30 December 2012

عن 2012 ♥

.
23 التعليقات



السنادى مش كان ينفع تخلص من غير ما اكتب عنها حاجات حلوة كتير
بس مهما حاولت اكتب
مش هيبقى زى الحاجات الحلوة اللى حصلتلى فيها
بالرغم من أن الجو المحيط بينا كلنا مش كان مناسب خالص لحاجات حلوة
بس جوة حياة اى واحد فينا فى حاجات حلوة 
بتخلية يعدى كل اللى حوالية ده
والسنادى بيتهيألى كانت من أحلى سنين حياتى
أن مش كانت أحلاهم على الاطلاق
بداية من اول يوم فيها لحد اخرها
مروراً بحاجات جميلة اوى
زى فرحى وبيتى وصدور كتابى 
وكتاب صندوق ورق اللى شاركت فية مع ناس من أجمل الناس اللى قابلتهم



السنة اللى فاتت لما عملت قائمة بالامنيات اللى نفسى اعملها وربنا يحققهالى
فى منها اللى قدرت احققة 
زى انى اقوى علاقتى بناس كتير وابقى اجتماعية اكتر الى حد ما
و اقابل ناس جميلة اوى عرفتهم من البلوج
واقرأ 30 كتاب والحمد الله قريت 80 تقريباً
واروح اماكن جديدة
واخرج خروجة حلوة انا واختى وصاحبتها من اللى كنا بنخرجها زمان
وافرش شقتى انا ومحمد زى ما كنا بتمنى
وكتحدى ليا قدرت اكتب اكتر من 50 بوست فى المدونه

وفى منها اللى حاولت ووصلت بس كنت مقصرة 
ومش زى ما بتمنى
زى انى اقرب من ربنا اكتر وهافضل احاول اكتر 
زعلت ماما ومحمد السنادى
 يمكن توتر كتير كان بيحصلنا مش خلانى قدرت اعملهم زى ما نفسى
كان نفسى اشترى لكل حد فى البيت هدية وده مش قدرت اعملة ليهم كلهم
حاولت تبقى علاقتى احسن بالناس اللى حواليا 
ومع ذلك مازلت مقصرة جداااا وخصوصا فى الفترة الاخيرة
اما بالنسبة للدايت اللى مشيت علية فترة وخسيت ده 
فـ انا مش عارفه ارجعلة تانى :(
وبالنسبة لفرحى اللى كان نفسى يبقى فى 12\12\2012 
فـ انا بحمد ربنا انى مش عملته فى الوقت ده
والا كنت هتحول لـ لوح تلج نظراً للصحراء اللى انا عايشة فيها :D

اما الحاجات اللى ماقدرتش اصلا احققها
فـ هى انى اخد كورس انجليزى 
وده اساسا انا كنت عارفة من ساعه ما كتبتة انه منحوس ومش هتحقق
للاسف مش قدرت ازور حد من اهلى بقالى كتير مش زورتة 
لحاجات كتير شغلتنى
واسوء حاجة
انى ماعرفتش بردو ابطل عصبية
وكأنها بقت صفه مميزة فيا وصعب تتغير
واخيراً فيلم تيتانك ثرى دى 
واللى اكتشفت انه اختراع فاشل جدا الحقيقة :D

قائمة الأمنيات دى كانت الوحيدة اللى كتبتها فى حياتى
دايماً بكتفى ان ربنا يحس اللى فى قلبى ولو راضى عنى هيحققهولى
السنادى حسيت ان ربنا راضى عنى كتير حتى لو كنت مقصرة
وحسيت انى هابقى طماعه اوى لو طلبت حاجة تانى
وعشان كده انا قررت السنه الجديدة مش هاعمل قائمة أمنيات
لأنى راضية أن شاء الله بكل اللى ربنا هيجبهولى
مش بتمنى غير أنها تكون سنة جميلة اوى زى اللى قبلها
وده عندى كفاية :)



كل سنة وأنتم بخير
وربنا يجعل أيامكم كلها سعيدة :)


readmore »»

28 December 2012

عن إحنا واللى فات ...

.
6 التعليقات


اتفاجئت وانا واقفة بشترى حاجه ... بعدد لمجلة إحنا
"اللى مايعرفهاش هى مجلة شبابية بتتكلم فى كل حاجه بالعامية و
- صوت جيل بحالة-"
وللاسف جداً كان العدد الاخير !
زعلت أوى
بس زعلى الاكثر كان لما قريت مقالات لكل العاملين فيها
واللى بجد لمس حتة مستخبية جوايا



إحنا دى خلتنى أفكر فى حاجات مش كانت فى دماغى أصلاً
إحنا جرأتنى وخلتنى اكتب مقالات ومواضيع منها اللى نشرتة 
ومنها اللى فضلت محتفظة بيها لنفسى
إحنا خلتنى انقل منها تقريباً 20 صفحىة "ودى حاجه مملة بالنسبالى" فى منتدى لموضوع  علامات القيامة والخلفاء الراشدين 
عشان كانوا اسلوبهم مختلف و "مش مكلكع" وحبيت غيرى يشوفهم
إحنا دى المجلة اللى كان نفسى اوى أنشر حاجه فيها
إحنا عرفتنى يعنى اية تفتح شباك جواك يدخل منة النور
إحنا فى كلام الكُتَاب بتوعها عنها
فكرتنى يعنى اية تبقى متعلق بحاجة وفجأة تروح بكل لحظاتها الحلوة
إحنا فكرتنى بجزء جميل اوى من حياتى اختفى



فكرتنى بمنتدى كنت مشتركة فية لـ 5 سنين
واللى منة طلعت بأصحاب عمرهم ما هيتكرروا
واللى كان سبيل انى اعرف اجمل انسان فى حياتى
واللى غيّر تفكيرى وخلانى اشوف كل حاجه حواليا بنظرة فيها تفكير
واللى خلانى ابص للناس واتعامل معاهم بطريقة مختلفة واجتماعية اكتر
واللى خلانى احس انى اقدر اعمل اللى انا عايزاه ادام بحاول
واللى خلانى كل يوم فى ابتسامة ولو صغيرة بتترسم على وشى 
وحاجات كتير اوى حلوة فى قلبى

فاكرة لما كنا بنتجمع سوا فى مقابلات سواء فى الحقيقة او على النت 
عشان نفكر فى افكار جديدة نطورة بيها ونكون كلنا احسن
فاكرة لما كنا كلنا بنفكر وبنسهر مع بعض من غير اى مقابل 
غير بس حاجة بنحبها واننا بنحب بعض
فاكرة لما عرفت ان فى اقتراح انه يتقفل 
وكنت بعيط ان حاجة جميلة زى دى بتجمعنا هتروح
وعارفه ان مهما اتوعدنا اننا نفضل اصحاب حياة كل واحد فينا هتخطفة
..وانا منهم !
كتير اعتبروة فترة فى حياتهم وعدت
لكن انا كنت دايماً بعتبرة مرحلة فاصلة بالنسبالى فى حاجات كتير اوى

المنتدى قفل من فترة 
وماحدش فكر يكتب هو اد اية فرق فى حياه كل واحد دخلة
بس لما شوفت حاجة عاصرتها فى نفس الفترة 
ويمكن بنفس القوة إلى حد ما و بتنتهى
كل الاحاسيس دى رجعت جوايا من تانى 
وماكنش ينفع مش أكتب عنها وعن احساسى انا بيها :)


readmore »»

21 December 2012

صينية أرز معمر

.
18 التعليقات


 جاء الشتاء
 بـ بردة القارص
لتعاوده نوبة الربو المعتادة والتى لا تتركة يهنّئ فى نومة أو حتى صحوة
فـ يلملم بعض من ملابسة المهلهلة و التى لا تقية من برد الشتاء
و يذهب إلى مستشفى أمراض الصدر التى كانت تستقبلة
وكأنة أصبح نزيل -صديق- بها
يجلس بها يوم أو أثنين وربما تمتد المدة إلى أسبوع
تأتى زوجته إلية كل يوم خالية الوفاض
ولكنها تعود محملة بالغنيمة
أكياس اللبن المعلبة وشرائح الجبن المثلثة وبعض أرغفة الخبز
تلك الأطعمة التى يجلس طوال أيامه فى المستشفى الحكومى يدخرها لأطفالة و زوجتة
فـ تعود زوجته كل يوم إلى المنزل المتهالك محملة بكنزهم الصغير
لتدخل إلى المطبخ وتعد لأطفالها صينية الأرز المعمر الساخن
لتدفئهم فى برد الشتاء


بعد سبعه أيام من الشبع يعود هو إلى منزلهم بعد أن تحسنت صحته مؤقتاً
فـتستقبلة زوجته بذات الصينية التى تمتلئ بالأرز المعمر الساخن
ليتدفئ بها بعض الشئ
يتسامرون ويضحكون وهم محاطون بجو الألفة الدافئ 
ينسيهم ذلك البرد خارج جدران منزلهم الصغير ذي الغرفة الواحده !
ليمر يومان تنتهى فيهما صينية الأرز المعمر
فيهاجمهم البرد والجوع من جديد
وتعاودة النوبة المعتادة
لـ يلملم ملابسة المهلكة مرة أخرى
ولكن تلك المرة كانت بسعادة 
فهو لم يعد يعتبرها رحلة للعلاج
بقدر ما أصبح يعتبرها رحلة إلى البحث عن ..
 ما يبعث بهم الدفء..
والأمان..
اصبحت رحلة للبحث عن شئ يسد جوع أبنائة
بعد أن اقفلت ابواب العمل فى وجهه بسبب مرضة !!



readmore »»

13 December 2012

My passion

.
10 التعليقات


مش كنت حابة الاسبوع ده يعدى من غير ما اكتب حاجه
و بعيداً يعنى عن حكاية الدستور و الاستفتاء و نعم وألا لا دى
والواحد أصلاً مش عايز يتكلم فى السياسة كفاية كدة بقى أوى
فـ أنا قررت أن النهاردة يبقى البوست ترفيهى
هاتكلم عن حاجه بحبها ...وهى القراءة



من و أنا صغيرة كنت مختلفة عن كل أصحابي فى حكاية القراءة دى
لان مش كان حد فيهم بيحب القراءة أصلاً غيرى 
وده أستمر معايا لحد لحد فترة مش بعيدة

فاكرة كويس اووووى لحد دلوقتى أول يوم أشتريت فية قصة
ولما حوشت تمنها اللى كان مش يزيد اساساً عن 35 قرش
فاكرة لما خدت الفلوس وروحت المكتبة واشتريت القصة وكأنت بالنسبة ليا كأنها كنز
أول قصة كنت أقراها كانت قصة سيدنا قابيل وهابيل من سلسلة قصص الأنبياء
وبعدها بدأت اجمع فى السلسة دى وكان صاحب المكتبة عرفنى وبدأ يحتفظ بالنسخ ليا عشان أكمل المجموعة كلها

بعدها بدأ معايا بقى موضوع رجل المستحيل واللى كان مستحوذ عليا لفترة طويلة
وبعدين صرخة الرعب و ملف المستقبل و ما وراء الطبيعة واللى مستمرة معايا لحد دلوقتى كل ما بلاقى فرصة أنى اجبها

فاكرة أوى وانا صغيرة كل يوم احوش اتنين جنية ونص و بعد الغداء اروح اشترى قصة
وبردو الراجل حفظنى وبقى كل ما اروحلة يطلعلى كل الاعداد الجديدة اللى كان بيجبهالى مخصوص
اخد القصة واقعد فى البلكونة أفضل اقرأ فيها لحد ما أخلصها
واروح أقول لماما أنا عايزه أجيب قصة تانى
طبعاً مامتى حبيبتى كان ردها جميل عليا
أنتى هتستهبلى دة أنتى كده عايزالك مرتب لوحدك للقصص دى :D
مشجعة الحقيقة يعنى :D
بس بصراحة كنت بصعب عليها 
وكانت بتجبلى قصص لما بتلاقينى قاعدة مش عارفة أعمل حاجة

كل ما كنت بكبر كل ما كنت بحس أن القصص دى مش كفاية بالنسبة ليا
وكان أول كتاب أقراه بعيداً عن النطاق ده
هو كتاب احسان عبد القدوس " يا أبنتى لا تحيرينى معك" 
وده السبب فى قرأتى لية ماما لانه كان عاجبها وشجعتنى اقراه
 وبعدها انقطعت عن القراءة لفترة مع المذاكرة واللعب وحاجات كتير
وبعدين رجعت تانى مع كتاب كان بالصدفة مع صاحبتى بتاع انيس منصور اسمه "قالوا"
كان عاجبنى اسلوبة جداً وفكرة الكتاب اللى عبارة عن فقرات مش متصلة لكن مرتبطة بموضوع واحد إلى حد ما
بعدها بردو بدأت قراءتى تقل و مش كل الكتب بحب أقراها
ممكن كسل منى وكمان النت كان واخد حيز كبير اوى

اما اخر السنة اللى فاتت والسنادى بقى بالنسبة ليا كان الموضوع مختلف تماماً
شغفى للقراءة رجع من تانى وبشكل أكبر
مابقاش ليا نوع كتب معين بحب أقراه
أى كتاب بيقع قدامى بحب أقراه
و مع كل كتاب جديد بخلصة بحس أنى مستمتعه أكتر
كنت حاطه هدف ليا مع بداية السنادى أنى اخلص 30 كتاب
بس الحمدالله قربت أوصل للـكتاب الـ 80
وقدرت أخلص المجموعة الشعرية لـ سوزان عليوان فاضلى منها كتابين أن شاء الله اخلصهم قبل السنة ما تخلص
وبقيت حاطه قائمة بالكتب اللى نفسى أقراها
 وأشتركت فى حملة أسترجل واقرأ 10 كتب فى الشهر اللى اتعملت لمدة شهرين على الفيس بوك
والحمدالله كنت من الاوائل فيها وكان ليا جوايز كمان

القراءة مش بس شغف وحب للمعرفة
أنما بتخلى أسلوبك فى حاجات كتير أوى يتغير
بيخلى طريقتك فى الكلام وطريقتك فى الكتابة تتغير وتكون افضل
ده طبعا غير المعلومات اللى بتضاف ليك
وفى مقولة بتقول
أنت لا تستطيع أن تفتح كتاباً من الكتب دون أن تتعلم منة شيئاً
ونفسى أستمر على كده ومفيش اى حاجه تشغلنى عن القراءة تانى

لما سألت ماما هو أنا اية اللى حببنى فى القراءة كدة 
رغم أن مفيش أى جو مشجع حواليا ليها
قالتلى أن وأنا بيبى كانت بتقعد تقرألى قصص
وقريت فى علم النفس
أن ده بيشجع الأطفال من صغرهم على القراءة وبيخليها حاسة أكتر منها هواية عندهم
ولذلك أنا أن شاء الله لما أجيب بيبى هاقعد أقرالة بصوت عالى
عشان يطلع بيحب القراءة أكتر منى :)
 
 

readmore »»

06 December 2012

معقول ده ؟!!؟

.
8 التعليقات




اللى يضايق فى كل اللى بيحصل دلوقتى
مش أن ربنا رزقنا برئيس مايختلفش كتير عن اللى قبلة
ولا أن فى ناس كتير بتموت وبتتصاب
لأن أحنا فى السنتين اللى فاتوا اتعودنا على الموت 
وبقينا بنتوجع شويتين تلاته وبعدين عادى وننتظر استقبال خبر الموت اللى جاى
بداية من 25 يناير مرورًا بـ 28 يناير و موقعه الجمل ومحمد محمود 
والالتراس و جنود الحدود وأطفال أسيوط 
وحاجات كتير كده لحد الأتحادية
لكن اللى يضايق بجد
أننا بنواجه أكتر فترة من وقت الثورة الشعب منقسم فيها
وأصبح الشعب ذات نفسة هو اللى بيموت نفسة
يعنى ما شاء الله هننقرض بأكتفاء ذاتى من غير أى تدخل
ولا حد محتاج يقول يد خفية ولا طرف تالت ولا الجو ده خالص



بستغرب بجد من الناس اللى متمسكين بتفكير الاخوان ومتفقين معاهم جداً
بيضايقنى أنى اشوف ناس اعرفهم كويس متبنين نفس فكرهم ونفس طريقة كلامهم
لما ببقى خلاص هفكر جدياً فى قطع كلامى نهائى معاهم
أرجع واقول المفروض أكون أعقل من كده
ما هو لازم كل واحد يعبر عن رأية حتى لو كان بالغباء ده بردو
معقول ماحدش فاهم مين الصح ومين الغلط للدرجة دى !
معقول فى ناس قادره تعمل غسيل مخ لناس تانية بالمنظر ده !
معقول تكون كمية المسئولين دول كلهم بـ كم الغباء الفظيع ده ؟!؟
معقول يكون فى رئيس بيعانى من الصمم للدرجة اللى تخلية مش قادر يسمع شعبة 
لكن قادر يسمع الآوامر وبس؟!!؟
 معقول بعد ما نعيش طول عمرنا مهمشين
ويوم ما يطلعلنا صوت ونقدر نغير نظام بحالة
نجيب نظام بدالة يتفنن فى أزاى يرجعنا مهمشين تانى !!!!!!




readmore »»

05 December 2012

♥...♥

.
4 التعليقات




كل ما بدور على كلام اقولة ليك
بحس انى مش عارفه اقولك حاجه
لان اصلًا مفيش كلام ممكن يوفيك حقك

شكرًا لأنك بتستحملنى فى أوقات جنانى الكتير
ومزاجى اللى بيتغير ما بين الدقيقه والتانيه مرتين تلاته كده :D
وزهقى اللى ع الفاضى والمليان
وتفاهاتى واستهبالاتى اللى اوقات بتكون كتير اوى :D

شكرًا لأنك حبيبى اللى عشت أحلم بيه
واخويا اللى ربنا مش رزقنى بية
 وصديق دايماً بيسمعنى
وابويا اللى بشوف كتيييير منه فيك
فى حنيتك وطيبه قلبك وخوفك عليا وهزارك وخفه دمك وكرمك
وزوج عمرى ما تخيلت أنه يكون حد غيرك

شكرًا لأن كل سنة بتزيد فى عمرى
بتحلى بوجودك أكتر

شكرًا لأن أعيادى تختلف بك


 



readmore »»

29 November 2012

كلام والسلام ... كلاكيت 22 مرة

.
22 التعليقات




لما بناخد موقف معين من شخص
بنستقبل كل وأبسط تصرفاتة وكلامة على إنها أثبات للموقف دة
مع أن ممكن جدًا مايكنش ده صح
بس عقلنا وقتها مش بيقدر يترجم التصرفات إلا بطريقة واحدة
اللى هو اصلًا متوقعها ومستنيها

*****

لما بننجرح وبنبعد عن أشخاص كانوا مهمين فى حياتنا
وبتجمعنا بيهم الظروف والأيام من تانى
بنخاف اوى نرجع نكون معاهم زى الاول
بيبقى فى جوانا سببين للخوف ده
خوف من مشاعرنا اللى اتغيرت من ناحيتهم او حتى أصبحت مبهمه التفاصيل
وخوف انهم يقدروا يجرحونا تانى !

*****

الحنين
كلمة حروفها قليلة اوى
بس كل حرف منها
بيخلق جوانا كيان كامل .. بنشتاقلة ..و بنحتاجة
كل ما بترجع تانى ذكرياتنا وتجبرنا نَحَنّ لحاجات كتير مرينا بيها فى حياتنا
وارد جدًا الحاجات دى مايكنش ليها مكان
او حتى مابقاش ليها طعم
بس الحنين اللى جواك دايمًا بيشدك أنك تشوفها بنفس النظره 
اللى كنت بتشوفها بيها زمان
وعشان كدة بتفضل بردو شايفها بنفس جمال زمان
واللى اصلًا مابقاش موجود
وده اللى بيخلي الحنين فى اوقات كتير اوى يتغلب علينا

*****

فى حاجات فى حياتنا سواء بسيطه جدًا او كبيرة جدًا بنحس أنه مُسَلِّم بيها
يعنى كأنها لازم تكون فى حياتنا
وغير وارد فكرة فقدها نهائى فى بالنا
بس اول ما بنشوف حد غيرنا مش بيملكها
بنتخيل نفسنا من غير النعمة دى
وبنبدأ نستوعب فكرة فقد نعمه من نَعَم ربنا علينا
وساعتها بس مش بنقدر غير أننا نحمد ربنا على حاجات كتير اوى بعتها لينا
ونسينا نشكرة كتير عليها

*****

ماتطلبش من حد يعاملك بأكثر من الطريقة اللى بتتعامل معاه بيها
على اد ما تدى على اد ما هتاخد
وعشان كده ماتستناش اكتر من اللى انت نفسك تقدر تديه


readmore »»

11 November 2012

سيدة الألحان

.
12 التعليقات



تجلس داخل محرابها تترفع عن كل ما حولها
بقدسية الألحان التى تعزفها
تحيا يومها ولحظاتها بين الأوتار
تأسرها تلك الألحان هنا
و تحتويها تلك النوتات هناك

ولكن ...
 حين جاء هو ليختطفها
ويدنس ثوبها الملون بلون الكَمَان
ليجعلها ترى مفاتيح الموسيقى فى منحنيات وجهه
وتستمع للألحان فى نبرات صوته
وتشعر بعزف الأوتار على دقات قلبة
و تتلخص ملامحه فى نوتاتها الموسيقية
وكأنها تحتويه وترتسم فى بريق عينيه
لتجد نفسها تزداد عزفاً 
علها تَجده بين الالحان وتراً
او على درجات سلمها الموسيقى نغماً

وحين أعتاد هو على لحنها وأصبح مذاقه داخل أذنيه مُستَهلَك
ذهب ليبحث عن وتر أخر
يستطع العزف عليه أحدى نوتاته الجديدة

فـ عادت هى إلى محرابها تبحث عن قدسيتها التى تخلت عنها
ولكن كان ذلك بعد أن تعكر صفاء لون ثوبها !!


readmore »»

05 November 2012

بعضاً منى ومنك ..♥ (2)

.
16 التعليقات



عارف يعنى ايه يوم عن يوم احس انك بتحبنى اكتر
لما الاقيك مطحون فى شقتنا عشان تخلصها قبل فرحنا
لانك مش عايزنا ناجل ولا يوم
وعايزنا نكون مع بعض فى بيت واحد فى اقرب وقت


انا : تحب نأجل الفرح شويه عشان مش تحس انك مزنوق وتستريح شويه
انت : لا طبعا مش هنأجل ولا يوم
بالرغم من انى كنت بقولك كده بجد عشان شايفه انك تعبان فعلا
بس كان قلبى من جوايا بيتمنى يسمع منك الاجابه دى بالذات


عارف يعنى ايه تكون انت الخير اللى ربنا بعتهولى؟
يعنى فى يوم احلم اننا بنصلى مع بعض
فى مسجد السيده عائشه
ولما احكيلك تاخدنى فى نفس الاسبوع نصلى هناك
والاقى الحلم بيحصل بكل تفاصيله رغم انك ماتعرفهاش
مهما حاولت اوصف احساسى بيك وبالموقف ده
مش بعرف


انا: ربنا يهنيك يارب
انت: مهنينى بيكى اصلا الحمدالله
من اكتر الكلمات اللى بتقدر تخطقنى بيها
عشان انا مش بتمنى غير انك تكون متهنى فى حياتك معايا


عارف يعنى ايه انت  كل احلامى؟
يعنى باقى احلامى التانيه تكون ليك يد بردو فى تحقيقها


انا: مبسوطه اوووى بهدية سوزان عليوان وعاجبانى اوى رسوماتها
انت: خلاص نعملهم مكان على حيطه فى الشقه ونعلقهم عليها
حتى لو مش كنا عملنا كده فعلا
بس كفايه عليا انك بتفكر فى اقل حاجه ممكن تسعدنى
كفايه انك مهتم باهتمامتى اللى اوقات بتختلف عن اهتماماتك


عارف يعنى ايه تكون انت أمانى فى الدنيا؟
يعنى اكون خارجه مع اصحابى
ولما يحصلى موقف يضايقنى
اجرى اتصل بيك
عشان مابعرفش احس بالامان الا معاك
ولا بيعرف حد يطمن قلبى غيرك


readmore »»

17 October 2012

قصاصات أنثوية ..واقع بطعم الحلم

.
36 التعليقات



الفتره دى حاسه أن فى حاجات جميله اوى فى حياتى
أجمل بكتير حتى من أنى أقدر اتكلم عنها
من أجملهم النهارده
النهارده أول مره أمسك حلمى فى أيدى واتأكد بجد أنه بقى واقع
النهارده لأول مره ومن بدايه الحلم أقدر استوعب أنه فعلًا بقى موجود
النهارده استلمت كتابى
"قصاصات أنثوية"



لما كنت نازله من البيت انا ومحمد عشان نجيب الكتاب
حسيت كأنى رايحه فسحه كان نفسى فيها من زمان اوى
ورغم ان الطريق كان متعب جدًا وطويل
بس انا كنت مبسوطه

اول ما استلمت نسخى من الكتاب
ولاقيت فجأه مجموعه كده قدامى من الكتب مكتوب عليها أسمى
قولت لنفسى : ده بجد؟!!؟

 طول ما محمد ماشى وماسك الكتب وانا عماله ابصلها
ولولا انه كان حاكم عليا مش أفتحهم ألا فى البيت
كنت زمانى طلعت كل نسخ الكتاب ووزعتهم حواليا عشان يشاركونى فرحتى بيهم

لما روحت مش عرفت اخد فرصتى بالأنفراد بالكتاب
وكانت اول لحظه افتح فيها صفحاته بيشاركنى فيها اصحاب محمد
ومع ذلك الكتاب خطفنى من كل ده
وحسيت انى شايفاه هو وبس
حسيت انى بجد ماسكه حلم وخيال فى أيدى
لما محمد سألنى حاسه بأيه دلوقتى
قولتله : هو انا بجد اللى كاتبه ده؟
لحد دلوقتى مش متخيله بصراحه
ومش متخيله ان فى وقت قصير الحمدالله قدرت احقق حلمى
هو بعيدا يعنى عن ان اختى مش مصدقه ان انا اللى كاتبه الكلام ده
وماما نفسها تعرف انا كتبته امتا اصلا !
بس انا مبسوطه اوى
نفسى فرحتى دى تكمل

بأن الكتاب يعجبكم وتشوفوا فيه حاجه تستحق بجد انها تتنشر


15-10-2012


readmore »»

03 October 2012

أجازه سعيده :)

.
34 التعليقات




بكره حياتى هتختلف تمامًا
بكل تفصيله فيها
حياه مختلفه بتمنى فى كل لحظه جايه انها تكون دايماً يارب اجمل

مش متخيله اصلاً ان بكره خلاص فرحنا
وهنرجع مع بعض لـ بيتنا اللى تعبنا فيه اوى عشان يطلع بالشكل ده
كل ما ببصلك بستغرب اوى
هو انت بجد تحديدا اللى بقيت جوزى؟
مش هاقولك لسه لحد دلوقتى مش مستوعبه
بس ده مايمنعش انى بردو لسه مستغربه
وكل ما تفاصيلنا وحاجاتنا الصغيره اللى بينا وبنحبها بتكبر
كل ما بحس انك بجد اجمل بكتير من اللى كان فى خيالى

على اد ما انا مبسوطه ومستنيه اليوم ده
على اد ما انا خايفه ومرعوبه
انا بصراحه كنت بحب فكره انى البنوته الصغيره اللى اعرف ادلع على ماما
وبيتحققلى كل اللى انا عايزاه ومش شايله مسئوليه
هو اه يعنى انا هابقى بدلع عليك انت وهتحققى اللى انا عايزاه بردو ^_^
انما دلوقتى هاحس انى بجد كبرت !
المفروض اشيل مسئوليه بيت لوحدى
وانسان كمان مسئول منى
واطفال فى المستقبل حياتهم وشخصيتهم هتتوقف على تربيتى ليهم
الفكره دى كانت ومازالت مرعبه بالنسبالى !!

بس مطمنه وعارف وبدعى أن شاء الله نعدى كل حاجه صعبه مع بعض
زى ما عدينا كل الصعب اللى شوفناه الايام اللى فاتت

بعتذر عن تقصيرى فى متابعه المدونه وباقى المدونات الفتره اللى فاتت
بس لازم دلوقتى اخد اجازه سعيده 
اشوفكم على خير
^___^


readmore »»

29 September 2012

أُمـنـيـة !!

.
10 التعليقات




كم أشتاق لـ لحظه كـ تلك تجمعنى بك
كم كنت أتمنى أن تبقى
ولكن...!
ليس كل ما يتمناه المرء يدركه


readmore »»

25 September 2012

نساء فى حياتى

.
17 التعليقات



البوست ده لـ 3 نساء أثروا فى حياتى بشكل كبير جداً
وحقهم عليا أنى اكتبلهم البوست ده





أولهن .. جدتى أم ماما
أرتباطى بيها من صغرى كان غريب
كان كل اللى يشوفنا يفتكر أن هى أمى مش جدتى
والشبه فى الشكل بينا جدًا كان مساعد على ده
فاكره لحد دلوقتى أول يوم مدرسه 
لما أصريت أبات معاها عشان هى اللى تلبسنى وتخرجنى للباص
فاكره أوى لما قعدت هى على الارض عشان تلبسنى شوز المدرسه الجديد
اللى هى أصلاً جايبهولى واللى لحد دلوقتى فاكره شكله بالظبط
فاكره كل ما كانت بتسافر وانا اعيط
مش عشان حاجه
بس لانى لما كنت بخاف كانت هى اللى بتطمنى
وساعتها كانت مكالماتها ليا كأنها الأكسجين اللى بيرجعنى للحياه
بتحس بيا من صوتى ومهما حاولت اخبى عليها فيا ايه مش بعرف
بحب اسمع تفاصيل حياتها اللى تعبت فيها أوى وخبرتها فى الحياه
بحب قوتها اللى بتبان حتى فى عز بكاها
طلباتى بالنسبه ليها مفيش فيها نقاش لازم تتحقق
حاسه انى بعد ما اتجوز هافتقد وجودها اوى معايا فى نفس الاوضه
واسرارها اللى كانت مش بتقولها لحد غيرى

ثانيهن .. ماما
هو بعيداً يعنى عن ان اى حد بيشوفك مش بيقتنع ابداً انك ماما
لانك بالكتير تبقى اختى
بس انا ببقى مبسوطه بـ ده
فرق السن اللى بينا اللى مش كبير
بيحسسنى انك فهمانى ومستوعبه مشاكلى فى كل مرحله من حياتى
كل ما بكتشف صفه جديده فيا
بلاقيها بالظبط فيكى وبتأكد يوم عن يوم أنى شبهك اوى فى كل صفاتك
بقف قدامك عاجزه عن اى كلام لما بحس انك عايزه تجبيلى حته من السماء
عشان تحققيلى كل اللى بتمناه وابقى احسن حد فى الدنيا
برغم قوتك اللى بحبها الا انك قدامى انا واختى بتبقى اضعف حد فى الدنيا
وخصوصا لانك عايزه تسعدينا
من صغرنا وانتى شايله همنا وبتحاولى تكونى لينا الأم والأب
وده زاد بعد وفاه بابا اكتر كمان
لما حجزت بالصدفه فرحى يوم عيد ميلادك
حسيت ان ربنا خلى ده يحصل عشان تكون دى هديتى ليكى
انى اريحك من همى شويه
مش اوى يعنى لانى كام يوم واجيلك انا وهو ما انا مش هسيبك لوحدك :)
كل ما بتخيل فى يوم من الايام حياتى تبقى من غيرك
بحس انى هضيع اوى وابقى ضعيفه اوى وبنكسر اوى اوى

أما ثالثهن .. خالتى الكبيرة
بالرغم من بعد المسافات الدايم بينا
وبالرغم من ان المده اللى بشوفك فيها كل سنه مش بتتعدى شهرين تلاته
ألا ان روحك دايما لمسانى وبتحسى بيا من غير حتى ما اتكلم
بسببك عرفت يعنى ايه حد يبقى بعيد اوى عنك
لكن قلبه قريب اوى منك
معاكى عرفت يعنى ايه الحب والاهتمام مش بالقرب الجسدى
لكن بقرب الارواح لبعضها
بحس بـ دة اكتر
لما ابقى فى وسط مشكله و مش عارفه احلها
وانتى بمكالمه منك بتحلى حاجات كتير
بحس بـ ده لما ابقى مضايقه وحابسه دموعى وبعمل نفسى قوية
واول ما انتى تكلمينى وتقوليلى مال صوتك
ماعرفش امسك دموعى اكتر من كده
دايماً بحس ان فى حاجه قويه اوى جوايا بتربطنى بيكى
وعارفه ان نفس الحاجه دى جواكى
نفسى اوى ابقى فى قوتك وقدرتك الجباره على التسامح والعطاء
ولانى مستخسره بصراحه ان وجودك فى حياتى يبقى تحت مسمى انك خالتى وبس
فـ انا بعتبرك دايما امى التالته




عارفه ان البوست دى مدى اوى على جو عيد الأم وده مش وقته خالص
بس كان لازم اقولكم الكلام ده دلوقتى
عشان عارفه انى بعدى حاجات كتير فى حياتى بسببكم
و لانى خلاص المفروض هابطل ابقى البنوته  بتاعتكم
وهابقى كبيرة واعتمد على نفسى بعيد عنكم
ده المفروض يعنى  :D
 ولان كمان من حقكم عليا انى أشكركم اوى على كل حاجه عملتوها عشانى ♥



readmore »»

16 September 2012

كلام والسلام ... كلاكيت 21 مره

.
36 التعليقات




لما بنغلط وماحدش بيعرف غلطتنا دى غيرنا
وبتتغير بعض تصرفات اللى حوالينا معانا للاسواء
بنفتكر ان ده نتيجه انهم عرفوا غلطتنا
لاننا بنكون خايفين حد يعرف غلطنا ده
الغلط بيخلينا اضعف وبيفقدنا ثقتنا فى نفسنا
ادام كنت اد انك ترتكب الغلط ده
خليك كمان اد انك تتحمل نتيجته

*****

كل ما بفكر ان فى الوقت ده بالذات
كنت محتجالك تكونى معايا وجنبى فيه
برجع افتكر ان حتى وجودك دلوقتى ماكنش هيفرق كتير
لانك ببساطه مش هتكونى فضيالى اصلاً  !

  ولان ببساطه اكتر انا كده مرتاحه

 *****
 
سنين البعد بينا وبين ناس كانوا من أقرب الناس لينا 
بتتعد بـضِعف سنين القُرب .. واكتر
كل ما كانوا الاشخاص أقرب لينا 
كل ما بيكون الفراق أقسى وأقوى
عشان كده لما بنحسب سنين الفراق بينا وبينهم مش بنحسبها بالأيام 
لكن بنحسبها بكل لحظه اتوجعنا فيها منهم !
وعلى اد وجعنا ده على اد ما بنرفض ان يبقى فى حاجه تجمعنا بيهم تانى


*****
 
بالرغم من انى اتعودت دايما على وجودك
وفكره انى اكون من غيرك دى اصلاً مش سهله
لانك اساسا جزء مهم عندى
بس لما لاقيتك حتتين كده فى ايدى
اول حاجه قولتها
نضاااااااااااااااارتى :((((((
حسيت انا اد ايه ماقدرش استغنى عنك
نضارتى العزيزه ..شكراً
وربنا يخليلنا اللينسيز :D


*****
 
بنحاول نكون مثاليين جداً لما المواقف بتتعلق بالماديات
بس اول ما الماديات دى بتقف قدام حاجه انت بتتمناها
وقتها بتتنازل تمامًا عن فكره المثاليه دى !!






readmore »»
 

FaceBook Comments

wibiya widget