28 November 2011

صوت الحريه

.




احساس الانتخابات النهارده مختلف بكتير حتى عن الاستفتاء
ان الناس كلها عايزه تنزل
واقفين فى الشارع بالساعات
مش عشان فى غرامه زى ما بيقولوا
بس عشان عايزين يعملوا ده
فى حماس كبير جوه كل الناس عشان فرحانين بالتغيير ده
ناس سنهم كبير وناس تعبانين 
واللى رجلها مكسوره واللى عامله عمليه
وكلهم عندهم نفس الروح انهم يعيشوا اللحظه دى

 اننا ننزل اصلا عشان ننتخب لاول مره فى حياتنا
من غير ما نكون مستنين بطاقه انتخابيه 
والا نكون عارفين ان صوتنا اصلاً مش هيفرق
مع ان وارد يكون فى شك جوه ناس مننا انه مش هيفرق اوى المره دى كمان
بس كخطوه اولى
تدعو للتفائل

حتى لو كنت بطلت صوتى
بس ايه اللى يجبرنى اختار ناس انا مش مقتنعه بيها
وانى ببطلان صوتى ده يبقى انا بضيع حق الشهداء او انى سلبيه
وهو انا لما انتخب حد مش يستحق مش يبقى كده بضيع حقهم بردو؟!؟؟
بس فكره انى انزل الانتخابات
وانا عمرى ما فكرت اعرف مين المرشحين فى الدايره بتاعتى اصلاً
دى لوحدها اختلاف كبير جوايا

ده مايمنعش بردو ان فى مخالفات كتير موجوده
منها الدعايه اللى ظهرت فجأه قدام اللجان
كنتوا فين قبل كده؟!؟
ده غير ان الكلام ده مخالف قانوناً اصلا
والحق يتقال
كانت الدعايه الاول للاخوان وده كان عامل تخفظ كبير عليهم
بس مع الوقت بقت للكل وكله بيوزع ورق

الحريه والعداله اللى كنت ملحظاه انهم معتمدين على الناس اللى مايعرفوش اى معلومه عن السياسه
او بمعنى اصح مش بيدورا فا بيدورلهم بنفسهم
زى ان كل واحد واخد لاب توبه وفلاشته وقاعد فى اى ركن كده
يجيب للناس ارقام اللجان ويقولهم انتخبوا الحزب بتاعنا
وفى واحد تانى مرشح فردى
اعتمد على ان الناس متقسمه كل واحد فى حته
وعامل اتوبيسات بتوصل الناس للجان بنفسهم بشرط انهم يتخبوهم
مطلع رحلات للجان يعنى وكل واحد يجى ومعاه ساندوتشاته !!

حتى مع كل التجاوزات دى
مبروك علينا خطوه جديده فى احساسنا بجد بالحريه


16 comments

ابراهيم رزق said...

سعيد انك قدرتى امانة صوتك و لم تعطيه الا لمن يستحق

للأسف اغلب الناس مش محددين و دى فرصة للى بيدعوا انهم بتوع ربنا و هما ايدهم ملوثة بدم الشباب

ربنا يستر و يخيب ظنونى
معكى ابراهيم الممتنع عن الانتخابات
تحياتى

Bent Men ElZman Da !! said...

ابراهيم رزق

ياااارب فعلا ظننا يخيب ويبقى فى ناس كويسه
اكيد اى حد فينا مش بيتمنى غير ان مصر تبقى احسن
ومش مهم هو ادى صوته لمين ساعتها

شرفنى وجودك استاذ ابراهيم :)

EL pRiNcEssA said...

يارب بس تيجي بفايدة يارب
وربنا يقف مع بتوع التحرير اللي فعلا جابولنا الحرية دي لحد عندنا

nour alqamar said...

بالتوفيق ليكم ولمصر ياغاليه ..
مع تحياتى لك
نور

د/دودى said...

الاخوان المسلمين من كتر ما كانوا بينافسوا الحزب الوطنى اتعلموا شويه حاجات بتنفع فى الانتخابات

سواح في ملك اللــــــــــــــــــه- said...

هي خطوة علي الطريق

Bent Men ElZman Da !! said...

EL pRiNcEssA

يارب
وان شاء الله تيجى بفايده عشان تعب الناس دى مايروحش هدر

نورتينى يا جميله

Bent Men ElZman Da !! said...

نور القمر

اللهم آمين
ميرسى ليكى يا قمر
نورتينى بوجودك :)

Bent Men ElZman Da !! said...

د/دودى

اه اتعلموا منه اوووى
وكانوا مستنين بس الفرصه
واهى جتلهم

شرفتينى بوجودك :)

Bent Men ElZman Da !! said...

سواح في ملك اللــــــــــــــــــه-

وطريق الالف ميل بيبدأ بخطوه
او ثوره :)
شرفنى وجودك ومتابعتك

rona ali said...

صوتك امانه وركز هههههههه

انا ليسه معرفتش انتخب انهارده امم افواج
والجيش معرفش نازل ليه

وفي حاجات تانيه واسرار اكتر هتعرفوها في بوست منى كدة لما اشوف المقاعد هتحم لمين اة يا بلد
اة اكتر لرجلى

أمل م.أ said...

غاليتي
بالفعل اليو م في مصر كان يوم حافل
بل انه كان عرس مصري بكل معنى الكلمة
وفعلا لم يتوقع احد من النخبة المثقفة او السياسية هذا الاقبال على التصويت
منذ الصباح الباكر وانا اتابع
الوضع في الشقيقة مصر
واصدقك القول كنت خائفة بعض الشيء
لكن الحمد لله الامور تبدوا الى الان جيدة
ربنا يتمم على خير
وتخرج مصر ام الدنيا بثوب جديد يليق بها
لك مني كل الود

كوني بخير دوما

Bent Men ElZman Da !! said...

rona ali

فعلا النهارده كان زحمه بطريقه فظيعه
انا روحت متاخر على الساعه 5 كده وكان الجو رايق اووووى

مستنيه اكييييييد البوست بتاعك بكل التفاصيل :))

Bent Men ElZman Da !! said...

أمل م.أ

فعلا عرس مصرى
ان ناس يبقى عدت ال 70 من عمرها
ورايحين ينتخبوا لاول مره
احساس رائع بالحريه
الحمدالله الامور عدت على خير وان شاء الله بكره كمان يعدى على خير
سعيده جدا بكلماتك واحساسك الطيب :)
ليكى منى تحيه وشرفنى وجودك وتعليقك :))

Nada Emam ʚɞ said...

والله يا دينا انا مش عاجبني اللي بيحصل خالص فالبلد وعارفة ان المجلس القادم دا فاقد صلاحياته وهايبقي منظر وخلاص // بس انا هشارك برغم الوضع فقط يمكن المجلس العسكري يغور ونرتاح بقا
وطبعا مش عايزة اقولك انا قرفت اد ايه عشان اعرف المرشحين واحاول احدد حد مناسب !!
ربنا يستر بجد

Bent Men ElZman Da !! said...

Nada Emam ㋡

معاكى ان وارد يكون المجلس ده فاقد لشرعيته ويتم ابطاله حتى قريب
بس الفكره كلها اننا لاول مره قادرين نختار ومش حد بيختارلنا غصب عننا
دى خطوه فى طريق طويل للحريه اللى كلنا عايزنها
ان شاء الله اللى جاى يكون احسن
شرفتينى يا جميله :)

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment