21 December 2011

شكراً للمجلس العسكرى

.




شكراً للمجلس العسكرى
لانى ماكنتش اعرف معنى تتسحل الا من عمايلكم

شكراً للمجلس العسكرى
لانك عرفتنى اد ايه احنا دمنا رخيص اوى كده

شكراً للمجلس العسكرى
لانك خلتنى اشوف ان اللى متغطى بيك عريان

شكراً للمجلس العسكرى
لانك قطعت ايد الشعب اللى ماسكه فى الجيش
وبنيت بينهم سور عمره ابداً ما هيتكسر

شكراً للمجلس العسكرى
لان مفيش حق شهيد من الشهداء رجع لحد دلوقتى

شكراً للمجلس العسكرى
لان مفيش اى حد غلط خد جزائه لحد دلوقتى

شكراً للمجلس العسكرى
اللى فى نظره الكتب اهم من البنى ادمين

شكراً للمجلس العسكرى
لانك بتموت فى شبابنا وبتعرى فى بناتنا

شكراً للمجلس العسكرى
اللى ال أيه حمى الثوره !!
انهى ثوره اللى حمتها بالظبط حضرتك؟!!؟


18 comments

Unknown said...

:i: انتى بتشكريهم وانا فاهمه اللى جواكى ايه وحرقت قلبك عامله ازاى لانى انا كمان زيك بس انا بقولهم أتفووووووووووووو عليك يا مجلس العار

د/دودى said...

انا كنت من الناس المؤيديه لان المجلس يكمل مدته باى وضع و خلاص لحد الانتخابات ما تخلص..الا ان بعد ماسبيرو و دهس الناس بالمدرعات و بعد محمد محمود و الناس بتترش بالغاز زى البيروسول على حشرات و بعد مجلس الوزراءو سحل البنات و ضرب علاء بالنار ...خلاص خلاص يعنى خلاص

مصطفى سيف الدين said...

شكرا للمجلس العسكري انك كشفت مين فعلا قلبه على البلد ومين اللي بينافقك
ربنا ييسر الحال ويحفظ مصر واهلها

شمس النهار said...

الغريب المريب موقف اغلب الشعب المصري من ابنات تلاقيه كده موقف غلاوي
ايه منزلهم ايه مخاليها تلبس عباية كده مع ان لو كبرتي الصورة هتلاقي البلوفر مقطوع
يسقط يسقط حكم العسكر

سواح في ملك اللــــــــــــــــــه- said...

مش عارف اقوللك ايه

بس جميغ الاطراف

اراها مخطئة

كنا في فرحة الانتخابات

واول مرة نتاكد ان صوتنا بيوصل ورايح في مكانه

وجم المعتصمين بوظوا فرحتنا

فمنذ تنحي مبارك معروف ان اي اعتصام يليه كارثة

طبعا البنت اللي اتعرت دي انا زعلان جدا عليها

بس عزائي

ان في الفوضي

كل شءيحدث

nour alqamar said...

شكرا لك بجد ..وانا متضااااااايقه كثيييييير بجد على الى صاير ربنا معاكم
تحياتى لك
نور

Bent Men ElZman Da !! said...

mena

هو مجلس العار
عشان حسسنا بالعار اننا نبقى شايفين جيشنا اللى المفروض يحمينا يعمل فينا كده !!

Bent Men ElZman Da !! said...

د/دودى

والله انا زيك يا دينا كنت من مؤيدينه اول التنحى
بس بعد كل اللى بيحصل ده
واضح ان التائيد من الاول كان غلط

Bent Men ElZman Da !! said...

مصطفى سيف الدين

اللهم آمين
ويارب يكون اللى جاى احسن بكتييير من اللى فات وربنا يعوض البلد دى ان شاء الله

Bent Men ElZman Da !! said...

شمس النهار

ايا كان البنت كانت لابسه ايه
وايا كان هى نازله ليه
فا مفيش اى شرع ولا دين ولا اخلاق ولا انسانيه بتقول ان اى بنت يتعمل فيها كده اصلا
ويسقط اى حاجه ماشيه غلط وبتقتل انسانيتنا يوم عن يوم

Bent Men ElZman Da !! said...

سواح في ملك اللــــــــــــــــــه-

بس المشكله ان اللى بيحصل ده مش تأثير فوضى وبس
ده تاثير حاجات كتير انا اصلا مش قادره اعرفها ولا افهمها
وبيتيهيألى فى ناس كتير كده بردو

Bent Men ElZman Da !! said...

نور القمر

والله كلنا بنفس الحاله يا نور
ان شاء الله اللى جاى يكون احسن
ميرسى يا قمر

faroukfahmy said...

كفاكى شكر ولا عزاء للسيدات

AhMeD RaDy said...

اعتقد ان شكرك هيزيد الفترة القادمة اوى !! ولسه يا ما هنشكره على اللى بيحصل

نفسى نبطل نشكره ويرجع مكانه الطبيعى

EL pRiNcEssA said...

فعلا اللي متغطي بيه عريااان
تسلم ايدك

Bent Men ElZman Da !! said...

faroukfahmy58

لا الشكر هيبقى كتير اليومين دول
ربنا يستر

شكرا لحضرتك على مرورك

Bent Men ElZman Da !! said...

AhMeD RaDy

اه واضح جدااا
الشكر من النوع ده تقريبا بيجيب معاه نتيجه عكسيه للاسف

شرفتنى بوجودك

Bent Men ElZman Da !! said...

EL pRiNcEssA

والله كان نفسنا نتغطى بيه فعلا
نورتينى

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment