12 November 2011

انتخبوا ابن الدايره :D

.




مش كنت ناويه اتكلم عن حاجه فى الموضوع ده 
لحد ما يخلص ونشوف هيحصل ايه
بس الهبل اللى بيحصل بيحكم بقى

عايزه اتكلم عن انتخابات مجلس الشعب
السنادى بخلاف ان جو الانتخابات مختلف والمفروض يكون فى امل
الا انى ملاحظه ان لا فى "امل" ولا "عُمر" حتى

بدايه من انى اصلاً لحد فتره قريبه جداااا
مش كنت قادره اعرف مين المرشخين فى الانتخابات عن الدائره بتاعتنا
لان ماحدش بيحاول يعلن عن نفسه
غير عن طريق اليفط والصور وبس
بس ادينى عرفت

اتفاجئت ان واحد من المرشحين السنادى
واللى كان مرشح لكل السنين اللى فاتت وبيخفى اى حد قصاده
لانه كان النص التانى وجزء لا يتجزأ من حمله يوسف بطرس غالى 
للانتخابات  عن الدائره بتاعتنا طول الكام سنه اللى فاتت
واللى كانوا هما الاتنين دايما بيكسبوها غصب واقتدار
او بمعنى اصح بشراء اصوات الناس
والخدمات اللى بيوزعوها فجأه فى فتره الانتخابات
وبعد ما يكسبوا ابقى قابلنى ان حد لاقاهم تانى
ولان ادام واحد فيهم كسب يبقى التانى تلقائى كسب
زى واحد وخياله كده
وبالرغم من ان المرشح ده اول ما حصلت الثوره
ولانه كان شريك يوسف بطرس غالى فى الانتخابات دايماً
طبعا اسمه جه فى التحقيقات
وقريت خبر فى جريده من الجرايد وقتها
انه مطلوب التحقيق معاه تحت بند من اين لك هذا
حتى لو كانت التحقيقات حصلت معاه او ماحصلتش
بس هو ازاى جاب الجرائه دى انه يرشح نفسه تانى
ومتوقع ان الناس تصدقه تانى
وتنتخبه تانى!!!
فى ناس بجحه اوى فى حكايه الانتخابات دى

فى مرشح تانى مش شفته ولا عمل حاجه عرفتها صراحه
غير انه دايماً بيخسر قدام يوسف بطرس غالى والمرشح السابق ذكره ده

اما تالت مرشح
بسم الله ما شاء الله لسه شايفاه مجمع كل متشردين المنطقه حواليه
وقاعدين قاعده مزاج عالى اوى
وريحه المخدرات منتشره فى جميع الاتجاهات
وحاجه اخر حلاوه يعنى

والرابع بقى
بالرغم من ان المقر بتاعه فى شارعنا
بس هاموت واشوف حاجه منه غير صورته !!

وفى حوالى 10 من الاخوان فى حزب الحريه والعداله
وانا مش ناويه اختار حد منهم

اما الباقيين
فا جارى البحث عنهم
لان واضح ان تحديد مبلغ الدعايه مأثر اوى على الكل
الاول كانوا بيعملوا دعايه بهبل
دلوقتى ناقص الواحد يروح يدور عليهم بنفسه

ده بقى كله كوم
والرموز الانتخابيه كوم تانى خالص
حاجه اخر عجب يعنى :D

المفروض الواحد يعمل ايه؟
نفكرهم ان فى ثوره حصلت مثلاً واننا محتاجين مرشحين 
يستحقوا بجد اننا نختارهم مش زى قبل كده
والا اعزل فى حته تانيه يمكن الاقى مرشحين عدلين !!

 *****

للى يحب يعرف حاجه يعنى


32 comments

m.hallawa said...

السلام عليكم
ربنا يستر علي مصر
تحياتي

سواح في ملك اللــــــــــــــــــه- said...

بصي

الفلول مش بس المرشح عن الدايرة ابن الدايرة

اللي بيبع صوتة برضه

ده فلول وهو اخطر من المرشح نفسه

الناس لازم تنضف وتيطل تتاجر بصوتها

تحياتي

Bent Men ElZman Da !! said...

m.hallawa

فعلا ربنا يستر
شكرا لحضرتك ونورتنى

Bent Men ElZman Da !! said...

سواح في ملك اللــــــــــــــــــه-

طب واللى عايزين ينضفوا بس مش عارفين
وعايزين فعلا يدوا اصواتهم للى يقدر يصلح حالنا
ما انا عمرى ما فكرت انتخب حد عشان كنت شايفاهم مش يستحقوا
وبعيدا بقى عن فلول ولا اى حاجه
مازلت شايفاهم مش يستحقوا
يبقى ازاى احنا هنقدر نبنى مستقبلنا الجاى !!

سواح في ملك اللــــــــــــــــــه- said...

شوفي

انا هدي صوتي لواحد جديد

اقري تاريخه واسال عنه

لو هو حسن السمعة يطلع بقي من اي تيار

ميهمنيش

نجرب الجديد

وكل جديد اكيد هيحاول يثبت وجوده في الفترة الجاية

لان عصاية الشعب والثورة هتبقي متابعاه

تحياتي

م

Miss LoZa said...

عايزة اقولك ان معظم مرشحى الانتخابات مش بيكون عندهم نقطة من الاحمر
ووشهم مكشوف اوى وبجحين فوق الوصف اصلا
فبلاش تستغربى يعنى
يالهوى :O بيشربوا مخدرات !!!!!!!
يا مامى بجد
ايه الارف ده ,, حيوان اوى بجد
الموضوع ده بينرفزنى اوى والله العظيم
ايه حرقة الدم دى يعنى
البلد دى انا مش عارفة هتنضف امتى بقه الواحد زهق !!

Bent Men ElZman Da !! said...

سواح في ملك اللــــــــــــــــــه-

والله زى ما قولت
احنا اللى المفروض نعمل بحث عن كل واحد مرشح نفسه عشان نشوف ممكن نختار مين
يعنى زمان كانوا هما اللى بياخدونا من ايدينا ويعرفونا كل حاجه عنهم وبرنامجهم وناويين يعملوا ايه
دلوقتى احنا اللى لازم ندور وراهم عشان نعرف مين الافضل فيهم

Bent Men ElZman Da !! said...

Miss LoZa

ااه البجاحه توفره اوى

المخدرات دى عشان تقريبا ناويين يعمل من ضمن برنامجه الانتخابى
غرزه لكل مواطن :D

ادينا مستنين يمكن لما كلنا نختار الناس النضيفه البلد تنضف والا حاجه

nona elsha3nona said...

شوفى يا ايتها البنت اللى من الزمن ده
انا من نفس المكان اللى انت ساكنه فيه وهقولك وبمنتهى الامانه متقلقيش عارفه واللى كان بينزل مع بطرس غالى ولا بتاع قعده المزاج ولا حتى الاخوان المسلحين دول ومتقلقيش كلنا لها

Bent Men ElZman Da !! said...

nona elsha3nona

انا افتكرتك اختى والله
نفس اسمها الحركى ونفس المكان ههههههههههه
كويس انك حاسه بكده
انا افتكرت انا بس اللى كارهه اللى داخلين الانتخابات
لازم مانقلقش عشان مش نكتئب

ميرسى ليكى يا قمر
ونورتينى بزيارتك واتمنى مش تكون الاخيره :))

AHMED SAMIR said...

انا لحد النهارو قبل اسبوعين فقط من الانتخابات و مش عارف مين المرشحين في الدايرة عندي
مهزلة بجد
مش عارف دة قصور مني و لا منهم
بس اكيد في حاجة غلط

Reem Nafady said...

أولا: عجبني جدا شكل البلوج
ثانيا: عجبني الموضوع جدا و كويس ان عندك خلفية عن المرشحين مش زيي كل المرشحين يا حرامية يا فلول يا تجار صنف يا مستجدين...

ثالثا:تشرفت بيكي يا أفندم..

ريم

Radwa Ashraf said...

أنا مشفتش غير مرشحين الاخوان فى الدايرة بتاعتنا
فعلا المرشحين مش بيحاولو يعلنوا عن نفسهم
و بعدين احنا ازاى هنعرف ان الشخص ده يستحق
أكيد مش بكيلو اللحمة و لا الخمسين جنيه اللى بيديها فترة الانتخابات

كان نفسى فى تنتوفة امل :(

Bent Men ElZman Da !! said...

AHMED SAMIR

هو الاكيد ان فى تقصير منهم فى الدعايه غير مفهوم وغير طبيعى عن السنين اللى فاتت
مش فاهمه ليه

شكرا ليك جدا على تعليقك ورأيك

Bent Men ElZman Da !! said...

ريم عصام

ميرسى ليكى يا ريم انتى اجمل

كل المرشحين فى كل الدوائر كده
وده اللى موقعنا فى حيره للاسف

انا اللى اتشرفت بيكى وبمرورك
نورتينى جميله :)

Bent Men ElZman Da !! said...

Radwa Ashraf

دلوقتى لو بقت بكيلو لحمه و 50 جنيه بجد يبقى عليه العوض
واضح ان تناتيف الامل اتبعترت منهم ومابقاش فاضل حاجه للانتخابات دى
نورتينى يا رضوى

سندباد said...

ربنا يعديها علي خير

rona ali said...

انا موضوع الانتخابات كل ما بيجى

ببقي عايزة اقول يالهوتى :)
احمدى ربنا انا ليسه لاشايفه اعلانات ولا اى نيله هنا
نا بينى في منطقه مهجورة ولا إيه

انا عايزة موقع يعرفنى المرشحين عن كل منطقه
متعرفيشي حد ابن حلال عامل كدة

Bent Men ElZman Da !! said...

سندباد

ربنا يستر فعلا
شكرا ليك

Bent Men ElZman Da !! said...

rona ali

انا والله دورتلك على موقع كده لانى فاكره انى سمعت ان فى موقع فيه قوائم المرشحين
بس مش لاقيته للاسف
اول ما الاقيه هاجبهولك على طول

EMA said...

و الله عندك حق و الموضوع شكله هيعك ع الآخر ربنا يستر..بس لمما يبقى حد حزب وطنى يبقى لازم يتعلم عليه كدة من اولها عشان لو عمل ايه حتى ينسى انه ممكن ياخد العضوية تانى كفاية لغاية كدة..

و بجد ربنا يستر على مصر

تسلمي يا دينا

و تقبلي مروري و متابعتي لمدونتك الجميلة

أع ـقل مـ ج ـنـونــة said...

ربنا يستر وجماعة حزب الكنبة ميفرحوووش فينا
ربنا يستر علي مصر

Unknown said...

لا طولى بالك ..هتشوفى عجايب لسه

Unknown said...

انا بجد بقيت بكره الانتجابات من كتر الصور اللى ف الشارع بس عمرنا ما بنشوف خلقت حد فيهم طول السنة كمان انا مش هدى صوتى لاى حد من مرشحى الاخوان ف ديرتنا الجديد بقى انى اول مرة ف حياتى هدى صوتى لحد هبقى السنة دى

ابراهيم رزق said...

يا مرحب بدائرة المعهد الفنى
يعنى سنجر و حلاوته يعنى شبرا و حلاوة شبرا
ابن الدايرة ابن الدايرة ابن الدايرة
انا سمعت الاسم ده فين قبل كده
كل المرشحين ولاد الدايرة
فميش واحد مرشح يبقى مختلف و يقول انا ابن المثلث او المستطيل او المربع
ديمقراطية فاشلة ان اختار
من صاحب مصالح او جاهل او فلول او حرامى
و سلميلى على ابن الدايرة

Bent Men ElZman Da !! said...

EMA

ماهو البجاحه فى ان حد من الحزب الوطنى سابقا
ويجى يرشح نفسه دلوقتى
ولا كأن فى حاجه حصلت
حتى لو علمنا عليه 100 علامه دى ناس مش بيحوق فيهم حاجه

ميرسى ليكى يا ايمى
وسعيده جدا بزيارتك واتمنى تتكرر ان شاء الله :)

Bent Men ElZman Da !! said...

أع ـقل مـ ج ـنـونــة

ربنا يستر علينا وعلى مصر بقى

نورتينى يا ريمو

Bent Men ElZman Da !! said...

خالد ناجى

ما احنا فى انتظار باقى العجايب ان شاء الله :D

حضرتك نورتنى
وسعيده جدا بحمله التدوين اللى دعيت ليها :)

Bent Men ElZman Da !! said...

mena

ناس كتيييييير مننا هتبقى لاول مره تدى صوتها لحد
عشان كده كلنا بنفكر اننا ندى صورتنا لواحد يستحقه بجد
وده اللى هيحيرنا فى الاختيار

نورتينى يا منه

Bent Men ElZman Da !! said...

ابراهيم رزق

هههههههههههههههه
جامده اوى التحيه اللى فى الاول دى
هو حضرتك من شبرا والا ايه بقى

فعلا ديمقراطيه فاشله
مش من الديمقراطيه اننا ندور عشان نختار احسن الوحشين
لان كلهم عينه واحده للاسف

نورتنى بتعليقك بجد

Anonymous said...

طيور الظلام !

Unknown said...

تحياتي و تقديري لهذا القلم و صاحبته

رجاء

موضوع: تدوين تحت الوصاية
موضوع هام و أسال الكثير من الحبر
أرجو مواصلة الرابط و الادلاء برأيك / رأيك يهمنا كثيرا !!
http://zaman-jamil.blogspot.com/2011/11/blog-post_08.html
شكرا على التفاعل
منجي

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment