25 February 2012

كلام والسلام ... كلاكيت 13 مره

.
24 التعليقات




فى مستشفيات بيبقى ليها ريحه بنج
بتحسسنى بالكئابه اوى
 

**********

فكره الفراق بسبب الموت بتوجع اووى
غير لو فراقنا حد لسفر او لاى سبب تانى
لما حد بيموت وبنبكى
مش بنبكى عليه
بنبكى علينا احنا 
اننا ازاى هنتقبل فكره انه مش هيكون موجود معانا بعد كده
بنبكى عشان ربنا يصبرنا 
اننا نقدر نعيش من غير الاشخاص القريبين مننا اللى بيموتوا
اكتر لحظات الفراق وجع بالنسبه ليا
لما اشوف الصندوق اللى بيحضن اقرب الاشخاص ليا
بيبقى احساس بشع جوايا
فكره ان حد كان لسه معايا وحاسه بوجوده وانفاسه
وفجاه يبقى فى صندوق دى مش سهله
مؤمنه اكيد بقضاء ربنا
بس احساس ان ربنا مبدل من حال الى حال فى اقل من ثانيه
ده شئ شعوره جوايا مش بيكون بسيط ابداً


**********

لما بتفتكر مواقف او اشخاص المفروض انهم يضايقوك
بس انت مش بتتضايق بتحس ان كل حاجه عادى
ومش بتحس بنفس التأثير بالخنقه اللى كنت بتحسه قبل كده
ده مش بيكون عشان الواحد نسى الشخصيات او المواقف دى
بس لانه بيكون جواه تصالح مع نفسه ومع كل حاجه حواليه
قادره تخليه يتخطى اى حاجه ممكن تضايقه

**********

يارب .. اجعلنى متسامحه
يارب...لو جوايا حته منوره ورى لعينى النور ده

**********

" بحب كراكيبي.. وبحنّ لها :)"
لــ ساره درويش

انا ده اوووووى
كراكيبى عندى مش مجرد كراكيب
دى فيها كل ذكرياتى واحلى ايامى

وحته منى


**********

السبب الوحيد اللى يخلينى بكتب اسمى ثلاثى على الفيس بوك
انى اشوف نهايه اسمى دايماً متزينه بأسمك :))

readmore »»

22 February 2012

عن "الكتاب التانى" اتحدث

.
17 التعليقات



من فتره قريبه قريت كتاب " الكتاب التانى " لأحمد العسيلى
انا اصلا مش من معجبين احمد العسيلى اوى يعنى
بس كان فى نيتى اقراه وكمان رنا شجعتنى على كده
لما اقترحت علينا نبدأ فيه مع بعض

الكتاب مواضيعه كتير اووى
وانا مش عامله البوست ده عشان اعمل ريفيو للكتاب ولا حاجه
انا عامله البوست ده عشان فى حاجات قريتها لفتت نظرى
واستوعبت انى اصلا بفكر فيها من زمان
بس ماكنتش شايفاها بالطريقه دى
او مش عارفه اوصلها لنفسى بالطريقه دى

(البوست طويل شويه فـ استحملونى بقى :) )






عن ان تكون بتحاول

فكره المحاوله فى حد ذاتها دى كفايه اصلا
انك تفكر تعمل حاجه وتحاول مره واتنين وتلاته ده كفايه
بس للاسف معظمنا مش كده انا اصلاً مش كده
لما بنحاول فى حاجه مره واتنين وتلاته بنيأس بعدها ادام الحاجه دى مش اتعملت
حتى  لو مش اتعملت بس كفايه اننا حاولنا وطورنا من نفسنا عشان نوصلها
يعنى انا عصبيه وبحاول ابطل عصبيه
يمكن مش ابطلها بشكل كامل لانها طبع فيا
بس على الاقل من محاولاتى الكتير هاقدر اهدى شويه
ده فى حد ذاته تطور كويس
كل واحد ليه قدره عقليه وجسديه
فى حدود قُدرتك دى انت بتنفذ قَدرك والحاجات اللى مكتوبلك انك تعملها
بس انت مش بتكتفى بده
وده عيب بيوصلنا فى اوقات كتير لليأس
طول ما انت بتحاول اكيد هتوصل
مش شرط هتوصل للى انت عايزه بالظبط
بس اكيد هتوصل لحاجه تخليك احسن بأى شكل من الاشكال

"امنياتى للمستقبل كانت بسيطه عايز ابقى كويس بس
لكن دلوقتى بقيت عايز حاجه مختلفه شويه (او يمكن هى هى نفس الحاجه) ..عايز اكون على طول بـحـاول "


******

عن ان كل اناء ينضح بما فيه

لو خدنا الجمله دى ونطبقها على الناس اللى قدامنا وبنتعامل معاهم
هنلاقى ان اللى بيتعاملوا معانا بيتعاملوا على اساس اللى جواهم
يعنى تلاقى اب بيعامل اولاده بطريقه معينه
هو بيعاملهم كده عشان هو اصلا اتربى بنفس الطريقه
وادام شايفها من وجهه نظره صح
يبقى هيعامل اولاده بيها ويربيهم على نفس الاساس
كل شخص بتتعامل معاه هو بيبان عليه كل حاجه جواه
لو فكرت بقى تطبق نفس الجمله دى على نفسك
هتلاقيها عبقريه انت فعلا بتنضح بكل ما فيك
لو بتحب حد هيبان عليك لو بتكره حد بردو هيبان عليك
مهما حاولت تخبى
لو خبيت فتره مصير اللى جواك يبان مع اول موقف
وقبل ما تراقب الناس راقب نفسك وانت تعرف انت بتنضح بأيه

" حكمه اليوم:كل واحد فينا دايماً بينضح بحاجه من اللى جواه ،انا رأيى :سيبك خالص من الناس بينضحوا بايه، لو راقبت اللى بينضح منك انت ممكن تعرف وبسهوله انت فعلا عامل ازاى "

 
******


عن ان انا لوحدى مش عايز ابقى مع حد

هو اتكلم عن الفكره دى من ناحيه انى ليا اتجاهات معينه
مش شرط تبقى بشكل كامل تحت مسمى واحد
يعنى مش شرط اكون اشتراكى بصوره كامله ولا رأسمالى بصوره كامله
ممكن جدا اكون مزيج من ده على ده
اقتنع بشويه افكار من هنا وشويه افكار من هنا
والافكار دى بتكون وجهه نظرى اللى انا متعايشه معاها ومقتنعه بيها

الفكره ده حستها اوى فى الانتخابات الاخيره
او قبلها بفتره مش قليله يعنى
كان السؤال المتداول انتى هترشحى حزب ايه؟
الاخوان والا الكتله
السلفيين والا الوفد
لالا انتى ترشحى الاخوان مفيش احسن منهم
وانتوا ليه شايفين انى لازم اكون تابعه لحد اجبارى
ليه مش تسبونى اختار لوحدى الشخصيات اللى احس انى مقتنعه بيهم
بعيداً بقى عن التفكير هما تحت اى مسمى او اى حزب
وكأنى لو مش اخترت الحزب اللى كفته هترجح يبقى هتقيموا عليا الحد
او انى مش فاهمه او انى سلبيه او او او
ما انا ممكن اكون مقتنعه بشويه من افكار الاخوان على شويه من افكار الكتله مع شويه من الاصلاح والتنميه مثلا
دى مش اجبار والا مش كان هيبقى فى اختيارات ولا احزاب كتير زى ما موجود
ما تسبونى ابقى لوحدى
انا مش عايزه اكون مع اى حد
ليا افكارى واتجاهاتى
اللى من حقى امارسها بحريه


" للحقيقه اوجه كثيره .. كلمه لو دخلت فى قلب البنى آدم ممكن يوصل لحاله من التسامح مع الاخر والثقه فى نيته وفى رغبته فى النجاح ، 
ويفهم ان كل الفرق اللى بينهم وبين بعض ان تقنياتهم مختلفه ووجه نظرهم مختلفه ومصدقين حاجه مختلفه ، فبالتالى بينتهجوا نهج مختلف وبيمشوا فى طريق مختلف ..رغم انهم ممكن جدا يكونوا عايزين يوصلوا لنفس المكان"
 
******

 

عن كلام الكلام


"اصعب حاجه فى الدنيا انك تقول الكلمه المناسبه"
دى حقيقه لا مجال للشك فيها
فى مواقف بتعدى على الواحد فعلا الكلام بيخونه وبيهرب منه
ومش بيلاقى الكلمه المناسبه حتى لو كانت ابسط الكلمات
عشان انت بكلمه واحده ممكن توصل للسماء
وبنفس الكلمه فى موقف تانى توصل لسابع ارض
اد ايه ممكن الحرف يفرق فى مواقف كتير
ومش بس لازم نختار الكلام المناسب
لازم كمان نختار الوقت المناسب للكلام اللى اختارناه ده
الوقت بيفرق اوى عشان نقدر نوصل اللى احنا عايزينه

اوقات كمان الواحد بيبقى عايز يكتب حاجه او يقول حاجه
ومش عارف يلاقى الكلام المناسب
فا مش بيقدر يوصل الفكره اللى فى دماغه صح للناس
زى مثلا لما بنكون حاسيين بحاجه او عايشيين موقف
ونلاقى حد غيرنا كتب بأسلوبه عن نفس الموقف بالظبط
وبطريقه نفس اللى احنا حاسيين بيها وعايزين نقولها
بس الفرق
ان الشخص ده لاقى الكلام المناسب اللى احنا مش لاقينه

"دايماً كنت بشوف ان اصعب حاجه فى الدنيا انك تقول الكلمه المناسبه
الكلمه المناسبه ممكن تنقذك من مأزق او تكسبك فلوس او زظيفه او تخلى حد يحبك او يكرهم
ممكن كلمه تقولها تطلعم القمر او تنزلك تحت سابع ارض
فقط الكلمه المناسبه
اقول ازاى ؟ مش اقول بس ..لأ
اترجم افكار .. اترجم روحى لكلام بحروف ازاى ؟؟ "

"كل ما اعتقد انه صواب هو صواب يحتمل الخطأ
وكل ما اعتقد انه خطأ هو خطأ يحتمل الصواب"
 
******

 

عن الحمار الذى يحمل اسفاراً

وفي الجزء ده بيتكلم عن التدين حسب الحاجه !
يعنى فى ناس بتحمل صفات شكليه وبس عن الدين
بس للاسف مش بيفكروا الدين فعلا بيطلب منهم ايه
فـ بيكونوا زى اللى شايل كتب كتير هو اصلا مايعرفش فيها ايه

 انت محتاج تبقى متدين عشان عايز تدخل الجنه
مش عشان عايز ترضى ربنا !
ودى فيها فرق
لانك انت بتدور على الاساس 
وهو رضى ربنا اللى منه هتدخل الجنه مش العكس

اكتر حاجه بتضايق
ان الواحد يفكر يقرب من ربنا
او يبدأ يصلى بعد ما كان بيهمل الصلاه
عشان يطلب حاجه من ربنا او يدعى بحاجه معينه
ربنا مش وقت الحاجه وبس
ربنا مستنينا فى كل الاوقات
سواء لو هندعى بحاجه نطلبها 

او هندعى بس بانه يتقبلنا من عباده الصالحين
بس اختلاف النيه بيفرق فى النتيجه اكيد
ودى حاجه ربنا وحده اللى يعلمها

حاجه كمان
فى ناس كتيير واخده الدين للاسف شكل
او بتفاصيله الصغيره وبس
الدين مش بس لحيه وجلباب
او نقاب واسدال
ده جزء من الكل الكبير اوى اللى كلنا لازم نعرفه ونعيشه
فى تفاصيل صغيره لو استخدمتها بطريقه غلط
هتبقى كده بتوصل مفاهيم دينك لغيرك غلط
ووقتها العيب مش هيبقى على الدين
العيب هيبقى فيك انت

"الدين مش هدف ، الدين وسيله للوصول الى الله "

******


عن الحب

انا عن نفسى مش مقتنعه بفكره مواصفات فارس الاحلام والحكايه دى
ماينفعش نختار شريك حياتنا بالمسطره كده
المواصفات اللى بنقولها دايماً بترسم قدام عنينا شخصيه كامله فى كل التفاصيل
بس صعب نقابل حد كامل بالطريقه دى
هنقابل شخص مناسب اه
بس فى النهايه اكيد فيه عيوب لانه انسان
وهنتحمل العيوب دى لان فى مميزات تانيه ممكن تغطى عليها

ومش معنى ان مش هينفع نحط رسم خيالى للشخص اللى بنحلم بيه
يبقى كده هنقدم تنازلات او مش هنلاقى المواصفات اللى عايزنها
بس لو قابلنا شخص فيه 7 مواصفات 
من ال 12 اللى احنا عايزينهم مثلا
ده شئ كويس اوى

فى مقابل ده بقى
انا اصلا بقدم ايه عشان اوصل لفارس احلامى ده
مش انا لازم اكون اد امنياتى واللى بطلبه اكون انا كمان بعمله
هطلب من ربنا انسان كويس
طب ما انا لازم اكون كويسه عشان ربنا يجازينى بيه
اللى بطلبه
لازم يكون فيا

فارس الاحلام
مش بس شريك هيكون معايا انا فى حياتى
ده هيبقى معايا ومع المحيط اللى حواليا بكل اشخاصه وتفاصيله
والاهم انه هيبقى اب لاولادى
فا من حقهم يكونوا فخورين بيه
زى ما انا لازم اكون جديره انهم يكونوا فخورين بيا

"الواحد وهو بيقيّم الشخص اللي علي وشك الارتباط بيه من المفترض كدا انه يحط في باله ان دا مش شريك بس
دي هتبقي ام عيالي...ودا هيبقي ابو عيالي
حيتعلموا منه ايه ؟..هياخدو منها ايه؟..هيفهمو منه ازاي؟"

******


عن الفرحه اللى مابتخلصش

يعنى حاجه تحصلكم وتفضل راسمه على وشكم ابتسامه
بدون اى سبب
انا حاسه ان هى دى الفرحه اللى مابتخلصش
صداقتى بناس جديده احسهم انهم بقوا منى
هى دى بالنسبه ليا الفرحه اللى مابتخلصش
لما اعيش يوم من عمرى حلو وابقى عارفه انى هاعيش طول حياتى
افتكر اليوم ده وافتكر اد ايه كنت مبسوطه فيه
دي بردو اسمها الفرحه اللى مابتخلصش
ممكن حاجات صغيره اووى ماتفرقش مع غيرنا
بس تخلق جوانا احنا فرحه بتفضل مأثره فينا كتير
خليك دايماً فاكر ان مهما كان فى حاجات وحشه فى حياتك
فى دايماً حاجات جميله بتعيشك الفرحه اللى مابتخلصش 

 ******



عن شريط الحياه

الحياه فيلم سينمائى احنا عايشينه بكل تفاصيله
وكل واحد مننا ليه دور فيه
الفكره دى اصلا عايشه فيا اوى
بحسها كل ما بقف قدام المرايه وابص فى وشى !
بحس انى بطلع من جوايا وبتفرج عليا وعلى شريط حياتى
ومش بشوف غير انى دور فى الفيلم الكبير اللى ابطاله كتير اوى ده

"فلنعش قصص افلامنا مشهداً تلو الاخر ... عسى ان مايفتناش منها حاجه مهمه ابداً "

readmore »»

18 February 2012

Special Post ♥

.
32 التعليقات



بوست خاص ليكم انتم
رونا & ميهو
اولاً عشان واحشكم منى بوستات انا عارفه :$
وثانياً عشان خلتونى اقضى يوم جميل اوى زيكم كنت فعلا محتاجاه

مبسوطه اوى انى كنت معاكم
مبسوطه اوى انى اتعرفت عليكم
مبسوطه اننا شبه بعض فى حاجات كتير
اصل انا اول مره اقابل اصحاب ليا ويوافقوا يدخلوا معايا مكتبه
ده لوحده انجاز صراحه :D
وحتى اختلافاتنا بتخلينا نقوى صداقتنا اكتر مع حساب الاختلافات دى

مبسوطه اووى بقى اننا اتشاركنا فى شيكولاتايه
عشان يبقى بينا عيش وشيكولاته :)

رونا 

حاسه اننا شبه بعض فى كذا حاجه
تفكيرك كبير وانا حبيت ده فيكى من اول كلمه اصلا قريتهالك
بحب اتناقش معاكى اوى عشان بحس انك بتقولى كلام انا عايزه اقوله
بحبك وبحب دماغك

ميهو اصلا :P
انتى اصلا يعنى كتكوته خالص اصلا
بحب دلعك ورقتك رغم طولك اللى محسسنا كلنا اننا ازعه جنبك
معاكى دايماً بضيف كلمات جديده لقاموس اللغه
فظيعه منك "غلبان فى دماغه "دى :P

بحبك وبحب كلامك اوى


بحبكم كتير
ومبسوطه انى عرفتكم وشوفتكم
:)






واخيراً


ممتنه انا لـ قدر جمعنى بكن




readmore »»

02 February 2012

حــداد

.
26 التعليقات




هى وصلت ان ناس تموت عشان ماتش كوره !
وصلت اننا كل يوم يبقى فى ضحايا عشان اسباب تافهه واهمال وعدم تحمل مسئوليه
ليه نغمه الموت اصبحت هى النغمه الوحيده السائده فى يومنا !!

احنا محتاجين وقت كتير نعمل فيه حداد
على حاجات بتموت جوانا وحوالينا يوم عن يوم
مش بس البنى ادمين !!

readmore »»

01 February 2012

كلام والسلام ... كلاكيت 12 مره

.
38 التعليقات



حياتنا عباره عن قطر
ناس بتطلع فى محطات
وناس بتنزل فى محطات
ماينفعش تلغى محطه
ماينفعش نزعل على حد نزل
وماينفعش نضايق ان حد ركب
لازم نتقبل حياتنا بكل محطاتها
وكل زوارها

********************

لما بيبقى فى حاجات جوانا مش عارفين ايه هى
دى حاجه مش بتريحنا ابداً
بتفضل شغلانه الحاجات اللى احنا مش عارفنها دى
ولما بنعرفها
بردو مش بنحلها
فا بتستخبى جوانا شويه عشان توهمنا اننا بقينا احسن
بس مصيرها بردو مع الوقت تظهر على وش قلوبنا وروحنا من تانى
ووقتها بيبقى تأثيرها اسوء بكتير للاسف

********************

مش شرط باختفاء اشخاص من حياتنا
وعدم كلامنا عليهم فى اى مناسبه بيتم ذكر اسمهم فيها
ده معناه انهم مش موجودين فى بالنا
او اننا فعلا مسحنا وجودهم جوانا
بس التجاهل الظاهرى بيبقى اسلم الحلول فى الوقت ده 


********************

فى موقف حصل وانا فى تالته ثانوى
عمرى ما بنساه ابداً
كنا فى درس فلسفه اللى بالنسبه ليا احلى ماده درستها فى عمرى
وكان المُدرس بيفهمنا حاجه 
وقالنا لو كتبتلكم سؤال انا واثق انكم مش هتعرفوا تحلوه
وانا قفلت معايا بقى لا انا عايزاه
فعلا كتبه لينا
واحنا كلنا كنا الحمدالله كويسين وشاطرين اوى
الا بنت واحده كان مستواها اقل مننا كلنا
والغريبه ان كلنا حلناه غلط
وهى الوحيده اللى حلته صح وهى ماكنتش متخيله انها حلته صح
بس هو قالنا
انتوا جربتوا تستعملوا ذكائكم رغم انها مش محتاجه ذكاء
الاجابه كانت بسيطه جداً ابسط حتى من ان عينيكم تشوفها
عشان انتوا بتفكروا فى الابعد منها 
ماقدرتوش تشوفوها رغم انها كانت واضحه قداكم
دايماً المثال ده قدام عينى وعمرى ما بنسى الموقف ده
اوقات كتير بتبقى الحاجه واضحه وضوح الشمس قدام عنينا
بس عشان احنا بنبص على حاجه ابعد منها مش بنقدر نشوف اللى قدامنا
فى حياتنا مواقف كتير اوى كده على جميع المستويات
عشان كده مش شرط ان اهم الحاجات اعظمها
بل وارد جدا تكون ابسطها

********************

 يااااارب .. حققلى اللى بتمناه





readmore »»
 

FaceBook Comments

wibiya widget