10 December 2011

انا ضد البرادعى !!

.


انا ضد البرادعى من زمان من قبل الثوره 
ومش حابه ظهوره المفاجئ ده
وكأنه هو المفجر للثوره مثلاً
بس ماكنتش ضد الناس اللى بيشجعوه او عندهم استعداد يختاروه
كل واحد ليه رأيه وتفكيره وهو حر فيه

كنت من انصار عمرو موسى صراحه
بما ان هو شخصيه سياسيه وفاهم فى العلاقات الخارجيه 
 وقادر يتعامل كويس داخلياً
بدليل ان ناس كتير بتحبه من زمان
بس شيلت فى نفسيتى اوى منك ياعمرو يا موسى
ساعه احداث نوفمبر
لما طلعت فى السى بى سى
وتقول الثوار المفروض يمشوا من التحرير 
ونكون مع الجيش ايد واحده عشان نعدى الفتره دى
طب وبالنسبه للشهداء اللى ماتوا ماخدتش بالك منهم والا ايه ظروفك؟؟
فا بقى ليا تحفظ عليه 
وعندى استعداد ابقى من انصار اى حد غيره 
وادخل فى دماغ حد اقتنع بيه اكتر


لما شوفت لقاء البرادعى مع مجدى الجلاد
مش كان عندى استعداد اسمعه او اقتنع بيه
هى دماغى كده بتبقى جزمه لما بتقفل
بس بصراحه الراجل كلامه مايتعيبش
اول حاجه كلامه بسيط اوووى
يعنى الناس اللى مش متعلمه تفهم كلامه
يعنى طريقته مش متصنعه ولا متكبره 
ولا حافظله كلمتين كبار كده جاى يتمنظر علينا بيهم
لو بقى رئيس هتبقى طريقته وكلامه قريب اوى من الناس البسيطه
ثانياُ بيتكلم بزوق جدا حتى لما بيوجهله سؤال من مشاهدين مستهبلين
بيرد بزوق واحترام
وثالثاً لما اتكلم على اللى المفروض يكون من اولويات اهتماماتنا 
وطريقنا لاصلاح البلد
كان كلامه منطقى جدا وممكن يتعمل مش شئ مستحيل
فا تفائلت بيه الحقيقه
وعندى استعداد افتح دماغى اللى قفلت من ناحيته دى



حاجه على الهامش بقى
كلام البرادعى فكرنى بيها
لانه اتكلم عن مساحه الحريه المفروضه لكل واحد فينا
واللى ماينفعش حد تانى يتعداها
هو ايه اللى يدى الحق لاى انسان انه تجبر حد يعمل حاجه مش عايز يعملها
ايه بقى اللى يخلى المرشح المبجل لحزب النور
 يجبر مذيعه القناه الرابعه انها تلبس الحجاب 
عشان يتكرم ويرضى يعمل معاها حوار؟!؟
لا ويقولها البسيه دلوقتى بمزاجك 
ما انتم هتلبسوه بعد كده غصب عنكم !!!
(ده حسب كلام المذيعه نفسها)
 لما هى مش لبسته عشان ربنا يبقى هتلبسه عشانك انت ازاى !!!


22 comments

سواح في ملك اللــــــــــــــــــه- said...

بصي

انا متابع البرادعي من ايام ماكان المدير للطاقةالذريه

وده ببساطه لانه مصري ثانيا هو علي راس منظمة عالمية

وعجبني موقفه جدا ايام ماجتمع مجلس الامن بقيادة امريكاوعصابة بوش

لتوجيه التهمة للعراق بانها تمتلك اسحة نوووية

حين سالوه في مجلس الامن

كان رده مقتضب

لم يثبت لنا ان العراق به ايه اسلحة نووية


وتعاطفت معاه جدا لما عصابة جمال مبارك ابتدت تشهر ببنته علي النت

وتجيب صور ليها بالمايوه

انما ده مش معناه اني قررت انتخبه كرئيس

لاني هاشوف الاول مين المتقدم للرياسة
وبرنامجه وكفاءاته السابقة

وبعدين احدد

اما موضوع الشيخ

اللي اشترط ان المذيعة تتحجب

انا شايف ان من حقه

وشايف برضه ان هي من حقها ترفض او تقبل

Noha Saleh said...

انا كمان ضد البرادعى بس بصراحة كلامه عجبنى لما سمعته على السى بى سى شكلى هعيد نظر

Nada Emam ㋡ said...

انا اول ما شوفت بداية البوست دي
قولت أكيد الباقي شتيمة فالبرادعي
وخاصة لما شوفت اسم عمرو موسي
اللي للاسف مش بطيقه ولاسباب
لان مش معني اني اشتغلت فالعلاقات الخارجية ابقي بفهم فيها وللاسف جامعة الدول في عهده كانت في موقف زباله وحاله سيئة وعلاقاتنا الخارجية بالدول التانية أكيد كلنا عارفين كانت عاملة ازااي .. وتقريبا هو ماعملش جديد بل كان فالمكان الخاطئ
وكمان من النظام القديم ودا سبب جدير اني حتي ماسمعلوش !
..
انا بردعاوية وافتخـــــر
وبجد لو ظهر حد افضل من البرادعي علي استعداد 100% اني انتخبه
لكن الي الآن هو الافضل
وعلي فكرة يا دينا لو رجعتي لقديم شويه هاتعرفي ان البرادعي بيطالب بالتغيير من 2009 وما قبلها
ويكفي انه الوحيد اللي كان ضد نظام مبارك وكان بيقول دا علنا دون خوف من النظام القديم
..
البوست حلوووووة اووووي .. تسلمي يا دينا :))

Bent Men ElZman Da !! said...

سواح في ملك اللــــــــــــــــــه-

مش معنى اكيد ان البرادعى مرشح محتمل ومناسب الى حد ما يبقى اكيد الاختيار هيكون عليه
بس الى حد ما هو الانسب دلوقتى
لو فيه غير احسن ممكن نختاره ليه لا

ميرسى ليك على تعليقك
نورتنى :)

Bent Men ElZman Da !! said...

Noha Saleh

فعلا لقائه فى الجون وغير فكره ناس كتير عنه

ميرسى ليكى يا نهى
نورتينى :))

Bent Men ElZman Da !! said...

Nada Emam ㋡

ما احنا كلنا كنا بنطالب بالتغيير
واحد زى عمرو الليثى مثلا كان مبهدل الحكومه فى انهم سايبين الفقراء تحت الارض بالمنظر ده
بس مش معنى كده انه يكون سبب فى الثوره مثلا !!
بس الواحد ماينكرش ان حكومه مبارك اصلا كانت ضده جدا زى ما خالد كان بيقول كمان
وده يمكن سبب كافى اووووى ان احنا نكون حاسيين ان فيه من البرادعى كويس وهيفيدنا
وايه المانع لو فى حد احسن منه نختاره
كله فى الاخر لصالحنا ولصالح البلد
وده اللى احنا عايزينه

ميرسى ليكى يا ندى على مرورك
نورتينى يا قمر :))

ابراهيم رزق said...

اولا بالنسبة للبرادعى انا لا باحبه و لا باكرهه
و ده اللى مخلينى احكم عليه حكم موضوعى
عشان كده انا حطه رقم 1 لاختيارى لحين ظهور حد جديد
بعكس حمدين الصباحى اللى مرتبط معه بصداقة فممكن تؤثر فى اختيارى
احنا عايزين رئيس دولة مش شيخ طريقة
و يا خوفى يا بدران لو حولوا انتخابات الرئاسة الى مثل انتخابات مجلس الشعب

تحياتى

reemaas said...

لا انا مش هنتخبه وده لاسباب منها طبعا السبب اللى قولتيه انك مش طيقاه لله فى لله

ثانيا حديثه مع معتز الدمرداش كان مستفذ جدا
ال ايه ال15 مليون اللى نزلوا فى 25 يناير نزلوا تعاطفا معاه لما الظابط غرقه بالميه !!!!!!!!!!!!!!!1

ولا هنتخب عمرو موسى لانه بوشين ومن ايام الثورة وبسبب حديث اعلامى برده

هتنخب مين
هههههههههههههه
مش عارفه

faroukfahmy58 said...

البرادى فعلا كما ذكرتى كان ظهوره مفاجئ!!!!!!!!!
نط ازاى ومنين ووصل لحد فين ده فيلم متقطع الاوصال لا يصد ولا يرد
وعمرو موسى خدم صحيح العلاقات الخارجية ولكن مشاكلنا الخارجية مش كل حاجه وهل هو قدرمشاكلنا الداخلية واولها رغيف لكل فم مفتوح
اشك واشك دون ان اطعن فى شخصه فلكل تخصصه الناجح فيه وكما قال رسولنا المصطفى كل لما يسر له مع تحياتى
الفاروق

د/دودى said...

انا برضه زيك كده كنت بكرهه قوى و حسيت انه نط على ثوره العيال الغلابه و برضه كنت من انصار عمرو موسى و كمان قررت انى غالبا هاتبع البرداعى خاصه انه احسن الوحشيين

AhMeD RaDy said...

امممم

حلو اوى ان فى اتنين قرارو يعيدوا النظر

ودا بقى مهم جدا جدا جدا جدا جدا بصراحة .. الفرصة

هو دا اللى كان ناقص الفرصة احنا للاسف ما اخدنش الفرصة اننا نتعرف على اى شئ فى الفترة اللى فاتت سواء احزاب او اشخاص وكان الموضوع محتاج اعلام شاطر ( مشكلة الاعلام يا بنت تانى اهى ) ولكن لان اعلامنا الاجير المستاجر بلا اى قدرة على توضيح شئ غرقنا فى الاشاعات والتهم !

البرادعى انا مع افكاره وهو صاحب رؤية بجد .. قال ان ادامه عشر سنوات عشان يا دوب نعرف نبدا نعدل .. ودا يطمنى انه راجل عارف بيعمل ايه .. وهو اللى طلب ان المرحلة الانتقالية تكون سنتين .. ودلوقتى الاحزاب كلها عرفت اد ايه هو برده صح وهى اللى بطلتم دلوقتى بسبب الاستعجال !

وهو اللى قال ان النظام هينهار بمجرد نزولنا الشارع ... وفعلا بمجرد البداية فى النزول للشارع مع وجود البرادعى ابتدى النظام يتهز ويتارجح ويترعب ويخاف !

احنا لولا ان حسنى لسه فى الحكم .. و مشكلنا حكومة الجنزوارى

كان فى حاجات كتيرة هتكون افضل

ربنا يسهل بقى ونخليه يسيب الحكم قريب

Sara said...

احم احم
أنا من مؤيدي البرادعي من الأول :)
و هو انسان محترم
و مليش دعوة بحياته الشخصية نهائي
و بالنسبة للحاج بتاع حزب النور اللي عايز المذيعة تتحجب
فدا مش من حقه مطلقًا لأنه تدخل في حياتها الشخصية :)

و ربنا يوفقك يا دندن :*

Bent Men ElZman Da !! said...

ابراهيم رزق

ودى احسن حاجه ان الواحد يفكر بموضوعيه فى اختياره لشخص معين
مش لانه بيحبه او بيكرهه فا هيختاره

لو انتخابات الرئاسه بقت زى مجلس الشعب
يبقى كده الموضوع هيبقى فى مش لصالحنا خالص
كفايه اللى احنا شايفينه منهم دلوقتى

نورتنى بتعليقك استاذ ابراهيم :)

Bent Men ElZman Da !! said...

reemaas

والله يا نور كلنا فى نفس الحيره
انا بردو مش كنت بطيق البرادعى بس بشويه موضوعيه فعلا مفيش اصلح منه دلوقتى الى حد ما
ومعنى كده ان مش هو اللى هيخلينا نوصل لكل اللى عايزينه فجأه
بس هو حاطط خطه وعارف بيعمل ايه
للاسف مش شوفت لقائه مع معتز
كويس عشان مش اكرهه اكتر اصلا

منورانى يا قمر دايماً :))

Bent Men ElZman Da !! said...

faroukfahmy58

هو بعيداً عن الحياه الشخصيه لكل واحد فيهم
واللى منها حصلت حملات كتير لتشويه سمعه البرادعى
بس فعلا حسيت ان عمرو موسى فى اتجاه والبرادعى فى اتجاه تانى
كل واحد اتجاهه كويس بس فى الاحسن من التانى
واحنا فى النهايه عايزين الاصلح لبلدنا

شكرا لحضرتك استاذى
ومشرفنى وجودك دايماً :))

Bent Men ElZman Da !! said...

د/دودى

الازمه والله يا دينا
اننا دايماً بنتحط فى موضع اختيار احسن الوحشين
اذا كان فى مجلس الشعب حالياً
والا بعدين فى الرئاسه
ومش ده اللى المفروض يكون الوضع الطبيعى !!

ميرسى لتعليقك ورأيك
نورنى وجودك :)

Bent Men ElZman Da !! said...

AhMeD RaDy

الفرصه
قولت حضرتك حاجه مهمه
ان احنا المفروض فى مرحله نسمع لكله وندى فرصه لكله يمكن نلاقى عند حد مش كنا شايفينه حاجه نقتنع بيها
والاعلام دوره المؤسف ده مأثر علينا بالسلب

عيبنا اننا مستعجلين وعايزين كل حاجه بسرعه
بس مع الوقت ان شاء الله هتبقى احسن
انا متفائله :)

شكرا لحضرتك على رأيك
شرفتنى بوجودك

Bent Men ElZman Da !! said...

Sara

ما هى حياته الشخصيه دى نقطه الضعف اللى بيمسكوه منها ويشوهه صورته بيها

نورتينى يا ساره
ووحشنى وجودك والله :))

أع ـقل مـ ج ـنـونــة said...

انا اقتنعت بالبرادعي كـ مرشح يستاهل ان يتقال بعده محتمل من بعد الثورة
مش عشان هو مفجر الثورة
بس عشان افتكرت حاجات كتير هو عملها في وقت البلد كانت فيها نايمة
افتكرت خالي لما جالنا البيت مع ان للاسف خالي من الاخوان وقالنا ان البرادعي عامل جمعية التغيير وسجلو انكو موافقين ع التغيير
افتكر ماما قالتله بلاش لتودينا في داهية
وقتها هو شكر فيه جدا

بعدها اختفي وظهر واتشتم وطلعو عليه ملحد وصور لبنته وحاجات غريبة كدا
اتأكدتان دا شخص كويس
لأن في بلدنا مش بيشوهو صورة حد بالشكل دا الا لو كان محترم ويستاهل !!

ربنا يولي علينا الأصلح يارب

وياريت سواء البرادعي او غيره يحترم الشعب دا عشان الشعب يحترمه

وجع البنفسج said...

بالنسبة لي لا مقتنعة بالبرادعي ولا عمرو موسى

رغم ما يتحدثون به عنه في لقاءه مع الجلاد

بالنسبة للملاحظة ع الهامش .. هذا فعلا كلام خطير وزي ما قلتي هي مش لابسه خوفا من الله راح تلبسه خوفا منكم ؟؟

Bent Men ElZman Da !! said...

أع ـقل مـ ج ـنـونــة

هو حكايه تشويه سمعته على طول الخط دى اللى كانت مريبه
وكانت فى صفه الى حد كبير على عكس المتوقع
لان احنا عارفين طول عمرنا زى ما قولتى ان النظام السابق مش كانوا بينفوا حد ولا بيشوهوا سمعه حد الا لما يكونوا خايفين منه كده
والبرادعى كان عملهم رعب بدليل كل التشويهات اللى كانوا بيحاولوا يعملوها فى حياته

ميرسى ليكى يا ريمو على رأيك
نورتينى يا قمر :)

Bent Men ElZman Da !! said...

وجع البنفسج

حتى لو كان لقاء البرادعى مع مجدى الجلاد كان كويس لحد كبير
ده مايمنعش انه احسن"الوحشين"مش اكتر من كده
وفى انتظار الافضل ان شاء الله

ميرسى ليكى اوى على تعليقك
وشرفنى وجودك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget