22 February 2012

عن "الكتاب التانى" اتحدث

.



من فتره قريبه قريت كتاب " الكتاب التانى " لأحمد العسيلى
انا اصلا مش من معجبين احمد العسيلى اوى يعنى
بس كان فى نيتى اقراه وكمان رنا شجعتنى على كده
لما اقترحت علينا نبدأ فيه مع بعض

الكتاب مواضيعه كتير اووى
وانا مش عامله البوست ده عشان اعمل ريفيو للكتاب ولا حاجه
انا عامله البوست ده عشان فى حاجات قريتها لفتت نظرى
واستوعبت انى اصلا بفكر فيها من زمان
بس ماكنتش شايفاها بالطريقه دى
او مش عارفه اوصلها لنفسى بالطريقه دى

(البوست طويل شويه فـ استحملونى بقى :) )






عن ان تكون بتحاول

فكره المحاوله فى حد ذاتها دى كفايه اصلا
انك تفكر تعمل حاجه وتحاول مره واتنين وتلاته ده كفايه
بس للاسف معظمنا مش كده انا اصلاً مش كده
لما بنحاول فى حاجه مره واتنين وتلاته بنيأس بعدها ادام الحاجه دى مش اتعملت
حتى  لو مش اتعملت بس كفايه اننا حاولنا وطورنا من نفسنا عشان نوصلها
يعنى انا عصبيه وبحاول ابطل عصبيه
يمكن مش ابطلها بشكل كامل لانها طبع فيا
بس على الاقل من محاولاتى الكتير هاقدر اهدى شويه
ده فى حد ذاته تطور كويس
كل واحد ليه قدره عقليه وجسديه
فى حدود قُدرتك دى انت بتنفذ قَدرك والحاجات اللى مكتوبلك انك تعملها
بس انت مش بتكتفى بده
وده عيب بيوصلنا فى اوقات كتير لليأس
طول ما انت بتحاول اكيد هتوصل
مش شرط هتوصل للى انت عايزه بالظبط
بس اكيد هتوصل لحاجه تخليك احسن بأى شكل من الاشكال

"امنياتى للمستقبل كانت بسيطه عايز ابقى كويس بس
لكن دلوقتى بقيت عايز حاجه مختلفه شويه (او يمكن هى هى نفس الحاجه) ..عايز اكون على طول بـحـاول "


******

عن ان كل اناء ينضح بما فيه

لو خدنا الجمله دى ونطبقها على الناس اللى قدامنا وبنتعامل معاهم
هنلاقى ان اللى بيتعاملوا معانا بيتعاملوا على اساس اللى جواهم
يعنى تلاقى اب بيعامل اولاده بطريقه معينه
هو بيعاملهم كده عشان هو اصلا اتربى بنفس الطريقه
وادام شايفها من وجهه نظره صح
يبقى هيعامل اولاده بيها ويربيهم على نفس الاساس
كل شخص بتتعامل معاه هو بيبان عليه كل حاجه جواه
لو فكرت بقى تطبق نفس الجمله دى على نفسك
هتلاقيها عبقريه انت فعلا بتنضح بكل ما فيك
لو بتحب حد هيبان عليك لو بتكره حد بردو هيبان عليك
مهما حاولت تخبى
لو خبيت فتره مصير اللى جواك يبان مع اول موقف
وقبل ما تراقب الناس راقب نفسك وانت تعرف انت بتنضح بأيه

" حكمه اليوم:كل واحد فينا دايماً بينضح بحاجه من اللى جواه ،انا رأيى :سيبك خالص من الناس بينضحوا بايه، لو راقبت اللى بينضح منك انت ممكن تعرف وبسهوله انت فعلا عامل ازاى "

 
******


عن ان انا لوحدى مش عايز ابقى مع حد

هو اتكلم عن الفكره دى من ناحيه انى ليا اتجاهات معينه
مش شرط تبقى بشكل كامل تحت مسمى واحد
يعنى مش شرط اكون اشتراكى بصوره كامله ولا رأسمالى بصوره كامله
ممكن جدا اكون مزيج من ده على ده
اقتنع بشويه افكار من هنا وشويه افكار من هنا
والافكار دى بتكون وجهه نظرى اللى انا متعايشه معاها ومقتنعه بيها

الفكره ده حستها اوى فى الانتخابات الاخيره
او قبلها بفتره مش قليله يعنى
كان السؤال المتداول انتى هترشحى حزب ايه؟
الاخوان والا الكتله
السلفيين والا الوفد
لالا انتى ترشحى الاخوان مفيش احسن منهم
وانتوا ليه شايفين انى لازم اكون تابعه لحد اجبارى
ليه مش تسبونى اختار لوحدى الشخصيات اللى احس انى مقتنعه بيهم
بعيداً بقى عن التفكير هما تحت اى مسمى او اى حزب
وكأنى لو مش اخترت الحزب اللى كفته هترجح يبقى هتقيموا عليا الحد
او انى مش فاهمه او انى سلبيه او او او
ما انا ممكن اكون مقتنعه بشويه من افكار الاخوان على شويه من افكار الكتله مع شويه من الاصلاح والتنميه مثلا
دى مش اجبار والا مش كان هيبقى فى اختيارات ولا احزاب كتير زى ما موجود
ما تسبونى ابقى لوحدى
انا مش عايزه اكون مع اى حد
ليا افكارى واتجاهاتى
اللى من حقى امارسها بحريه


" للحقيقه اوجه كثيره .. كلمه لو دخلت فى قلب البنى آدم ممكن يوصل لحاله من التسامح مع الاخر والثقه فى نيته وفى رغبته فى النجاح ، 
ويفهم ان كل الفرق اللى بينهم وبين بعض ان تقنياتهم مختلفه ووجه نظرهم مختلفه ومصدقين حاجه مختلفه ، فبالتالى بينتهجوا نهج مختلف وبيمشوا فى طريق مختلف ..رغم انهم ممكن جدا يكونوا عايزين يوصلوا لنفس المكان"
 
******

 

عن كلام الكلام


"اصعب حاجه فى الدنيا انك تقول الكلمه المناسبه"
دى حقيقه لا مجال للشك فيها
فى مواقف بتعدى على الواحد فعلا الكلام بيخونه وبيهرب منه
ومش بيلاقى الكلمه المناسبه حتى لو كانت ابسط الكلمات
عشان انت بكلمه واحده ممكن توصل للسماء
وبنفس الكلمه فى موقف تانى توصل لسابع ارض
اد ايه ممكن الحرف يفرق فى مواقف كتير
ومش بس لازم نختار الكلام المناسب
لازم كمان نختار الوقت المناسب للكلام اللى اختارناه ده
الوقت بيفرق اوى عشان نقدر نوصل اللى احنا عايزينه

اوقات كمان الواحد بيبقى عايز يكتب حاجه او يقول حاجه
ومش عارف يلاقى الكلام المناسب
فا مش بيقدر يوصل الفكره اللى فى دماغه صح للناس
زى مثلا لما بنكون حاسيين بحاجه او عايشيين موقف
ونلاقى حد غيرنا كتب بأسلوبه عن نفس الموقف بالظبط
وبطريقه نفس اللى احنا حاسيين بيها وعايزين نقولها
بس الفرق
ان الشخص ده لاقى الكلام المناسب اللى احنا مش لاقينه

"دايماً كنت بشوف ان اصعب حاجه فى الدنيا انك تقول الكلمه المناسبه
الكلمه المناسبه ممكن تنقذك من مأزق او تكسبك فلوس او زظيفه او تخلى حد يحبك او يكرهم
ممكن كلمه تقولها تطلعم القمر او تنزلك تحت سابع ارض
فقط الكلمه المناسبه
اقول ازاى ؟ مش اقول بس ..لأ
اترجم افكار .. اترجم روحى لكلام بحروف ازاى ؟؟ "

"كل ما اعتقد انه صواب هو صواب يحتمل الخطأ
وكل ما اعتقد انه خطأ هو خطأ يحتمل الصواب"
 
******

 

عن الحمار الذى يحمل اسفاراً

وفي الجزء ده بيتكلم عن التدين حسب الحاجه !
يعنى فى ناس بتحمل صفات شكليه وبس عن الدين
بس للاسف مش بيفكروا الدين فعلا بيطلب منهم ايه
فـ بيكونوا زى اللى شايل كتب كتير هو اصلا مايعرفش فيها ايه

 انت محتاج تبقى متدين عشان عايز تدخل الجنه
مش عشان عايز ترضى ربنا !
ودى فيها فرق
لانك انت بتدور على الاساس 
وهو رضى ربنا اللى منه هتدخل الجنه مش العكس

اكتر حاجه بتضايق
ان الواحد يفكر يقرب من ربنا
او يبدأ يصلى بعد ما كان بيهمل الصلاه
عشان يطلب حاجه من ربنا او يدعى بحاجه معينه
ربنا مش وقت الحاجه وبس
ربنا مستنينا فى كل الاوقات
سواء لو هندعى بحاجه نطلبها 

او هندعى بس بانه يتقبلنا من عباده الصالحين
بس اختلاف النيه بيفرق فى النتيجه اكيد
ودى حاجه ربنا وحده اللى يعلمها

حاجه كمان
فى ناس كتيير واخده الدين للاسف شكل
او بتفاصيله الصغيره وبس
الدين مش بس لحيه وجلباب
او نقاب واسدال
ده جزء من الكل الكبير اوى اللى كلنا لازم نعرفه ونعيشه
فى تفاصيل صغيره لو استخدمتها بطريقه غلط
هتبقى كده بتوصل مفاهيم دينك لغيرك غلط
ووقتها العيب مش هيبقى على الدين
العيب هيبقى فيك انت

"الدين مش هدف ، الدين وسيله للوصول الى الله "

******


عن الحب

انا عن نفسى مش مقتنعه بفكره مواصفات فارس الاحلام والحكايه دى
ماينفعش نختار شريك حياتنا بالمسطره كده
المواصفات اللى بنقولها دايماً بترسم قدام عنينا شخصيه كامله فى كل التفاصيل
بس صعب نقابل حد كامل بالطريقه دى
هنقابل شخص مناسب اه
بس فى النهايه اكيد فيه عيوب لانه انسان
وهنتحمل العيوب دى لان فى مميزات تانيه ممكن تغطى عليها

ومش معنى ان مش هينفع نحط رسم خيالى للشخص اللى بنحلم بيه
يبقى كده هنقدم تنازلات او مش هنلاقى المواصفات اللى عايزنها
بس لو قابلنا شخص فيه 7 مواصفات 
من ال 12 اللى احنا عايزينهم مثلا
ده شئ كويس اوى

فى مقابل ده بقى
انا اصلا بقدم ايه عشان اوصل لفارس احلامى ده
مش انا لازم اكون اد امنياتى واللى بطلبه اكون انا كمان بعمله
هطلب من ربنا انسان كويس
طب ما انا لازم اكون كويسه عشان ربنا يجازينى بيه
اللى بطلبه
لازم يكون فيا

فارس الاحلام
مش بس شريك هيكون معايا انا فى حياتى
ده هيبقى معايا ومع المحيط اللى حواليا بكل اشخاصه وتفاصيله
والاهم انه هيبقى اب لاولادى
فا من حقهم يكونوا فخورين بيه
زى ما انا لازم اكون جديره انهم يكونوا فخورين بيا

"الواحد وهو بيقيّم الشخص اللي علي وشك الارتباط بيه من المفترض كدا انه يحط في باله ان دا مش شريك بس
دي هتبقي ام عيالي...ودا هيبقي ابو عيالي
حيتعلموا منه ايه ؟..هياخدو منها ايه؟..هيفهمو منه ازاي؟"

******


عن الفرحه اللى مابتخلصش

يعنى حاجه تحصلكم وتفضل راسمه على وشكم ابتسامه
بدون اى سبب
انا حاسه ان هى دى الفرحه اللى مابتخلصش
صداقتى بناس جديده احسهم انهم بقوا منى
هى دى بالنسبه ليا الفرحه اللى مابتخلصش
لما اعيش يوم من عمرى حلو وابقى عارفه انى هاعيش طول حياتى
افتكر اليوم ده وافتكر اد ايه كنت مبسوطه فيه
دي بردو اسمها الفرحه اللى مابتخلصش
ممكن حاجات صغيره اووى ماتفرقش مع غيرنا
بس تخلق جوانا احنا فرحه بتفضل مأثره فينا كتير
خليك دايماً فاكر ان مهما كان فى حاجات وحشه فى حياتك
فى دايماً حاجات جميله بتعيشك الفرحه اللى مابتخلصش 

 ******



عن شريط الحياه

الحياه فيلم سينمائى احنا عايشينه بكل تفاصيله
وكل واحد مننا ليه دور فيه
الفكره دى اصلا عايشه فيا اوى
بحسها كل ما بقف قدام المرايه وابص فى وشى !
بحس انى بطلع من جوايا وبتفرج عليا وعلى شريط حياتى
ومش بشوف غير انى دور فى الفيلم الكبير اللى ابطاله كتير اوى ده

"فلنعش قصص افلامنا مشهداً تلو الاخر ... عسى ان مايفتناش منها حاجه مهمه ابداً "

17 comments

ابراهيم رزق said...

رغم انى مش من محبى العسيلى

الا انك قدمتى فكرة كبيرة عن الكتاب

تحياتى

Bent Men ElZman Da !! said...

ابراهيم رزق

والله انا بردو مش من محبى العسيلى خالص نهائى يعنى
بس هو قدم الافكار بطريقه فلسفيه حبيتها انا
انا لسه واخده بالى انى بكده حرقت الكتاب للى لسه مش قروه :D :D

شرفتنى بوجودك :))

سواح في ملك اللــــــــــــــــــه- said...

بالنسبة لحكاية حاول وحاول وحاول هتوصل

دي انا بشوفها صعبة شوية

لان من كتر المحاولات حتي لو تمكنا من الوصول

سنفقد نشوة الوصول من المرة الاولي

او الثانية

وقد نصل اذا تمكنا من الوصول بعد كثرة المحاولات

قد نصل بعد فوات الاوان

يعني ممكن اشبههالك

بواحد في تالتة اعدادي مثلا عنده 25 سنة

اما حكاية التدين والشكليات

انابشوف ان الشكل عامل مهم

رغم انه مش اساسي

مثلا مطلق اللحية او صاحبة النقاب

تخجل ان تفعل اي شئ مشين امام الناس

حتي لو بيتظاهروا بالتدين

فهو او هي ان لم يكونا علي الاقل متدينين

فهم لايشيعون المنكر بين الناس

مثلا

كالمفطر في رمضان

لو اكل في بيته فهو لم يضر احد غير نفسه

ولو اكل امام اولاده

في رمضان قد يقلدونه

ولو اكل امام الناس قد يكون من الناس ضعيف نفسا

يشجعه هذا الفعل علي الافطار

سواح في ملك اللــــــــــــــــــه- said...

صعب جدا انك تعيشي حياتك بكل تفاصيلها

فهذا اكبر من قدرة العقل علي الاحتمال

تحيتي يادينا

Bent Men ElZman Da !! said...

سواح في ملك اللــــــــــــــــــه-

انا معاك فى الامثله اللى قولتها جدا
بس ان مثلا واحد فى تالته اعدادى و عنده 25 سنه
ده شئ مش منطقى
انا كان قصدى على الظروف المنطقيه ان اللى انت فى ايدك انك تحاول فيها
عايز تكتب قصه مثلا ومش قادر
طول ما انت بتحاول هتقدر تكتب خواطر هتكتب شعر
هتبقى وصلت لحاجات بردو فى النهايه

بالنسبه للتدين الظاهرى
ما احنا اليومين دول بنلاقى كتير ناس مطلقوا اللحيه وبيتطلوا على غيرهم سواء بالكلام او الاتهامات
يعنى بقى فى نماذج كتير قدامنا

الحياه فعلا فيلم كبير اوووى
بنبذل جهد كبير بس حتى عشان نشوف الجزء اللى نقدر عليه
لان للاسف مفيش اعاده ولا ينفع تسأل حد هو هنا حصل ايه !!

ميرسى ليك اوى على تعليقك
وسعيده بوجودك :))

Miss LoZa said...

أنا كمان قريته اصلا كنت لسه بقول فالبوست

وعجبنى أوى الفصول بتاعت عن الحب وعن الأبوة

دينا أنا الكتاب ده بدأته امبارح ! أنا حاسة أنى جالى مرض والله ادخلى شوفى عندى شوفى الكتب الى خلصتها اصلا .. مكملتش فيهم أسبوعين اصلا وجبت كتب تانى من الجامعة .. أنا هأعلن أفلاسى خلاص ههههههههههههههه

تفتكرى ممكن أتعالج ؟! :$

Bent Men ElZman Da !! said...

Miss LoZa

هههههههههههههههههههههههههههه
لا تتعالجى ليه ده حاجه حلوه خالص
انا حاسه ان دلوقتى فيه نشاط غريب كده فى القرايه
دى حاجه تحفه اصلا انا كنت هاموت ويرجعلى نشاطى فى القرايه تانى
عايزين نعمل حمله تبادل ما بينا بقى ههههههههههههههه

مصطفى سيف الدين said...

بيت الافكار اوي
و طريقة عرضك ليها
واضح انه كتاب يستحق الاقتناء
تحياتي

reemaas said...

الكتاب شكله حلو

بس لفت نظرى اوى
عن ان انا لوحدى مش عايز ابقى مع حد

عارفة انا كمان عندى معظم الاحاسيس دى بس ده بالذات كنت لسه بفكر اكتب عنه لما حد قالى انه مش فاهمنى ومش فاهم انا مع الثوار ولا مع الحكومه ولا مع الجيش

حسيت انى بتحاصر انه عاوز يحدد افكارى واتجاهاتى انا مع كل دول وضد كل دول مختلفة ومتفقه فى حاجات وده مايعبنيش بالعكس ده معناه انى سمعتهم وفكرت فى كلامهم وكونت وجهة نظرى اللى عادى مش زيهم ولا ضدهم مش فاهمة اى المشكله فى ده

شمس النهار said...

قريت نص البوست ولما ارجع هقرا النص التاني طبعا

بس عايزة اقولك ان من اجمل الاشياء ان الانسان يقرا كتاب ويأثر فيه
هنا بيبقا للقرايا وللكتاب معني
هرجع تاني اقرا واعلق تاني

كريمة سندي said...

دا كتاب حكايته حكاية أول مرة أقرأ عنه المهم إنك حللتي الكتاب بطريقة أكثر من رائعة تحياتي الصادقة

Bent Men ElZman Da !! said...

مصطفى سيف الدين

فعلا كتاب ممتع فى افكاره كأنك بتتكلم مع واحد صاحبك بيفكر فى حاجات انت كمان بتفكر فيها
سعيده بوجودك يا مصطفى :))

Bent Men ElZman Da !! said...

reemaas

نفس الفكره دى بردو يا نور بتمر علينا كلنا وبنفس الطريقه اللى قولتيها
ايه المشكله ان الواحد يكون شايف الثوار صح فى حاجه وغلط فى حاجه
وارد ان اى موقف يكون ليه اخطائه
مفيش حاجه كامله
نورتينى بوجودك يا جميله :))

Bent Men ElZman Da !! said...

شمس النهار

سعيده بجد بوجودك حضرتك جداااا

دى اهم حاجه فى القرأه اصلا
ماينفعش نقرأ كتاب وكأنه ماعدش علينا بعد كده
وده من الكتب اللى فعلا أثرت فيا
شكرا لحضرتك على التعليقك
ومستنيه تعليقك :))

Bent Men ElZman Da !! said...

كريمة سندي

شكرا لحضرتك على كلامك
اسعدنى وجودك جدا :))

rona ali said...

الله الله بيجد

المحاوله الفكرة حاوله ولو انها صعبه

انتى علقتى علي كل اللى عجبنى في الكتاب

انا كمان مبحبش العسيلي بس عجبنى الكتاب وافكارة

معنديش تعليق لان كل اللى قولتى

خاصه الحاجات البسيطه الى بتسيب جوانا اثر

حاجه تهوس بيجد كلامك كان حلو مع كل مقطع

تسلم ايدك

Bent Men ElZman Da !! said...

rona ali

انا عايزه اقولك بس حاجه واحده
ان انتى سبب فى انى اقرأ الكتاب ده وانا بشكرك اوى انى شجعتينى اقراه <3
وانتى وريمو سبب فى البوست ده :))

:a: :b: :c: :d: :e: :f: :g: :h: :i: :j: :k: :l: :m: :n:

Post a Comment

 

FaceBook Comments

wibiya widget