19 November 2011

اتبرع ولو بجنيه .. !!

.



فى دول كتير اتدمرت
وقدرت ترجع تانى زى ما كانت واكبر بكتير كمان
زى اليابان والصين
اللى بقوا من اهم الدول على مستوى العالم كله وخصوصا تجارياً
دوله زى العراق مثلاً
امريكا دخلتها ودمرت كتير فيها
لما فكروا يقفوا تانى
عملوا اعلانات وحملات توعيه كتير
عشان شعب العراق يبطل كسل وكله يشتغل مع بعضه
عملوا اعلانات لـتنشيط مجالات مختلفه عندهم زى مثلاً الاتصالات
واهم مطرب عندهم اللى هو كاظم الساهر استخدموه كوجه اعلانى محبوب
ومطرب معروف جدا كدعايه للدوله اكتر من انها تكون دعايه 
لشركه الاتصالات نفسها
لمجرد انهم يوصلوا احساس للعالم كله
ان العراق لسه موجوده وهتفضل موجوده
وغيرها وغيرها من بلاد تانيه كتير


اما احنا
لما حصلت ثوره عندنا وادمرت حاجات كتير 
سواء مادياً او فكرياً او حتى معنوياً جوانا
مش فكرنا نعمل كده
مش فالحين غير فى اعلانات الشحاته وبس
معلش على اللفظ
بس لو بصينا على كل الاعلانات بعيداً طبعا عن الاعلانات التجاريه
هنلاقى اعلانات زى
اكفل طفل يتيم
اتبرع ولو بجنيه
ساهم فى اطعام مسكين
اتبرع لقريه صغيره
اتبرع .. ادفع ... ساهم
حاجات كتير اوى على نفس المنوال
انا طبعا مش بقلل ابداً من اى حمله من دول
ولا بقول انها حاجات مش مهمه
بالعكس المفروض كلنا فعلاً نكون حاسيين ان فى ناس غيرنا محتاجين
واحنا لازم نقف جنبهم
بس الفكره فى ان صعب اوووى كل الاعلانات تبقى بالمنظر ده
ليه اعلامنا يعيش دور الشحاته بالطريقه دى
ليه مفيش اعلانات وحملات توعيه كتير زى باقى الدول
اللهم الا يعنى حاجات قليله اووووى
وقليل مننا اللى شافها لانها فى جميع الاحوال مش بتبقى واخده حقها
ده غير كمان ان لما بتحصل عندنا حمله توعيه
بتبقى لغرض محدد فى فتره زمنيه معينه وبينتهى
زى مثلا الحمله اللى طلبت بـ"لا" فى الاستفتاء
واللى مش كانت حمله توعيه
دى كانت حمله اجبار على التصويت لجانب على حساب جانب اخر
لانها لو كانت حمله توعيه بجد
كانوا جابوا جزء من الفنانين والشخصيات المهمه 
يقولوا هيختاروا نعم ليه
ولا ليه
وكده يبقى عرضنا جميع الاتجاهات ونبعد عن التحيز لجهه معينه
ويسيبوا الناس تقرر وتختار براحتهم
لكن ده للاسف ماحصلش
ومش بيحصل فى اى حاجه

 ليه الاعلام عندنا او منتجين الاعلانات اللى خنقونا باعلانات تافهه
مش بيحاولوا يشجعونا ويدعمونا اننا نقف لبلدنا
ونوصل بيها لمستوى احسن
ويفتحولنا مجالات كتير نقدر نقدم فيها حاجه
ليه كل اللى بيقدروا عليه
انهم يجيبوا اتنين فى برنامج كل واحد فيهم بيتكلم فى اتجاه
واحنا اللى بنتوه معاهم فى النص
لا احنا استفادنا حاجه ولا هما استفادوا حاجه من لغبطتنا دى
زى ما بندور على ناس يتبرعوا للمحتاجين
ليه مش بندور على ناس تبنى البلد من جديد؟؟

29 comments

سواح في ملك اللــــــــــــــــــه- said...

تعرفي حكاية التبرع دي

امتداد لعصر مبارك

اول مابدا عهده المشئوم

قاللك البلد مافيهاش فلوس

راح مدشن حملة اعلانية في التلفزيون المصري

تبرعوا لسداد ديون مصر

اتبرع ولو بجنيه

بعد كده بقت داء فينا

بقت كل حاجة تتعمل اسهل حاجة فيها جمع التبرعات

تاني حاجة بقي

موضوع الحملة الانتخابية

معرفش ليه مش بميل للنخبة التلفزيونية

بحس انهم زي مابنقول بالبلدي كده

متنشيين

عايشين في وادي والناس في وادي

بيقولوا كلام نظري كويس قوي

بس يستحيل تنفيذه علي ارض الواقع

ربنا يرحمنا من البلاوي دي

ريبال بيهس said...

صباح الورد

للأسف بالفعل ليست مصر فقط من تحتاج للحملات التوعوية هذه ولكن كامل الوطن العربي لأننا مازلنا نغرد خارج السرب ولكن من الخلف وينقصنا الوعي الكافي لنتقدم وهذه مسؤولية مشتركة ما بين الحكومة وبقية أطياف المجتمع من شركات ومؤسسات خدمية غير ربحية وحتى جمعيات خيرية بمختلف مسمياتها مروراً بنا نحن أبناء الوطن وأعتقد أن حملة صلي قبل أن يصلى عليك كانت حملة ناجحة جداً أثارت أنتباه الشباب على وجه الخصوص وكذلك حملة مكافحة الإرهاب و نفيها عن ديننا كون الغرب يحاول إلصاق هذه التهمة بنا وووو حملات كثيرة قامت وكلها مجهود مؤسساتي فردي فلنا أن نتخيل لو هذه الحملات قامت في كل مكان إلى أي درجة سيختلف المجتمع ؟؟؟

موضوع رائع وأتمنى أن يأخذ حقه من قبل الأخوة المدونين .

تحياتي وإحترامي

خالد ناجى said...

عندك حق

محمد فوزى said...

كل الشكر والامتنان على روعة بوحـك ..

وروعهـ مانــثرت .. وجمال طرحك ..
دائما متميز في الانتقاء
سلمت على روعه طرحك
نترقب المزيد من جديدك الرائع
دمت ودام لنا روعه مواضيعك

لك خالص احترامي

reemaas said...

الامثلة اللى انتى ضربتيها دول ناس بيشتغلوا وشغلهم بيتكلم عنهم
لكن احنا وللاسف الشديد بقولها بثقه

بنتكلم
بنتكلم
وبس

reemaas said...

الامثلة اللى انتى ضربتيها دول ناس بيشتغلوا وشغلهم بيتكلم عنهم
لكن احنا وللاسف الشديد بقولها بثقه

بنتكلم
بنتكلم
وبس

Miss LoZa said...

انا معاكى اوى يا دينا ان مفروض نركز شويتين تلاتة على اعلانات التوعية والحاجات الى ليها دور فبناء البلد
بس مين بيسمع يعنى !
كله بيفكر فالفلوس والبيزنس وبس
انما مضمون ورسالة لا !

faroukfahmy58 said...

أنا شخصيا معاكى فى وجهة نظرك وكل هذا لن يتأتى الا بشعورنا بالانتماء الى هذا البلد اللى ظلمناه يايدينا وليس بيد الغير ، دايما بنجرى ونستجدى وراء السهل والاهم ان نجرى وراء الصعب حتى نجد السهل
تحياتى واحتراماتى لوجهة النظر الزكية والذكية
الفاروق

rona ali said...

والله عندك حق

للاسف احنا دايمآ كدة بنفكر ازاى

ندور علي الفساد ننقب ونثور بس محدش حتى الان وضع خطه انتاجيه لبلد

ليه منقسمش نفسنا بين اللي يطالبو بالحقوق واللي يشتغلوا في البلد وينتجو

للاسف احنا دايما فكرنا ماشي ضد التيار

لايك للبوست ^_^

وجع البنفسج said...

عندك حق والله .. بس شو الواحد يعمل .. لازم نحاول نوقف على رجلينا من ثاني .. علشان مصلحة بلدنا في الاول وفي الاخير

ربنا يصلح الحال يارب ..

نور القمر said...

بالتوفيق لشعب مصر والعراق ..
مع تحياتى لك
نور

أع ـقل مـ ج ـنـونــة said...

اجابة السؤال بتاع ليه دا
لان ناس في مصلحتهم اننا نفضل في جهل كدا !!

Bent Men ElZman Da !! said...

سواح في ملك اللــــــــــــــــــه-

هى من عصر مبارك
وتقريباً بقت عاده والناس اتعودت عليها خلاص

شكرا ليك على رايك
نورتنى

Bent Men ElZman Da !! said...

ريبال بيهس

حضرتك فعلا ذكرت امثله مهمه اوى لحملات التوعيه
وللاسف مصر ماكنش ليها اى نصيب من الحملات دى
وده اللى يضايق فى الموضوع
ان هنا مش فكرنا نعمل كده بأى شكل من الاشكال
يمكن نوصل للافضل
وفعلا وضعنا فى العالم العربى كله هيختلف اكيد لو كلنا عملنا حملات توعيه وبس مش تكون مجرد كلام لكن فعل كمان

شكراَ لحضرتك على رأيك وتعليقك
وشرفتنى بوجودك

Bent Men ElZman Da !! said...

خالد ناجى

شكرا ليك :)

Bent Men ElZman Da !! said...

محمد فوزى

شكرا لحضرتك جدا على زوقك
وشرفتنى بزيارتك :)

Bent Men ElZman Da !! said...

reemaas

ياريت حتى عندنا فرصه نتكلم

شرفتينى يا نور

Bent Men ElZman Da !! said...

Miss LoZa

صحيح
يعنى المضمون والرساله هيعملوا ايه
اللى بيفكر يعمل اعلان ده
بيفكر مليون مره هيكسب من وراه ايه
لو مش هيكسب من وراه اد اللى بيصرفه 100 مره مش هيعمله خالص

نورتينى يا ميهو

Bent Men ElZman Da !! said...

faroukfahmy58

حتى لو جزء مننا جواه فعلا الانتماء لبلدنا وعايزين نطورها
الباقى مش بيشجع الجزء ده انه يستفاد من انتمائه ده

شكراً لحضرتك على رأيك
شرفنى وجودك

Bent Men ElZman Da !! said...

rona ali

احلى كلمه قولتيها
فكرنا ماشى ضد التيار
وعشان كده كلنا مشتتين
مش عارفين نتجمع على رأى واحد

ميرسى اوى يا رنا على رأيك
ونورتينى بوجودك

Bent Men ElZman Da !! said...

وجع البنفسج

بس يارب يكون فى امل

شكرا لحضرتك
ونورتينى بوجودك :)

Bent Men ElZman Da !! said...

نور القمر

يارب ان شاء الله
ميرسى ليكى على تعليقك :)

Bent Men ElZman Da !! said...

أع ـقل مـ ج ـنـونــة

واكيد احنا مش عايزين نفضل فى جهل كده
نورتينى ياريمو

mena said...

:i:فعلا عندك حق زى الشحاتين

Bent Men ElZman Da !! said...

mena

للاسف يا منه

Radwa Ashraf said...

و الله موضوع فى الجون
يعنى مش عارفة هل احنا عاجبنا كده
و لا هو مفيش غير كده
حاجة تزعل ... ان اليابان اللى لسة مدمرة
تقوم باعتالنا قرض لسة قريب و مش مبلغ بسيط
حاجة تزعل أووى

آرثـر رامبـو said...

الحمد لله عل السلامة من الهزة إللي ضربت مصر اليوم
.
.
.
دمت بخير

Bent Men ElZman Da !! said...

Radwa Ashraf

احنا للاسف اتعودنا اننا نعيش بالقروض الخارجيه والمعاونات والديون
فا مش بسهوله هنقدر نغير ده ونعتمد على نفسنا

Bent Men ElZman Da !! said...

آرثـر رامبـو

شكرا جدا لحضرتك على اهتمامك
شرفنى وجودك

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget