20 November 2011

الثوره راحت فين ؟!!؟

.




هو ايه اللى بيحصل بقى
ها؟
حد فاهم كده يفهمنى؟؟

تقريبا والله اعلم ان اللى بيحصل ده الطبعه التانيه من الثوره
اصل الطبعه الاولى نفذت

حاسه ان كل حاجه بتكرر بحذافيرها
كان بيتهيألى ان حسنى مبارك هيطلع يقولنا بيان 
ويأكد ان جمال مش هيرشح نفسه ولا هو هيترشح تانى
كأن ولا 11 شهر عدوا ولا اى نيله حصلت

الثوره اتعملت ليه؟
مش عشان حسنى مبارك يمشى
بس عشان زى ما الشعب كله كان بيطالب
انه يغير النظام
شخص واحد مشى
انما جذور تفكيره واسلوبه ونظامه لسه جوه كل سُلطه فى مصر

احنا زى ما احنا
لسه كله مختلف فى رأيه عن التانى شويه ضد الاعتصام وشويه معاه
لسه ناس بتموت فى التحرير عشان بتقول رأيها
لسه بردو اللى بيحصل ده اجندات خارجيه
لسه كل اللى فى التحرير بلطجيه وعملاء ومدربين بره
لسه فى مدنين بيتحاكموا محاكمه عسكريه غصب عن عين اهلنا
لسه بنضرب بالقنابل والغاز
لسه حياتنا ولا ليها اى 30 لازمه عندهم
لسه احنا مش حاسيين بالثوره
لسه للاسف مش عارفين ناخد حقنا
الا بالمناسبه بقى
حد يقولى هى الثوره راحت فين؟
كانت جايه زياره مثلا من 25 يناير لـ 11 فبراير وبعدين سافرت؟
والا كانت ترانزيت وبعدين رجعت مكان ما جت؟

بالمناسبه كمان بقى
هو فين عصام شرف؟
هو مش ده بردو اللى كان راجل من الميدان وبتاع الثوار واحنا عايزينه
بيعمل ايه بقى ده دلوقتى؟
بيتابع الاخبار على الفيس بوك وتويتر؟
يا فرحتى بيه
ياخوفى بعد كده اللى يترشح للرياسه يصدر قرارات عبر الفيس بوك 
ويعمل للوزراء تاج ويستنى يوافقوا عبر اللايك !!!

اهم كلمه سمعتها النهارده من ماما
يافرحه مبارك فينا وفى اللى بيحصل دلوقتى !!!


34 comments

mena said...

:i:الثورة راحت مشوار لحد المريخ ومش راجعه تانى

m.hallawa said...

السلام عليكم دينا
الثورات ما بيتخلصش في يوم وليلة !!! عندك مثلا :
ثورة فرنسا ظلت لمدة 7 سنوات
بس المقاصل كانت معلقة غي كل الشوارع حتي يقضوا علي الفساد
و مصر للان لم تحاكم أحد
( غير شعبها في محاكم عسكرية )
تحياتي

rona ali said...

اعتقد ان هناك بعثه ما لامريكا طلبت الثورة مؤقتآ واحنا امنا عليها بالفين جنيه وبعتناها لوحدها هناك ^_^

اعتقد كمان ممكن تكون اطلب علي مستوى دول اخري بس المصريين اللي سافروا معاها اتعملوا معامله زباله وهما مراين عند السعوديه ماهما لقوا اننا ملطشه فلطشونا بالمرة :(:(

زى كدة السجين الاسرائيلي قدامه 25 بس

اة يا ولاد اللذينه ياما نفسي امسك الفلول والاجندات دى واحرقهم واقولهم ها بقي ايه اللي حصل

لايك يا دينا كلامك عجبنى جدآ ومنطقي اوى

Bent Men ElZman Da !! said...

mena

احنا بس بشويه امل نبعتلها جواب ترجع

Bent Men ElZman Da !! said...

m.hallawa

وعليكم السلام
واحنا للاسف مش حاسيين بتأثير الثوره
وبالتالى تبقى هى مش حققت نتايجها اصلا
فى فرنسا زى ما قولت حضرتك
كانوا طول ال 7 سنين بيحاربوا الفساد
فا احنا لسه قدامنا اد ال 7 سنين دول 3 والا 4 مرات

شكراً لحضرتك على رأيك
شرفنى وجودك

Bent Men ElZman Da !! said...

rona ali

لا من ناحيه الحرق فا فى ناس كتير اوووى محتاجه الحرق فعلا

ميرسى اووى يا رونا على رأيك
ونورتينى

أمل م.أ said...

الثورات بحاجة الى صبر وجلد وقوة
ومن يعتقد ان طريق الحرية والعدالة سيكون مفروش بالورود فهو في عالم الاحلام
اما الحقيقة والواقع
فان لا شيء مهما كان بسيطا فلن يأتي بسهولة فكيف اذا كان حرية شعوب باكملها كانت ترزح تحت
الظلم والاستبداد والظلام سنين طويلة
الله يفرجها ويغير هالاحوال باحسن منها
ويحمي مصر واهل مصر .........وثورة مصر

تحياتي وتقديري

ابراهيم رزق said...

مخطىء من ظن يوما
ان للثعلب دينا

من تربى بين الثعالب
من المستحيل ان يكون حمل

بأذن الله الثورة مستمرة
ربنا مش هيضيع تعبنا ابدا

تحياتى

faroukfahmy58 said...

ليكى حق تقولى انا بنت مين الزمان ده
الثورة محتاجه ثورة تديرها
الامن محتاج امن يحميه
القانون محتاج قانون يقننه
الوزارة زورت من كتر ماشربت من عتابات
سؤالك مالوش الا اجابة واحده احنا ضعنا وسط زحام النفوس المتسلطه المتسلله والمتسوله من مواطنينا
الفاروق

وجع البنفسج said...

وضع محزن ومؤلم بصراحة
أحداث الامس رجعتنا عشر شهور لورا ..
ربنا يحفظ مصر والمصريين
ويعدي هالأزمة على خير

reemaas said...

كلمة بسمعها كتير اليومين دول وكل ما اسمعها اقف ومالقيش رد

كل ثورة وانتم طيبين

فى حاجة غلط ومش عارفه حتى اشاور عليها واقول هى فين

سواح في ملك اللــــــــــــــــــه- said...

لسة يادينا الامور مش واضحة

انا متضايق من اللي بيحصل

كل مليونيةيليها اعتصام ينتهي بصدام

Bent Men ElZman Da !! said...

أمل م.أ

معاكى حق فى كلامك جدااا
واضح ان الطريق مش هيبقى سهل ابداً للى احنا عايزين مصر توصله
ربنا يحمى مصر ان شاء الله

ميرسى ليكى على وجودك
وشرفتينى بزيارتك واتمنى تتكرر

Bent Men ElZman Da !! said...

ابراهيم رزق

يااارب ان شاء الله
شكرا لحضرتك استاذ ابراهيم
شرفنى وجودك

Bent Men ElZman Da !! said...

faroukfahmy58

يارب بس يكون فى امل نلحق نفسنا قبل ما نضيع
ونقدر نرجع الثوره تانى من اول وجديد واقوى من الاول
عشان نقدر نوصل للى كنا بنحلم بيه طول الشهور اللى فاتت
لان قبل الشهور اللى فاتت
ماكنش عندنا امل نحلم اصلا

شكرا لحضرتك
وشرفنى وجودك وتعليقك

Bent Men ElZman Da !! said...

وجع البنفسج

فعلا امبارح حسيت كأننا يوم 28 يناير بالظبط
ربنا يستر وتعدى على خير

شكرا لحضرتك
وشرفتينى بوجودك

Bent Men ElZman Da !! said...

reemaas

الغلط اكيد مش فينا كشعب
الغلط اكيد فى كل واحد متخيل معنى انه مسك سلطه فى البلد من حقه يتحكم فى مصيرنا زى ما يعجبه

ميرسى على تعليقك يا نور

Bent Men ElZman Da !! said...

سواح في ملك اللــــــــــــــــــه-

بس بيتهيألى ان دلوقتى مش مجرد صدام
فى ناس ماتت وناس اتصابت كتير اوى
نفس اللى حصل اول ما الثوره اتعملت
يعنى مش مجرد صدام وخلاص الموضوع بقى اكبر من كده
ربنا يستر على اللى جاى بقى

ميرسى ليك ونورتنى

مصطفى سيف الدين said...

الثورة ذهبت حين تشتت المطالب وحين بحث كل شخص عن مصلحته الشخصية على حساب مصلحة مصر
الحل هو عودة روح الخامس والعشرين من يناير
تحياتي

Bent Men ElZman Da !! said...

مصطفى سيف الدين

جزء كبير اوى من روح 25 يناير رجعت من تانى امبارح
يارب المره دى تكمل

شكرا ليك يا دكتور
وحمدالله على السلامه

ريــــمــــاس said...

مساء الغاردينيا دينا
مؤسف مايحدث ولن نقول سوى حفظ الله مصر لتعود بقوتها وشموخ ثورتها الحقيقية "
؛؛
؛
لروحك عبق الغاردينيا
كانت هنا
reemaas

Miss LoZa said...

والله العظيم مانا عارفة أقول ايه اصلا !!
انا بس عايزة أشوف أخرتهم ايه
واخرة البلد دى على ايديهم ايه
وهتوصل لفين اصلا !

أع ـقل مـ ج ـنـونــة said...

الثورة راحت تجيب ورقة بوسطة !!

وجع البنفسج said...

اللهم أنى أستودعتك مصر..♥ رجالها و شبابها .♥.

نساءها و فتياتها .♥. أطفالها و شيوخها .♥.

اللهم أنى أستودعتك ممتلكاتها و مبانيها و منشآتها .♥.

اللهم أنى أستودعتك نيلها و اراضيها و خيراتها .♥.

اللهم أنى أستودعتك أمنها و أمانها و أرزاق اهلها .♥.

اللهم أنى أستودعتك حدودها و بحورها و جنودها .♥.

فأحفظهم بحفظك يا من لا تضيع عنده الودائع و أنت خير الحافظين .

Bent Men ElZman Da !! said...

ريــــمــــاس

والله كلنا بنتمنى يا ريماس
وربنا يسهل الامور وكل اللى جاى
نورتينى يا جميله

Bent Men ElZman Da !! said...

Miss LoZa

الله اعلم يا ميهو والله
ربنا يستر فى اللى جاى
نورتينى يا حبيبتى

Bent Men ElZman Da !! said...

أع ـقل مـ ج ـنـونــة

طب هانت
نشوفها بعد 25 سنه كده :(

Bent Men ElZman Da !! said...

وجع البنفسج

اللهم آمييييين
ربنا يتقبل دعائك يااارب

نيللى said...

لسه العدل غياب ..طيب أيه الأسباب ..الله أعلم ..الأسباب انهم يدمروا الشعب منهم لله

Bent Men ElZman Da !! said...

نيللى

والشعب اللى بيعمل كل ده فى الميدان من امبارح
ومن قبلها فى 25 يناير وتوابعها
استحاله يدمر

هبة فاروق said...

http://i306.photobucket.com/albums/nn252/cebong_ipit/templateanna/emo-girl-005.gif
pحزينة على مصر واهلها
حفظك الله يا بلدى من كل شر
تحياتى

Bent Men ElZman Da !! said...

هبة فاروق

ربنا يحفظ مصر واهلها ياارب
شرفنى وجودك

خالد ناجى said...

ياخوفى بعد كده اللى يترشح للرياسه يصدر قرارات عبر الفيس بوك
ويعمل للوزراء تاج ويستنى يوافقوا عبر اللايك


اه والله عندك حق

:)

Bent Men ElZman Da !! said...

خالد ناجى

للاسف
مش بعيد ده اللى يحصل :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget