15 November 2011

ارجوك ماتستهبلنيش !!

.


فى شويه برامج فى التليفزيون
تجيب للواحد تخلف بجد
اد ايه بيستفزنى ان يبقى فى مذيعين او مذيعات عندهم استعداد يظهروا
لمجرد انهم بيستهبلوا الناس !!

فى قناه ماعرفش اسمها
بس واضح انها كانت مسابقات وبس
بعيداً عن المذيعه اللى اصلاً اتخضيت لما شوفتها
مش لانها كانت شكلها وحش ولا حاجه دى خلقه ربنا يعنى
بس لانها كانت بتتخانق اكتر من انها بتذيع
والله بقيت مزبهله من طريقتها
والاكتر لما شوفت السؤال اللى بتسأله والاجابات اللى الناس بتجاوبها
السؤال حاجه ليها رجل واحده و 3 عيون
واحنا بنشوفها فى الطريق وفيها 3 الوان وبتخافظ على سلامتنا
لا عروستى
صراحه السؤال صعب
واحد يتصل يقولها المفتاح والتانى يقولها الموبيل !!
الناس دى بتفهم منين انا عايزه اعرف؟؟؟؟
والغريبه ان صوت اللى بيتصلوا كله شبه بعضه
هى الناس دى فاكرينا مساطيل للدرجه دى والا ايه مش فاهمه !



والا يعنى ايه مثلا واحده تطلع فى برنامج  "ارجوك ماتفتيش" ده
تسأل الناس فى الشارع
ايه رأيهم فى ان خط الاستواء هيتمسح ؟؟
والا مثلا مين مخترع القطط السيامى!!
والا ان الاسدين  بتوع كوبرى قصر النيل 
 هيهربوا عن طريق النيل بسبب الحر والزهق من قعدتهم دى!!
 والسؤال الفظيع بقى
بعد وفاه عم دهب ومرض بطوط
ياترى هيقدروا سوسو ولولو وتوتو يمسكوا البلد مكانه والا لا؟!!؟
ياخراشى على الشلل
ويعنى ايه اصلا ناس ترد عليها ردود بثقه كده
وكأن السؤال عادى مثلا
مش فيه اى حاجه غلط !!

ما هو اللى انا متاكده منه
ان الناس لسه بعقلهم مش اتهطلوا للدرجه دى يعنى ولا حاجه
ازاى بقى بنى ادم طبيعى هيرد عليكى بطريقه طبيعيه فى السؤال ده؟؟؟

وتعليقها دايماً ان الناس بتفتى فى اللى تعرفه واللى ماتعرفوش
وهى كده الناس بتفتى ؟؟ ده الناس بتستغبى قصدك
لان استحاله واحد عاقل مهما كان مش عارف اجابه السؤال اللى بيتسأله
هيرد الردود اللى بالمنظر ده

لما فى اى دوله تانيه يشوفوا البرنامج ده
مش هيقدروا يربطوا ابداً ان البلد اللى بيظهر على شاشتها البرامج دى
والشعب اللى بيرد الردود دى
هو نفس الشعب اللى قدر يعمل ثوره
وقدر لاول مره فى التاريخ يخلى رئيسه السابق يتحاكم زيه زى اى حد
انا قولت مثلاً ان قبل الثوره الموضوع دى ليه علاقه بالحكومه
عشان يعرفونا احنا اد ايه هُبل
بس لما برنامج زى ده يفضل مستمر لحد دلوقتى
واتعمل جزء تانى كمان بأسم ارجوك ماتفتيش بعد الثوره
يبقى اكيد فى حاجه غلط

بطلوا تستخفوا بعقليه الناس كده
عايزين تعملوا اشتغالات
اعملوا حاجه تتصدق الى حد ما
بلاش قرف بقى


36 comments

m.hallawa said...

مساء الخير دينا
بجد أنا ما بشوفش غير الجزيرة
قناة حرة حتي برامجها جامدة وقدرت تقوم ثورات
خلينا من التفاهة
الله يكون بالعون
تحياتي

Bent Men ElZman Da !! said...

m.hallawa

مساء النور
معظم القنوات بقت للاسف تفاهه واستهبال

شكرا لحضرتك
وشرفتنى

سواح في ملك اللــــــــــــــــــه- said...

هههههه والله انتي عندك حق

القنوات دي عايشة في جزر منعزلة خالص

البرنامج الاولاني اللي قولتي عليه اللي

فيه المذيعةالمتدلعة دي

بيعتمد ياستي علي الاتصالات

وهيافة اللي قلبه بيرفرف لما يشوف دلع المذيعه

ده اذا كانت مذيعة اصلا

والهبل في العالم العربي كتير

واللي يجاوب اجابة صح

في الكنترول بتاعهم ده

يركنوه علي الخط خاصة لو بيتصل من دولة تانية

عشان عداد الاتصال يعد فلوس لحد مايزهق ويقفل

وييجوا بقي يدوا الجايزة لواحد وهمي

اما البرامج التانية

لا صدقي

لسةفيه هبل كتير

وهما مابيذيعوش اللقاء مع الناس اللي بتجاوب صح

عشان يبينوا سذاجة الناس

وده من اهداف البرنامج

Bent Men ElZman Da !! said...

EL pRiNcEssA

ياريتها كانت مذيعه مدلعه
دى خضتنى من صوتها العالى
وكان ناقص تدينى بالبوكس من خلال الشاشه
دى طالعه ترعب مش طالعه تذيع

طب وهدف البرنامج ده هيوصلوا بيه لايه نفسى افهم ؟!؟

ميرسى ليك على متابعتك

سواح في ملك اللــــــــــــــــــه- said...

عشان معدالبرنامج يقدملك مادة مفكر انها يعني بتضحك الناس

تحيتي

Bent Men ElZman Da !! said...

سواح في ملك اللــــــــــــــــــه-

دول مش بيضحكوا الناس
دول بيستفزوا الناس

ريــــمــــاس said...

صباح الغاردينيا دينا
هههههههههههه
معليش بقى اسمحيلي اضحك مع انه موضوع بيجيب القرف بجد ومعاكي حق هما بيسخفو بعقول الناس وبالنسبة للمزيعات بجد مش بعرف بيجيبوهم منين لاشكل استغفر الله ولا أسلوب وبتبقى تزعق اكتر مابتتكلم دا حتى صوتها مبحوح هههههههه بحه وحشة خالص والسؤال بقى تبقى صورتين لهيفاء وهبي وحدة بخاتم ووحدة لا وطبعاً السؤال صعب جداً وهاتي اتصالات ومافيش حد يعرف ههههههههههه
والله مرة جبت ابن اختي عنده خمس سنين وقالي خالتو ماعندها خاتم
هو يعني مافيش عيل يجاوب ههههههه
خلينا ساكتين دا موضوع يفرس بجد "
؛؛
؛
دودو اسفة على الغياب
لظروف السفر وحشتيني يادينا "
؛؛
؛
لروحك عبق الغاردينيا
كانت هنا
reemaas

أع ـقل مـ ج ـنـونــة said...

دي حاااجة تشللللللللللللللل

mena said...

والله العظيم انا بكرة البرنامج ده جدا بتاع ارجوك متفتيش ومذيعه كمان شكلها يقرف ومعفنه ودمها تقيل وبتبين للناس ان الشعب المصري ده غبي ومش بيفهم وهى اللى حماره ومش بتفهم

Bent Men ElZman Da !! said...

ريــــمــــاس

ايوه الاسئله الاطفال بجد يعرفوا يحلوها
ودول ممكن يقعدوا يوم كامل على سؤال

ولا يهمك يا حبيبتى
وحمدالله على سلامتك
وحشتينى ووحشتنى كتاباتك :)
نورتينى من تانى

Bent Men ElZman Da !! said...

أع ـقل مـ ج ـنـونــة

اوى :@

Bent Men ElZman Da !! said...

mena

ومش دى وبس
فى زيها كتييير بنفس الشكل
واحنا الضحايا :D

نورتينى يا منه :)

خالد ناجى said...

هههههههههه..عندك حق والله ..ربنا يصبرنا ع البلاوى دى

israa essam said...

عندك حق بتبقي حاجة تشل فعلا :@:@

faroukfahmy58 said...

أنا مع رأى مينا ازاى همه يستهزأو بعقولنا ومفاهيمنا والا علشان تالبرامج دى مفروضة علينا
صدقتى فى كل حرف قلتيه
مع تحياتى
الفاروق

وجع البنفسج said...

هههههه

عن جد انا باكون مزبهلة زيك هيك لما اشوف البرامج هذه وخاصة الاسئلة العبيطة اللي بتتسأل والناس مش عارفين يجاوبوا .. بيستهبلوا ع الناس وكله كوم وبرنامج ارجوك ماتفتيش كوم .. يالهوي على الهبل الاسطوري المعشش
عن جد شوية رحمة فينا

ريبال بيهس said...

مساء الورد

للأسف ظهرت كثير من القنوات المسابقية والفكرة بحد ذاتها غير مرفوضة ولكن أن يتم إستهبال المشاهد لهذه الدرجة مع مذيعة لا تعرف هل ترقص أم تصرخ أم حتى تسكت والغريب أنها اسألة مستفزة وكل من يتصل لا يعرف الإجابة وللأسف هو نفس الشخص ولكن مرة سعودي ومرة مصري ومرة فلسطيني والجائزة بمئات الألوف !!!!!

بالنسة للبرنامج الآخر بالطبع لم أشاهده ولكن من المؤسف أن تنحدر بعض القنوات لهذا المستوى الثقافي والإعلامي والغريب عندما تجد لها صدى في نفوس بعض المتلقين !!!

تحياتي وإحترامي

EMA said...

بلاش قرف بقى !

فعلا و الله عندك حق بجد..انا ببقى قاعدة فعلا هيجيلي شلل بمعنى الكلمة بقول لاخواتى غيروا قبل ما يجيلنا تخلف و احنا قاعدين ههههههه ..مش عارفة و الله اخرتها ايه بس لو الناس قاطعت البرامج و القنوات التافهة دى اعتقد مبدئيا دا هيكون ابلغ رد ..و مش عايزة اقولك بقى لو ظبطوا مذيعة باسئلة من دى فى الشارع علقة بقى على طول ههههههه..

تسلمي يا قمر على الموضوع دا ..فشيتي غلي و الله

تحياتي

Bent Men ElZman Da !! said...

خالد ناجى

اه والله ربنا يصبرنا
ميرسى ليك ونورتنى :)

Bent Men ElZman Da !! said...

israa essam

لنا الله :D

ميرسى ليكى يا قمر
نورتينى :)

Bent Men ElZman Da !! said...

faroukfahmy58

فعلا مش تتقال غير انهم بيستهتروا بدماغنا
شكرا لحضرتك جدا على رأيك
ونورتنى بوجودك

AHMED SAMIR said...

انتي عارفة ليه الناس بتظهر بالشكل دة في البرامج دي
لأني اعتقد و الله اعلم انهم بيتسألوا اسئلة تانية خالص
و يجاوبوا على الأسئلة دي و لكن لما الحلقة بتتذاع في التليفزيون بيركبوا سؤال تاني خالص على الاجابات دي..فبيظهر الناس بالشكل المعتوه دة
تقريبا...مالهاش تفسير غير كدة

آخر العنقــــــود said...

هههههههه
اسلوبك ضحكني يا دينا على الرغم انه باين عليكي مش متقبلاهم خالص
"شئ معروف.. اللي يعيش ياما وياما يشوف" :))
ربنا يخلي لنا عقولنا يارب
تحياتي يا قمر

Miss LoZa said...

اقسم بالله يا دينا ضحكتينى ضحك
ههههههههههههههههههههههههههههههه
مفيش كده بجد اصلا
عارفة البرامج بتاعت المسابقات دى كنت بحبها زمان علشان بتجيب اسئلة بعرف احلها
ما شاء الله عليا الحقيقة
ههههههههههههههههههههههههههههههه
وبعدين موضوع الحاجة ام رجل وحدة والوانات دى
الاجابة سهلة جدا اصلا
مقشة لابسة لينسيز
هههههههههههههههههههههههه
وكل كوووووووم ومش تفتى ده كوم تانى اصلا
والله العظيم شوفت مرة حلقة بيعملوا استفتاء انهم يخلوا البيوت من الازاز
يا نهار ابيض
فضلت اضحك بعدها بيومين اصلا
ههههههههههههههههههه
ربنا يهديهم بجد
انا رغيت كتير
كفاية كده :D
العواف بقه :$

EL pRiNcEssA said...

للاسف اتملي التلفزيون بالاشكال دي
واحنا كل اللي نقدر نعمله
اننا نغير المحطة

Bent Men ElZman Da !! said...

وجع البنفسج

هههههههههههه
عجبتنى الهبل الاسطورى المعشش دى
ميرسى ليكى على رأيك
ونورتينى بوجودك والله :))

Bent Men ElZman Da !! said...

ريبال بيهس

الناس كلها بيتهيألى بقت عارفه ان كل الحاجات دى نصب
نفسى افهم دول بقى بيتضحكوا على مين بالظبط؟!!؟

شكرا لحضرتك على رأيك
ونورتنى :))

Bent Men ElZman Da !! said...

EMA

تصدقى حلوه فكره العلقه دى
انا معاها اووووى
اشوف بس المذيعه دى وانا هاديها حته قفا :D :D

ميرسى ليكى يا قمر
نورتينى :)

Bent Men ElZman Da !! said...

AHMED SAMIR

بس فى برنامج ارجوك ماتفتيش ده
الناس فعلا بتجاوب على الاسئله دى
لانهم بيكونوا بيتكلموا فى نفس الموضوع المتخلف اللى السؤال بيسأل عنه
يعنى مفيش فيها خدعه ولا حاجه
الخدعه بتتعمل فينا احنا مش فيهم هما

ميرسى ليك على رأيك
شرفتنى

Bent Men ElZman Da !! said...

آخر العنقــــــود

ياارب يخليلنا عقولنا فعلا
عشان عقل الواحد بيختزل يوم عن يوم من اللى بيشوفه
ميرسى يا قمر
ونورتينى بجد :)

Bent Men ElZman Da !! said...

Miss LoZa

ههههههههههههههههه مش بقولك انتى عسل
فظيعه مقشه ولابسه لينسز دى هههههههههههههههههههههههههه
ارغى براحتك ده البيت بيتك والله
منورانى يا ميهو بجد <3

Bent Men ElZman Da !! said...

EL pRiNcEssA

او نقفل التليفزيون احسن
حاكم القنوات كلها بقت شبه بعض :D

ميرسى ليكى يا قمر :)

Radwa Ashraf said...

بلا قرف بقى صحيح على رأيك
و الأسوأ أنهم يوصلوا يقنعوكى بحاجة
"أنتو شعب أهبل و كفى"
لا و الله ؟ بيستخفو بينا بغباء .. و الناس ستحيل تصدق برا فعلا ا دول اللى عملوا الثورة

أرجوك متشلنيش !

Bent Men ElZman Da !! said...

Radwa Ashraf

هيستفادوا ايه يعنى لما يقنعنونا بكده
ماهما مايعرفوش اننا بطلنا نقتنع اننا شعب اهبل اصلا
سلامتك يارودى
كلنا بنعانى والله من الموضوع ده
نورتينى يا جميله

rona ali said...

صراحتآ انا اللي بيغظنى اكتر من الاجابات المتخلفه والسؤال العبيط زى مدينه خضرة من برة وحمراء من جوة
والكل يقلها مدن موجوده فعلا هههههههه

اكتر شئ بينرفزنى ان صوتهم بيبقي شاذ اوى ومخنق انك تطقي واتصلوا علشان تكسبوا اكتر وكل ما تتصل اكتر تكسب اكتر
وحكايه الشحن علي الهوا هما بيشحنونا احنا غباء عتته متعرفيشي

بالنسبه للبرامج كنت مرة شوفت اعلانات علي موجه كوميدي لبرنامج حاجه فيها اسم عزة والله مافاكرة كانت لاقطاته متخلفه فعلا

ربنا يعينا
شوفت الخمسه ^_^ اهو

Bent Men ElZman Da !! said...

rona ali

يلهوى على الجنان ههههههههههههههههه
الناس دى مسطوله وربنا
موجه كوميدى عليها حبه برامج بردو تجيب شلل
احنا لنا الله
وانتى نورتى الخمسه اهو ^^

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget