16 September 2011

ياريت عندنا كده !!

.




شوفت كده بالصدفه حلقه لاوبرا ونيفرى
كانت بتقابل راجل امريكى متجوز اربعه
انا لما شوفت اعلان الحلقه وقالوا انها هتتكلم عن تعدد الزوجات
افتكرت انها هتجيب واحد عربى
بما ان القانون فى امريكا او معظم البلاد الاوروبيه بيمنع ان الشخص يتجوز اكتر من واحده
يعنى لو ثبت لشخص واحد اكثر من زواج على طول بيتحبس

انما لاقتها فى الاخر جايبه واحد امريكى ومتجوز اربعه
وقادر يظهر فى البرنامج ومش خايف من حاجه
هما كلهم مستوعبين الموقف اللى هما فيه  اذا كان هو والا زوجاته الاربعه
وعندهم استعداد يخوضوا اى حاجه 
فى سبيل ان الاسره الكبيره اوى دى تفضل مع بعض
انا صراحه استغربت جدا جدا لما شوفت الراجل ده واللى متجوزهم
 
حسيت ان الراجل ده بيطبق بالظبط اللى الدين الاسلامى قال عليه 
من ناحيه تعدد الزوجات
من حيث العدل بينهم فى المعامله ومعامله اولاده

حتى زوجاته نفسهم
بيتعاملوا مع بعض باسلوب متحضر جدا بطريقه غير معقوله
وبيحطوا حدود لنفسهم  قدام بعض عشان يرعوا مشاعر بعض كويس جدا
الله اعلم هما كانوا بيجملوا نفسهم لانهم قدام التليفزيون والا ده الطبيعى
لكن هما كمان بيظهروا فى احدى برامج الحياه الواقعيه اسمه
sister wives
بيتابعهم فى كل لحظات حياتهم وليه كذا موسم كمان

من ضمن الحاجات اللى حبيتها اوى فى علاقتهم ببعض
سواء هو وزوجاته والا هما اصلا الاربعه مع بعض
اول واحده اتجوزها من 20 سنه وبعدها اتجوز التلاته الباقيين 
واخر واحده من سنه
مش عنده مشكله ان اللى يكون متجوزها دى معاها اطفال من زواج سابق
ويعيشوا مع اولاده
فى واحده من اللى متجوزها دول
سابت شغلها عشان تقعد فى البيت تشوف طلبات العدد الكبير ده
لان اولاده حوالى 16 او 17 ولد وبنت مختلفين الاعمار

لما كمان اتكلموا مع ولاده
ولاده اتكلموا بكل صراحه قالوا السلبيات والايجابيات فى وضعهم
وقالوا كمان ان والدهم فى الاول مش كان بيقضى وقت معاهم كتير
بس حاول يوظف وقته ومكانه عشان يقدر يقعد معاهم اكتر

حبيت فى طريقه الراجل ده 100 حاجه
ازاى قادر يخلى كل زوجه من دول قادره تحبه 
لدرجه انها تتحمل الحاله الخاصه دى
ماهى لازم تكون بتحبه عشان تتحمل ياما هتقتله هو والتلاته التانين
ازاى قادر يسيطر عليهم اصلاً
لان معروف ان المرأه الاوروبيه قويه الشخصيه 
ومش بسهوله الرجل يبقى متحكم فيها كده
ازاى هما قادرين يوصلوا لكده
وازاى اولادهم مبسوطين بيهم كده وعايشين حياه سويه جدا
واخدين بالهم من اختلافات حياتهم عن حياه اى حد غيرهم
ومع ذلك حابين اوووى الاختلافات دى وفخورين بيها



انا طول الحلقه منبهره صراحه ومعجبه جدا بطريقه كل واحد فيهم ومستغربه اكتر
لانى حاسه ان لو شخصيه عربيه اللى المفروض فى شريعتنا الاسلاميه نظام تعدد الزوجات
مش متخيله انه هيكون بالطريقه دى والا بالعدل ده
ياما سمعنا عن حالات تعدد زوجات
بس دايما كان فى حاجه بتفشل فى النص 
اللهم الا كام حاله يعنى من ضمن كذا حاله
 لان بيبقى فى طرف من الاطراف مش قادر يكمل فى المنظومه دى
وسمتها منظومه لان كل اللى فيها لازم يعرف دوره  كويس جدا
ويختار افضل طريقه للتعامل مع باقى الاطراف
اذا كان الزواج الطبيعى اللى هو زوج وزوجه واحده
بيبقى عايزين ياكلوا بعض
اومال لما يبقى فى كذا زوجه هيعملوا ايه !!



دى حلقه من برنامج
Sister Wives

30 comments

ابراهيم رزق said...

انا شاهدت الحلقة
بصى يا ستى لو كان ما شاهدتيه طبيعى لما ظهر مع اوبرا وينفرى
نقدر نعتبرها حالة شاذة تختلف مع مفردات و قوانين الحياة
ما شاهدناه يحتاج مقدرة و تفاهم قليلا ما نجده

اربعة ربنا يعينه الطبيعى يكون فى مستشفى العباسية بواشنطن البلد
هههههههههههه

تحياتى

Bent Men ElZman Da !! said...

ابراهيم رزق

ههههههههههههههههههههه
هو اكيد مايعرفش طريقها المستشفى دى
لازم تكون حاله استثنايه بجد

شكرا لحضرتك يا استاذ ابراهيم :))

نهر الحب said...

بصي يا جميل
انا مقتنعة بحاجة كدة عن المجتمع الأمريكي

انهم بيحبوا يبينوا قد أيه هما ديموقراطيين وقد ايه حياتهم مثالية ومتزنة ومفيهاش مشاكل وعيوب ويبقوا عاوزين يثبتوا للبشرية كلها انهم احسن ناس لكن احساسي ان مش دي الحقيقة

عارفة زي حد عنده عقدة نفسية وبيحاول يداريها
وهو ده اللي خلي اوبرا تجيب الحلقة

لو فكرنا يعقل شوية نلاقي ان الحياة حلاوتها في انها تبقي طبيعية يعني حلوة ووحشة ومش مثالية كدة

:))

سواح في ملك اللــــــــــــــــــه- said...

ه عايز اقول حاجة


الشريعة الاسلامية لم تترك تفصيلة من تفاصيل الحياة

الا وعالجتها

ولكن العيب عندنا في سوء تقدير الشريعة والعمل بها

Miss LoZa said...

يااااااااااه يا دينا
صعب اوى تلاقى الكلام ده عندنا اصلا
سواء كانت حكاية العدل دى
او التفاهم بين الزوجات
لان بطبيعة الراجل الشرقى بيتجوز واحدة جديدة بيفضلها عن القديمة
اكيد مش كله طبعا
كمان الست الشرقية غيورة جدا وزى الفريك
متحبش شريك
هههههههههههه
وانا من البنات بتوع الفريك دول على فكرة
هههههههههههههههه

rona ali said...

اربعه المفتري هههههههههههه

بصي يا قمر هى حاله استثنائيه غريبه فعلا بالمنظر دة

بس هل فعلا لو كان الراجل مصري وزوجاته مصريين كان زمانه انتحر

مش عارفه انا لو مكان واحدة من زوجاته كنت هستحمل ولا لاء الله اعلم :):)

مصطفى سيف الدين said...

سبحان الله ده بيحصل في امريكا في الوقت اللي في ناس عايزين يقننوا الجواز ويخلوه واحدة بس في مصر
على العموم اصلا راجل متهور مش عارف عمل ايه في نفسه
هو اللي يتجوز مرة يكررها؟

Bent Men ElZman Da !! said...

نهر الحب

ماشى انا معاكى انهم عايزين يظهروا مثاليين
بس حتى اوبرا نفسها دايما بتجيب مساؤى كتير فى المجتمع الامريكى و الافريقى وبتحاول تنتقدها وتعالجها

واكيد فى حاجات فى الحياه مش مظبوطه
لان صعب تبقى اى حاجه مثاليه اوى كده انا متاكده من ده

شكرا ليكى جدا
ونورتينى :)

Bent Men ElZman Da !! said...

سواح في ملك اللــــــــــــــــــه-

اكيد كل غلط بيكون مننا احنا

شكرا ليك
ومنورنى دايماً :)

شمس النهار said...

ضحكتيني هدور عليها في اليوتيوب


سي متولي بس من الشمال لليمين بالانجليزي
:))))

Bent Men ElZman Da !! said...

Miss LoZa

لا ماتقلقيش كلنا من البنات بتوع الفريك دول هههههههههههههه
وده لاننا اصلا عارفين ان مفيش واحد هيعدل معانا بالطريقه دى ومش هيحسسنا بنقص فعلا

ميرسى ليكى يا جميله
نورتينى :)

Bent Men ElZman Da !! said...

كلمات من نبع احساسي

مش عارفه هو المشكله فينا اننا مش بنتحمل حاجه
والا ايه بالظبط
بس هو اكيد الراجل ده حاله استثنائيه يعنى

ميرسى ليكى يا حبيبتى
منورانى دايماً :))

Bent Men ElZman Da !! said...

مصطفى سيف

عايزين يقننوه هنا
لان احنا كلنا عارفين ان ماحدش بيقدر يعدل بين زوجتين
وكمان فى اضرار كتير بتحصل للزوجه الاولى نتيجه للزواج التانى ده
لو قادرين نحقق العدل فى كل ده
مش هيبقى فيه تقنين اكيد

شكرا ليك يا دكتور
نورت :)

Bent Men ElZman Da !! said...

شمس النهار

هههههههههههههههه
عجبتنى متولى من الشمال لليمين دى
وادى الحلقه كلها تقدرى تعمليلها دونلود
http://forums.egyup.com/threads/51774

reemaas said...

اول مره اعرف ان من حق الاوربينن يعددوا الزوجات
بس عموما التجربه صعب تعميمها

محمد عبد التواب said...

مدونة ممتازة ومقال رائع وفكر جميل شكرا لك ...

Radwa Ashraf said...

انتى قلتيها بنفسك يا جميلة ..
اذا كان عندنا زوج و زوجة واحدة
و يبقوا عايزين يموتوا بعض .. امال بقى لو اكتر من واحدة
بس انا معتقدش ان ى حياة بالمثالية دى
و بعدين متبقاش حياة لو كلها مثالية .. اكيد فى حاجات وحشة :)
بس عجبنى الموضوع الصراحة :)
تسلم إيدك يا دينا

Bent Men ElZman Da !! said...

reemaas

هو المفروض الموضوع ده ممنوع عندهم
دى حاله استثنائيه اوى

ميرسى ليكى يا نور
نورتينى :)

Bent Men ElZman Da !! said...

محمد عبد التواب

شكرا لحضرتك
شرفنى وجودك

Bent Men ElZman Da !! said...

Radwa Ashraf

هما اكيد فى حاجات فى حياتهم مش بيعشوها بشكل طبيعى
بس فعلا الموضوع ملفت للنظر

ميرسى ليكى يا رضوى
نورتينى :))

sabry abo-omar said...

معلش مش مقتنع بالموضوع دة ومش مصدق مشاعرهم .. شو امريكى عادى واكيد كل يوم بينهم مليون مشكلة الا اذا لغوا مشاعرهم وباقوا اصحاب وخلاص .. ساعتها يبقى خلاص اهى عيشة والسلام.. انا مقتنع ان الحب احساس ديكتاتورى جدا جدا.. تقبلى مرورى

sendbad said...

ربنا سبحانه وتعالي لا يحرم او يحلل شئ الا لحكمة يعلمها فهو يعلم خلقه
هو موضوع جديد ومثير وحالة شاذة خاصة في امريكا

آخر العنقــــــود said...

مش انتِ لوحدك اللي زهلتي
انا كمان مش مستوعبة ازاي في حالة زي دي وفعلا زي ما ذكرتي ان السيدات في الخارج بشكل عام شخصياتهم قوية
بس اتفق مع الرأي اللي بيقول انها حالة مش بتحصل كتير فعلا
موضوع فريد وغير تقليدي
تقبلي تحياتي

The illusionist said...

انا اعترض

الراجل ده مش بجد

الراجل ده خدعه سينمائيه

انا اعترض

وهضمه لقائمه اللى بحقد عليهم

هه

بس

Bent Men ElZman Da !! said...

sabry abo-omar

والله ماحدش مقتنع بالموضوع ده
واكيد فى مشاكل لان مفيش حياه مثاليه
بس فكره انهم يكملوا الحياه مع بعض كده
اكيد فى حاجات بتخليهم قادرين يستحملوا ويكملوا
وانا معاك جدااا فى نقطه ان الحب احساس ديكتاتورى
ده حقيقى فعلا

شكرا لحضرتك
ونورتنى :)

Bent Men ElZman Da !! said...

sendbad

ياريتنا احنا قادرين نطبقها بالمنطق ده

شكرا ليك
ونورتنى :)

Bent Men ElZman Da !! said...

آخر العنقــــــود

كلنا متفقين مع الرأى ده تقريبا
هى حاله شاذه
بس الاغرب انها فى امريكا مش فى دوله عربيه

ميرسى ليكى يا جميله
نورتينى بوجودك :))

Bent Men ElZman Da !! said...

The illusionist

هههههههههههههه
خليك انت قاعد بتحقد كده ههههههههه

وظائف الخالية said...

رائع جدا وممتاز وفكرة رائعة ...

Bent Men ElZman Da !! said...

شكرا ليك :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment