25 November 2011

انتخبوا ابن الدايره...الجزء التانى

.


البوست ده كتبته يوم 14/11/2011
وكنت أجلته شويه
و بعد الاحداث اللى حصلت قولت مش هانزله
بس قررت انزله النهارده لانى وصلت لنتيجه اخيره فيه





هو لما وزاره التربيه والتعليم 
 يعملوا الامتحانات بتاعه نص السنه فى الخباثه كده
على انها امتحانات الشهر
يبقى ده معناه ايه؟
انهم مش متفائلين خالص بالانتخابات
وده بالتبيعيه يوصلنا احساس بعدم التفائل نهائى بتاتا مطلقاً

ايييييه بقى كميه المرشحين دىىىىى !!!
عشر الاف مرشح عن 8 محافظات بس!! ليه بقى نفسى افهم؟!؟
ده الواحد مش قادر يعرف اتنين والا تلاته من المرشحين فى الدايره بتاعته
يعنى عندنا الدايره بعد ما كانت دايره المعهد الفنى بس
بقت دلوقتى بتشمل شبرا والساحل وروض الفرج والزاويه والشرابيه
فى كل منطقه من دول فى مرشحين شكل 
وبتوع المناطق التانيه مايعرفوش عنهم حاجه
كل واحد من المرشحين بيعلن فى المكان اللى يعجبه 
ومش مهم الناس بتوع باقى المناطق يعرفوه والا لا
واللى المفروض يكونوا من ضمن نفس الدايره 
ومن حقنا نكون عارفين كل المرشحين
بس عادى نتفلق وهو يعلن مكان ما يحب
وهو هيتعب نفسه مثلاً
وكل ما اروح فى مكان جديد تابع للدايره بتاعتنا
الاقى مرشحين جداد اول مره اعرف عنهم حاجه والا اشوف صورهم حتى
هو انا هامشى الف وادور وراهم بقى والا ايه

فى بقى شويه مرشحات
حاجه اخر جمال
دول داخلين المجلس يتعاكسوا مش يشتغلوا
والا اغنيه حزب الوفد بقى
حد يفهمهم يا جدعان انهم داخلين مجلس الشعب
مش مهرجان الموسيقى العربيه

بعد الجزء الاول من البوست ده
قولت لما أسال اختى هترشح مين؟
لاقتها بترد عليا بسرعه من غير تفكير
وبتقولى على اسم واحد مترشح عن الدايره بتاعتنا 
لاول مره يترشح بس كنت بسمع اسمه الى حد ما قبل كده
قولتلها اشمعنا
قالتلى اصله بيخدم الناس من قبل ما يترشح
هى اختى نزل عليها الوحى على غير العاده  كده ليه 
ووصلت للى هترشحه بكل سهوله كده
اومال انا ليه مصعبه الموضوع بالمنظر ده يعنى
بس لما فكرت
 هو انا ليه اختار بالطريقه دى اصلا
انا مش عايزه اختار مرشح خدمات
انا عايزه اختار مرشح يبقى عنينا وسط الحكومه
وقت مايعملوا حاجه يسألهم ده ليه
مش مجرد ناس بتقدملنا رشوه مستخبيه فى كلمه خدمات
ولا واحد بيدور على حصانه عشان يستخبى هو نفسه وراها

اما حزب الحريه والعداله عاملين كُتيب كده
كاتبين فيه اهداف الحزب
حسيت انه دستور مُصغر
فكرنى اوووى بمواد الدستور
كلام مثالى اوى زياده عن اللزوم
لدرجه انه مايتصدقش
او بمعنى اصح احنا اتعودنا مش نصدقه
مفيش حاجات محدد بتتقال واللى بيقولوه بيعيدو ويزيدوا فيه
مفيش حاجه محدده بعينها قالوا هيعملوها
ولما مش يعملوها يتحاسبوا على كده
عاملين ناصحين يعنى
وده اكدلى انى بردو مش هارشحهم

اما بالنسبه للرموز الانتخابيه اللى مازالت لافته نظرى اوى
رمز الكمثرى ورمز الجزر ورمز الموز
تحس انهم مرشحين من سوق العبور تقريباً
والا بتوع رمز الرسيفر والتكييف واللاب توب
حاسه انى لو دورت شويه هلاقى رمز تويتر ورمز الفيس بوك
التطور التكنولوجى يصنع المعجزات

بعد اللى حصل فى الاسبوع اللى فات ده
وعدم وجود اى موقف واضح من جميع الاحزاب والمرشحين
ولا كأنهم مرشحين فى بلد تانيه 
مش نفس البلد اللى بيحصل فيها الاحداث دى كلها
قررت انى هانزل الانتخابات
وهابطل صوتى
عشان مفيش حد يستحق انى ارشحه


17 comments

m.hallawa said...

مساء الخير دينا
علي فكرة هما كلهم ولاد دايرة ؟؟؟؟
تحياتي

سواح في ملك اللــــــــــــــــــه- said...

اصل هنعرف فلان ازاي من غير منشوف شغله

بمعني اخر انا حاسس ان كل اللي هيترشحوا

او بمعني ادقهيشتغلوا بجد

ليه بقي

اولا هيبقي عايز يتعرف ويطهر في الصورة

وعينه علي الدورة القادمة

ثانيا

هيبقي كرباك الشعب

وراه وخاصة

ان احنا طالعين من ثورة مجيدة

فلن يتخاذل حتي لو دي طبيعته

ثالثا

المنافسة اثناء انعقاد المجلس هتبقي شرسة

كل واحد او حزب هيحاول

يبان احسن منغيره

وده في الاساس

هيصب في مصلحة الشعب

وعموما

ربنا يصلح احوالنا

Bent Men ElZman Da !! said...

m.hallawa

مساء النور
دى حقيقه فعلا
شكرا لحضرتك شرفنى وجودك

Bent Men ElZman Da !! said...

سواح في ملك اللــــــــــــــــــه-

معاك ان اللى جاى واصرار الناس انا المجلس والحكومه تبقى "نضيفه" عن كده
يمكن تجبرهم انهم يشتغلوا بجد وبضمير لاول مره فى عمرهم
بس الفكره اصلا
ان انا واحده من ضمن الناس
مش قادره اشوف حد كويس اختاره
لانى اصلا ماعرفش حاجه عن حد من المرشحين واللى جايز يكون كويس بس انا ايه عرفنى !!
واللى اعرفهم مايستحقوش ابدا يترشحوا من الاساس فابالتالى مش هختارهم نهائى
وعشان اخلص ضميرى ومايكونش ليا يد فى انى اختار حد مايستحقش المكان اللى هياخده
انسب حل انى ابطل صوتى

شكرا ليك على تعليقك
مشرفنى دايما وجودك

m.hallawa said...

المهم يا دينا نسحب البلد او بمعني اصح ننقذ البلد من ايدي العسكر
تعرفي حضرتك كام مليار سنويا تحصل عليها المؤسسة العسكرية وزيهم للشرطة ؟؟؟؟
من أميركا ؟؟؟
أين هذة الاموال وغيرها وغيرها الخ الخ الخ
علشان البشاوات والبهاوات بيتوع الجيش والشرطة
يعيشوا وكل واحد واخد شوية عساكر مصخرهم لخدمة اهلة !!! والجيران أيضا ان لزم الامر !!!
خلينا نخلص من الديكتاتورية العسكرية
التي جعلت مصر في قاع الدول !!!! ومركزة في حماية الصهاينة ؟!!!!
أما ولاد الدايرة !!!
الاخوان في انتظارهم !!!هههه
تحياتي

Lady E said...

والله جدعه انا كمان قررت أعمل كده بعدما الحزب اللي كنت ناوية أرشحه سقط من نظري وجايب شوية مرشحين .......ولا فاهمين في اي حاجة طبعا علشان يبقوا عروسة ماريونيت في ايد الحزب مرشح دمياط كان بيتكلم على تطوير الزراعة في دمياط ههههههههههه ودمياط مش زراعية اصلا :) حاجة غريبة

سجلت على موقع الانتخابات وغيرت مكان الانتخابات للخارج وقررت اني هبطل صوتي برضه لما اعرف هننتخب ازاي واحنا بره مصر الأول :)

Bent Men ElZman Da !! said...

m.hallawa

ما احنا بعد اللى حصل ده
والخراطيش والرصاص الحى والغاز عرفنا خلاص الملايين اللى فى مصر بتروح فين
وال الاقتصاد واقع
اومال لو مش واقع كانوا عملوا ايه
فجرونا وخلصوا نفسهم بقى
اما الاخوان فا دول قصتهم قصه
نفسى ياخدوا حته بمبه فى الانتخابات دى تطلع من عنيهم

شكرا لحضرتك على تعليقك
شرفنى وجودك

Bent Men ElZman Da !! said...

Lady E

بالظبط زى ما قولتى
المرشحين دلوقتى اغلبهم مش فاهمين حاجه لانهم لاول مره بيرشحوا نفسهم فا مايعرفوش حاجه عن السياسه اصلا
واخدنها منظره وخلاص

بالنسبه لانتخابات الخارج
ال ايه هتبقى بالبريد
يعنى عقبال ما البريد يوصلهم يكونوا اعلنوا النتيجه قبلها بيومين
الناس دى ماسمعتش عن ان الانتخابات ممكن تبقى فى السفاره
بس والله عادى
مش فارقه خارج من داخل
المرشحين غير مشجعين اصلا على ان الواحد ينتخب منهم حد
اموت وافهم جايبنهم منين !!

Anonymous said...

صباح الغاردينيا دينا
انا ماليش في السياسة والانتخابات
بس دخلت اقرأبوستك الجديد وحبيت اسجل حضوري
واقول ربنا يحمي مصر وشعبها يارب "
؛؛
؛
لروحك عبق الغاردينيا
كانت هنا
Reemaas

هبة فاروق said...

الكلام ده دار بينى وبين والدتنى
حنرشح مين وفى الاخر قررنا اننا نروح ونقول حادى بادى
خلص الكلام والسلام ختام

reemaas said...

اكتر حاجة لفتت نظرى فى الرموز النتخابيه رمز الشهيد
انتخبوا اخوكم الشهيد فلان!


انا مش مشكلتى اختيار الافراد دلوقتى
انا هموت واعرف اختار انهى حزب

Bent Men ElZman Da !! said...

ريــــمــــاس

اللهم تقبلك دعائك
شكرا ليكى يا ريماس
ونورنى وجودك يا جميله :)

Bent Men ElZman Da !! said...

محمد سعد القويري

شكرا لحضرتك على الدعوه :)

Bent Men ElZman Da !! said...

هبة فاروق

والله فى ناس كتير بتعمل كده يا هبه
مش ماحدش قادر يرسى على حاجه
شرفنى وجودك :)

Bent Men ElZman Da !! said...

reemaas

ايه شوفت بتاعه اخوكم الشهيد دى
تجاره حتى بالشهداء
كويس انك عارفه الافراد دى خطوه كبيره والله

ابراهيم رزق said...

عندما يكون نظام المجلس سمك لبن تمر هندى
فالنتيجة عصير زبادى بالتونة و الفواكه
الاختيار بين سىء و اسوء لا ينتج الا سىء
للأسف حيرتك هذه حيرة اغلب الناس البسطاء و عندما يحتاروا لا يجدون امامهم الى عباية الدين لكى يرموا نفسهم بها
لذا انا مش متفائل و صوتى امانة معى و عندما اجد من اعطيه الامانة اعطيها له هو معى الى ان يحل الله امرا كان مفعولا

تحياتى

Bent Men ElZman Da !! said...

ابراهيم رزق

الواحد فعلا مش متفائل
وخصوصا ان الكل متوقع اكتساح الاخوان من قبل ما نفكر النتيجه هتبقى ايه اصلا
المهم ان النتيجه تبقى فى صالح تطور البلد للاحسن

شكرا لتعليق حضرتك ونورتنى

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment