحظات حياتهم وليه كذا موسم كمان

من ضمن الحاجات اللى حبيتها اوى فى علاقتهم ببعض
سواء هو وزوجاته والا هما اصلا الاربعه مع بعض
اول واحده اتجوزها من 20 سنه وبعدها اتجوز التلاته الباقيين 
واخر واحده من سنه
مش عنده مشكله ان اللى يكون متجوزها دى معاها اطفال من زواج سابق
ويعيشوا مع اولاده
فى واحده من اللى متجوزها دول
سابت شغلها عشان تقعد فى البيت تشوف طلبات العدد الكبير ده
لان اولاده حوالى 16 او 17 ولد وبنت مختلفين الاعمار

لما كمان اتكلموا مع ولاده
ولاده اتكلموا بكل صراحه قالوا السلبيات والايجابيات فى وضعهم
وقالوا كمان ان والدهم فى الاول مش كان بيقضى وقت معاهم كتير
بس حاول يوظف وقته ومكانه عشان يقدر يقعد معاهم اكتر

حبيت فى طريقه الراجل ده 100 حاجه
ازاى قادر يخلى كل زوجه من دول قادره تحبه 
لدرجه انها تتحمل الحاله الخاصه دى
ماهى لازم تكون بتحبه عشان تتحمل ياما هتقتله هو والتلاته التانين
ازاى قادر يسيطر عليهم اصلاً
لان معروف ان المرأه الاوروبيه قويه الشخصيه 
ومش بسهوله الرجل يبقى متحكم فيها كده
ازاى هما قادرين يوصلوا لكده
وازاى اولادهم مبسوطين بيهم كده وعايشين حياه سويه جدا
واخدين بالهم من اختلافات حياتهم عن حياه اى حد غيرهم
ومع ذلك حابين اوووى الاختلافات دى وفخورين بيها



انا طول الحلقه منبهره صراحه ومعجبه جدا بطريقه كل واحد فيهم ومستغربه اكتر
لانى حاسه ان لو شخصيه عربيه اللى المفروض فى شريعتنا الاسلاميه نظام تعدد الزوجات
مش متخيله انه هيكون بالطريقه دى والا بالعدل ده
ياما سمعنا عن حالات تعدد زوجات
بس دايما كان فى حاجه بتفشل فى النص 
اللهم الا كام حاله يعنى من ضمن كذا حاله
 لان بيبقى فى طرف من الاطراف مش قادر يكمل فى المنظومه دى
وسمتها منظومه لان كل اللى فيها لازم يعرف دوره  كويس جدا
ويختار افضل طريقه للتعامل مع باقى الاطراف
اذا كان الزواج الطبيعى اللى هو زوج وزوجه واحده
بيبقى عايزين ياكلوا بعض
اومال لما يبقى فى كذا زوجه هيعملوا ايه !!



دى حلقه من برنامج
Sister Wives

readmore »»

13 September 2011

خــط الــعــمــر

.
36 التعليقات




ماشيين على خط العمر
خايفين نقع على اليمين
او حتى ع الشمال نمر
عايزين نمشى  على خط مستقيم

لكن يا ابن ادم انت مش حر



readmore »»

06 September 2011

بيقولوا النظافه من الايمان ...!!

.
35 التعليقات



فى حاجه لافته نظرى اوى اليومين دول
حاول كده تنزل اى شارع فى اى وقت
وشوف كميه الزباله اللى مرميه فى كل ركن فيه اد ايه !!!


المشكله مش بس فى اننا بنرمى الزباله
ولا اننا بنحاول من كام سنه فاتوا
نقنع الناس انك ماينفعش ترمى زباله حواليك
ولا ينفع انك تملى الشارع اللى انت ساكن فيه زباله
واللى يحدف من البلكونه
واللى يخرج شنط اد كده من البيت يرميها فى كل جنب شويه
الحكايه دى تقريباً بقت متأصله جوه ناس كتير من الشعب المصرى وبقى متعود عليها خلاص
ومحتاج ثورتين تلاته كده عشان يمكن يقتنع ويفهموا
ان فعلا النظافه من الايمان

المشكله دلوقتى ان المسئولين اللى بيشجعوا الناس انها ترمى الزباله
وتملى الشارع بالمنظر المستفز اللى ماحدش بيستحمله ده
هتقولى ازاى؟؟...اقولك ازاى
يعنى لما تلاقى ان يعدى يوم واتنين وتلاته
وعمال النظافه ماحدش فيهم بيجى يشوف شغله وينظف الشارع او ياخد الزباله من البيت عندك
انت هتعمل ايه؟؟
هترمى الزباله اللى فى البيت عندك فى الشارع
ماهو انت اكيد مش هتستحمل تسيب الزباله فى بيتك اللى انت عايش فيه
هيحصل ايه بعدها؟؟
هتزيد اكوام الزباله اللى فى الشارع بطريقه مستفزه جدا
فا هتروح انت تبلغ ان بتوع النظافه مش بيجوا
المفاجأه انك هتلاقى رد واحد بيتكرر
وهى ان عربيات الزباله بايظه
الغريبه ان حتى لو فى عمال نضافه بينزلوا
فا هما بياخدوا الزباله
يرموها فى مكان تانى فيه اكوام اكبر واكبر
او حتى بيحرقوها
والمنظر بيبقى بجد يقرف الواحد

طب ما الفلوس اللى انتوا بتاخدوها على قلبكم اد كده
من فلوس النظافه اللى على الكهربا
مش بتصلحوا بيها العربيات ليه وترحمونا من القرف ده؟؟

انا كنت فاكره الحكايه دى فى المنطقه بتاعتنا بس
لكن كل ما بخرج الاقى جميع المناطق اللى حوالينا كده
قولت يمكن المكان اللى انا ساكنه فيه بطلوا يتعاملوا معانا على اننا فى زباله بنرميها
فا لغوا حكايه عمال النظافه والعربيات بتاعتهم 
واحنا نعمل اكتفاء ذاتى بقى
ويمكن ننمى جوانا قدرتنا على اعاده التدوير والا حاجه!!

بس امبارح كنت بتفرج على التليفزيون
ولاقتهم بيقولوا ان الحكايه دى فى جميع مناطق القاهره
وكمان محافظات كتير زى الجيزه و اسماعيليه واسكندريه وغيرها

هو ده ستايل مثلا؟؟
وبعدين يعنى ايه اصلا العربيات كلها وعلى حين غره كده تبوظ 
ومفيش ولا عربيه شغاله؟
هيكونوا العربيات عملوا ثوره عليكم هما كمان يعنى؟؟

كان فى event
على الفيس بوك
بيطالب اننا نتفق كلنا نروح نرمى الزباله عند الحى
وساعتها هيخلوا فى وشهم وعند اهلهم دم
ويلموا الزباله دى بدل ما هى ماليه الشوارع كده
والحمله دى تقريباً هتبقى يوم 14/9
فكرك الحمله دى ممكن تجيب نتيجه؟؟
طب انت ممكن تعمل كده وترمى الزباله عند الحى والا هتقول وانا مالى؟؟


***اسفه على الصوره
بس الحقيقه اقذر من كده بكتير
انا حاولت اجيب صوره نضيفه شويه

readmore »»

04 September 2011

كلام والسلام ..كلاكيت ثامن مره

.
36 التعليقات




لما تبقى قليل الذوق مع حد
اوعى تشتكى ابداً
لما يبقى اى حد تانى قليل الذوق معاك
(وقياساً على ذلك اى صفه اخرى)
ده ضريبه هتدفعها مع الوقت يعنى هتدفعها
لا مفر

****************

مابعرفش اسامح
مابعرفش اخبى اللى جوايا
مابعرفش ابقى مضايقه واضحك
مابعرفش احاول احب حد انا من جوايا مش عارفه احبه

****************

متخيله نفسى
فى فصل الخريف
نايمه على ضهرى على الارض فى مكان فاضى فيه شجر بعيد عنى شويه
فى وقت الغروب وضوء الشمس الاحمر ملون كل حاجه حواليا بنفس اللون
وحواليا واقع ورق شجر كتير من الشجر اللى مات بسبب الخريف
ليه بتخيل كده
يمكن لانى شايفه ان جزء من حياتى كده
فى مرحله الخريف و ورقه بيقع حواليا !!!
لكن
مستنيه الربيع عشان يجدد جمال الورق ده

****************

دايما بيبقى فى حياه كل واحد فينا شخصيات مهمه
كل واحد ليه مكانته جوانا
اللى يمكن تزيد او تقل مع مرور الوقت والمواقف والظروف
بس لو حد مشى من حياتك
مفيش حد تانى بيعرف ياخد مكانه ابداً
يمكن التانى ده يعمله مكان اكبر من جواك
بس انه ياخد مكان غيره
وتتصرف معاه بنفس الاسلوب والطريقه بالظبط وتعيد نفس الذكريات
حساها صعبه
كل مكان جوانا اتخلق لشخص معين
لما الشخص ده بيمشى
المكان ده بيتقفل
وبيتكتب عليه
كان هنا...فلان !!

****************

اول مره اكتشف انى عامله المدونه دى من 4 سنين
يمكن قعدت فتره طويله ماكتبش فيها حاجه
ده يخلينى أسال نفسى
انا ليه ماحستش انى عملاها كل الفتره دى!
ليه ماهتمتش بيها!
ليه مش كتبت فيها كتير!

****************

دايما بحاول مش افكر فيكى
اصل انا صراحه ما بصدق يكون مزاجى عدل شويه
مجرد ما بفتكر مزاجى بيتقلب خالص
وانا ماعنديش استعداد لكده
بحاول مافكرش
بحاول مارتبش المواقف اللى حصلت الفتره اللى فاتت
عشان عارفه انى يمكن يمكن يمكن اطلعلك اعذار
او حتى اطلع لنفسى غلطات
عشان كده بفكر فى اى حاجه تانيه
بس الشئ الغريب
انى بلاقى اسمك فى كل حته قدامى
فى قصه أقراها..فى ناس جديده اتعرف عليهم..فى مسلسل بتفرج عليه
هو دى حركه مقصوده من الدنيا والا صدفه بحته بتستهبل شويه؟؟

****************

طول مراحل حياتى كان بتمر عليا صداقات وبتنتهى
نهايه طبيعيه بكل حب سواء لاختلاف ظروفنا او حياتنا
او حتى مكانا
كنت فاكره انى دلوقتى وصلت لمرحله صداقه العمر
بس للاسف الشديد
طلعت غلطانه

readmore »»