21 September 2011

دنيا التكاتك !!!

.




موضوع التكاتك ده بقى ملفت للنظر جدا
وخصوصا فى الفتره اللى فاتت
لان قبل كده كان ظاهر بنسبه قليله اوى فى الارياف وبعض المحافظات
ومن فتره قريبه بدأ يظهر فى القاهره
وفى بعض المناطق اللى عملتله ترخيصات وبقى تبع مجلس المدينه كمان
زى شبرا الخيمه والوراق وامبابه
ومن فتره قريبه بدأت اشوفه عندنا
ازبهليت صراحه من سيطره التوكتوك  على الشوارع رغم صغر حجمه
يعنى تلاقى التوكتوك من دول ممكن وهو ماشى يدوس على رجل واحد
وعادى جدا يكمل طريقه ولا كأن فى حاجه
ممكن يكون هيلزق فى ميكروباص او اتوبيس 
وعادى بردو جدا يكمل ولا كأن فى حاجه حصلت
ممكن وانت راكبه كده لو الحمل زياده والا حاجه
تلاقيه راح حادف يمين
تنزل تعدله وتركب تانى ويكمل عادى بردو ولا كان فى حاجه

الغريبه فى التوكتوك  بالرغم انه صغير كده ولا يرى بالعين المجرده
الا انه بسم الله ما شاء الله
بياخدو اعداد غريبه جواه
تحس انه مفتوح والا موصل على ميكروباص من الناحيه التانيه مثلا
وهو شكله اصلا مياخدش غير فردين
بس ممكن تلاقى اسره كامله راكبه فيه ومعاهم عفش الشقه كمان لو يحبوا
تكاتك استريتش تقريبا

 
المشكله فى التكاتك دى
انهم بقوا يعملوا ازمه فى المرور غير طبيعيه
اصلا احنا عندنا ازمه فى المرور مالهاش اى حل ممكن
التكاتك  زودتها الضعف تقريبا
لانها كتير وحجمها صغير فا بتدخل فى اى حته 
ومش بتدى فرصه لاى مواصله تانيه
يعنى الازمه الاول كانت فى بتوع الميكروباصات واللى بيعملوه
دلوقتى بقت فى التكاتك وبتوع الميكروباصات بيواجهوا نفس الازمه معانا
 
محافظ القاهره اصدر قرار بمنع وجود التكاتك فى محافظه القاهره نهائياُ
واى توكتوك هيتمسك هيتصادر على طول
وبيطالبهم انهم يروحوا اى مكان فى الارياف افضل ليهم
القرار ده ليه عيوبه ومميزاته
مميزاته
انه هيساعدوا الى حد ما فى حل جزء من ازمه المرور اللى خنقتنا كلنا
عيوبه
ان الشباب اللى بيشتغلوا على التكاتك دى هيلاقوا شغل تانى فين؟؟
وخصوصا ان صعب بتوع التكاتك اللى فى الارياف 
يدخلوا عليهم اى حد غريب من محافظات تانيه
وياخدوا شغلهم
زى ما بيقولوا كل واحد بيشتغل فى منطقته ومش هيخلى حد غريب ياخد مكانه
وبعدين الاهم بقى
هو على اساس ايه كانوا بيرخصوا للتكاتك الاول وبياخدوا نمر 
وبيمشوا ولا كأنهم ملاكى
ودلوقتى فجأه مش عايزين يشوفوا ولا واحد منهم فى الشارع!!

38 comments

Anonymous said...

حلو مضوع التوتوك الاستريتش ده :)
والله يا بنتي يا ريت مشكلة المرور على قد التكاتك...عايزه أقولك أتوبيسات المدارس عاملين أحلى شغل :)

تحياتي ليكي

شيرين سامي

Bent Men ElZman Da !! said...

لا موصوع المرور فى المدارس ده بيبقى مأساه بجد
وتخيلى ان دلوقتى اصلا فى اعتصامات جزئيه فى هيئه النقل
اومال لو كانوا كلهم نازلين عادى كان ايه اللى هيحصل !!

ميرسى ليكى يا شيرين نورتينى :))

مصطفى سيف الدين said...

مشكلة التكاتك مشكلة عويصة للاسف التكاتك بتتسبب في حوادث كتير خصوصا اللي بيسوقوها اطفال صغيرة سنهم ممكن يكون عشر سنين او اقل معندهمش خبرة بالسواقة
في رايي لازم التقنين ولاازم الترخيص وطرق رادعة للمخالفات بالرغم من صعوبتها لان التكاتك بيكثر في العشوائيات والاماكن الشعبية الصعب السيطرة عليها ووضع لجان
الحكاية مش ناس اتقطع عيشها بس لازم نظام
ولازم تقنين
تحياتي

ريــــمــــاس said...

مساء الغاردينيا
طبعا انا لاشفته ولا بعرفه غير منك دلوقتي بس مش عارفه ليه تخيلته خطير وممكن حد ينحدف منه دا على كلامك طبعا يارب تنحل الأزمة دي "
؛؛
؛
لروحك عبق الغاردينيا
كانت هنا
reemaas

Miss LoZa said...

هههههههههههههههههههه
ايه يا دينا بقه حرام عليكى مالك مضايقة من التوكتوك كده ليه
والله ده سكر اصلا
هههههههههههههههههههه
كفاية شكله وحجمه يا خلاسى بجد اصلا
هههههههههههههههههههه
عامة هما اه فعلا عاملين ازمة كبيرة
بصى هما ممكن يروحو مناطق قريبة يعنى مش لازم ارياف سفر

سواح في ملك اللــــــــــــــــــه- said...

التوكتوك

نسيتي تقولي اهم حاجة

السماعات اللي مركبينها دي وبيشغلوا عليها

الام بي ثري

تحيتي

Bent Men ElZman Da !! said...

مصطفى سيف الدين

ماهو عشان مفيش مراقبه وقوانين رادعه من الاول
اعداد التكاتك زادت اوى وكل واحد عايز يشتغل يروح يجيب تكتوك ويشتغل عليه
عشان مفيش رقيب من الاول خالص
فا صعب دلوقتى يقدروا يتعاملوا معاهم بسهوله

شكرا ليك على رأيك
وشرفتنى بوجودك :)

Bent Men ElZman Da !! said...

ريــــمــــاس

شوفتى بقى يا ريماس
وريتك اللى عمرك ما شوفتيه ههههههههههه

نورتينى يا جميله
وصباحك سكر :)

Bent Men ElZman Da !! said...

Miss LoZa

واضح انك معجبه خالص بالتكاتك يا لوزه ههههههههههههههههههههههههه
ماهو زى ما قولت
ماحدش هيرضى ان ناس جديده تيجى من بره تشتغل فى منطقتهم
وخصوصا ان فى معظم المحافظات فى كل منطقه الناس بتبقى عارفه بعضها

ميرسى ليكى يا قمر
نورتينى بوجودك :)

Bent Men ElZman Da !! said...

سواح في ملك اللــــــــــــــــــه-

لا حكايه الاغانى اللى بيشتغلوها
والديكورات اللى بتبقى فيه التوكتوك من دول قصه تانيه
والا الكلاكس بتاعهم بقى
اللى يحسس الواحد ان فى مقطوره جايه مش توكتوك
هما بيعملوا الكلاكس ده عشان عقده النقص دى تقريبا :D

شكرا ليك
ومنورنى دايما :)

Casper said...

التكاتك فعلا صنعت أزمة جديدة في المرور
لا أعلم متى ستحل

=======

بوست متميز
بالتوفيق

ابراهيم رزق said...

انتى عارفة انهم بيفننوا فى راحة الزبون
يعنى بيروحوا اى حتة ممكن يوصلوا الزبون لحد السرير

اعتقد يجب ان يحاسب من ادخل التوك توك و اعتقد انه مشرف فى طرة يجب ان يؤخذ منه غرامة كبيرة و يعوض هؤلاء الغلابة

تحياتى

وجع البنفسج said...

فعلا انتشرت التكاتك في مصر بصورة مش طبيعية ، على فكرة احنا كمان عندنا تكاتك بس من نوعية ثانية خالص ، التكتك عندنا عبارة عن موتوسيكل ووراءه مجرور ويستعمل لنقل البضائع والناس .. بس في نوع من الخطر على الحياة وتسبب في مقتل العديد

ربنا يبعد عنكم الشر ويبعد عنكم التكاتك

دمتي بخير وطاب مساؤك

FAW said...

إسمحيلي بس أقول رأيي في جملة غريبة قوي "بالنسبة لي"

الشباب اللي بيشتغلوا عالتكاتك هيلاقوا شغل تاني فين ؟

أصلا التوك توك ده مش مرخص , وملوش خط سير , وملوش تعريفة , ومن الآخر كده كائن غير شرعي واللي راكبه عارف إنه مخالف ومعرض في أي وقت شغله يقف , لما المرور والمحافظة بقي يفوقوا من الغيبوبة ويمنعوه بالقوة , المفروض إني كمواطن أساعدهم مش أسأل السؤال ده , ماهو لو كل فعل مخالف بيشغل ناس ولما نقضي عليه هيقطع عيش ناس هنتكلم عليه , يبقي نشرع السرقة والمخدرات بقي عشان ما نقطعش عيش ناس
مطلوب توفير فرص عمل عامة , بس مش مطلوب توفير فرص عمل بديلة للأعمال غير المشروعة بعد القضاء عليها

تحياتي . .

sendbad said...

وهو مين اللي دخل التوكتوك مصر من الاساس ولمصلحة مين نيجب المشكلة من اولها عشان نفهم
لله الامر من قبل ومن بعد

ريبال بيهس said...

مساء الورد

كنت أظنها حلت أزمة الزحمة في القاهرة

ولكن الواضح من كلامك أنها تسببت بزيادة

أكبر وفاقمت من المشكلة ولكن ليس بحل

أن يلغو كل الوظائف المترتبة على هذي النوعية

من المواصلات وهم بأنفسهم سمحوا بها ...

أعتقد مصر بحاجة لحلول أنجع من التكاتك ..

تحياتي وإحترامي

شمس النهار said...

التكاتك دي ماعرفتش مشكلتها الا لما رحت مشوار في امبابة حسيت بالمأساه
ده المفروض يتلغي بالكااااااامل

كلمات من نبع احساسي said...

ماهما كدة يصنعو الازمه ويجيبه واحد جديد يحاول يحلها وهى اصلا ملهاش حل غير قطع عيش الشباب وتحصل اضطرابات بس القرار بيكون صائب لكن مشكلته ان الغلط دة بقاله كتير فيكون الشاب اخد علي الشغلانه ورزقها ولو سحبتي دة من تحت رجله لي حق يثور ويكسر الدنيا

آخر العنقــــــود said...

تكاتك استريتش تقريبا
:D
أضحك الله سنك يا دينا
فعلا موضوع التكاتك ده صعب وزي ما قلتي له عيوب ومميزات
بس مشكلة المرور في مصر لا تتلخص في التكاتك فحسب
بل في التكاتك و(المكروباظ) وحتى سيارات الملاكي بسبب عددها الكبير اللي مابقاش يكفي في الشوراع فنجد صف تالت وخلافه
هى مشكلة عويصة مشكلة المرور في مصر والحقيقة مش عارفه هتتحل امتى

نيللى said...

ماهو ده بقى عيب التقليد الاعمى..يعنى الهند وله الصين ماعرفش مين اللى فيهم اخترعوا عامله عشان الاماكن الضيقه مش الواسعه ..تصدقى الموقف ده فكرنى لما محمد على حب يزين النيل بورد النيل راح جابوا وعملنا مشكله فى النيل
نيللى

iـــــــــــsــــــــــlــــــــــــaـــــــــm said...

التوكتوك ده حاجه حلوه ووحشه فى نفس الوقت

احنا اللى مبنعرفش نستخدم حاجه

عارفه لو فى نظام والله ما هيبقى فى مشاكل فى حاجه

لكن احنا كل حاجه عندنا بالدراع

تلاقى التوكتوك داخل وسط العربيات والناس بمنتهى الغشوميه وكأن اللى راكبه راكب فيرارى ما شاء الله عليه

يااااااه لو نفكر نتحضر شويه ونرتقى باخلاقنا

والذنب مش ذنب التوكتوك والله

الذنب ذنب الناس اللى ميعرفوش شىء عن الانسانيه

محتاجين نألف كتاب نسميه كيف يكون الانسان

ونطبعه ونوزعه على شعب مصر كلهم

تحياتى

Bent Men ElZman Da !! said...

Casper

احنا فى انتظار انها تتحل

شكرا ليك على زوقك
ونورتنى :)

Bent Men ElZman Da !! said...

ابراهيم رزق

اه والله ماهما عشان صغيرين كده والواحد مش بيشوفهم فا بيعدوا من اى حته وبيوصلوا الراكب لحد باب البيت دى ميزتهم الصراحه
غلبوا التاكسى يعنى

انا ماعرفش مين دخلهم
بس لو حضرتك بتقول ان اللى دخلهم فى طره
يبقى لازم ده يبقى من ضمن الجرائم اللى يتحاسب عليها

شكرا لحضرتك على رأيك
ونورتنى بوجودك :)

Bent Men ElZman Da !! said...

وجع البنفسج

يعنى المشكله موجوده فى كل حته
بس باختلاف الاشكال والخطر واحد

شكرا لحضرتك
ونورتينى :))

Bent Men ElZman Da !! said...

FAW

انا اكيد مش معترضه على كلامك
بس لو خدت بالك
انا كنت بتكلم ان اصلا فى جزء مرخص من التكاتك دى فى بعض المناطق
يعنى مجلس المدينه مديهم تراخيص وخط سير معين وهما فعلا ماشيين عليه وكل توكتوك ليه نمر كمان
يعنى ادوهم الحق بنفسهم انهم يشتغلوا ويكون ده شغل اساسى ليهم
يجوا بعد كده ويلغوه
يبقى بيحطوا الشباب فى حته ان عيشهم يتقطع
وعشان كده قولت على اساس ايه كانوا بيرخصوه الاول وبعدين يامروا بمنعه؟!!
طب كانوا ليه رخصوه من البدايه اصلا ؟؟؟
ياريت حضرتك تكون فهمتنى انا بتكلم فى انهى نقطه بالظبط
لان انا اكيد زى ناس كتير مش عاجبنى منظر الشوارع والزحمه اللى بتبقى حاصله بسبب التكاتك

شكرا ليك على رأيك
وشرفتنى :)

Bent Men ElZman Da !! said...

sendbad

ماحدش عارف للاسف كان مين اللى دخله ولا ايه مصلحته فى كده

شكرا لحضرتك
ونورتنى :)

reemaas said...

انك يكون عندك مشكله وتسبيها لحد ماتنفجر وبعدين تقولى عاوزة اشيلها وكانها ماحصلتش ده غباء ادارى واضح
مشروع التكتك انا شيفاه مفيد جدا لو اتنظم ومفيد فى احياء القاهرة الضيقه لو اتظبط وتم الاعتراف بيه

Bent Men ElZman Da !! said...

ريبال بيهس

مساء النور
للاسف التكاتك زودت الازمه مش حلتها
وده فعلا اللى قولته
انهم رخصولهم الاول
ودلوقتى بيلغوه
اكيد كان حد بيستفاد من الحكايه دى
من ضمن الفساد الكتير اللى كان بيحصل فى البلد
والزحمه هنا مش حلها التكاتك
كلها حاجات كتير تانيه اقلها اوووى اداره المرور

شكرا لحضرتك
ونورتنى بوجودك :)

Bent Men ElZman Da !! said...

شمس النهار

معاكى حق والله
منظر الشارع بيبقى رهيب
الواحد مابيعرفش يمشى حتى

شكرا لحضرتك
وشرفتينى بجد :)
ومبسوطه ان التعليقات بقت تتنشر بسهوله :)

Bent Men ElZman Da !! said...

كلمات من نبع احساسي

بالظبط يا رنا زى ما قولتى
المشكله فى حته ان الغلط بقاله كتير دى
يعنى زى ما احنا بنحاول نغير البلد بالتدريج
ماينفعش نقول لا كله يتغير دلوقتى وحالا
لان ماينفعش كان ليها وجود واضح جدا من فتره
وفجأه عايز تمحيها ولا كأن ليها وجود

شكرا ليكى يا جميله
منورانى دايما :)

Bent Men ElZman Da !! said...

آخر العنقــــــود

ربنا يخليكى يا قمر :)

المشكله فى المرور بتكون فى جميع وسائل المواصلات
والطرق وعدم تنظيمها
مع تخازل اداره المرور نفسها فى انها تطبق القوانين والاهتمام بتنظيم المرور
اكيد ده كله هيتغير بس مع الوقت
مش فجأه

شكرا ليكى يا جميله
نورتينى :))

Bent Men ElZman Da !! said...

نيللى

معاكى حق جدا يا نيللى
فعلا التوكتوك ده حل حلو للمناطق اللى ماينفعش يدخلها مواصلات رئيسيه
انما مش فى كل الاماكن

ميرسى ليكى
وشرفتينى بوجودك :)

Bent Men ElZman Da !! said...

iـــــــــــsــــــــــlــــــــــــaـــــــــm

انت عارف ليه يا اسلام
عشان احنا عشنا وقت طويل اوووى
فاهمين ان الواحد مش هياخد حقه ولا يمشى فى البلد دى الا بالدراع
زى ما غيرنا كتير عملوا وخدوا مننا كتيييييير اوى
محتاجين وقت على ما نفهم ان ده غلط
وانا قولت فى كلامى بردو ان السبب ان تلاقى التوكتوك داخل وسط الناس ممكن يخبط فى ميكروباص والا يدوس على واحد وعادى مفيش حاجه
ان شاء الله يكون فى حل فينا نفسنا وفى التكاتك دى كمان

شكرا ليك على رأيك
ونورتنى :)

Bent Men ElZman Da !! said...

reemaas

والله قولتى المفيد يا نور
الواحد مستغبى اوى حكايه انهم سابوا الموضوع ده لحد ما بقى فى كل حته فى مصر
وعايزين فجأه دلوقتى يخلوه يختفى ومش هيقدروا يعملوا كده
وهو مفيد فعلا فى بعض المناطق اللى مش فيها مواصلات
وماكنتش الازمه دى متلاحظه لما كان التكاتك دى مثلا فى الارياف وبعض المحافظات

شكرا ليكى يا جميله
نورتينى :)

سبايدرمان said...

ما هو ده احد بلاوي النظام الفاسد الى فات

Bent Men ElZman Da !! said...

سبايدرمان

وبنتحمل نتيجته لدلوقتى للاسف

شكرا ليك

m.hallawa said...

السلام عليكم دينا
علي فكرة بلاد كثيرة بيتستعمل التوكتك
ولكن بنظام !!!
مثلا هنا في هولندا
استخدام العجل والمراكب الهوائية كثير
ولهم مكان مخصص علي جانب الطريق لونة مختلف عن الطريق ويوجد خط فاصل بينهم ويمنع الخروج عنة الا يتعرض للغرامة !!!
أن شاء الله مصر بعد الثورة سوف يتغير حالها للاحسن
تحياتي

Bent Men ElZman Da !! said...

m.hallawa

وعليكم السلام ورحمه الله وبركاته
ماهى الفكره فى النظام دى
فى حاجات نقدر نحل بيها ازمه المرور بس المهم النظام
ازاى نمشى بنظام عليها
ان شاء الله احنا مستنين ان بعد الثوره كل حاجه تتغير بالتدريج

شكرا لحضرتك
نورتنى :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget