20 October 2011

كلام والسلام .. كلاكيت تاسع مره

.




كل ما اقعد اتفرج على الكم الهائل الغير طبيعى
من صورنا فى كل خروجه كنا بنخرجها
دايما بتطلع على وشى فجاه ابتسامه فيها شويه سخريه !!
مش عارفه ده من هبلى؟
والا من قله عقلك؟؟

*****************

بضايق اووى لما اخسر حاجه جميله فى حياتى
حتى لو كان ده عشان حاجه اجمل

***************

انا بحب التغيير او دايما بقول كده
وبزهق اوى من الروتين وان حياتى تفضل ماشيه على نظام واحد
بس فى المقابل
انا بترعب من التغير
بخاف ان الحاجات من حواليا تتغير ومابقاش عرفاها
بحب كل حاجه اتعودت عليها
بخاف اوى لو داخله على تغيير جذرى فى حياتى
عشان كده وقتها بتلغبط ومش بقدر استوعب اى حاجه بسرعه

***************

هو مش الكلام اللى فوق ده
يحسسنى انى متناقضه؟
والا يعنى خايفه ارسالى على رأى؟؟
والا اكيد مثلا انا مجنونه ؟؟؟

****************

بحب لما يكون عندى ورق قديم مش عايزاه مش ارميه على طول
بس بقعد اقطعه لحتت صغيره
بيريحنى ده اكتر
مش عارفه دى حاله نفسيه والا ايه ..!!

****************

بمناسبه الحاله النفسيه
وانا سرحانه
بقعد ارسم مربعات واقسمها لمثلثات
ده معناه ان حالتى خطيره؟
والا فى امل ابقى كويسه؟؟

****************

احنا بكل الكيان ده وكل حياتنا
بنتلخص فى شويه ورق
ورقه ميلاد
شهادات
شويه صور
على شويه ورق تانى حسب حياه كل واحد فينا
وصولاً الى ورقتنا الاخيره
وهى شهاده الوفاه
طول ما الواحد مننا عايش 
من غير اى ورقه فى حياته
مش هيبقى هوه
حتى لما بنموت
مش بيفضل مننا غير شويه ورق

 ****************

مهما بيعدى وقت برضى فيه بأى حاجه
ومهما اعدى كل اللى بيمر عليا حلو او وحش
بس بوصل فى فتره
انى مش عايزه افكر فى مسئوليه حد ولا حال حد
عايزه وقت ليا
ليا انا وبس
اعمل فيه كل حاجه بحبها وعايزه اعملها
فى دى
انا عارفه انى انانيه !!

 ****************

بستريح جدا لما اى موضوع في حياتى يكون فيه مشاكل

يتقفل ويتحط ليه نهايه لا راجعه فيها
حتى لو كانت النهايه دى مش على مزاجى وهتضايقنى
بس انا مش بحب الابواب المواربه

****************

جوايا حاجه
نفسى تريحنى
طب بلاش تريحنى
بس تسبنى فى حالى !!


38 comments

nour alqamar said...

ههههههههه الحركات الى عندك مش انتى بس صدقنى
وانا كمان هيك ..
مع تحياتى \نور

سواح في ملك اللــــــــــــــــــه- said...

ايه ده يابنتي

الاعراض اللي عندك دي بيمر بيها كل انسان

هي فترات من الحياة

كل واحد بياخد دوره في الطابور

في حد بيبقي زيادة شوية

وفيه حد بياخد دوره وينتقل للي بعده

(انا خلقنا الانسان في كبد )

صدق الله العظيم

تحيتي

ابراهيم رزق said...

فضفضة صادقة و طبيعية

اغلبها يعبر عن حالة شجن و سلام نفسى

حمد الله على السلامة و العودة للكتابة

أع ـقل مـ ج ـنـونــة said...

انتي عايشة بالحاجات اللي جواكي
مهما كنتي متناقضة
ومهما كانت الحاجات تعباكي
هتلاقيها مع الوقت بتوضحلك حاجات كتير
مكنتيش هتعرفيها الا باحساسك المتناقض دا !!

Miss LoZa said...

بحب الحاجات المنعكشة الى بنقولها واحنا مش عارفين بنقولها ليه دى :)
بالنسبة لموضوع الحالة النفسية
لا انتى مش مجنونة
بس نفسيا مش مستقرة
وده الى انا استشفيته من من الكلام والحاجات الى بتحصل دى
بس حلو حلو انك بتطلعيها بطريقة ما يعنى :)
لايك البوست ده انا :)

Bent Men ElZman Da !! said...

نور القمر

الحمدالله انى مش لوحدى
اطمنت :)

ميرسى ليكى جدا
سعيده جدا بزيارتك اللى اتمنى انها تتكرر
نورتنى :)

Bent Men ElZman Da !! said...

سواح في ملك اللــــــــــــــــــه-

صدق الله العظيم
معاك حق فعلا
كلنا بنمر بنفس الظروف مع اختلاف شكلها
وبنعيش دايما نفس الحالات

شكرا ليك على ردك ومتابعتك
منورنى دايماً :)

Bent Men ElZman Da !! said...

ابراهيم رزق

الله يسلمك يا استاذ ابراهيم
شكرا ليك جدا على ردك
ومنورنى بوجودك :)

Bent Men ElZman Da !! said...

أع ـقل مـ ج ـنـونــة

كلامك صح اوى اوى على فكره
كل حاجه جوانا حلوه او وحشه فى محلها او متناقضه
فى النهايه بتوصلنا اننا نكون احنا

مبسوطه اوى بتعليقك
نورتينى ياريمو :)

Bent Men ElZman Da !! said...

Miss LoZa

ولايك الكومنت بتاعك انا :)
اكيد بنمر بحالات كتير
بس المهم اننا نخرجها بأى طريقه

ميرسى ليكى يا قمر
نورتينى بردك :)

Sara said...

كلنا كدا :)

و بنحب الذكريات دي


بس ما تنسيش تنضفي كل فترة

لأن في كركبة بتبقى فظيعة بعد فترة بتتكون من غير لزمة :D

شمس النهار said...

لحظات فضفضة
ماتضرش

متناقضة اه
لما الواحد بيكون متلخبط بيبقا متناقض

عااااااادي
بتحصل

reemaas said...

الحالة مش مطمئنة وخصوصا حكايه المربعات والمثلثات دى هههههههههه اسئلينى انا

فضفضة من القلب ووصلتنى على طول يا دينا

rona ali said...

اممممممممممممم طيب مبدأيآ لايك

ثانيا اغلب الحالات اللي قولتى عليها بنمر كلنا بيها مش كلها بس اغلبها

بس دة بيحصل فعلا مابين اقبالك علي مرحله جديده ومابين مرحله قديمه فيها شويه حاجات بتتقفل

اعتقد الفتره اللي بيحصل فيها كدة بتبقي فتره مثمرة اوى بنعرف فيها نفسنا اكتر ونتجنن اكتر ونجنن اللي حوالينا ثم ننتقل لمرحله الافكار المريبه والحاجات اللي خايفين منها فبنتلشاها ثم بنتنهى بعقل رازين قرر يعمل اللي عليه ويدخل وينافس:)

تحياتى دودو بوست حلوة انا كمان بحب كلامك لانه مش كلام والسلام هو كلام ويا سلام من دة كلام :)

Bent Men ElZman Da !! said...

Sara

المشكله ان الكركبه دى اوقات كتير جدا
بتكون جزء من حياتك وذكرياتك وتفكيرك
فا صعب نشيلها من غير ما يكون ليها اى اثر كده

نورتينى يا ساره :)

Bent Men ElZman Da !! said...

شمس النهار

ده هو احلى حاجه فينا التناقض الغريب ده :D
شكرا لحضرتك
ومنورانى دايما :)

Bent Men ElZman Da !! said...

reemaas

انا بردو قولت كده على فكره هههههههههههههه

ميرسى ليكى يا نور
منورانى دايما يا قمر :)

Bent Men ElZman Da !! said...

rona ali

انا لايك تعليقك اووووووى بجد
فعلا فى مابين مرحله والتانيه فى حياتنا
احنا بنبقى مشتتين اوى
بس التشتت ده بيوصلنا فى الاخر اننا لازم نستوعب اللى احنا فيه

ميرسى يا حبيبتى بجد على كلامك
منورانى دايما يا رونا :)

سندباد said...

فضفضة لابد منها عشان نقدر نكمل ونعدي الوقت رغم ان الوقت بقي مفهوش بركة زي زمان علي راي امي انما بقي دمه تقيل اوي رغم انه قصير وبيعدي بسرعة
تحياتي لاسلوبك

Unknown said...

انتى عسوله اوى ومتسألنيش ليه بس لما قرات حسيت انى عاوزة اقولك كده انا مش بعاكس على فكرة:h: بس ده راى اللى حسيت انى عاوزه اقوله

Anonymous said...

صباح الغاردينيا دينا
عارفة والله فضفضة حقيقية
وكل الي قلتيه ساعات بمر بيه
خاصة حكاية تقطيع الورق دي
هو انا عندي حالة نفسية :) "
؛؛
؛
لروحك عبق الغاردينيا
كانت هنا
reemaas

نهر الحب said...

:)
ضحكتيني اوي
بس حلوة الفضفضة
احمدي ربنا بجد غيرك مش بيعرف يعملها

حتي لو حاسة انها جنان
:)

استني بس عاجباني اوي صورة فضل شاكر القمر ده علي جمب وانتي كاتبة حبيبي
انا كمان بحبه اوي
:))

Anonymous said...

صباح الورد

جميعنا نمر بحالات قد يكون أنعكاسها

علينا عبر رسم مربعات بداخلها مثلثات

أو حتى رسم دوائر بداخلها نجوم لايهم

الشكل ولكن بالتأكيد أنها تريحنا بطريقة ما ..

مقتطفات من حياتك عبرت عنه أو حتى نثرتيه

بتلقائية وجمال هنا ...

تحياتي وإحترامي

Radwa Ashraf said...

عاجبانى أوووووى الفضفضة دى :)
و حركة تقطيع الورق و الابتسامة الى فيها سخرية ساعات كتير بتحصل معايا :)
و انا كمان مش بحب الابواب المواربة .. وحشتنى كتابتك و الله
تسلم إيدك يا جميلة

Bent Men ElZman Da !! said...

سندباد

هى الفضفضه دى اصلا اللى بتخلى الواحد يكمل اى حاجه حلوه بقى والا وحشه مش فارقه

شكرا ليك جدا
نورتنى :)

Bent Men ElZman Da !! said...

mena

والله انتى اللى زى السكر يامنه
كفايه ردك ده
وياستى عاكسينى هو حد لاقى ههههههههههه

ميرسى ليكى يا قمر
نورتينى واتمنى تنورينى دايماً كده :))

Bent Men ElZman Da !! said...

ريــــمــــاس

لا كده واضح يا ريماس ان كلنا عندنا حاله نفسيه :)

ميرسى ليكى يا جميله
منورانى دايماً :)

Bent Men ElZman Da !! said...

نهر الحب

اه والله الحمدالله ان الواحد عارف يخرج التخاريف اللى جواه دى
عشان من غيرها الواحد يتجنن صراحه

انا مجنونه بفضل شاكر مش بحبه بس
مبسوطه بجد انك انتى كمان طلعتى بتحبيه اوى كده

نورتينى ياقمر وميرسى ليكى على ردك :)

Bent Men ElZman Da !! said...

ريبال بيهس

فى النهايه الرسومات دى
دايماً بتعبر عن حاجه جوانا مش عارفين نقولها

شكراً ليك جدا على تعليقك
نورتينى بوجودك :)

Bent Men ElZman Da !! said...

Radwa Ashraf

يعنى الموضوع مش حاله نفسيه ده منتشر بقى شكله
انا كمان واحشتنى كتاباتك اووووى يا رضوى بجد
يارب يكون المانع خير عندك

نورتينى يا قمر :)

نيللي علي said...

كل اللى جواك سببه حاجه واحده هو "الخوف"سيطرى عليه وعلى رأى عم حمزه حاصر حصارك أنتصارك بكره جى :h وتوكلى على الله وربنا ينجحك يارب

محمد عبد التواب said...

المدونة ممتازة ورائعة وفكرة جميلة شكرا لك ...

eng_semsem said...

طول ما انت بترسمي مربعات جواها مثلثات مفيش قلق انما لو ظهرت الدواير تعرفي انك في خطر ههههههههه
احيانا بنعوز حاجات ونبقى خايفين انها تحصل
احيانا بنجري ورا حاجه وجوانا حاجه بتقول يارب ما تحصل
بكره احسن طول ما احنا عايزينه احسن بكل ما فيه احنا اللي بنحط نكهته عليه
تحياتي

Bent Men ElZman Da !! said...

نيللى

ونعم بالله
الاغنيه دى بجد تدى تفائل للواحد كده
يارب بالتوفيق ليا انا وانتى يا قمر
نورتينى ومبسوطه بجد بتعليقك :)

Bent Men ElZman Da !! said...

محمد عبد التواب

شكرا لحضرتك
وشرفتنى :)

Bent Men ElZman Da !! said...

eng_semsem

لا والله طب الحمدالله انا افتكرت ان المربعات والمثلثات دى بتعبر عن رغبه دفينه جوايا انى ادخل هندسه مثلا هههههههه
بكره اكيد احسن ان شاء الله
بس المشكله اننا كتير مش بنقدر نستنى لبكره ده
شكرا ليك على ردك
ونورتنى :)

شهرزاد المصرية said...

عزيزتى

كل عام و انت و جميع أحبائك بخير و سعادة

تحياتى

Bent Men ElZman Da !! said...

شهرزاد المصرية

وحضرتك بألف خير
وشكرا جدا على التهنئه :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment