04 September 2011

كلام والسلام ..كلاكيت ثامن مره

.




لما تبقى قليل الذوق مع حد
اوعى تشتكى ابداً
لما يبقى اى حد تانى قليل الذوق معاك
(وقياساً على ذلك اى صفه اخرى)
ده ضريبه هتدفعها مع الوقت يعنى هتدفعها
لا مفر

****************

مابعرفش اسامح
مابعرفش اخبى اللى جوايا
مابعرفش ابقى مضايقه واضحك
مابعرفش احاول احب حد انا من جوايا مش عارفه احبه

****************

متخيله نفسى
فى فصل الخريف
نايمه على ضهرى على الارض فى مكان فاضى فيه شجر بعيد عنى شويه
فى وقت الغروب وضوء الشمس الاحمر ملون كل حاجه حواليا بنفس اللون
وحواليا واقع ورق شجر كتير من الشجر اللى مات بسبب الخريف
ليه بتخيل كده
يمكن لانى شايفه ان جزء من حياتى كده
فى مرحله الخريف و ورقه بيقع حواليا !!!
لكن
مستنيه الربيع عشان يجدد جمال الورق ده

****************

دايما بيبقى فى حياه كل واحد فينا شخصيات مهمه
كل واحد ليه مكانته جوانا
اللى يمكن تزيد او تقل مع مرور الوقت والمواقف والظروف
بس لو حد مشى من حياتك
مفيش حد تانى بيعرف ياخد مكانه ابداً
يمكن التانى ده يعمله مكان اكبر من جواك
بس انه ياخد مكان غيره
وتتصرف معاه بنفس الاسلوب والطريقه بالظبط وتعيد نفس الذكريات
حساها صعبه
كل مكان جوانا اتخلق لشخص معين
لما الشخص ده بيمشى
المكان ده بيتقفل
وبيتكتب عليه
كان هنا...فلان !!

****************

اول مره اكتشف انى عامله المدونه دى من 4 سنين
يمكن قعدت فتره طويله ماكتبش فيها حاجه
ده يخلينى أسال نفسى
انا ليه ماحستش انى عملاها كل الفتره دى!
ليه ماهتمتش بيها!
ليه مش كتبت فيها كتير!

****************

دايما بحاول مش افكر فيكى
اصل انا صراحه ما بصدق يكون مزاجى عدل شويه
مجرد ما بفتكر مزاجى بيتقلب خالص
وانا ماعنديش استعداد لكده
بحاول مافكرش
بحاول مارتبش المواقف اللى حصلت الفتره اللى فاتت
عشان عارفه انى يمكن يمكن يمكن اطلعلك اعذار
او حتى اطلع لنفسى غلطات
عشان كده بفكر فى اى حاجه تانيه
بس الشئ الغريب
انى بلاقى اسمك فى كل حته قدامى
فى قصه أقراها..فى ناس جديده اتعرف عليهم..فى مسلسل بتفرج عليه
هو دى حركه مقصوده من الدنيا والا صدفه بحته بتستهبل شويه؟؟

****************

طول مراحل حياتى كان بتمر عليا صداقات وبتنتهى
نهايه طبيعيه بكل حب سواء لاختلاف ظروفنا او حياتنا
او حتى مكانا
كنت فاكره انى دلوقتى وصلت لمرحله صداقه العمر
بس للاسف الشديد
طلعت غلطانه

36 comments

ريبال بيهس said...

صباح الورد بنت من الزمن دا

كلام والسلام ... أعتقد أنه كلام بس مش أي كلام لأنه غسل كل اللي في نفسك وفي نفس الوقت ريحك لأنك كنت محتاجة تقوليه ...

أحيانا بنمر بمواقف تستلزم نكون قليلين الذوق فيها لكن سبحان الله تطغى أخلاقنا على الموقف فنمشيها بس المصيبة لما نعدي الموقف بتولع النار في داخلنا قهر لأنا سكتنا لأن بعض البشر لا يستحقون منا لحظة إحترام !!!

مش عارف مين دي اللي مش عاوزة تفتكريها بس اللي لاحظته أنك كنتي خايفة تفتكريها عشان ما تحني لها ويضعف قلبك فترجعي لها لأن الواضح في خلاف لكن خوفك هذا أكبر دليل على حبك للشخصية هذي وأتعقد أنها تستحق تسامحيها لو غلطت طالما هذي هي مكانتها في نفسك ...

أربع سنين ماشاء الله ويارب نحتفل بعيدها الخمسين وأنت بصحة وسلامة وتكون صفحة رائعة لكل من يمر بها ..

تحياتي

سواح في ملك اللــــــــــــــــــه- said...

دانتي جواكي غضب جامد اوي ة

تعرفي

الانسان يمتلك ان يمنع نفسه عن اشياء

ولكن لايستطيع ان يمتلك مشاعره

ان يحب هذا او يكره ذاك ليس هو من يقرر

فلااحد يمتلك قلبه

تحياتي

Bent Men ElZaman Da !! said...

ريبال بيهس

صباح الفل على حضرتك :)

ماهو اسمه كلام والسلام عشان مالوش اى علاقه ببعضه
هى حاجات جوايا وخلاص

معاك حق جدا فى كلامك
فى مواقف بتجبرنا اننا نتصرف بطريقه ممكن نندم عليها او حتى نقول اننا كنا ممكن نتصرف بطريقه افضل من كده

المشكله ان بيبقى فى ناس غلطانه ومش مستنيه المسامحه دى :))

شكرا لحضرتك جدا على زوقك
ونورتنى :))

Bent Men ElZaman Da !! said...

سواح في ملك اللــــــــــــــــــه-

لا مش غضب
دى شويه فضفضه بس
الواحد مش بيقدر يتحكم فى قلبه يحب مين والا يكره مين
دى حاجه من عند ربنا كده
هو اللى قادر عليها

شكرا ليك جدا
ومنورنى دايماً :))

ريــــمــــاس said...

صباحك غاردينيا بنت من الزمن دا
اولاً وحشتيني
ثانياً كل سنة ومدونة من نجاح لنجاح
ثالثاً انا فعلا مش معتبره دا كلام والسلام يمكن كل سطور بتشوفيه مش مرتبط بـ السطر التاني يعني سطور فضفضة بكل الي جواكي انما كلها من جوا قلبك ومشاعرك وروحك يعني بتبقى غالية ولازم تكتبيها ولاننا بنحبك نسمعها ونحسها اوي عارفة أصعب حاجة لما تكوني ذوق مع اشخاص ومايقدروش ذوقك انما المهم تبقي حاسة انك عملتي الصح وهو انك تكون بنفس اخلاقك الحلوة معاهم ..اما الانسان الي بتشوفيه في صفحة كتاب او مسلسل او حتى اغنية تفكرك فيه ممكن حبيب وممكن صديقة كل انسان بيدخل حياتنا وبياخذ من مشاعرنا حيفض معانا مهما غاب وماتيأسيش برضو في صداقة في الحياة حتكون صداقة العمر "
؛؛
؛
لروحك عبق الغاردينيا
reemaas

مصطفى سيف said...

ياااااااااااااااه
ده مش كلام والسلام ابدا دي عصارة تجارب وحياة
كلماتك عن الخريف لمست شيء بداخلي وكلماتك عن الشخصيات اللي حجوانا واثرت فينا حسيتها بجد
من اجمل التدوينات اللي قريتها النهاردة
تسلم ايدك بجد

شهرزاد المصرية said...

لا يا عزيزتى دة مش مجرد كلام
واضح إنك متأثرة أوى من صاحبتك دى
و صحيح إن كل علاقة بتنتهى ما حدش بيملا مكانها زى ما قلتى
بس بعد فترة العلاقة نفسها و صاحبها و مكانها بيبقى مجرد ذكرى باهتة جدا
إنتى بعد شوية خبرة أكبر فى الحياة حتكتشفى إن ما فيش حاجة مستاهلة تزعلى عليها
و حتتجاوزى مأزق إن فيه حاجة أو حد يفضل مأثر فيكى على طول
دة التطور الطبيعى للحياة
تحياتى لك

Miss LoZa said...

بحب الكلام الى بيتكتب عشوائى ده لانه بيبقى طالع من القلب :)
انا معاكى جدا فموضوع ان لما حد يجى فحياتنا مش بينفع حد ياخد مكانه
كمان شئ طبيعى جدا انك تشوفى اسمه فكل مكان
هتاخدى وقت شوية على ما تتعودى وتبدأى تدخلى انتى بقه فمرحلة الاستهبال وتعملى مش واخدة بالك
ان شاء الله هتلاقى صداقة العمر بس اهم حاجة احسنى الاختيار وعدو لبعض مش تقفو على الواحدة :)

reemaas said...

عارفه يابنوتة انا كمان كنت متخيله انى وصلت لمرحلة صداقة العمر بس اكتشفت ان مالهاش مراحل هى ممكن تيجى فى اى وقت
بحب اوى بوست الكلاكيت ده ماتتخيليش ازاى

safa7_karmooz said...

:(

:)

:\

نهر الحب said...

كل مكان جوانا اتخلق لشخص معين
لما الشخص ده بيمشى
المكان ده بيتقفل
وبيتكتب عليه
كان هنا...فلان !!

عارفة الجملة دي نزلت علي قلبي كانها علمت فيه وفتحت كل الابواب اللي جواها ناس
:(

بس
مش عارفة اقول ايه تاني

m.hallawa said...

السلام عليكم
طرح طيب جزاكم الله خير
تحياتي

ابراهيم رزق said...

1 عامل الناس بمثل ما تحب ان يعاملوك
2 جميل كل ما فلتيه لكن يجب ان نسامح
3 ضعى فى حسابك ان مرحلة الخريف هى مرحلة اعادة بناء و ليست نهاية مرحلة هى بداية
3 لانه اصبح جزء من تاريخنا اى من حياتنا
4 انها اسئلة بلا اجوبة
5 او انك جزء حقيقى من حياتى
6 او ربما العكس

تحياتى لكلامك

Bent Men ElZman Da !! said...

ريــــمــــاس

ربنا يخليكى يا جميله
ده مش عيد ميلاد المدونه
ده انا افتكرت كده بس :)

زى ما قولتى بالظبط
لازم احنا نحس من جوانا اننا عملنا الصح
بس دايما بنحب نلاقى مقابل الخير خير زيه

ان شاء الله انا مش بيأس خالص :))

ميرسى ليكى يا جميله
ونورتينى :))

Bent Men ElZman Da !! said...

مصطفى سيف

مبسوطه اوووى بجد من كلامك وان التدوينه عجبتك
نورتنى يا دكتور
وميرسى على رأيك جدا :))

Bent Men ElZman Da !! said...

شهرزاد المصرية

كلامك صح جدا انا متفقه معاكى
كل حاجه بتعدى
ومراحل حياتنا بتختلف وبيختلف معاها الاشخاص الموجودين فيها
واحنا نفسنا جزء مننا بيختلف

شكرا لحضرتك جدا :))

Bent Men ElZman Da !! said...

Miss LoZa

طبيعى ان اى حاجه بتاخد تأثير لحد ما ننساها
ميرسى ليكى يا قمر على كلامك
ومبسوطه اوى بزيارتك :))

Bent Men ElZman Da !! said...

reemaas

فعلا مالهاش وقت محدد
وهنفضل طول ما احنا ماشيين فى حياتنا
نفتكر حاجات ومع الوقت ياما تتغير ياما تثبت اكتر

ميرسى ليكى يا نور
ومبسوطه بجد انك بتحبى البوست ده كده

Bent Men ElZman Da !! said...

safa7_karmooz

:))

Bent Men ElZman Da !! said...

نهر الحب

عشان كلنا مقفول جوانا ابواب مكتوب عليها ناس كتير :(

ميرسى ليكى يا جميله
مبسوطه جدا بزيارتك واتمنى تتكرر ان شاء الله

Bent Men ElZman Da !! said...

m.hallawa

شكرا لحضرتك
نورتنى

Bent Men ElZman Da !! said...

ابراهيم رزق

كل حياتنا فى الاخر اسئله بلا اجوبه

شكرا ليك يا استاذ ابراهيم
شرفتنى :))

Mohamed Amer said...

كلام حلو مع ان كل حاجه غير التانية
وعمرنا دايما بيبقي فيه خريف وصيف وشتاء وربيع
والعادي ان الربيع يبقي اقلهم وقتاً
وربنا يجعل كل حياتنا ربيع ان شاء الله
قولوا يارب

The illusionist said...

اسف بس اول كومينت ليا هيكون

الذوق بال ذ مش بال ز

معلش انتى عارفه عقدتى

The illusionist said...

بحب البوستات النفسيه المختصره عن النفس دى

البوست ده عاوز اكتب زيه بالضبط بنفس الخطوات والحاجات دى وباختلاف رؤيتى ليه

ممممممممممممممممممم

ولو غلطانه صلحى غلطك يا دينا

الغلطات كلها بتتصلح

انا شايف كده

Sara said...

دا مش مجرد كلام و السلام

دا عبر عن حاجات كتير جوايا :)

Bent Men ElZman Da !! said...

Mohamed Amer

بس لازم نطلع من كل الفصول واحنا عندنا حاجه الربيع يرويها
ويارب ايامنا كلها تبقى ربيع ان شاء الله
ميرسى ليك على تعليقك
وسعيده جدا بزيارتك واتمنى تتكرر :)

Bent Men ElZman Da !! said...

The illusionist

هههههههه
يا سلام على الدقه يا محمد
ولا تزعل نفسك هاغيرها دلوقتى عشان عقدتك دى
فى غلطات بتتصلح وفى غلطات لا
بس انا هاصلح الغلطه بتاعه الحرف :)

ميرسى ليك اوى
نورتنى

Bent Men ElZman Da !! said...

Sara

مبسوطه ان البوست عجبك وقال حاجه جواكى
ميرسى اوى يا قمر
نورتينى :))

شمس النهار said...

مش بحب اعلق علي البوستات اللي بتبقا طالعه من جوه اوي كده
بحس انتي هعتدي علي صرخت اللي كتبها

بس معايزة اقول لك ان هيجي يوم وتعرفي تسامحي
اما الصداقة مااعتقدش انها موجودة بنفس المعني الللي لازم تكون عليه الا فيما ندر جوجداااااااا كمان

zay maTigy said...

حلو انك لما تكتبى تطلعى اللى جواكى بدون احتيطات او تجهيزات حسا الكلام جاى من قلبك اووى
عجبنى تصويرك لمشهد الخريف من زمان مش شوفت ليكى حاجة .. مش كنت متابعاكى للاسف :(
جميل اوى يا دينا بجد :)

Bent Men ElZman Da !! said...

شمس النهار

بجد كفايه عليا وجود حضرتك وانك تقريلى حاجه بس

فعلا الصداقه مابقتش موجوده زى ما احنا بنتمناها للاسف
بس دايما بيوحشنا احساس الصداقه اللى بجد ده

شكرا جدا لحضرتك :)

Bent Men ElZman Da !! said...

zay maTigy

ميرسى ليكى اوى يا جميله ومبسوطه ان اول بوست تشوفيه ليا يعجبك
منورانى واتمنى تكررى زيارتك تانى هكون مبسوطه اكيد :))

نيللى said...

كلامك فى غايه الروعه بس لازم تعرفى تسامحى عارفه ليه عشان هتحسى انك مرتاحه وككمان طول ماانتى شايله جواكى هيفضل الشخص اللى مضيق وخد حايز فى قلبك وفى تفكيرك ومعطل حياتك ...وكان ممكن فى الوقت ده ممكن تعملى حاجه تسعدك..سمحى ..وربنا كمان بيبحنا نسامح ..اما بالنسبه لو حبينا حد ممكن يتنزع من مكانه لو جرحنا ...وتسلمى ياقمر وعلى كلامك

نيللى said...

بصراحه فيروز دى بتريح الاعصاب اهنئك على اختيارك

Bent Men ElZman Da !! said...

نيللى

انتى اللى كلامك اروع بجد
بس حاسه ان حتى الناس اللى بتجرحنا
فا هما بردو بيسيبوا علامه فى قلبه بتاخد مكانها

ميرسى على زوقك
وسعيده اوى بتعليقك

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget