15 January 2012

تسييس الامتحانات !!

.





مين الفظيع اللى جاتله الفكره الجهنميه دى
مين اللى دخل الامتحانات فى السياسه او الاحداث اللى بتحصل
ماحدش اكيد يقدر ينكر ان الثوره وتوابعها
اُثرت ودخلت فى كل واقل حاجه بتحصل فى البلد
بس يعنى ايه طالب تطلب منه انه يكتب برقيه شكر للمجلس العسكرى؟!؟
لا والسؤال يبقى اجبارى
يعنى لا مفر !
وايه اللى دخل التعليم فى المجلس العسكرى
حسسونى بالظبط زى من سنه فاتت كده
كأنهم بيطلبوا من الطلبه يكتبوا كلمه شكر للرئيس (المخلوع) محمد حسنى مبارك
على جهوده المبذوله فى تطفيشنا قصدى فى قرفنا
يووووه قصدى فى اى نيله وخلاص
هو هو الاسلوب بالظبط مفيش اى فرق بين الاتنين
افرض فى طالب سيس و مش متابع اصلا المجلس العسكرى ده بتاع ايه
هيكتب شكر على اايه بقى؟
والا افرض انه كان طالب ناصح وفاهم وعارف اللى بيحصل 
وراح رازع فى وشك فى الورقه
يسقط يسقط حكم العسكر
هيبقى موقفكم ايه دلوقتى؟



لا بقى والا السؤال الخطير كمان
بتاع اكتب برقيه تهنئه لحزب الحريه والعداله بما انه الفائز الاول فى الانتخابات !!
ماتحبش الطالب كمان يبعت لرئيس الحزب بوكيه ورد عشان التهنئه تكمل؟!!؟
افرض بردو ان الطالب ده جاهل ومالوش فى السياسه والا الانتخابات خالص
ومايعرفش مين حزب الحريه والعداله دول اصلا
هيكتبلك ايه؟؟

الاهم من كل الهبل ده
هى الامتحانات دى بتتعمل ليه اصلا؟
عشان يحددوا مستوى الطالب 
وقدرته على استيعاب المواد الدراسيه المنصوص عليها فى الكتب المدرسيه 
المقرره من وزاره التربيه والتعليم
هو فى درس عن المجلس العسكرى وانجازاته نزل فى الكتب وانا ماعرفش؟
والا فى درس نزل عن حزب الحريه والعداله ونسبه نجاحه فى الانتخابات وانا ماعنديش علم؟
زى ما انت عايز من الطالب انه يكون حافظ الكتاب المدرسى صم
ماتجيش تجبله انت بقى حاجه من المجتمع اللى حواليه وتسأله فيها 
بحجه انك عايز توسع مداركه
لانك لو عايز توسع مداركه وتفهمه مجتمعه واللى بيحصل فيه اكتر
كنت بدأت من الاساس وعملت ده فى الكتب من الاول
لما الثوره تكتمل وينزل موضوع عنها فى كتب التاريخ
وقتها يبقى من حقكم تسألوا فيها زى ما تحبوا

اللى يشل بقى
ان مساعد وزير التربيه والتعليم
يقولك المُدرسه اللى حطت السؤال لم توفق 
ومش من المفروض انها تدخل السياسه فى الامتحانات
هو حضرتك ساعتها كنت نايم والا بتشتى فى اسوان مثلا؟؟

بيتهيألى كان فى سؤال مهم لازم يتحط
اختار مما يأتى
ايه اللى غيرته الثوره فى التعليم؟؟
1- مفيش
2- ولا حاجه
3- ماتغيرش
4- جميع ما سبق

12 comments

سواح في ملك اللــــــــــــــــــه- said...

تعرفي انا شايفها ظاهرة ايجابية

رغم اني مش موافق علي موضوع

الامتحانات


الحكومات السابقة من ايام 52 يعني من خمسين سنة

كان محظور علي الطلبة في الجامعات

والمدارس الحديث في السياسة

وده كان غلط

Casper said...

ما حدث في هذه الامتحانات تهريج بكل المقاييس
وأحسبه من قبيل التطبيل للتيار السائد

reemaas said...

ههههههههههه عاوزة تعرفى المجنون؟
هو نفسه اللى كان بيقولنا اكتبوا برقيه تهنءا فيها مبارك على سلامته

ياستى هم هماهم اللى بيحطوا الامتحانات

وحزب الحرية هو شكل مصغر للوطنى

Sara said...

كنت توسع مدارك الطالب بإنك ما تقرفوش بالمنهج السخيف التقيل دا أصلاً و تسيبه يتفرج ع التلفزيون و يتابع
و بعدين إيه اللي دخل السياسة في التعليم بجد !؟؟؟

حاجة تشل !

ربنا يستر ع الثانوية العامة السنة دي بقه

Bent Men ElZman Da !! said...

سواح في ملك اللــــــــــــــــــه-

ظاهره ايجابيه لو فعلا عاملنها بطريقه صح
بس دول بيتعاملوا فيها بأسلوب الاجبار
افرض فى واحد مش عايز يشكر المجلس العسكرى وشايف فيه عيوب عايز يقولها
يجبروه يقول غير اللى جواه ليه !!
انما فكره الكلام فى السياسيه داخل التعليم مش مرفوضه
الطالب المفروض يكون واعى لكل حاجه بتحصل حواليه مش بس حفظ الكتب وخلاص
انما التعليم عندنا مش بينمى ده فيه من الاساس

منورنى يا خالد دايماً بأرائك

Bent Men ElZman Da !! said...

Casper

بالظبط
ضحك على الدقون زى ما بيقولوا
عشان مايخسروش حاجه فى الاخر لا من ناحيه المجلس العسكرى ولا من ناحيه الحريه والعداله اللى الكل متوقع يكون الحزب الحاكم فيما بعد

شكرا ليك على رأيك ووجودك

Bent Men ElZman Da !! said...

reemaas

اه والله تحسى ان كل حاجه زى ما هى
مفيش اى اختلاف
شالوا حسنى مبارك
حطوا المجلس العسكرى
شالوا الحزب الوطنى
حطوا الحريه والعداله
واحنا تايهين فى النص !!

~ISLAM~ said...

هههههههههههههههههههه

وربنا يستاهلوا الحرق عالم فقيقة اوى

فعلا شر البلية ما يضحك

الموضوع على اد مهو مستفز على اد ما بيثبت فشلهم فى احترام المصرى اللى ماحترموش عينيه وضيعوها ومحترموش دماغه وكسروها وكمان مش محترمين عقله وبيأرطسوه

Bent Men ElZman Da !! said...

~ISLAM~

ما احنا اللى فى النص اللى مع الاسف لسه بيحاولوا يستهبلونا زى زمان

نورتنى يا اسلام :)

Bent Men ElZman Da !! said...

Sara

هو اصلا لو عايز الطالب يفهم
كان حاول يطور التعليم اللى بقاله سنين فاشل زى ما هو ومش عايزين يغيروا فيه حاجه
لا مناهج دراسيه كويسه
ولا مدرسين اصلا مهتمين يوصلوا المعلومه للطالب من خلال المدرسه تحديداً

نورتينى يا ساره :))

ابراهيم رزق said...

انا معنديش مانع تسيس الامتحانات
لكنى ضد توجيها
مثل اكتب رايك فى المجلس العسكرى و انتقد اداءه و اوجه القصور به
او اكتب موضوع تعبير عن التجاوزات التى حدثت من الاحزاب

هذه هى الاسئلة التى اتمنى تواجدها

تحياتى

Bent Men ElZman Da !! said...

ابراهيم رزق

ماهو تسييس الامتحانات مش عيب ولا غلط
بس طريقه الاسئله نفسها هى اللى مستفزه اكتر
احنا فى انتظار ان فى المستقبل تكون الحريه فى الاجابه موجوده عن الاجبار اللى موجود دلوقتى

شرفنى وجودك استاذ ابراهيم

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment