01 December 2011

Forgive Or ... !!

.



من تعاليم اى دين سماوى
ان احنا لازم نتسامح ونعيش فى حب دايماً
ولو حد ضايقك فى حاجه عديها
وخليك انت الاحسن وأبدأ بالسلام
وأبدأ بالنيه الصافيه بالحب
من غير ما تبص بقى
اذا كان اللى قدامك هيتقبل اللى انت بتعمله ده
بنفس التسامح والحب والنيه الصافيه والا لا
ودى حاجه كويسه ديننا بيعودنا عليها
اننا نحاول نكون نيتنا صافيه دايماً
عايشين فى راحه وامان مع بعضنا
لان لو كل واحد شايل جواه حاجه وحشه لحد
مش هنقدر نعيش فى راحه بال
ده غير انك كمان بتاخد حسنات على بدأيتك بالسلام والتسامح

طب انا عايزه اعرف حاجه
بما انى يعنى من الناس اللى مش بتعرف تسامح
هو مش كتر التسامح ده
فى الزمن الجميل اللى احنا فيه ده
ممكن يخلى اللى حواليك يفتكروا انك ضعيف وماعندكش شخصيه؟؟

طب بلاش دى
مش ممكن بردو يفتكروا انك مفيش عندك كرامه
يعنى واحد بيغلط فيك وبيسئ ليك وبيظلمك دايماً
وانت بتسامحه
مره واتنين وتلاته
فين كرامتك اللى بتدافع بيها عن نفسك؟
ما انت لو كل مره تروح تبدأ انت بالسلام
اللى قدامك ممكن يقول فى مره ماعندكش كرامه!
وبعدين المؤمن لا يلدغ من جحر مرتين

هو ايه الصح فيهم بقى ؟!!؟


26 comments

Anonymous said...

أعتقد الصح هو التسامح في كل الأحوال لأن الإنسان المتسامح هو إنسان متصالح مع نفسه و بينام و معندوش ذرة ندم غير طبعاً إنه بيكسب حب الناس...لكن موضوع الكرامه ده ممكن نتجنبه بإننا نتسامح من غير ما نتعدى حدود معينه تلزم الآخر بإحترامنا...و ده مجرد رأي :)

أرق تحية لكي

شيرين سامي

AHMED SAMIR said...

في طريقة افضل و مجربة
لو حد غلط فيكي
خدي حقك منه...
و بعدين سامحيه
بكدة تبقي حققتي الحسنيين
اخدتي بتارك....و في نفس الوقت تحليتي بفضيلة التسامح

reemaas said...

على فكرة التسامح لازم يكون حاجة داخليه بمعنى انك ماتشيليش فى قلبك منه

يعرف بقى انك سامحتيه او مايعرفش ده يرجع للى ببتعاملى معاه لو يستاهل يعرف ومتاكدة انه هيقدر ده عرفيه
مش هيفهم ويقول ده ضعف مع نفسه بقى

المهم انتى

نور القمر said...

موووضوع رائع بجد سلمت ايديكي ..
تحياتى
نور

rona ali said...

واو لايك للبوست مبدأيآ
يا دندن

بصي انا شايفه خير الامور الوسط انا ابدأ بالسلام لو انا حاسيت ان الموضوع صغير ومش مستاهل حتى لو هاجى علي نفسي شويه بسيطه
انما لو كبير وانا مش غلطانه اعتقد مافيش بيقدر يصفي بسهوله وبما انك مش من الناس اللي بتحبي تنافقي يبقي هتبعدى شويه ودة احسن

بعد فترة ممكن تلاقوا نفسكم بتتعاملوا عادى جدآ كان محصلش حاجه

بس عارفه لما تحبي حد اوى وتخلصي لي جدآ ويغلط ومتسامحين اعتقد دة من معزتك متاخديش بكلام اللي يقولك اللي بيحب بيسامح مش في كل حاجه واى هبل التسامح دة حسب درجه الموقف

بالتالى وسطنى الامور واعرفي مين غلطان ومعزته عندك وانتى هتلاقي الحل والصح احنا برضوا في الاول وفي الاخر مش ملايكه ومش كاملين ^_^

بوست نقاشي جميل

haneen nidal said...

الثنتين صح نسامح و نحفظ لانفسنا خط الرجع

ريــــمــــاس said...

صباح الغاردينيا دينا
وسوري لاني تأخرت عليكي الأيام الي راحت
عارفة يادينا بجد مابعرفش غير أسامح ساعات بحس انه الناس بتقول عني ضعيفه بس صدقيني المشكلة اني مش بقدر ابقى قاسية حتى على الناس الي بتظلمني او توجعني ولما بسامحها واعديها بحس براحة لما بحط راسي على مخدتي وانا بقول الحمدلله ابات مظلومة ولا ابات ظالمة وببقى مرتاحه من جوايا اني سامحت مهما كان الجرح يمكن مايعجبكيش كلامي بس بجد دا احساسي "
؛؛
؛
اممم خلي قلبك ابيض دايما
وصدقيني مش حتندمي :)
لروحك عبق الغاردينيا
كانت هنا
reemaas

نيللى said...

لو مشينا ورا الناس بتشوف الامور أزاى ؟يبقى الدنيا هتبقى غابه.اه هم شايفين كدا ضعف عشان هم تفكيرهم تفكير الشيطان ,اللى مش عاوزنا نكون مؤمنيين أقوياء بتسامحنا وعفونا,وهنروح بعيد ليه؟الرسول صلى الله عليه وسلم ياما أتأذى وسامح وعفا,أوعى تشوفى التسامح بمبدأ الناس,شايفه زى ماربنا أمرنا بيه,,

محمد البرقي said...

الصح فيهم انك تفضل المسامح برضه :)

ابراهيم رزق said...

التسامح ليس له علاقة بالكرامة
التسامح من على و لا من اسفل
طالما انا اقدر على الرد و لا ارد فانا متسامح
لان العفو عند المقدرة
و كلهل بالنيات

تحياتى

faroukfahmy58 said...

بنت مين
انا أرى ان الامر كله يتوقف على الشخص الذى امامك اذا كان شخص فاهم الدنيا كويس فليبدأ الانسان بالتسماح والاعتذار والسلام اما اذا كان هذا الشخص من النوع الغلس لن يفيد فيه وفيكى اللى بيتعمل وتجنبه افضل
الفاروق

نهر الحب said...

مممم
دي حيرة بقي

انا شايفة ان التسامح لازم اوي بس مع الشخص الصح اللي يستاهل اللي بنحبه وبيحبنا وواثقين فيه
:)
بس

Nada Emam ㋡ said...

حلو اووي الموضوع دا
وكنت لسه بسأل نفسي فيه قريب
وبالصدفة لقيت رد في كتاب ل د/ محمد العريفي
..
كان بيصف فيه بعض اخلاق الرسول عليه الصلاة والسلام
قال ان الرسول كان دوما يسامح ولا يغضب لشئ قط ما دام في غير الدين !
ولكنه ف موقف مع الكفار انه عليه الصلاة والسلام كان ماراً بهم يوما ذاهبا لبيته ونعتوه بكلام مسئ .. فتغير وجه الرسول ولكنه سامحهم و مضي .. ومر بهم ثانية ففعلوها وسامحهم و مر بهم ثالثة ففعلوها
فرأي ان الرفق لا يصلح مع هؤلاء فوقف عليهم وقال " أتسمعون يا معشر قريش .. أما والذي نفسي بيده لقد جثتكم بالذبح " .. ثم ظل واقفاً امامهم حتي انتفضوا من اماكنهم و ظلوا يقولون " انصرف يا أبا القاسم راشداً .. فما كنت جهولاً " ! فانصرف عنهم الرسول صلي الله عليه وسلم ..
..
الحكمة اننا نسامح مرة واتنين بس لو حسيتي ان اللي قدامك شخص بيفكر ان تسامحك ضعف او قلة حيلة و بيزود فيها .. يبقي أكيد لازم يعرف حدوده و يعرف ان تسامحك كان من كرم أخلاقك فقط :))

Bent Men ElZman Da !! said...

شيرين سامى

ايوه هى اهم حاجه الحدود دى
لازم يبقى فى فاصل كده
ميرسى ليكى يا شيرين على رأيك
شرفتينى :)

Bent Men ElZman Da !! said...

AHMED SAMIR

والله جامد اوى الموضوع ده
انا اوقات كتير بعمل كده فعلا :D
ميرسى ليك جدا على تعليقك
وشرفنى وجودك :)

Bent Men ElZman Da !! said...

reemaas

ما هو لو حد بتتعاملى معاه بشكل يومى اكيد هيبقى واضح انتى سامحتى والا لا
شرفتينى يا نور بتعليقك بجد :))

Bent Men ElZman Da !! said...

نور القمر

ميرسى ليكى يا جميله :))

Bent Men ElZman Da !! said...

rona ali

انا اللى لايك للكومنت بتاعك والله
بس بيتهيألى ان حتى لو بعد الفتره النفوس مش اتصافت هيفضل فى حاجه فى النص كده واقفه بينكم
بس باقى كلامك انا معاكى فيه اوووى
ميرسى يا حبيبتى على تعليقك
ونورتينى :))

Bent Men ElZman Da !! said...

haneen nidal

كلامك صح جدا
ميرسى ليكى يا قمر على تعليقك
نورتينى :)

Bent Men ElZman Da !! said...

ريــــمــــاس

والله باين من كلامك يا ريموس طيبه قلبك دى
المهم فعلا ان الواحد يبات مظلوم ولا يبات ظالم
معاكى حق

تسلميلى يا حبيبتى على وجودك دايما :))

Bent Men ElZman Da !! said...

نيللى

فعلا كلامك صح يا نيللى
بس التسامح صفه كلنا بنحاول نوصلها
لان للاسف مش كتير مننا جواه قدره التسامح دى
على اد ما كتير بيكونوا شايفين التسامح ضعف
انما التسامح ده محتاج قوه مش سهل تكون عند اى حد
ميرسى يا حبيبتى على تعليقك
نورتينى :))

Bent Men ElZman Da !! said...

محمد البرقي

اكيد يا محمد صح

ميرسى ليك على تعليقك اللى نورنى ده :)

Bent Men ElZman Da !! said...

ابراهيم رزق

المهم النيه فعلا
فى ناس بتقول انها مسامحه
بس بتبقى شايله جواها لمواقف جايه كتير
شكرا لحضرتك على تعليقك
وشرفتنى بوجودك :))

Bent Men ElZman Da !! said...

faroukfahmy58

ما هو النوع الغلس ده بقى اكتر من الهم على القلب للاسف :)

شكرا لحضرتك على تعليقك
شرفنى وجودك :)

Bent Men ElZman Da !! said...

نهر الحب

فعلا موضوع محيرنى والله
معنى كده ان الثقه اساس لوجود التسامح اصلا

ميرسى ليكى يا قمر
شرفتينى :))

Bent Men ElZman Da !! said...

Nada Emam ㋡

عليه افضل الصلاه والسلام
تسلمى بجد على تعليقك يا ندى
انا بردو بفكر كده
ان الواحد يسامح مره او اتنين
بس مش على طول الخط لازم يسامح عشان الموضوع مش يقلب بضعف وعدم وجود شخصيه

تسلمى يا قمر على ردك
وشرفنى وجودك :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget