06 October 2011

عريس تفصيل !!

.




قريت خبر فى جريده من الجرايد من قريب
عن واحده كانت مرشحه نفسها لمجلس النواب فى احدى الدول العربيه
(بدون ذكر اسم الدوله رغم انها مذكوره فى الخبر)
السيده دى طالبت من فتره باصدار قانون جديد
بينص على اعاده نظام الجوارى لمجتمعها
واستندت فى كده ان لازم يكونوا الجوارى دى 
من سبايا حروب لدول اسلاميه من دوله غير اسلاميه !!
على ان تكون الواحده ب 2500 دينار !!
وده عشان تقلل نسبه الزنا والعلاقات المحرمه

ياريتها جت على كده
التقيل جاى لسه اهو
دى كمان بتطالب بطلب اعجب واغرب
وهو السماح للسيدات من بلدها العربيه بشراء ازاواج !!!
اه والنبى شراء ازاواج
بشرط انهم يكونوا من دوله اسلاميه بردو ويكونوا "حلوين"
ولا كانها هتروح تجيبهم من سوبر ماركت مثلا
ادينى اتنين والنبى
واحد ابيض وعنيه زرقاء والتانى قمحاوى وشعره اسود!!

وكانت فكرتها الجهنميه دى بسبب زياده العنوسه فى بلدها
وارتفاع نسبه الطلاق
زيها زى كل الدول العربيه يعنى مش حاجه زياده عننا

لا وكمان طالباه بمواصفات محدده 
فى انه يسيب للى "هتشتريه" كل التصرف فيه وفى علاقتهم وجوازهم
ويكون مؤدب ولبق ومتواضع وشكله حلو وينفذ طلباتها من غير نقاش
ده طبعا غير الدلع اللى لازم وحتما يدلعهولها
والنبى ده مش اسمه استهبال؟
ماهو لو كده ماكنش حد غلب
اصله مش مصنع بيصنعلك عرسان بشكل واحد واسطمبه واحده
وبيعملهالك باشكال مثاليه
دى كده بتطلب انسان آلى مش بنى ادم ولا زوج يعيش معاها حياه طبيعيه
زى اى زواج بين اى اتنين

انا صراحه مستغربه من تفكير الست دى
دماغها رايحه منها اوى ومش راجعه خالص
ياما هى معقده نفسياً وناويه تخلى كل بنات بلدها معقدين زيها
ماهو لو كل واحده اطلقت وفكرت تشترى زوج ده لو فى ماكنش حد غلب
وكانت كل واحده تاخدها من قصيرها وتدورلها على عريس تفصيل 
يكون على مقاسها 
وكده مش كان هيبقى فى طلاق من اصله

مفيش حد فينا كامل
وبالتالى ماينفعش نطلب من اللى بنتعامل معاهم
يكونوا كاملين فى كل تعاملاتهم معانا
وخصوصا بقى فى حكايه الجواز دى
ما انتى اكيد مليانه عيوب
ليه المفروض العريس اللى قدامك ده يبقى كامل الاوصاف
على اساس ايه يعنى؟
ما انتى اصلا مش كامله الاوصاف قدامه
بقى فى ناس كتير دماغهم بتخرف على فكره !!

39 comments

سواح في ملك اللــــــــــــــــــه- said...

صباح الفل

الترف الزائد بيخللي العقول تضرب

ماهي في البلد التي لم تذكري اسمها

لايفعلون شيئا غير الانفاق من اموال النفط

ويملكون فراغا

يقوموا بقي يدوروالهم علي عريس

مقاس 42 ن

وبعدين دي لازم يكشفوا

عليها نفسيا

وظيفة مصر said...

مدونة ممتازة وكلام جميل شكرا لك ...

Bent Men ElZman Da !! said...

سواح في ملك اللــــــــــــــــــه-

صباح النور

مش بس الترف
كمان الفراغ بيولد المعجزات
ودى نتيحته

شكرا ليك جدا على متابعتك الدائمه
منورنى :)

Bent Men ElZman Da !! said...

وظيفة مصر

شكرا ليك على زيارتك

مصطفى سيف الدين said...

هههههههههههههه
يا صباح الدماغ العالي والروقان
واضح كده والله اعلم الست دي في البالالا خالص
ممكن يطبقولنا حكاية الجواري دي فكرتها حلوة :)
بس ازواج تفصيل؟ ليه يعني
وبعدين الراجل ازاي هيبقى له كلمة في بيته وهو نفسه بايع نفسه
تحياتي

Bent Men ElZman Da !! said...

مصطفى سيف الدين

بردو نفس الاحساس اللى حسيته من ناحيه الست دى
بس اشمعنا وافقت يطبقوا ومش وافقت على العريس بقىىىى :D
ميرسى ليك يا دكتور
نورتنى :)

شمس النهار said...

طيب تتشطر علي الدول الغير اسلامية وتحاربهم
واصلا تدور علي رجالة تحارب بيهم اذا كان مش عارفين نحرر فلسطين
وكمان لازم الدول دي مايكونوش اهل كتاب
ماملكت ايمانهم مش مسلمة ولا كتابية وان اسلمت يحق لها ان تستمر كزوجة او يسرحها ويعتقها حيث لا عبودية في الاسلام
:))

Bent Men ElZman Da !! said...

شمس النهار

والله حضرتك جبتى المفيد
كل ده غير ان اى راجل مش هيرضى بحاجه زى دى

شكرا لحضرتك جدا :)

Miss LoZa said...

ههههههههههههههههههههههههههههههههههههههههه
يا نهار ابيض على المسخرة اصلا
هههههههههههههههههههههه
وانا الى كنت فاكرة نفسى اكتر واحدة ممكن تخترع افكار علشان تتجوز !!
دانا طلعت ولا حاجة جنبها اصلا
هههههههههههههههههه
لو الموضوع ده مشى ابقى قوليلى يا دينا والنبى علشان اروح اشتريلى واحد
ومش لازم يكون كامل
ممكن يبقى قاسم او ماجد
عادى يعنى
ههههههههههههههههههههه
بنات فاضية والله معندهومش حاجات تشغلهم
هههههههههههههههههههههه

rona ali said...

لا اله الا الله

دة ايه الفكر الفظيع دة

ودة تفكيرها لوحدها

ولا جابت حد يفكرلها

بجد يعنى لو دة كان الحل مكنش حد غلب

سبايدرمان said...

اهااا انا سمعت عتها
و الغريب ان فيه احد الفضائيات المصريه استضافتها برضه عشان تتكلم معاها
يلا هو الكلام بقي عليه جمرك
كل واحد بيقول اي كلام في كلام دلوقتي

kal ho na ho said...

عفوا ... أنا مش حـ رد على أي تعليق من الواضح أنه أساء لبلدي وبالتالي لي أنا شخصيا..

المرأة المذكورة في بوستك قبل كل شيء هي امرأة ربنا بس اللي يعلم بالظروف التي واجهتها في حياتها ..ضغطة زر واحدة على أحد مقاطعها في اليوتيوب وحـ تحكمي على أنها إنسانة وُضعت للتريقة عليها..و لا أظن أن إنسانيتي تسمحلي أتريق على انسان سوي..فما بالك بإنسانة تستحق الشفقة والدعاء لها بالشفاء والستر وكف ألسنة الناس في الخوض بسيرتها..
ولأن الكثير تجردوا من إنسانيتهم وأرادوا عمل أراجوز ينضحك عليه فقط من أجل جمع أكبر عدد مشاهدين أو قراء..

آسفة والله على المداخلة لكن حبيت أبين الحقيقة..أرجو أن تتقبلي كامل احترامي
.
.

ودمتم

AHMED SAMIR said...

حلو اقتراح الجواري دة......هههههههههههههه

Bent Men ElZman Da !! said...

Miss LoZa

هههههههههههههههه
والله انتى عسل اوى
ماتقلقيش اول ما الموضوع يمشى هاقولك على طول
نورتينى يا جميله :)

Bent Men ElZman Da !! said...

rona ali

لا دى عامله اكتفاء ذاتى

ميرسى يا جميله على رأيك
نورتينى :)

Bent Men ElZman Da !! said...

سبايدرمان

لا الفضائيات دلوقتى بقت تجيب اى حد يتكلم
المهم انه يشد الناس للكلام ده
سواء بالاعتراض او بالقبول

ميرسى ليك على رأيك
نورتينى :)

Bent Men ElZman Da !! said...

kal ho na ho

اهلا بيكى
انا مش مضايقه بالعكس مبسوطه بتعليقك جدا
المهم نسمع الرأى والرأى الاخر

لو خدتى بالك انا مش حبيت اذكر اسم البلد
عشان يبقى التعليق بعيداً عن طبيعه البلد نفسها
ويكون الموضوع على الشخصيه دى وأراها
اللى اكيد كلنا معترفين انها غريبه

حتى لو كانت مريضه نفسياً او غير مسئوله عن كلامها
يبقى مش المفروض انها تفرض رأيها على الكل وتطالب بأصدار قانون كمان
ده غير ان بيتهيألى تفكيرها المفروض يبقى ملتزم عن كده
وخصوصا انه تفكير مش منطقى نهائى

لو كان اى لقاء تليفزيونى عمل من الانسانه دى اراجوز
بيتهيالى هى اللى سمحت بكده
لانى حاسه ان أرائها دى لمجرد الشهره ولفت النظر مش اكتر

اسفه لو كان البوست ده فى اى اسائه لبلدك
وانا تعمدت عدم ذكر اسم البلد للسبب ده

شكرا ليكى على زيارتك وتعليقك
نورتينى :)

Bent Men ElZman Da !! said...

AHMED SAMIR

انا بردو قولت الموضوع ده هيعجب الولاد اوى :D

Casper said...

شر البلية ما يضحك
:d

reemaas said...

طب والحكايه دى شغاله؟
ههههههههههههههههههههههههههههههه

وعلى كده العريس واقف بكام

لو غالى نستنى شويه على مايرخصوا يعنى

ياااااااااااااااارب صبرنى

ابراهيم رزق said...

طبعا مفروض من الدول اللى هتصدر ازواج يجهزوا مزرعة لتجهيز الازواج طبقا للمواصفات القياسية المطلوبة
عشان مفيش حاجة تتصدر و ترجع
عشان معروف بواقى التصدير بتباع بنصف الزمن
عجبى

تحياتى

واحد من الناس said...

بيتهيألي الست دي ممكن تتعاون مع الصين

نمهي الصين دلوقتي بتصدر كل حاجه وأي حاجه

تخيلي كده كونتينر جاي من الصين مليان عرسان

ويعملوا مزاد بأى وخلي البنات تفرح

ربنا يشفي كل المجانين

ويجوز كل البنات قبل ما يبقوا زيها

تحياتي

Bent Men ElZman Da !! said...

Casper

فعلا والله :D

نورتنى

Bent Men ElZman Da !! said...

reemaas

نستنى شويه يمكن ينزلوا فى الاوكازيون
معلش استحملى يا نور
ياما هنشوف :D

نورتينى يا قمر

Bent Men ElZman Da !! said...

ابراهيم رزق

ههههههههههههه
والله فكره بردو :D

شكرا لحضرتك
ونورتنى :)

Bent Men ElZman Da !! said...

واحد من الناس

يااارب عشان نترحم من الافكار دى شويه

شكرا ليك
ونورتنى :)

EMA said...

بس هقو الله حاجة غريبة اوى اول مرة اسمع الخبردا بس نقول ايه ربنا يهدي بجد

و ربنا ما يبلينا بحاجة زى كدة عندنا البلد مش ناقصة و الله

تسلمي يا بنوتة على الطرح و الموضوع الظريف و المؤلم فى نفس ذات الوقت هههههههه

تقبلي مروري و متابعتي

safa7_karmooz said...

تعتبر عاقلة مقارنة ببلاوى سمعتها من ستات كتير :D

شهرزاد المصرية said...

مش قادرة أقولك ضحكت أد إيه لما قريت موضوع الست دى اللى عايزة الستات تشترى عرسان
و لو ان فيه حاجة شبه كدة ساعات بتحصل
لما واحدة غنية تتجوز واحد فقير
حتى و هى عارفة انه مش بيحبها و طمعان فى فلوسها بس بتوافق
عسان بتحبه أو عشان تهرب من العنوسة

تحياتى

وظائف فى مصر said...

مدونة رائعة وممتازة شكرا لك ...

Bent Men ElZman Da !! said...

EMA

ميرسى ليكى انتى يا جميله على رأيك
ونورتينى بزيارتك :)

Bent Men ElZman Da !! said...

safa7_karmooz

هو بجد فى بلاوى اكتر من كده؟!!؟

Bent Men ElZman Da !! said...

شهرزاد المصرية

مهما كان فى ست كده
لكن مش بتحب تقولها صريحه
انها بتشترى راجل بفلوسها لمجرد انها تعدى مرحله العنوسه دى
انما ان ست تقولها صريحه وتطلب تشترى عريس
دى اللى جديده فعلا

شكرا لحضرتك وشرفتينى :)

Bent Men ElZman Da !! said...

وظائف فى مصر

شكرا ليك على الزياره

فشكووول said...

اصل الناس فى البلاد دى من كتر الفلوس بقوا مخهم طاقق وفاضيين ومافيش عندهم مشكله الا انهم يبحثوا عن ازواج والافكار الطاقق فى دماغهم

reemaas said...

هو انتى مختفيه ولا دى تهيئات؟

Bent Men ElZman Da !! said...

فشكووول

لا هما بيستخدموا الافكار دى للشهره فى الغالب مش اكتر
وبما ان الفلوس متوفره بالطريقه دى
فا يمكن افتكرت ان من حقها تشترى اى حاجه حتى زوج ليها

شكرا لحضرتك
ونورتنى :)

Bent Men ElZman Da !! said...

reemaas

لا اطمنى على نفسك مش بيتهيألك ولا حاجه ههههههههه
مش كنت بقدر ادخل بس بقالى شويه
وميرسى اوووى يا نور على سؤالك بجد :))

وظائف خالية مصر said...

ممتاز جدا وفكر جميل بالتوفيق انشاء الله المدونة جميلة قوى ..

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget