24 November 2011

مصر تبكى أسفاً...!!

.



الواحد بجد دماغه واقفه ومش عارف يقول ايه بالظبط
المفروض كان فى يوم امتناع عن التدوين فى حمله التدوين اليومى
حداد على الشهداء وتضامناً مع الثوار فى التحرير
بس اليوم طول معانا شويه وبقوا كذا يوم


ايه القسوه دى
ايه كل اللى بيحصلنا ده
انا فعلا من الناس اللى عاشت الثوره فى الاعاده
لانى للاسف مالحقتهاش اول مره

فى العرض الاول
يوم 25 يناير
كان الوضع كله غريب ومتنحه وفى حاله اكتئاب مزمن بسبب اللى بيحصل
ولانه كان اول مره يحصل ماحدش كان فاهم مين الصح ومين الغلط
وكنت بتفرج اوقات على القناه الاولى زى ناس كتير اوى
بعد التنحى كنت حاسه بخوف من اللى جاى
وانه يمكن يكون اصعب
بس مع الايام احساسى بالخوف قل

فى الاعاده
يوم 19 نوفمبر
كان يوم مأساوى
ماينفعش نقول عليه غير كده
شايفه كل حاجه من اولها بعيداً بقى عن القناه الاولى خالص
الناس اللى بتموت عشان بس بتطلب حقها
الناس اللى عنيها بتروح عشان بيحلموا يشوفوا بلدهم احسن بلد فى الدنيا
شايفه الشباب اللى بتضرب ويترموا فى الزباله
شايفه الامن المركزى وهو قاصد انه ينشن فى عين الثوار
شايفه البنت اللى بيسحلوها من شعرها فى الشارع
انت لو اخوك او اختك بيتعمل فيهم كده هتعمل ايه

دايما بنقول على الامن المركزى اغبياء ومش بيفهموا حاجه
بس مش وصلت معاهم لعدم وجود الاحساس كمان
انهم يضربوا انسان زيه زيهم بالرصاص الحى والخراطيش
انهم يرشوهم بغاز من الاسلحه الكيميائيه
ده احنا لو فى حرب هتفكر قبل ما تستخدمه
انما شباب من بلدك وزيهم زيك تضربهم بالطريقه دى ليه

الاحداث نفسها بكل تفاصيلها بتكرر
شهداء بتموت عشان بيتظاهروا تظاهر سلمى وبيتقال عليهم بلطجيه
نفس البيانات بنفس تفاصيلها "مع اختلاف الاوضاع السياسيه "حتى بنفس بعض الكلمات فيها
يعنى مبارك قال لا انتوى الترشح
والمشير قال لم يكن يطمع فى مش عارف ايه
نفسي اشوف مين الغبى اللى بيكتبلهم الكلام الجزمه ده

مبارك قدر فى خطابه اللى قبل التنحى يكسب تعاطف الناس
والناس اختلفت جزء متعاطف معاه وبيقول نديله فرصته
وجزء بيقول لا ده بيستموت ويعيش الدور 
لحد ما يظبط فلوسه ويطفش ويسبها خربانه
انما المشير ابن الايه عمل حركه بنت لذينه صراحه وطلع انصح من مبارك
قال نعمل استفتاء
عشان بردو الشعب يختلف ما بين مؤيد ومعارض للاستفتاء ده
لو انت عارضت تبقى ضد الديمقراطيه
ولو وافقت ابقى قول للديمقراطيه خالتى بتسلم عليكى
لما انتوا مش قادرين تستحملوا ولا تسمعوا ولا تفهموا صوت الناس اللى فى التحرير
يبقى هتقدروا تسمعوا صوتنا فى الاستفتاء ازاى
وبعدين مين يثق اصلا فى استفتاء اللى هيقولوا نتيجته بيموتوا فى الشباب وبيرشوهم بغازات سامه !!

لو انا واحده من الناس اللى مش قادرين ينزلوا التحرير
يبقى كل اللى اقدر عليه واحاول اعمله
انى احاول افهم الناس اللى اعرفهم
اهلى اصحابى قرايبى جيرانى
اللى مش فاهمين الصح
ولسه مصدقين ان اللى فى التحرير دول بلطجيه وهدفهم يخربوا البلد
يشوفوا الفيديوهات والصور والناس اللى بتموت وتتسحل وتترمى فى الزباله
وبيضربوا ويشموا غاز بيدمرهم
عشان يصدقوا الحقيقه ويشوفوها بعنيهم

الناس اللى على النت قادره توصل لكل الكلام ده
بس اللى مش بيعرفوا فى النت حاجه
مش قدامهم غير التليفزيون يفهموا منه
وده مبقاش مضمون اليومين دول
فا من حقهم علينا اننا نفهمهم

16 comments

ابراهيم رزق said...

و منين اجيب ناس لمعناة الكلام يتلوه

تحياتى

مصطفى سيف الدين said...

على فكرة
النت برضه متاخديش منه اخبار صحيحة
كذا مرة الاقي تويتر فيه ناس بيحبوا يهولوا ويألفوا مع نفسهم
احنا في زمن مفيهوش شفافية خالص
ربنا يحمي مصر
تحياتي

Bent Men ElZman Da !! said...

ابراهيم رزق

اكيد هنلاقى

شكرا لحضرتك على تعليقك

Bent Men ElZman Da !! said...

مصطفى سيف الدين

ما احنا بردو لازم نميز فى اللى بنسمعه
ومش اى حد يقول حاجه تتصدق على طول
لازم يكون فى حاجه تثبت الكلام اللى بيتسمع ده

شكرا ليك يا دكتور
شرفنى وجودك

عازفة الالحان said...

مسآأئك طآاهِر حبيتي
ليس بيدينآ نحنْ سوآاء الدعآآء لكُم
بأن يفكْ الله الأزمة
ويعجل لكم النصًر
وترتآحوآ ونشوف البسًمة عل شفآه كل مصري حُر

وتبقى مصركم مصر العظيمة

دُمتي بخير

Bent Men ElZman Da !! said...

عازفة الالحان

اللهم آمين
وتعدى المحنه دى على خير ياااارب
ميرسى ليكى يا قمر
وشرفتينى بزيارتك والله

Hadeer Ghattas said...

أبدعت فعلا..

بس للأسف الوضع اليومين دول أصعب بكتير، بسبب الأسلحة اللى بيستخدموها،، واللى أول مرة نشوفها دى،، من القنابل المسيلة للدموع والغازات الحارقة للعينين والمسببة للاختناق..

ربنا يستر...

حَنيّـن نِضال said...

ربنا يقدم الخير لمصر و اهلها و يهظهم و يحفظ مصر بيهم

سواح في ملك اللــــــــــــــــــه- said...

اقول ايه

غير ربك يؤلف قلوب شعب مصر

وتستعيد مصر عافيتها

باولادها

Bent Men ElZman Da !! said...

haneen nidal

اللهم آمين
بسمع منك يارب
شرفنى وجودك

Bent Men ElZman Da !! said...

سواح في ملك اللــــــــــــــــــه-

اللهم يتقبل دعائك
وتستعيد مصر عفايتها فى اقرب وقت
ونقدر ناخد حقنا وحق كل الشهداء
شكرا لحضرتك

nour alqamar said...

لمصر التوفيق والسلامه يارب
ويحميها ويحمي شعبها

أمل م.أ said...

غاليتي
يسعد اوقاتك بكل الخير

لا زلت اقول الطريق مش سهل
وثمن الحرية غالي جدا
والموضع بحاجة الى كثير من الصبر والحكمة
لاتقاء الفتن خصوصا بين الناس البسطاء الضايعين بين الحقيقة والتضليل
ربنا يجمع قلوبكم على ما فيه الخير
لك مني كل الحب

كوني بخير دوما

Bent Men ElZman Da !! said...

نور القمر

ربنا يتقبل دعائك
شكرا ليكى

Bent Men ElZman Da !! said...

أمل م.أ

فعلا تمن الحريه غالى اوى
ناس بتموت وناس بتتصاب وعنيها بتروح
وللاسف كل ده مش فى حرب
ده من ابن بلدهم زيهم زيه مش عدو
وكل اللى نقدر عليه لو مش قادرين نساعدهم
نساعد بجد الناس البسيطه اللى مش قادرين يفهموا الصح فين
نقولهم اللى بيحصل وليهم كامل الحريه يبقوا مع الثوره والا ضدها

شكرا ليكى على تعليقك
وشرفتينى

Bent Men ElZman Da !! said...

Hadeer Ghattas

الاسلحه دى مش فاهمه ليه مش ظهرت قبل كده
ليه ظهرت دلوقتى على شباب بلدنا احنا اللى المفروض كانت تطلع للعدو مش ليهم

شكرا ليكى يا هدير على تعليقك
وشرفنى وجودك وزيارتك

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment